الجمعة، 24 أكتوبر، 2008

امسك مناخيرك من فضلك


كل واحد منا المفروض يمسك مناخيره زى الفيلم بالظبط

و ده ليه ؟؟؟؟
علشان كلنا .....اه كلنا فى الغالب بيحط مناخيره فى اللى مالهوش فيه

و تعابنا غيرنا بمناخيرنا دى

لما البنت تكون لسه ما اتجوزتش تلاقى كل الناس بتسأل
هاااااااا مافيش حاجه كده ؟؟؟؟؟

و تلاقيهم بيقولوها و همه بيتصعبوا اوى مش عارفه ليه

و لما تتجوز السؤال بيتغير
هااااااا مافيش حاجه جايه فى السكه؟؟؟؟

قمه الحشريه طب و هو مالهم مهو لما يكون فيه حاجه هايشفوها مش محتاجين يسألوا

اللى جاى بقى لو كانت جابت بنات

تلاقى الناس عماله تتصعب و تقولها ربنا يرزقك يا حبيبتى بالولد

و اكترمن كده مواقف تلاقى المناخير طلعت فى الحال
بس اكتشفت ان الناس مش البنات فى حالهم و لا و همه مش متجوزين
ولا و همه متجوزين
ساعتها بس فكرت همه ليه ما عملوش الفيلم بتاع امسك مناخيرى من فضلك
يمكن خايفين من الانفلونزا
الله اعلم؟

و دمتم سالمين

هناك 75 تعليقًا:

esraa يقول...

هم الناس مش بيسيبو حد في حاله بصفه عامه والبنات بصفه خاصه

Akram يقول...

بصراحة دي من أحلي الحاجات اللي اتعلمتها و اتغيرت في شخصيتي من ساعة ما سبت مصر، كان الاول الواحد فعلا بيسأل أسئلة مش من حقه يسألها و بيرد برضه زي الاهبل علي أسئلة حشرية من الغير، لكن أنا اتعلمت من العيشة بره ان كل واحد في حاله و مفيش حد بيتدخل في حياة التاني، بمعني أصح و من أحسن فلنفسه و من أساء فعليها، اللي عاوز يصلي بيصلي و محدش له دعوة، و اللي مش عاوز برضه محدش له دعوة، اللي يصاحب بيصاحب و صاحبته عايشة معاه، و محدش بيتدخل و اللي يتجوز يتجوز، اللي عاوز يجيب عربية بيجيب أحسن عربية و مش محتاج يدبح عليها الارنب عشان عارف ان مفيش حد حيحسده ولا يقوله انت جايبها بكام، عشان كده أنا دلوقتي بطلت أتدخل في أي مواضيع شخصية جدا حتي لأعز أصحابي، اللي عايز يحكي من نفسه يحكي، و لو أي حد برضه سألني سؤال و شايف انه مش من حقه يسأله، حتي لو كان شخص عزيز عليا، بقوله بكل هدوء و أدب دي حاجه شخصية و مش من حقك تسألني فيها و من فضلك متدخلش في حياتي الخاصة..

ضد التيار يقول...

طبيعه المجتمع الشرقى عموما التدخل فى حياه الاخر ... للأسف

واحدة مفروسة يقول...

الفضول الفضول
الناس عاوزة تعرف كل حاجه عن كل حد
و لعلمك متهيالى كلنا عندنا درجة من الفضول
بس احنا مش حاسين حجمه
لكن غيرنا يحس بحجمه فضول كبير و لا متوسط ولا صغير
بس ركزي مع نفسك كده حتلاقى انه يوجد نسبة من الفضول

romansy يقول...

هو دا طبع الشعب المصرى
حشرى فى اللى ليه فيه
واللى ملهوش فيه
قدر البنات كده بقى
الله يسامحمهم

HAPPY يقول...

بجد فعلا الناس مش بتسيب حاجة تعدى من تحت ايديها.. لازم يتدخلوا فى اللى ما يخصهومش ..
ولو مش اتكلموا من قدامك هيكلموا من وراك..

mohamed ghalia يقول...

الناس بيتكلموا عن كل حاجة وبيفهموا فى كل حاجة
بس ده مش بتقليه غير فى الشعب المصرى
أصل شعبنا بيفهما وهيا طايرة
تحياتى

ماما أمولة يقول...

طبيعة بشرية الا من رحم ربي

احنا بشر مش ملايكة باجنحة

تقديري

mahasen saber يقول...

عارفه عفوية الناس وطيبتهم ساعات هيا اليى بتخليهم حشرين...وغبائهم وحقدهم وقرهم على الغير فى احيان اخرى هو اليى بيدفعهم لكده برضه
........
ويبقا...من حسن اسلام المرء تركه ما لا يعنيه...
صدق رسول الله

كـــيــــــــارا يقول...

عاااااااااااااااااااادي يابنتي


ده طبيعه الناس

حشرييييييييييييييين

Tamer Alhosiny يقول...

انا عندي سؤال غريب شوية بما ان دي اول مرة ادخل بيتكم العامر
واقراء موضوعاتكم اللزيزة دي

هههههههههههه

هو ليه اسمها بيحشروا مناخيرهم

ليه مش بيحشروا عنيهم مثلا

او ليه مش بيحشروا ودانهم

او حتي اديهم

سؤال غريب صح

يمكن علشان المناخير بتشم
طيب ما العنين بتشوف
والودان بتسمع

مش عارف هو شكله فعلا سؤال غبي

بس بجد عندك حق الناس مش بتحشر مناخيرها علشان هي شايفة حاجة مش صح
او محتاجة تدخل

الناس بتحشر مناخيرها
لانها لو محشرتهاش
الناس هسحشروا نفسهم

يعني لو مش قالو ليكي وانتي انسة
يا عيني لسة متجوزتيش بيقولو كدة
علشان خايفين
انك انتي تحشري مناخيرك في حياتهم
الاول
وتقولي ليها ياعيني يا طنط جوزك بيبص علي البنات
شكله كئنه مش متجوز

للاسف انا اكتشفت الحقيقة دي
لما حد بيقولي الجرفات بتعتك مش لاقية علي القميص
بحس ان بدلته فيها حاجة مش صح
بيحشر مناخيره قبل ما احشرها انا


علشان كدا انا برجوكي انك تنزلي فرمان باي حد يحشر مناخيره
هتقطعيهاله

واالاي مستغني عن مناخيره يقرب

ههههههههههههههههههههه

تامر الحسيني
واحد مش بيحشر مناخيره في الاي ملهوش فيه
وربنا يرزقك بالعيال
ههههههههههههههههههههههههههه

:)

الجواز و سنينه يقول...

esraa
اولا نورتينى جدا
ثانيا فعلا الناس مش بتسيب حد فى حاله
و ربنا يكون فى عون البنات

الجواز و سنينه يقول...

Akram
منورنى كالعاده يا اكرم
وتعرف انى اتعلمت منك حاجه
انى لما حد يحشر نفسه فى حياتى اتهرب بدل ما برد و انا متغاظه و عايزه اقوله انت مالك بس مكسوفه
بس اوعدك انى اتغير فى النقطه دى
بجد ياريت تحاول تكتب اكيد فيه ناس هاتستفيد من افكارك زى ما انا استفدت

الجواز و سنينه يقول...

ضد التيار
مش عارفه هيه طبيعه و لا احنا فعلا سايبين الناس تتدخل فا بيسمحوا لنفسهم بمساحه هيه اصلا مش ليهم
قد تكون برضوا طبيعه فينا

الجواز و سنينه يقول...

واحدة مفروسة
بسم الله الرحمن الرحيم
الاجابه هى
فضول ضعيف
ههههههههههه
انا فعلا سيطرت على الموضوع ده جدااا و الحمد لله
ما بقاش عندى فضول لحاجات كتيره كان عندى فضول ليها زمان
يمكن علشان بعانى من فضول الاخرين فامحبتش اكون انا نفسى حشريه
بس اكيد فيه نسبه و لو ضعيفه مش هانكرها بس ضعيفه و الحمد لله

SemSem يقول...

اول زيارة لى فى المدونة
وباذن الله مش هتكون الاخيرة

اما الموضوع الصغنطوط ده على اد ماكلامه صغير لكن لخصت بيه حاله موجوده فى اغلب الاماكن فى الجمهورية ودا راجع للعادات الموروثة عن اجدادنا
يمكن نسميها فضول زيادة عن اللزوم
لكن انا اتمنى ان السلوكيات دى تنتهى فى عصر التطور اللى عايشينه

تحياتى
اتمنى زيارتكم لمدونة حواديت

الجواز و سنينه يقول...

romansy
و الله انا عندى امل اننا نتغير
مش معنى كده اننا نبقى اغراب
بس نحترم حصوصيه بعض
و اللى يحكى يكى براحته
و اللى مش عايز ما احرجهوش بأسئله بايخه

نورتنى كالعاده

الجواز و سنينه يقول...

HAPPY
اولا نورتينى
وفعلا الناس مش وراها حاجه غير الكلام
حتى شوفى ارباح شركات الاتصالات و انتى تعرفى
لو بنشتغل شويه ماكانش هايكون عندنا نفس الوقت للكلام

الجواز و سنينه يقول...

mohamed ghalia
فعلا الناس عندنا بيفهموا فى كل حاجه
حتى لو سألتهم عن عنوان مش موجودهايردوا برضوا
ربنا يهدينا جميعا

الجواز و سنينه يقول...

ماما أمولة
فلا احنا مش ملايكه المفروض اننا نحاول
على الاقل حتى نحاول
نورتينى يا ماما اموله

الجواز و سنينه يقول...

mahasen saber
بجد رأيك اكتر من رائع
فعلا جبتى نموذجين اللى همه
و ختمتيها صح اوى
اهنيكى على ردك الجميل

الجواز و سنينه يقول...

كـــيــــــــارا
ربنا يهدى الناس و يهدينا
صحيح رحتوا فين الهارده ؟ طيب و عملتوا كده ليه ؟و ايه تانى اللى حصل
ههههههههه

الجواز و سنينه يقول...

Tamer Alhosiny
اولا نورتنا و اتفضل غدا كمان
ثانيا بخصوص السؤال
متهيألى علشان صعب جدا حد يحشر عينه او ودانه
الحاجه الوحديه البارزه فى وش البنى ادم هو الانف فعلشان كده بيحشروها
و لما بيحشروها فابتتحشر و صعب انها تطلع من الزنقه اللى هيه فيها فابيسبوها محشوره
ايه الكلام اللى انا بقوله ده؟؟؟؟
اما بخصوص الفرمان
فأنت شايفنى الحاكم بأمر الله
هههههههههههه
انا ماشيه جنب الحيط و مش هنادى مسرور السياف لاى حد خدوا راحتكم يا بلوجرجيه
و شكرا على الدعوه اللى دعتهالى
بس حوش مناخير لا تطلع فى مخى و انادى مسرور

عايش علي الهامش يقول...

انا قررت انيمردش علي الموضوع علشان مكونش بحشر مناخيري في الي مليش فيه

خلق الله الانسان بعادة الفضول ورغم مابها من سوء فهي اساس التقدم يعني لو كان نيوتن قاعد تحت الشجره نزلت هوب علي دماغه التفاحه بص عليها بغباء وبلاده وكمل تامله او يمكن كلها كان بالتاكيد الحال اتغير ولو ارشميدس وهو بيستحمه والتاج غرق منه فضي الميه الي كان بيستحمي فيها علشان يلحق التاج كانت الدنيا تغيرت

ام سميره وخالتك ام احمد كان ممكن يكونوا علماء صحيح هما موجهين فضولهم غلط بس ممكن مين عارف بس نوجهم صح

المصريين بيوجهوا فضولهم في الحياه الاجتماعيه لكن مع احترامي للجميع الغربيين كمان لهم فضول وبيوجهوه برضه بس الفرق ان نسبه كبيره منه للعلم والباقي لاجتماعيات

شكرا لكي

الجواز و سنينه يقول...

SemSem
نورتنى يا سمسم
و شكرا على ردك الرقيق
بس فعلا انا شلنا ورثنا و ضيعنا كل الورث بتاعنا فا قعدنا نضايق بعض

واحدة مفروسة يقول...

تحياتي
عجبنى التعليق اللى على البوست بتاعي اوي

سلام

Geo Amr يقول...

ثقافة مجتمع اغلبية الناس تحب تعرف اخبار كل الناس فضول بشكل غريب مع انى لو انشغل الواحد منا بعيوبة افضل ما ينشغل بعيوب الاخرين

حبيبه يقول...

تفتكري لو كانوا عملوا الفيلم كانت الناس هتبطل فضول؟
اكيد لا طبعا لان دة طبع جوة كل انسان وبيختلف من شخص لاخر بس موجود

mohra يقول...

من كتر ما بتسأل اسئله بايخه مش من حق حد يسألهالى...اتعودت و اعتبرت موضوع جوازى موضوع رأى عام من حق اى حد يتكلم فيه
و الله لما مابتسألش(و ده شيئ نادر )باستغرب

Akram يقول...

مساء الخير مدام :) شكرا علي الرد بتاعك، فعلا أخجلتم تواضعنا :) علي فكرة أنا مش بس غيرت أسلوبي في موضوع التدخل في حياة الاخرين، ده بقي أسلوب حياة بالنسبة ليا، كتير حاجات الواحد بيكون نفسه يعملها بس بيقلق من نظرة الناس ليه و بالتالي مبيعملهاش، أنا بقي أتعلمت أني حر أعمل اللي أنا عاوزة مدام مفيهوش ضرر لأي حد، حتي الوالد و الوالدة ساعات بيتكلموا معايا في حاجات و يقولولي ميصحش و الناس و الاصول و مش عارف ايه، بيكون ردي بكل بساطة ان الاصول علي راسي طالما انها أصول فيها شىء من المنطق، لكن لما تكون الاصول دي عادات متخلفة و موروثة بدون مبرر يبقي ردي الوحيد فليذهبوا جميعا الي الجحيم و اللي مش عاجبة يخبط راسه في انشف حيطه يقابلها قدامه، و علي فكرة بالنسبة انك بتقولي انك حتبتدي تتعاملي مع الناس بنفس أسلوبي، حبيت بس أفهمك انك لازم تعملي الموضوع ده بحظر عشان الناس في مصر بتتقمص بسرعة، يعني مثلا لو قلتي لأي حد من فضلك لا تدخل في شىء يخصني، حتلاقيه أو تلاقيها أخد الموضوع علي شرفه قوي و ماشي يشتيكيكي للناس، أنا مثلا عشان معارفي خلاص حفظوني و عرفوا ان حياتي اتغيرت بقوا بيتفهموا أسلوبي اللي الي حد ما جاف بالنسبة ليهم بس خلاص اتعودوا و فهموني، علي أي حال حبيت بس أقولك انك في الموضوع ده حاولي تعمليها تاتا تاتا عشان الناس مبتصدق يئفشوا علي بعض، حاجه أخيرة حبيت أذكرها و هي فعلا من الحاجات اللي بتضحكني جدا من كتر سذاجتها و رجعيتها جدا، قال ايه أي واحد بيخطب أو أي بنت أتخطبت لو أبوها مبلغش أعمامها أو خلانها بالذات الاكبر فيهم، من الاول بمراسم الخطوبة بيزعلوا قوي و يخاصموا بعض و يعملوها فيلم، كل واحد منهم عايز أخوة يقوله ان النهاردة ابني رايح يتقدم ولا بنتي جايلها عريس، و لازم بعد الزيارة تتصلي بيه تتطمنيه و تقولي اذا كان في مشروع قرائة فاتحه ولا لا و اذا كان في فاتحه يبقي امتي، لكن لو كلمتي حد فيهم بعد ما تكون كل حاجه تمت و تقولي فاتحة ابني ولا بنتي يوم كذا و يبقي الخبر بالنسبة ليه مفاجئه، ساعتها تبقي مصيبة و حتجيب كمان انهم يقولوا هما خايفين مننا نحسدهم ولا ايه، و اذاي ميعرفوش عمها الكبير ولا خاله الكبير الا بعض ما يكونوا خلصوا كل حاجه، هو أحنا مش عمامها ولا خلانه؟؟؟ طب و انت مالك يا بارد هو انت اللي حتتجوز ولا هي؟؟؟ علي العموم قيسي بقي علي كده حاجات كتير قوي قوي قوي في حياتنا، بس الفكرة اني انا اللي باضحك ف الاخر و بقول اللي مش عاجبه يتفلق و اللي بيصرف عليا قرش يحوشه عني :) و عفوا للاطاله :)
Wish u a pleasant week end

blue-wave يقول...

دى مشكلة الفراغ الازليه
والحشريه طبع
ربنا يلطف بينا

غير معرف يقول...

السلام عليكم
انتى اخترتى مواضيع بجد فى كتابتك تلمس الواقع وكثير من السلبيات فى مجتمعنا وباسلوب بسيط وجميل
والفضول ده اكيد عادة سيئة جدا وهى نتيجة للفراغ الفكرى احيانا واحيان اخرى للفراغ فى الوقت .
ولكن هناك فضول ايجابى وهو اننا نحاول نعرف ماوراء الاشياء ومن هنا جاءت الاختراعات والابتكارات وكثيرا من الناس اهتدوا الى وجود الله بالفضول العلمى
ودمتم ... بس خلاص

Esraa Hamed يقول...

ههههههههههههههه
و الله عندك حق
دايما كلامك بيعبر عن حاجات بجد عايشينها

تحياتي ليكي يا قمرة

الجواز و سنينه يقول...

واحدة مفروسة
مرسى على زوقك
كان نفسى اشوف تعليقك على الموضوع بتاعى
بس اكيد نورتى

الجواز و سنينه يقول...

عايش علي الهامش
الحمد لله انك رديت
بجد فرق كتير
انا معاك اننا بنحشر مناخيرنا فى الحاجات اللى و لا تودى و لا تجيب
بس لغايه امتى هانسيب غيرنا يفكرلنا و حتى لو ظهر اللى بيفكر ياخدوه
حاجه تفقع المراره و الله

الجواز و سنينه يقول...

Geo Amr
و الله عندك حق
بس الناس ولا تنشغل بعيوبها و لا عيوب الاخرين
تنشغل بحاجه مفيده
نورتنى

الجواز و سنينه يقول...

حبيبه
اولا نورتينى يا قمر
ثانيا
لاء ماكانوش هايبطلوا بس يمكن كانوا اتهدوا شويه

الجواز و سنينه يقول...

mohra
هههههههههههه
ردك عجبنى اوى
اوى
اوى
بس ما تستسلميش و جوزاك حريتك انى لوحدك
و حاولى تقفلى على الموضوع مع الناس
ماحدش بيشيل هم حد خلاص

الجواز و سنينه يقول...

Akram
ما تخافش عليه انا مش هاصد حد بغلاسه بس هاحاول اهرب من الاسئله ممكن تعرف مين الحشرى و اسأله انا قبل ما يسألنى
غلاسه بقى
بس ان اعجبنى اوى حكايه ان البنت لازم تقول قبل الهنا بسنه ان فيه عريس جى
و الله يابنى منتهى التفاهه
و فعلا بتعمل مشاكل كتير
ربنا يهدى

الجواز و سنينه يقول...

blue-wave
فعلا هو فراغ
و إلا ماكنش هايكون عندهم وقت للرغى
نورتنى

الجواز و سنينه يقول...

غير معروف
مش عارفه ليه كل الغير معرف بيكون ردهم رائع
اسعدنى جدا ردك
و فعلا فيه فرق بين الفضول المفيد و الغير مفيد
اه حلوه اوى بس خلاص اللى فى نهايه الرد دى
حسستنى انك جبت الخلاصه و من الاخر

الجواز و سنينه يقول...

Esraa Hamed
نورتينى كالعاده يا جميل
واضح انك انتى كمان مكويه من المناخير
انا اصلا شايفه كام مناخير محشوره عندك كده
ههههههههههه

~*§¦§ Appy §¦§*~ يقول...

ولو مسكوا مناخيرهم هيمسكوا لسانهم ههههههههههههه

انت تسال والكمبيوتر يجيب يقول...

دعوه
يسعدنا ان نسمع تعليقاتكم
على ما نطرحه من موضوعات فى برنامجنا الأذاعى وهو الأول فى الشرق الأوسط عن النت والمدونات من الأذاعه الرئيسيه لمصر ....موضوعاتنا تطرح فى مدونتنا...وتذاع التعليقات التى تكتبونها فى حلقات البرنامج وهو يذاع يوميا عذا الجمعه التاسعه وعشر دقائق صباحا على موجات أذاعة البرنامج العام
ونرحب بنشر بعض موضوعات مدونتك المتميزه
المدونه
http://netonradio.blogspot.com

شخبطة يقول...

اولا اسم البوست جامد جدااااااا
ثانيا اسلوب جميل اوى
ثالثا دى حقيقة لازم نعيشها الناس حشرية( ايوة الله حشرية ) لازم تلاقى حد بيتدخل فى كل حاجة عارفة لو بتشربى مثلا شاى وقلتى معلقتين هتلاقى حد يقولك معلقتين بس وتلاقى حد تانى يقولك طب ليه معلقتين ده كتير ( اس حشرية جداااااااا) ولو ولو ولو لو ركزتى هتلاقى ان الناس بتدخل فى حياة بعض بطريقة مش طبيعية وزيادة اوى عن اللزوم
اما بقى فى موضوع الجواز والبنات فده الموضوع الاساسى اللى لازم المناخير تدخل فيه قبل الجواز وبعد الجواز وقبل الاولاد وبعد الاولاد دايما مناخيرهم موجودة
وربنا ما يقطعلهم عادة
معلش انا اتكلمت كتيييير اوى بس بصراحة موضوعك واسلوبك عجبونى اوى
يارب دايما بالتوفيق

mohamed ghalia يقول...

أختى العزيزة
لكى عندى تاج فاقبلية
فى إنتظار إجابتك
تحياتى

اقصوصه يقول...

ههههههههههههههههههههه

صراحه عنوان التدوينه لفت نظري

الناس فعلا فضولين بشكل غريب

نسوا مقولة..عليكم بأنفسكم..!

سعدت بقرائة التدوينه

بس ودي اسال

مفيش حاجه فالسكه؟

لووووووووووووول

من غير عنـــوان يقول...

من حسن إسلام المرء تركه ما لا يعنيه...
ومن راقب الناس مات هما...


بيغيظني كمان كلمة (عقبال)

تتجوز ... عقبال ما تخلف
تخلف عقبال ما يخش المدرسه
يخش المدرسه ... عقبال ما يتخرج
يتخرج... عقبال ما يتوظف
يتوظف عقبال ما يتجوز
يتجوز ... عقبال ما تفرح بعياله وعيال عياله.... إلخ إلخ...........

موضوع إجتماعي رائع

nona يقول...

عادى باة ان الناس تتدخل فى كل حاجة فى حياتنا ماهو دة العادى
الاى مش عادى انهم يسبوكى فى حالك

حاسوباتيه يقول...

هههههههههههههههههههههه اول مره ازورك وعندك حق فعلا ياريت كل واحد يمسك مناخيره حلوه قوي قوي ومدونتك جميله

nour shahen يقول...

والله عندك حق فعلا
بس شكل الشعب دايما خدوم يعنى بيحط مناخيره كمان ويفتى فأى شيء حتى لو ميفهمش فيه
بس يمكن تدخلهم أحيانا يكون تعاطف مع الشخص
ويمكن يكون بالفعل رخامه وخلاص

بس جميل الموضوع فعلا
تحياتى ليكى

بس خلاص ... يقول...

السلام عليكم
موضوع المدونة ده لمس الواقع اللى بتعيش فيه وللاسف فى ناس كثير فى المجتمع ماشيين ورا مناخيرهم ... وممكن مناخيرهم دى تعمل مشاكل حتى ليهم هما شخصيا
افكارك جميله ومدونتك رائعة
تحياتى

الجواز و سنينه يقول...

~*§¦§ Appy §¦§*~
ههههههههههههههههههه
مهو لو مسكوا مناخيرهم هايخنفوا و مش هايعرفوا يتكلموا
ههههههههههههه
نورتينى

الجواز و سنينه يقول...

شخبطة
اولا و ثانيا و ثالثا اسعدنى جدا ردك الرائع
و فعلا حتى لو قللتى السكر او زودتيه برضوا هايتدخلوا ما بالك لو فى الجواز؟؟

الجواز و سنينه يقول...

mohamed ghalia
احب احييك على التاج اللى انت عامله و عنيه ليه طبعا هارد
و بجد موضوع التاج اكتر من رأئع
و شكرا انك اختارتنى مع المليون مدون علشان ارد
ههههههههههههههه
اصلهم كتر
يلا ربنا يزيد و يبارك
حاضر حاضر هارد

الجواز و سنينه يقول...

اقصوصه
والله فعلا عندك حق الناس بقوا فضوليين جدا
و كل شويه يسألوا مافيش حاجه جايه فى السكه
حاجه غريبه و الله
طبعا انتى مش من الناس دول
ههههههههههههههه
نورتينى و الله بجد

الجواز و سنينه يقول...

من غير عنـــوان
اسعدنى جداا ردك الرررررائع دائما
و فعلا كلمه عقبال تنرفز جدا
( عقبــــــــــــال ) ما نشوفك تانى عندنا
هههههه

الجواز و سنينه يقول...

nona
اظاهر فعلا ان العادى ان الناس تتدخل
بالمناسبه دى بقى انت رحتى فين امبارح
ههههه

الجواز و سنينه يقول...

حاسوباتيه
نورتينى فى اول زياره
و اتمنى تنورينى دايما

الجواز و سنينه يقول...

nour shahen
نورتينى فعلا بردك و وجودك يا نور
و الناس ربنا يهديهم بيخدموا حتى لو
مش فاهمين فى البطيخ حاجه

الجواز و سنينه يقول...

بس خلاص
و عليكم السلام و رحمه الله و بركاته
و فعلا فيه ناس مناخيرهم مودياهم فى داهيه
انا جبت سيره المناخير كتير اوى فى البوست ده
و الله المفروض يعملولها اغنيه بعد كل ده
اسعدتينى و نورتينى بكلامك الجميل
و بعد اللى انتى قولتيه ده اقول بس خلاص و اروح انام

شفقة هانم واحسان بك يقول...

الله على كلامك اللى فيه الخلاصة
برافو عليكى انتى اثرتى تساؤلات هامة جدا
فعلا الناس بقت حشرية وبتحشر مناخيرها فى اللى ملهاش فيه
ربنا يرحمنا
وتسلمى

mahasen saber يقول...

ايه يا جميله انا رجعت وملقتش بوست جديد ومتعتبريش ده حشريه منى ولاا مناخيرى طولت فى المدونه ولاا حاجه
انا بس حبيت اشكرك على اهتمامك بالسؤال عليا وزيارتك الجميله ليا
وانبهك ان حلو لو نزلتى بوست جديد
ومناخيرى اهى فى مكانها الطبيعى فى وشى
سلام يا قمر
يا مواليد نفس برجى الجوزاء مع انى مش بعترف بالابراج جامد

حزينه يقول...

والله عندك حق
فى اسئله الناس الحشريه بتسالها
وهى مش عارفه اد ايه بتوجع واد ايه بتجرح
فعلا كل واحد يخليه فى حاله احسن


حزينه

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

البرنامج الأذاعى الأول عن النت والمدونات من الأذاعه المصريه الرئيسيه يقول...

الأخت العزيزه صاحبة المدونه
الأخوه والأخوات الزائرين المعلقين
فى مدونتنا-مدونة اول برنامج أذاعى عن النت والمدونات-فكره جديده تماما يمكن ان تحل الكثير من مشاكل الزواج ...نرحب بزيارتكم وبتعليقاتكم على الفكرhttp://netonradio.blogspot.com

الجواز و سنينه يقول...

شفقة هانم واحسان بك
و الله انتوا نورتونى بمجيتم دى
و اسعدتونى بردكم الغالى
بــــــــــــــــس
مافيش متولى فى السكه
ههههههههههههههه

الجواز و سنينه يقول...

mahasen saber
انا كتبت اهه و انتى و لا هنا
فينك؟؟؟؟؟؟؟؟
و ربنا يخليلى مناخيرك اللى زى العسل دى

الجواز و سنينه يقول...

حزينه
نورتينى و ربنا يبعد عنك الاحزان و الناس الوحشه الحشريه

costume jewelry يقول...

Very good!

materials يقول...

Good Blog, I think I want to find me, I will tell my other friends, on all!
aoc power leveling

Bola 7elmi يقول...

لما البنت تكون لسه ما اتجوزتش تلاقى كل الناس بتسأل
هاااااااا مافيش حاجه كده ؟؟؟؟؟


و تلاقيهم بيقولوها و همه بيتصعبوا اوى مش عارفه ليه

و لما تتجوز السؤال بيتغير
هااااااا مافيش حاجه جايه فى السكه؟؟؟؟



والبنت ف الحالتين بتبقى نفسيتها زباله والله من كتر السؤال والصعبنه ..
هو انتي لسا يا ولداه والناقص يعيطو عليها



حشاريين ولاد لازينا

>> دي أول مرا أزور بلوجك :) ومبسوطه اني وصلتلو

hayoomaa يقول...

والله من رايي انها شماته اكتر منها حشريه
ودي طبيعه في المصريين وبس
انا رحت بلاد كتير ومشفتش الصفه دي غير هنا بس
حاجه تخنق صح
احنا مش ملزمين اننا نقدم تقرير عن احوالنا
ولا ايه

تحياتي

funky girl يقول...

بجد الموضضوع داه يخنق و للاسف الحشرية الزايدة دي صفة عند اغلب المصريين ربنا يعافينا منها