الثلاثاء، 13 مايو، 2008

اسهل طريق لقلب جوزك معدته و لقلب مراتك ودانها لامؤاخذه




اه و الله
اقريب طريق لقلب المرأه ودانها
بس مش عارفه ليه الراجل لما بيكون معاه المفتاح بيسيبه و يروح يجيب شاكوش
و يقعد يكسر فى الباب علشان يفتحه
و الغريبه ان الست تقوله ما المفتاح معاك لكن لا حياه لمن تنادى
ليه صعب على الرجاله كلمه بحبك
مش مطلوب طبعا انها تكون كل يوم اصلها مش مضاد حيوى
بس من حين لاخر الواحد بيكون محتاج مسكن
مره واحده بتقولى مابقاش زى فتره الخطوبه
قلتلها لو فضل زى ما كان وقت الخطوبه يبقى مجنون و سألتها
لما بيمسك ايدك دلوقت بتحسى زى ما كان بيمسكها و انتوا مخطوبين
قالتلى لاء طبعا
قلتلها اشمعنى عايزاه يحس بنفس المشاعر و بنفس القوه و انتى نفسك اتغيرتى
ففهمت و سكتت و بطلت تشتكى
بس من آن لآخر قولها و لا تبخل
قولى بحبك بصوت عـــــــــــــــــــــــــــــــــــــالى

هناك 13 تعليقًا:

Gannah يقول...

صحيح مش عارفة ليه الرجالة مبتستخدمش المفتاح. الكلمة الطيبة بتأثر جدا فى المرأة و تخليها تعمل المستحيل علشان تسعد جوزها حتى كلمة تسلم ايديك بعد اكلة حلوة ولا شكرا لو عملتلوا كباية شاى يعنى حاجات بسيطة جدا ممكن تفرق معاها اما كلمات الحب فدى سحر وخاصة لمل يكون بيقولها باحساس
يا ريت كلهم يطبقوا الوصفة البسيطة دى كانت كل زوجة تكون سعيدة جدا
تحياتى

الربان يقول...

تحياتي

طبعا كلمات الحب و الغزل بين الزوج و زوجته مطلوبه كلما سنحت الفرصة...هذا
يؤكد و يدعم الحب بينهما.

لكن ان كان فيه تقصير من الزوج...اعتقد ان الزوجه ممكن تستدرجه
الي ان يقول ما تشاء هي...عليها هي ان
تبدأ....و هو سيجاريها بالتأكيد.

تحياتي و تقديري

mostafarayan يقول...

طبعا انا معاكي في رايك دة دي حتي الكلمة الطيبة صدقة ولماتكون للزوجةيبقي الثواب مضاعف
والراجل بردة بيحب يسمعها من مراته
ولكن يا عزيزتي احيانا كثيرة المرأة تهمل نفسها بعد الزواج ولا تحاول ان تظهر جميلة كما كانت قبل الزواج وعلشان كدةالراجل بيسكت لأن اللي معاه مابتشجعش واظنك فهماني
ربنا يديم الحب والسعادة علي الحميع
تحياتي لييكي

Darsh يقول...

كل حاجة بتتغير بعد الجواز ...

و طبيعة الحال أن الأحوال قبل الجواز غير بعد الجواز ...

فيه قطط بتندبح

و فيه نفوس بتتغير

بس ما ينفيش أن الحياة ممكن تبقى أجمل مع بعض الكدب المسموح بيه علشان يبقى الوضع أفضل و لو زي ما بيقول " شوبان"
حياة المرأة كتاب ضخم مكتوب على كل صفحة من صفحاته كلمة ... حب

فمفيش مشكلة ان الراجل يكتب الكلمة دي في الصفحة الواحدة من كتاب زوجته 24 مرة في اليوم

يمكن ... مين عارف ... يمكن يحفظها

ليكوريكا يقول...

علي فكره العكس صحيح بقي

الستات ممكن تتقربيلهم ب 100 الف حاجه ... هدايا خروجات ... فسح ... كلمه ... ورده ... حاجات كتير اوي

بس بجد الراجل مبيبقاش محتاج غير الكلمه من مراته

وبعدها ممكن يضحي باي شيء عشانها ...

ولو علي الكلمه مفيش مشاكل

نقولها بحبك بصوت عالي :)

وظايف يقول...
أزال المؤلف هذا التعليق.
غير معرف يقول...

جميلة جدا المدونة وفعلا انا شايفة ان الرجل والمرأة الاثنين محتاجين لكلمة طيبة ومش لازم تكون كلمة حب واضحة دايما لكن ممكن تكون تقدير للمجهود اللي الست عملاة في شغلها او في بيتها او المجهود اللي الرجل عاملة في شغلة مثلا انا عارفة انك مرهق في شغلك انا مقدرة تعبك برضة لو كلمة حب يبقي كويس

دكتور بهــدوء يقول...

الكلام ف الحب بعد الجواز بيقل ليه؟
عشان خلاص بقوا مع بعض وكل واحد عارف ومتاكد م احساس التاني
ولكن
يظل
الكلمه الحلوه لها تاثيرها ولو قلت

FaceMoon يقول...

والله الحكاية ابسط من كدة مش محتاجة مفتاح ولا حاجة افرضى المفتاح ضاع حنفتح ازاى يعنى
الحكاية كلها الاحساس بالحب كل واحد يخرج مشاعرة بطريقتة الخاصة اكيد لما اتنين يحبوا بعض واتجوزوا اكيد حيكونوا عارفين اية اللى يبسط التانى سواء كلمة او هدية او خروجة او كلمة بحبك اللى كلهم بينسوا معناها دلوقتى
مش صعبة والله الكلمة خالص دى حتى اربع حروف
تحياتى

Wael يقول...

بس مش عارفه ليه الراجل لما بيكون معاه المفتاح بيسيبه و يروح يجيب شاكوش

ههههههه

اعتقد ان المفتاح ده مع المرأة مش مع الرجل , شايلاه ف شنطتها و هيا الوحيده اللى تقدر تديهوله عشان يفتح .

ومع ذلك الكالون ساعات بيبقا " معصلج " شويه ومحتاج خبطة شاكوش من هنا او دقة مسمار من هنا عشان يتعدل .

وبعدين انتى بتطالبى بفتح كالون المرأة , ومقولتيش حاجه عن فتح كالون الرجل وهو المعده زى ماهو موجود هنا , يعنى مينفعش تبقا الواحده طابخه اكلة من اياهم , زى اكلات سناء يونس فى فيلم " الدنيا على جناح حمامة " , وبعدين جوزها يقولها انا بحبك , ده حتى يبقا منافق D: .

very nice post

حماتــــــــــــي ملاااااااااااك يقول...

لو كل زوجين عملوا عودة قصيرة للماضي كل شوية ورجعوا ايام خطوبتهم من كلام حلو وطريقة حوار متحضرة
كانت جوازات كتيرة اتصلح حالها واستمرت اكتر
بس يالا اصل الكلام بقي بفلوس دلوقتي
نسكت أوفر

Reem يقول...

تعرفي اول مرة سمعت الكلمة دي اتنرفزت
اوي لكن لما فكرت فيها لقيتها حقيقة فعلا الراجل ممكن يكسب الست بكلمة
بس هو فين الراجل اللي هيقعد يقولك في كلام حلو في الوقت ده و ظروف الحياة دي
ده يبقى عملة نادرة بجد

بس اللي نفسي اعرفه ايه مفتاح الراجل و محدش يقولي معدته اصلي مش عايزة اطبخ لو اتجوزت

بنت مصريه يقول...

عندك حق والله ياختى
كلنا ف الهوا سوا