انت ليه مش بتمسك ايدى

اولا احب اشكر محاسن كتر خيرها علشان هيه اللى دايما بتنبهنى انى اتأخرت فى الكتابه بس غصب يارب و بقولك اهه يا ستى علشان خاطرك البوست ده

و ثانيه اللى ما ردتش عليهم ان شاء الله هارد عليهم بس افضى و الله من العيال و البيت و سنيه

ـــــــــــــــــــــــــــــــــــــــ

نخش فى الموضوع

مره قريت موضوع كوميدى عن واحده كانت بتحب واحد و بتقوله انت ليه مش بتمسك ايدى

قالها لما نتجوز كده عيب... و بعد كده قالها ما احنا لينا بيت الناس تقول علينا ايه... و بعد كده انا هامسك ايدك و لا ايد العيال... و بعد كده حنا كبيرنا على الحاجات دى انتى عايزه جوز بنتك يقول علينا اتجننا

و كان ليه واحده صحبتى خالها كان خاطب و خطيبته( ايام زمان بقى علشان الحاجات دى اندثرت) ماكانتش عايزاه يمسك ايدها فكان بيشتكى و يقول طيب هو انا لو ما مسكتهاش دلوقت هامسكها بعد الجواز ليه؟؟؟

منطق برضوا طبعا ههههههههههه

بس لقيت بعد تفكير و تمحيص الفرق بين الزوجه و الحبيبه

و طلع اهم حاجه ايه تخيلواااااااااااا

طلع ان احساس الوحد انه ممكن يسيب الحبيبه بيديه الحريه فا يتمسك بيها لان مافيش حاجه تجبره غير رغبته انه يكون جنبها

لكن الزوج قبل ما يفكر يسيب لازم يفكر فى النفقه و الشقه الحضانه إلـــــخ يعنى متمسك بس غصب عنه

و بجد يفرق كتير اوى انك تحس انك لوحدك قيمه او ان الاثاث هو القيمه

طبعا مش كله كده بس اهى نظريه برضوا

يلا بقى علشا اروح اصلى و انام

دمتم ساااااااااااااااالمين

امسك مناخيرك من فضلك

كل واحد منا المفروض يمسك مناخيره زى الفيلم بالظبط

و ده ليه ؟؟؟؟

علشان كلنا .....اه كلنا فى الغالب بيحط مناخيره فى اللى مالهوش فيه

و تعابنا غيرنا بمناخيرنا دى

لما البنت تكون لسه ما اتجوزتش تلاقى كل الناس بتسأل

هاااااااا مافيش حاجه كده ؟؟؟؟؟

و تلاقيهم بيقولوها و همه بيتصعبوا اوى مش عارفه ليه

و لما تتجوز السؤال بيتغير

هااااااا مافيش حاجه جايه فى السكه؟؟؟؟

قمه الحشريه طب و هو مالهم مهو لما يكون فيه حاجه هايشفوها مش محتاجين يسألوا

اللى جاى بقى لو كانت جابت بنات

تلاقى الناس عماله تتصعب و تقولها ربنا يرزقك يا حبيبتى بالولد

و اكترمن كده مواقف تلاقى المناخير طلعت فى الحال

بس اكتشفت ان الناس مش البنات فى حالهم و لا و همه مش متجوزين

ولا و همه متجوزين

ساعتها بس فكرت همه ليه ما عملوش الفيلم بتاع امسك مناخيرى من فضلك

يمكن خايفين من الانفلونزا

الله اعلم؟

و دمتم سالمين

حبه رومانسيه

خطر فى بالى سؤال

ليه الناس بتتجوز؟

انا بتكلم بجد مش بهزر

علشان فيه ناس بتتجوز علشان تخلف

و فيه ناس بتتجوز جواز مصلحه

ده حتى فيه ناس بتتجوز علشان بيتهيألها ان الجواز هايصلح حالهم اللى مايل

كمان فيه ناس بتتجوز علشان خايفه تكبر على الجواز

او حتى علشان تبعد بعيد عن بيت الاب و الام

السؤال بقى

هو المفروض الناس بتتجوز ليه؟

و السؤال الأخطر

ايه ذنب الطرف التانى اللى داخل سواء بحسن نيه

او حتى علشان ليه اسبابه الخفيه هو كمان

المفروض الناس تتجوز علشان تسعد بعض

و بــــــــــــــــــــــــــــــــــــــــــــــــــــــــــــــــــــــــــــــس

و اللى شايف نفسه مليان عقد ياريت ما يتعبش معاه طرف تانى ممكن يكون اصلا مش ناقص تعب

و دمتم سالمين

الدين للشحاته بس

اولا كل سنه و انتوا كلكم طيبين

نخش فى الموضوع طبعا كلنا الحمد لله عزمنا و اتعزمنا و هلكنا فى رمضان و الحمد لله

و بما انى بشتغل فى البيت فى رمضان 18 ساعه اه و الله مش بفشر

من 12 ظهرا حتى 6 صباحا فكان لازم انى اطرى على نفسى بكام برنامج على كام مسلسل كده اسمعهم طبعا فى زحمه شغل البيت و العيال

المهم اتفرجت على برنامج كانوا مستضيفين فيه الشيخ سيد بتاع تفسير الاحلام و اكتشفت انه عضوا فى لجنه الافتاء و كمان كان الاول فى مش عارفه ايه

المهم طلع الراجل كفائه علميه بغض النظر عن تفسير الاحلام

المهم المذيعه و بالاشتراك مع كام واحد كده هاتك يا هجوووووم فزيع عليه اه و الله

مش بدافع عنه بس خدوا دى بقى

فجأه جه اعلانات مستشفى سرطان الاطفال

فجأه بقى الدين حلو و بنستشهد بيه علشان يكون كل اللى مش هايبعت فلوس فهو آثم

انا مش بقول الناس ما تدفعش للمستشفى

بس بقول ليه الناس بتستخدم الدين فى الشحاته و بس

و لما تييجى تكلمهم عن حجاب اوى اى حاجه من اصول الدين كل واحد يعمل فيها علامه زمانه

و الله انا سمعت فى الرنامج واحده بتكلم الشيخ سيد

و هيه اصلا مش محجبه و بتقلوا انت مش وصى على الدين و انها بتقرأ قرآن و فاهمه كل حاجه

و هو اللى حافظ القرآن جنبها و لا حاجه

كنت خلاص مفقوعه من كتر الغيظ و الحزن

يلا كل سنه و انتوا طيبين

و متم سالمين

يا لهوىىىىىىىي

اولا كل سنه و انتم طيبين

ثانيا جاتلى رساله ضحكتنى جدااااااااا

مش هاقولكم عليها

لاء هاقول علشان انتم كمان تضحكوا

بتقول

بمناسبه شهر رمضان الكريم حبيت اكون اول واحده تقولك

توبى يا صايعه

مش عايزه اقولكم هلكت من الضحك و انا بقراها بس ما يمنعش انى مسكت صحبتى و هزأتها بس و انا فطسانه من الضحك

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

المهم هاقولكم مصيبه شوفتها بأم عينى

حلوه اوى ام عينى دى بتبين اهميه اللى جى.

كنت فى النادى امبارح عادى و مافيش مشكله

لقيت مجموعه بنات و اولاد كل واحد منفرد بمزه قصدى بنت و هاتك يا رغى

و شويه و لقيت خناقه مش فاهمه فحواها ايه

المهم البنات و الاولاد دول الحبيبه عندهم كام سنه

و الله ما يطلعوش اكتر من 12 سنه

يعنى لسه اطفال احباب الله المفروض

لاء و سمعت طراطيش كلام كده واحده منهم بتقول لولد فى الخناقه يعنى ما اقولش انى بحب هشام

و الله العظيم انى اتعكننت اخر عكننه

فين الامهات الفاتنات اللى سايبه بناتها من غير رقابه

فين التربيه و لا لسه الهانم مش عارفه ازاى تربى

و لا بنت من الخمسه كان معاها مامتها ليه تراقب من بعد ايه اللى بيحصل

ربنا يهدى بنات المسلمين اجمعين

و دمتم سالمين

تيمور و مهند و غيرهم

بعد انقطاع طويل نظرا للمشاغل الفزيعه اللى انا فيها

و بجد مش لاقيه وقت اقعد على الجهاز خالص

عايزه اقولكم بجد ان كلكم وحشتونى

و اخص بالذكر مسز سوسه و اسراء حامد و فيس مون و دكتور بهدوء و واحده مفروسه

و عايزه اقول لكل اللى ما ردتش عليه و الله غصب عنى و لكننى اقرأ بعنايه كل كلمه يكتبوها

ـــــــــــــــــــــــــــــــــــــــــــــــــــــــــــــــــــــ

عايزه اقولكم على حاجات كتير اوى اوى اوى

عايزه اقولكم انى شوفت فيلم تيمورو شفيقه

عايزه اقولكم انى نسخه من شفيقه لدرجه انى اعدت اضحك من كتر مهى شبهى

و اكتشفت ان كل البنات عايزه واحد يشكمها زى تيمور و كمان مايبقاش وراه حاجه غير انه يحبها زى مهند

و رغم انى ما تابعتش مسلسل نور ده خالص و رغم انى فى منتهى الرومانسيه بس شايفه انه صعب جدا يكون كل اللى ورى الناس هيه الرومانسيه

ده حتى يبقى زهق يا ناس

طيب فين الشغل و فين العيال

ايييييييييييييييه هيه الناس ما وراهاش حاجه غير الحب

الاعتدال مطلوب فى كل حاجه حتى الحب

و بعدين الحب مش ورد و هدايا الحب اهتمام و خوف على الاخر و الاهتمام براحته

ساعتها بيكون ابلغ كتير من كلمات الحب اللى مش مترجمه لافعال

و كالعاده دمتم سالمين

عوووووو يا ناس

اولا و قبل كل شيئ احب اقولكم ان الموضوع ده حصل فعلا مش تأليف يعنى

احنا اخدنا شقه جديده

و ببساطه كان لازم تتنضف

اخدت البنت الشغاله و رحت انضفها

لغايه كده عادى

و هيه كانت بتمسح و انا كنت بجيب الميه اللى بتسمح بيها

كنت فاتحه الماتور علشان الميه كانت ضعيفه

و طلعت و رجعت لقيت الماتور مطفى

قلت يمكن انا طفيته و انا مش واخده بالى

بس بقى بدأت ألاحظ

ساعتها ولعته و سبته مولع

و لتانى مره لقيته اطفى

مش هاقولكم احساسى كان ايه بقى ساعتها

بس لغايه اللحظه دى كنت بكدب نفسى برضوا

فجأه لقيت نور المطبخ كان مولع و اتطفى

هاتقولولى جايز البنت هيه اللى عملت كده

لاء لانها كانت فى حته تانيه خالص بعيد عن المكان ده

رحت مخلصه الشقه بسرعه اى كلام

و مشيت بسرعه و انا بفتكر هنيدى و هو بيقول بنتى يا مولانا راكبها جووست

بس بجد كنت مرعوبه

تجربه شخصيه

و دمتم سالمين بدون اى جوست يارب

قله ادب مشروعه

بعد غيااااب طويل بسبب الاطفال اللى همه احباب الله
خطرت ليه حته دين فكره غريبه شويه
و الفكره جاتلى و انا قاعده ادام التليفزيون و ده مش بيحصل كتير مؤخرا بسبب المشاغل
كان شغال فيلم عربى
و بعدين البطل مسك البطله و هااااااااااتك يا بوس
مش عارفه ليه تخيلت الاخ المحترم زوج البطله و احساسه ايه و هو بيشوف مراته فى الوضع ده
و ازاى قادر يقنع نفسه ان ده تمثيل و آل ايه فن كمان و ليه هدف
طيب ايه الهدف ان مراته يا حرام تتباس ادام عينه و هو عامل مغمض
كمان ايه احساس الابن او البنت اللى بتشوف امها فى المنظر ده
خلاص بلاش البوس طيب الاحضان و لا دى ماحدش يقدر يقول فيها حاجه
طيب لو زوج الفنانه جمعته الظروف بالبطل القدير اللى عمال هايص مع مراته
يحطوا عنيهم فى عنين بعض ازاى ياناس
حسيت انى آخر تخلف و انا بسأل الاسئله دى
بس فى الاخر قلت لو ده تفكير الصعايده و الفلاحين فالحمد لله على دى نعمه
و دمتم سالمين

تهييس فى تهييس

مش عارفه مش عايزه اتكلم على موضوع معين

بس فى دماغى افكار كتير ملغبطه

كل واحد فيهم مشكله لوحده

مثلا

****ليه بيتكلموا على شرف البنت و شرف الولد لاء

رغم ان الاتنين ليهم نفس الشرف

بدليل ان لو فيه حد اعتدى على ولد ساعتها بس بيتكلموا عن شرف الولد

ليه المطلقه او الارمله ينظر إليها على انها used اى مستعمله

اسفه للفظ بس هيه دى الحقيقه

فى حين ان الراجل المطلق او الارمل لا ينظر له هذه النظره

****شفت فى العاشره مساء الصيادين اللى اتمسكوا فى ارتريا و بهدلوهم ضرب و جوع

و بعد سنه راحلهم السفير و افرج عنهم مش عارفه هو يادوب افتكر و لا ايه؟

****ليه بينقال نهايه الحب ايه ؟؟؟ الجواز و تكون هيه دى الحقيه

و التعود بعد الجواز يبهدل الدنيا

**** هانعمل ايه بعد زياده مصاريف المدارس

تفتكروا نرجع للكتاب من تانى

****بنتعلم ليه لو احنا مش هانشتغل باللى اتعلمناه

**** نفسى اتصرف بحريتى من غير ما اعمل حساب للناس و ده يقول و ده يعيد حتى لو اللى بعمله صح

و مخ الناس هو اللى غلط

****نفسى اوى اوى اوى اكل ايسكريم ساقع فى الحر ده يمكن يجمد الافكار اللى فى دماغى و ابطل تفكير

و دمتم سالمين

اسهل طريق لقلب جوزك معدته و لقلب مراتك ودانها لامؤاخذه

اه و الله
اقريب طريق لقلب المرأه ودانها
بس مش عارفه ليه الراجل لما بيكون معاه المفتاح بيسيبه و يروح يجيب شاكوش
و يقعد يكسر فى الباب علشان يفتحه
و الغريبه ان الست تقوله ما المفتاح معاك لكن لا حياه لمن تنادى
ليه صعب على الرجاله كلمه بحبك
مش مطلوب طبعا انها تكون كل يوم اصلها مش مضاد حيوى
بس من حين لاخر الواحد بيكون محتاج مسكن
مره واحده بتقولى مابقاش زى فتره الخطوبه
قلتلها لو فضل زى ما كان وقت الخطوبه يبقى مجنون و سألتها
لما بيمسك ايدك دلوقت بتحسى زى ما كان بيمسكها و انتوا مخطوبين
قالتلى لاء طبعا
قلتلها اشمعنى عايزاه يحس بنفس المشاعر و بنفس القوه و انتى نفسك اتغيرتى
ففهمت و سكتت و بطلت تشتكى
بس من آن لآخر قولها و لا تبخل
قولى بحبك بصوت عـــــــــــــــــــــــــــــــــــــالى

تاج و لا تاج محل فى زمانه

التاج الغالى ده هو اول تاج جالى
و دايما احلى بخت هو اول بخت
علشان بيكون ليه غلاوه خاصه
جالى من FaceMoon صاحبه مدونه انا غير كل البنات
و احب اقولها انها فعلا غير كل البنات و شكرا على التاج الجميل ده يا قمر
و انى اول مره اعرف حكايه التاج دى منها و شكرا على زوقك العالى
و عقبال ما تكملى صولجان زى ما قولتى

أولا:اذكر عشرة اشياء عن نفسك .....عشره كتير اوى ربنا يسهل و اعرف اقول كلمتين مش عشره

ثانيا:اختر خمس اشخاص تهدى لهم التاج .....نفسى اهديه لناس كتير بس فيه ناس منهم لقيتهم لسه مجاوبين على تاج فامارضتش اتقل عليهم زى علاء سالم

ثالثا:لا تهدى التاج لمن اهداه اليك ..... علم و ينفذ و لك يزم يا ظالم قضدى يا فيس مون

رابعا:عرف اللى بعتلك التاج انك نزلته عندك...... عنيه بس كده

بسم الله نبدأ
الاجابه على السؤال رقم واحد حاسه انى فى امتحان


1 _ اكتر صفه تميزنى انى رومانسيه جداااااااااا تقدروا تقولوا من هنا للصبح بس الحمد لله بعقل يعنى مش رومانسيه و السلام لدرجه انى بجد بحل مشاكل اصحابى و بيثقوا فى رأيى جدا و الحمد لله بيطلع صح

2- رقيقه برضوا جداااااااااا و لو كنتوا خلصتوا الصبح تقدروا تكملوا لغايه الصبح التانى
و دى بقى المشكله لانى كان فيه ناس بتفكر انى بصطنع الحكايه دى بس مع طول الوقت بيفهموا انها طبيعه فيه و الله مش تصنع بس بجد الموضوع ده كان مسببلى عقده بس الحمد لله اتحلت

3- بحب افهم كل حاجه بدماغى و ليه فلسفاتى الخاصه جدا و الحمد لله بتكون صح برضوا و لما ييجى وقت لحاجه فيها فلسفتى الخاصه هابقى اقولكم

4- بحب بابا و ماما جداااااااااااااا و زوجى جداااااااااااااااا و و اولادى جدا جدااااااااااا ثم الجميع بعدهم

5- الحمد لله علاقتى مع الله جميله و بحاول على اد ما افهم انى التزم و افهم دى ليها فلسفه بس مش عايزه ادوشكم
اصمع ان يغفرلى الله ذنوبى و يدخلنى برحمته الجنه

6- مش عارفه هيه ميزه و لا عيب بس انا سهل انى اسامح اللى غلطوا فيه بسهوله رغم انى لا اقبل الغلط لانى لا اسمح لنفسى بالغلط
بس بجد بلاقى نفسى بسامح الناس و ارجع كما كنت

7- تقدروا تقولوا ست بيت شاطره و الحمد لله و ليا وصفاتى اللى بتجنن الناس و اتفضلوا عندنا لو كمان و مش عزمه مركبيه

8-حساسه اوى و دى مشكله جامد بحاول انى اسيطر عليها و ربنا يكرمنى و اقدر اتخلص من الداء ده

9 - بحاول على اد ما اقدر اكون الشخصيه اللى اكون راضيه عنها دينيا و ادبيا و ده الحمد لله بيلاحظه الناس اللى حوليه

10 - الحمد لله خلصنا و بجد مش لاقيه كلم تانى اقوله عن نفسى غير انى بجد بكون مبسوطه لما بحس ان فيه حد استفاد من كلامى و انى مش بنفخ فى اربه مقطوعه لان صعب عليه اوى و بحس زى ما اكون بنيت بيت و ماحدش سكن فيه

ثانيا : الاختيار و دايما الاختيار بيكون صعب انا نفسى ناس كتير تجاوب و تتعصر كده زيى
نبدأ بالبنات و بعد كده الاولاد

1- صيدلانيه طالعه نازله و صاحبتها صيدلانيه طالعه نازله

2- الطريق إلى الكوشه و صاحبتها مسز سوسو

3- مذكرات عروسه ننوسه و صاحبتها جنه

4- دكتور بهدوء صاحب مدونه نقول كمان

5- دوشه و لا بد منها صاحبها دارش

و التاج اللى يجيلك منه الريح جاوب عليه و استريح
جارى التبليغ ان شاء الله و دمتم سالمين

نقارهم و لا خلو دارهم

المثل ده سمعته من وقت قريب فى التليفزيون
و عجبنى اوى اوى اوى
علشان فعلا الناس بقت ما عندهاش تمسك بالجواز مش عارفه ليه ؟
حوليا كتير اوى بيشتكوا من الجواز و سنينهع و ناس بيتهيألها ان الطلاق ده سهل جدا
و الغريب ان الناس اللى حوليهم تلاقيهم بيملوا دماغهم بحاجات غريبه زى
سبيه و انا اجوزك سيد سيده او سيبها و انا اجوزك ست ستها
طيب تعرفوا انا اعرف اتنين اتطلقوا و كل واحد منهم اتجوز و بعد كده كل منها طلق و اتطلق و رجعوا لبعض
طيب بالذمه مش حاجه تفقع ؟؟؟ طيب ما كان من الاول
و لا كل واحد مهم كان مع التانى بس ما حسوش بقيمه بعض إلا لما بعدوا عن بعض
طيب فين ست ستها و سيد سيده ؟؟؟
فيه مقوله بتقول ان محدش بيعرف قيمه الحاجه إلا لما بتبعد عنه
و دايما اصعب سنه هيها اول سنه فى الجواز و بتختلف على حسب تغير الاشخاص
بس دايما افتكروا
نقارهم و لا خلو دارهم
و دمتم سالمين

انا مصرى و ابويا مصرى بس احب ابنى يكون امريكانى

ماكونتش ناويه اتكلم فى السياسه لاسبابى الخاصه
بس فيه حاجه فاقعه مرارتى و غيظانى
الموضوع يخص الجنسيه المصريه و السبب هو المطربه شرين عبد الوهاب
سمعت و الله اعلم انها هاتسافر تولد بنتها فى امريكا علشان بنتها تاخد الجنسيه الامريكيه
ساعتها بس اتفقعت مرارتى و ماقدرش استحمل خلاص
امال فين ما شربتش من نيلها طب جربت تغنيلها
و لا هيه ناويه تشربها مياه معدنيه و اكيد مش من المضروبه بتاعه مصر اكيد هاتجيبها معاها و هيه جيه من امريكا
اللى غظنى ان الاغنيه اللى غنيتها جميله جدا و تخلى الواحد هايطق من الوطنيه
و تلاقيها اول واحده شايفه ان الجنسيه المصريه مش كفايه علشان بنتها و انها محتاجه حاجه تسندها
يعنى نوصل لان فيه ناس مصريين بيتعاملوا معامله vip مش لميزه فيهم اكتر من انهم يحملوا جنسيه تانيه
زمان كنا بنقول و بنردد و بكل فخر لو لم اكن مصريا لوددت ان اكون مصريا
فين الشعارات دى راحت و لا راحت مع اللى راح
و لا طلع كلام اغانى و راح لحاله و لا تلاقيها ليها فتره ما شربتش من نيلها و يبقى عندها حق
علشان مشاكل الميه المعروفه
انا كده فشيت غلى و ارتحت لما قولت اللى عندى لحسن خلاص كنت هاروح اشرب من نيلها و ارمى روحى فيه

تأثير النت على حياتنا الشخصيه

حاجه غريبه جدا قريتها النهاده فى الجرنال
واحده لقت ان صورها منشوره بصوره خليعه لكل اقاربها و اصحابها اللى على الميل بتاعها
و قالت ان الصور دى مفبركه
و بعد البحث و التمحيص اتضح ان حبيبها السابق هو السبب فى ما حدث و ان الصور غير مفبركه
لانه هو اللى عمل لها الميل و كان عارف كلمه السر بتاعتها
و هيه كانت قالتله انها حاطه الصور بتاعتها على الميل بتاعها
الغريب انها بنت شخصيه معروفه و حتى لو مش معروفه ده تصرف مش صحيح
ان بمنتهى السهوله حد يحط صوره على النت كده
فكرتنى الحكايه بهوس الفيس بوك facebook
مره بتفرج على واحده بيسألوها انتى عارفه ان الصور ممكن تتركب على حاجات مش كويسه
ردت بكل ثقه اه طبعا بيحصل
فسألها المذيع طيب انتى حاطه صورك فى الفيس بوك
قالتله ايوه
فقالها طيب مش خايفه
قالتله الواحد لو خاف من كل حاجه مش هايعمل حاجه
ايه التناقض ده ؟؟؟؟؟ مش فاهمه و خصوصا انى بحس ان فيه ناس ما عندهمش ثقافه احترام الاخرين
و اكتر حاجه بجد زعلتنى انى عرفت ان فيه بنت مصريه عندها 12 سنه انتحرت لما جارها لقاها على الفيس بوك
و اتريق عليها لدرجه انها انتحرت
مش بهاجم الفس بوك او غيره
بس بقول خدوا بالكم علشان الندم مش حلو
و على رأى محمد هنيدى كله بييجى بعد الجواز العرفى و ماحدش بييجى قبل الجواز العرفى

الام العاشقه و الاب العاشق

قريت فى مجله عن ام سنها 33 و ام ل 8 اطفال تركت اولادها مع اختهم البالغه من العمر 15 سنه
دون مال او طعام و ذلك بعد ان تعرفت على رجل اعمل من النت و سافرت معه لقضاء شهر العسل
هذه السيده ليست عربيه و لكنها امريكيه و لما جاه البوليس وجدوا الاطفال فى حاجه من عدم النظافه
و سوء الغذيه غير طبيعى
و وجهت إلى الام عده اتهامات و قالت البنت انها كانت تضطر إلى سرقه الطعام لتطعم اخواتها
فيه ناس طالبت بأن الست دى تعقم و بتعريضها لنفس الظروف اللى عاش فيها اولادها بدون طعام او ملابس نظيفه

الموضوع ده ما قدرتش امر عليه مرور الكرام
حسيت انى لازم اقف عنده و لان ده بيحصل كمان عندنا فى المجتمعات العربيه
اه مش بنفس الصوره
بس فيه ناس مع الاسف بتعيش بالطريقه دى
ماعندهاش اى اهتمام لاولادها و سهل اوى انها ترميهم و المهم هو نفسى
و ياما لقينا رجاله سابوا اولادهم و جريوا وراء بنت صغيره
بيعيشوا بنظريه يلا نفسى
الحمد لله ان دينا بيأمرنا بكل فضيله
ايه الغلط اللى خلى الناس دى تعمل كده
انا اصلا مش متخيله ان حد يجيب حد للدنيا و فجأه يتخلى عنه بالطريقه دى
حبيت اوجه نداء لكل انسان عاقل اتقى الله فى اولادك و كن لهم الاب و الام التى يتمنوه

يا مأمن الرجال يا مأمن الميه فى الغربال

يا مأمن الرجال يا مأمن الميه فى الغربال
ياترى دى مقوله صحيحه
و ياترى حلم هارون الرشيدى يطارد كل الرجاله
و بيفكروا يا ترى لو كان عنده الامكانيه انه يعمل مثله هايكون اسعد
و يا ترى امرأه واحده لا تكفى فعلا
بتفكرأ ازاى يا رجاله ؟
دايما بيقولوا ان المرأه صعبه التفسير
آل يعنى همه اللى كتبا مفتوح
زى ما احنا لغز بالنسبه ليكم انتوا كمان بالنسبه لينا نفس اللغز
بس السؤال هل كل حاله خاصه بنفسها فقط
يعنى كل مرأه لغز و كل رجل لغز
ام ان هناك قواعد و شواذ عن القواعد كمان
الخوف لا يكون هارون الرشيدى هو القاعده
و كمان دلوقت و مع وجود النت و الموبايلات اصبح الحلم سهل المنال
مين منال دى ؟ ماعلينا ربنا يستر على بنات حواء

فى عيد الحب لابد ان نتذكر من نحبهم و يحبونا

هل تذكر كل من احبوك اليوم
هل ورد فى فكرك كل من كانوا يوما احبائك
لم يكن الحب هو الذى بين الحبيب و الحبيبه
و لن اذكر انواع الحب
و لكن اردت التذكير بأن هناك من احبوك و لم تحببهم
هناك من احببتهم و لم يحبوك
و هناك من احببتهم و احبوك و لكن شيأ ما فرق بينكم
و هناك من ظلوا فى القلب للابد
و هناك من رافقك فى رحله الحياه حتى الان
فهل تذكرتهم
و هل يتذكونك هم بدورهم ام ان الدنيا شغلتنا حتى عن التذكر
فى عيد الحب
اقول لكل المحبين اهنأؤا بحبكم

اختيار صحيح

ازاى تقدر تعرف انك بتحب شخص معين من دون الناس؟
سؤال صعب الرد عليه
لان الحب ارتباط وثيق
و نفسى اعرف ازاى الواحد فجأه يحس انه بيحب انسان و ان سعادته معاه
و انه مش بيتهيأله انه بيحب
و ان المشاعر دى حقيقيه و ان وجوده مع الشخص ده بيحسسه بالامان
و ان لايمكن حد يحل محله

مش هو ده الحب؟

و لما هو ده الحب اللى بيتهيألى لن يختلف عليه اتنين
ليه الاتهامات المتبادله بين الطرفين
ليه مش كل واحد محدد هو عايز ايه ؟ و محتاج ايه ؟ و هايدى ايه للطرف التانى ؟
متهيألى لو كل واحد كان صريح فى الاجابه عن الاسئله دى
اكيد هايقدر يلاقى اللى بيدور عليه
لانه بمنتهى البساطه انت لما بتروح السوبر ماركت بتكون محدد من قبلها انت هاتشترى ايه
و ايه الطلبات اللى انت محتاجها
و كمان هاتدفع كام فى مقابل الطلبات دى
هو ده بالظبط مع شويه اختلافات
انت مش بتمشى فى الشارع و بتقول الله كل دى بنات
و اى واحده منهم تصلح
و انتى كمان
مش هايجيلك عارسان و تقولى كلهم يصلحوا
دور جواك و انتى كمان دورى جواكى و حددوا عايزين ايه
قبل ما ترحوا للسوبر ماركت

نيو لوك الكلام

اظاهر ان النيو لوك وصل لكل حاجه
حتى الكلام
حاجه غريبه جدا
احنا زهقنا حتى من الكلام
و الجديد ان الناس بتطلع بموضه فى الكلام
نيو لوك كلام يعنى
و الموضه اليومين دول كلمه "حد"
و رغم انها كلمه تدل على ان المتكلم عنه نكره
إلا انها و بقدره قادر اصبحت كلمه استايل
تلاقى الممثله او المذيع فى التليفزيون بيتكلم و بكل فخر بيتكلم على شخصيه معروفه
و تلاقيه بيقول الممثل الفولانى ده "حد " كويس و الكاتب ده " حد "
عليه النعمه لو حد قال عليه حد كنت دفنته فى مكانه
لاء و الادهى تلاقى اعلان سخيف طلعلك فجأه
و يقولك و كسب فلوس كتيره موله
و كسب فلوس كتيره فحت
نستنتج من ده كله ان اكيد
مامى نحله علشان تجيب العسل دا كله

بسم الله نبدأ

مش عارفه ليه فجأه طق فى مخى انى اعمل مدونه
و على رأى احمد فؤاد نجم روكنه ليه
كتير بيكون فى نفسى انى اكتب حاجه
و حتى لو علق عليها واحد
و اهتم بيها اكيد هاكون مبسوطه
فجأه و بدون سابق انذار حتى مش عارفه انام من غير ما اقول للناس تعالوا بينا نحكى مع بعضينا
و عارفين اكتر حاجه خايفه منها ايه
انى اكون بأذن فى مالطه
و المشكله الاكبر و المحبطه انى ما الاقيش حد يدخل يرد عليه
بس يمكن ساتها هاكون مبسوطه برضوا
لانى لقيه مساحه اتكلم فيها مع نفسى و براحتى
مش هاطول كتير بس الحمد لله انى هنـــــــــــــــــــــــــــــــــــا فى روكنتى لوحدى