السبت، 15 مارس 2008

تأثير النت على حياتنا الشخصيه




حاجه غريبه جدا قريتها النهاده فى الجرنال
واحده لقت ان صورها منشوره بصوره خليعه لكل اقاربها و اصحابها اللى على الميل بتاعها
و قالت ان الصور دى مفبركه
و بعد البحث و التمحيص اتضح ان حبيبها السابق هو السبب فى ما حدث و ان الصور غير مفبركه
لانه هو اللى عمل لها الميل و كان عارف كلمه السر بتاعتها
و هيه كانت قالتله انها حاطه الصور بتاعتها على الميل بتاعها
الغريب انها بنت شخصيه معروفه و حتى لو مش معروفه ده تصرف مش صحيح
ان بمنتهى السهوله حد يحط صوره على النت كده
فكرتنى الحكايه بهوس الفيس بوك facebook
مره بتفرج على واحده بيسألوها انتى عارفه ان الصور ممكن تتركب على حاجات مش كويسه
ردت بكل ثقه اه طبعا بيحصل
فسألها المذيع طيب انتى حاطه صورك فى الفيس بوك
قالتله ايوه
فقالها طيب مش خايفه
قالتله الواحد لو خاف من كل حاجه مش هايعمل حاجه
ايه التناقض ده ؟؟؟؟؟ مش فاهمه و خصوصا انى بحس ان فيه ناس ما عندهمش ثقافه احترام الاخرين
و اكتر حاجه بجد زعلتنى انى عرفت ان فيه بنت مصريه عندها 12 سنه انتحرت لما جارها لقاها على الفيس بوك
و اتريق عليها لدرجه انها انتحرت
مش بهاجم الفس بوك او غيره
بس بقول خدوا بالكم علشان الندم مش حلو
و على رأى محمد هنيدى كله بييجى بعد الجواز العرفى و ماحدش بييجى قبل الجواز العرفى

هناك 16 تعليقًا:

فضفضة يقول...

اووووووول تعليق

احمدك يااااااااارب

بصي انا معااااك ومع البنت كمان اللى قالت ان لو خفنا من كل حاجة

مش هنعمل حاجة

وده صح من وجهة نظرى

انا احب تكون ليا شرف التجربة حتى

لو فشلت التجربة

المهم انى احافظ على المعمل يعنى مش التجربة تفشل والمعمل يتحرق

لا انا مع الاعتدال

وانك تحافظ على خصوصيتك ضد اعداء الخصوصية

ولو كل واحد حافظ على خصوصيته واحترم خصوصية الناس الاخرين
هتلاقينا اختفى من بينا الناس الغريبة العجيبة

اللى بتخلى الواحد يطق من جنابه

ويجعله عاااااااامر

صيدلانيه طالعه نازله يقول...

النت بقي اساسي في حياتنا ،المهم مايتحكمش فينا و بالنسبه للفيس بوك ملقيتوش جذاب قوي بس بيوصلني باصحابي و احلي حاجه في النت انه عرفا علي البلوجز و خلانا نشارك غيرنا في الافكار و الخبرات

رئـــــيسـة حزب الأحلام يقول...

السلام عليكم ايه اللى بيحصل دة ربنا يستر

almasry يقول...

والله ان البنت كانت ماشيه سليم عمرها ما هاتتعرض لأى حاجه من دى


البنات اللى بتدخل على النت هى اللى مابتصدق تشوف واد حبوب وتعيش


احنا والله مظلومين فى الليله دى

تحيـــــاتى
المصـــــرى

nirvana يقول...

والله فيه فعلا تجاوزات كبيرة على الفيس بوك و غيره
تلاقى البنت حاطة صور لها كتير ف العدد و بشكل ملفت جدا و خصوصا انها مش مثلا لوشها بس او مش صور فورمال
تلاقيها حاطة صور لها بلبس البيت مثلا و هكذا
لكن

يعنى انا مثلا حاطة فعلا كام صورة ليا على الفيس بوك لكن محدش يقدر يشوفها غير اصحابى و معارفى

تحياتى

مروة الزارع يقول...

احييكى على نصيحتك الجميلة

اول مرة عندك بس مش هتكون الاخيرة

تحياااااااااتى

الشموع البيضاء يقول...

اول زياره بس تحياتى ليك على الموضوع..النت فعلا بقى حاجه مهمه فحياتنا بس زيه زى كل حاجه ليها سلاح ذو حدين سلاح نافع وسلاح ضار..موضوع الناس الى معندهاش ثقافة احترام خصوصية الغير خلو فعلا فى جو من الحذر وعدم الامان وده فعلا سلوك مش حضارى منوب منوب على راى السوريين بس هنقول ايه هو احنا عندنا ايه حضارى اصلا؟؟

khobayb يقول...

أعتقد إن صفحة البنت على الفيس بوك ممكن تكون للأصدقاء فقط ؟ وكذلك الصورة ؟

وكذلك أي شئ آخر على الانترنت

احنا اللي بنتحكم لمن يُعرَض ؟ ومن يراه ؟

وبالتأكيد أول قواعد المحافظة على النفس ..

إنها ميكونش ليها حبيب سابق أصلا !!!!
وتحطله صورها كمان ؟!!!

امواج يقول...

الدنيا بقى فيها حجات كتير تخوف

بد بقيت بخاف
بخاف من كل حاجه

معدش فيه امان فى اى مكان
بسهوله صور تتركب

بسهوله دافع الانتقام ممكن يخلى حد يركب صوره


الدنيا بقت وحشه قوى مش كده

المـــفـــــــقــــــــوعـــــة مــرارتـهــا يقول...

الموضوع ده خطييير جداً ربنا يستر علي الكل منه
الناس بقت وحشة ومالهاش آمان

DayDreaming يقول...

انا مقتنعه ان الانسان المحترم هيحترم نفسه والناس هتحترمه في الشارع بأه ولا ع الشات ولا الفيس بوك مش هتفرق

تقبلي مروري

واحد بيدور علي قلبه يقول...

أكيد زي ما في الوحش هنلاقي الحلو بس لازم ناخد احتياطتنا ونخلي بالنا من حاجات كتير ومعاكي في كل كلامك ويا اما في بلاوي ع النت.

الزواج.....روضة الحب يقول...

اكبر تأثير للنت على حياتى الشخصيةفرحتى لما ألا قى ناس زيك عسلين كاتبينلى تعليق حلو،ثم، زعلى لما جوزى يعد أدام النت وينسى كل حاجة..!

أحمد منتصر يقول...

كده حنضيق ع الناس أكتر وأكتر

زي السلفيين ما بيخلوا إناثهم منتقبات عشان في ناس وحشة

الصح إننا نتصرف عادي جدا

وإن مباحث النت تشوف شغلها كويس عشان تضرب بيد من حديد على المجانين دولا

تحياتي:)

mostafa rayan يقول...

طبعا هو اتصرف غلط لكن هي كمان البنت غلطانة ليه تتصور صور حلبعة من الأصل

داليا محمد يقول...

طبعا موضوع مهم جدا بس الفيس بووك يعتبر اامن مكان لان مش اى حد يقدر يدخل يشوف صورك بس بشكل عام فى بنات فعلا وفى مواقع مفتوحه للجميع يعنى تقريبا سبيل حاطه صور تكاد تكون اكثر من مؤرفه وربنا يهدى الف شكر على الموضوع المهم جدااااااااااااا