الاثنين، 19 أكتوبر 2009

إمرأه واحده لا تكفى !!!!!! ولا راجل واحد ايضا

مقوله شهيره جدا لدى الرجال
إمرأه واحده لا تكفى
و رغم انى مش عارفه ايه موش بتكفى ايه بالظبط
علشان انا بحس ان الرجل الشرقى واخد حقه تالت و متلت
بمعنى
بييجى من الشغل يلاقى بيته نظيف و عياله زى الفل و اكله جاهز
ياكل و ينام و يصحى ياكل و يروح الشغل
يعنى كل اللى بيعمله انه بياكل و يروح الشغل
مافيش مسؤليات بيت عليه
إلا ما ندر علشان الظلم وحش
يعنى الست هيه اللى شايله البيت من بابه زى ما بيقولوا
غيره بقى فى اوربا و الدول المتقدمه بييجى يغسل مواعين و بنظف زيه زيها
و ماحدش بينظف ورا سياته هو اللى بيشيل زبالته
رغم كده رجلنا الشرقى بكل مميزاته شايف ان امرأه واحده لا تكفى
طيب انا كمان و رغم انى مش بحب مبدأ المساواه لانى بحس اننا برضوا متدلعين عندهم
و عليه ممكن الستات كمان يطالبوا بنفس المبدأ
رجل واحد لا يكفى
راجل يسمع وقت ما نكون عايزيين نتسمع
راجل يخرجنا و يفسحنا
راجل ياخد بكلامنا و مايرمهوش ورى ظهره
الطلبات كتير و كل واحده و العدد اللى هيه عايزاه
و من هنا بأطالب و اشدد ان يكون شعار الرجال و النساء
لا اريد من الدنيا إلا واحد يكون هو كل الرجال و اكون انا له كل النساء
محدش هايقدر يطول كل الستات و لا ست هتاخد كل مميزات الرجاله
بس على الاقل كل واحد يحاول يكون كل الرجال و كل السيدات للاخر
و كفايه شعارات بقى

هناك 46 تعليقًا:

لاسع افندى يقول...

اول تعلييييييييييييق

لاسع افندى يقول...

امرأه واحده لاتكفى....اوك

لكن رجل واحد لايكفى ....نوووووو


تحيه لاسعه

لاسع افندى يقول...

وبعدين ينفع واحد يدخل جنينه مليانه ازهار جميله بروايح مختلفه والوان مختلفه
يسيبهم كلهم ويفضل طول عمره يشم ورده واحده
ده يبقى ايه؟؟؟؟




تحيه لاسعه

لاسع افندى يقول...

كل اللى فات كان هزار طبعا
امرأه واحده تكفى وزى الفل



خاصة لو كانت جنبك وانت بتكتب التعليق


تحيه لاسعه جدا

dr.lecter يقول...

معرفش ليه بعد الزواج كل حاجه بتتغير والراجل بيزهق من الست ويبتدي يطلع فيها العيوب ويبص لبره

بجد انا بتكلم بجد عاوز اعرف لييه لاني خايف اعمل كده لما اتزوج

الجواز و سنينه يقول...

لاسع افندى
ياسيدى اسفرت و نورت
و مليت الدنيا نور يا باشا
و بعدين ايه التحيز ده
امرأه واحده لا تكفى اوك راجل واحد نو
بلد ذكوريه صحيح
ههههههه
و بعدين هيه الستات ورود و الرجاله ايه ؟؟؟؟
حق الشم مكفول للجميع على فكره
ههههههههههههههههههه

و بعدين بدام الورده قاعده جنبك و انت بتكتب كل التعليقات
يبقى هنيالك ياعم بالبوكيه الجميل اللى عندك
صحيح هو التعليق الصحيح الاخير و لا اللى قبلهم
هههههههههههه

الجواز و سنينه يقول...

dr.lecter
بص يا دكتور هى الموضوع مش بيتغير بعد الجواز
بس الواحد بيكون مش عايز يشوف عيب فى خطيبه فامش بيشوفه
لو فضل مكمل بنفس العين دى هايلتمس العذر و يفضل شايفها احلى بستان ورد
نورتنى يا دوكتور
و اتجوز ما تخافش
العين الزايغه دى بعيد عنك داء مالوش دوا مع الاسف

Cute Kitty **sookra يقول...

كونى له كل النساء حتى يكون لك كل الرجال"
نصيحه موش عارفه مين اللى قالها
تحياتى

Sweet Violet يقول...

يعنى اللى قصادى وحش اكون انا زيه ؟؟
و كمان لو اتكلمنا فى الواقع .. حواء انقرضت بإنقراض ادم اصلا
يعنى هما الاتنين الصراحة فقدوا خصائصهم من بدرى
v_v

مطلق يقول...

حق ايه يا ست الكل الي بتتكلمي عليه احنا اقليه في البلدي خلاص

أبو كريم يقول...

أرفع لك القبعه

كلامك مليون فى المية صح صح صح

تدوينة بجد رائعه

أحسبها صح تعيشها صح الإعلان ده عاجبنى قوى ولو مشينا ع المبدأ ده كل واحد أو واحده يختار صح هيكمل صح وطبعا الدين فى أولويات الإختيار

تقبلى مرورى

أحــوال الهـوي يقول...

موافقك علي نص ما كتبتي
الست فاهمه ان الجواز بيت و طبيخ وتربية اولاد فالاولي ان ان يستعين بخادمه
و لكنها تتناسي ان فيه كائن اخر له حق في هذه المنظومه
سيدتي تتكلم الزوجه فقط عن حقوقها و تضحيتها و تتناسي دور الزوج
حينما نقارن الزوج بالخارج و الداخل نقارن الزوجه ايضا
كم من مرة تشعر الزوجه برغبة زوجها و تلبيها
انها تعتقد انه دور ثانوي
تحياتي

أحــوال الهـوي يقول...

امرأة و احده لاتكفي
نعم
و راجل و احد لا يكفي
لا
لانه مخالف لطبيعة المراءة و عقيدتنا الاسلاميه
و ليست افكارا ذكوريه

تحياتي

mohamed ghalia يقول...

دول بس الرجالة الى عنيهم زيغة الى بيقولوا كده
يلا ربنا يهدى

الجواز و سنينه يقول...

Saso

هيه هيه نفس النتيجه
المهم الرغبه فى الرعايه الطرف الاخر تكون من اهتمامتنا
نورت يا جميل

الجواز و سنينه يقول...

Sweet Violet
لاء طبعا لو اللى قصادك وحش من مبرر لمبادله الوحاشه بأخرى
بس صحيح انهم هما الاتنين فقدوا اختصاصاتهم
احنا اصلنا مش بنقلد غير الوحش
رغم ان اللى بنا مصر كان فى الاصل حلوانى بس اظاهر انه قلب مسمط

الجواز و سنينه يقول...

مطلق


و الله انا مش بحب اخد الامور على علاتها و احكم احكام عامه
زى ما فيه رجاله مفتريه فيه ستات كمان
و اللى ينكر ده يبقى مفترى
و انا موش مفتريه
و انتوا مش اقليه و لا حاجه
بس انا بتكلم على بيت فيه اتنين
مش المفروض واحد يكون اكتريه و التانى اقليه

المفروض فيه تفاهم و تعاون و مشاعر جميله متبادله
و اللى مش عايز يوصل للنتيجه دى يبقى لازم يغير نفسه او مايتجوزش من اصله
و لازم نعرف ان دايما فيه منطقه وصل للتفاهم
بس مين يعرف و مين يفهم و يعمل

الجواز و سنينه يقول...

أبو كريم

ايه النور اللى هل على المدونه ده
مرسى على الكلام الجميل ده يا فندم
و فعلا الاعلان جميل
بس احنا مع الاسف ضعاف فى الحساب
و إلا ماكناش ده بقى حالنا
المهم فعلا الاختيار
ده الواحد لو هايشترى عربيه بيقعد يدقق
فى الجواز بقى ياخدها بعلاتها و بعد كده يصوت
طيب ما كان فى ايدك بس كنت بتحسبها غلط
نورتنى يا باشا

الجواز و سنينه يقول...

أحــوال الهـوي

اهلا بالمعارضه
طيب انا موش عرفت ايه اللى موافق عليه
بس عرفت المعارض له
و هاقول لحضرتك ان دور الراجل انه يشتغل و يجيب فلوس
و دور الست انها تشوف بيتها و اولادها
الراجل بيشتغل 12 ساعه و ده فى الغالب مش بيحصل
الست بتشتغل 18 ساعه و يادوب بتنام 6 ساعات لو لقيتهم
الراجل بييجى من الشغل يفضل قاعد لغايه ما يروح تانى
الست ماتقدرش تعمل كده
الراجل عنده اجازه فى الغالب لو مش وراه حاجه بيفضل قاعد فى مكانه
الست مالهاش اجازه اصلا
و عليه مش مبرر انها تنسى الراجل
بس هو كمان يراعى ظروفها او يساعدها علشان تفوقله و تريحه هو كمان
اما ان من حق الرجل اسلاميا انه ممكن يتزوج اكتر من واحده
فمن حق المرأه إذا لم تستريح مع الرجل ان تتزوج غيره
و هو ده اللى بتكلم عليه
ان مش ممكن و لا الرجل و لا المرأه يتبرموا لمجرد التبرم
و يقول مش مكفيانى و مش بيسعدنى
دايما لكل مشكله حل و اكثر
يعنى مش فاضياله
ساعدها تفضالك
منتهى البساطه صح
بس تفتكر لو هو مش بيسمعها تتكلم مع مين؟
الدين و لا بيسمحلها و لا بيسحمله بالكلام بره على فكره
و إلا فين غض البصرو الكلام ده
مش كل اللى هايعجبنى هاخده
حتى لو الدين محلل للراجل التعدد بس بيحكمه على الاقل المجتمع
و فيه كلام كتير عن التعدد بس انا مش عايزه ارغى كتير
المهم نورتنى و اى معاضه انا مستعده

micheal يقول...

متفق معاكي جدا
شفتي حقاني اهو
:)

صيدلانيه طالعه نازله يقول...

دودو يا حبيبتى للاسف كلامك صح
يجى الراجل من دول تبقى خارجه معاه و متشيكه و حاطه روووووووووووووج و فجأه تلاقيه ملوووووووووووح على واحده تانيه لابسه حاجه ملفته و لا كابه على نفسها قزازه برفان و يبصلك و يقولك شايفه الستاااااااااات يا هانم
خدت الموضوع كام مره و سكت و بعدين مره كان واحد شاب شيك قوى و راكب عربيه تحفه و ملزق شعره بجيل مان لوك رحت بصاله بقرف و قولتله شايف الرجاااااااااله يا بيييييييييه
و بكده نبقى طبقنا مبدأ المساواه
مش كده و لا ايييييييييه

rovy يقول...

الله عليكى يا دودو ..
بجد و الله بوست رائع و كلامك صح ميه الميه .. مع انى متأكده ان فيه ناس كثير ممكن تعترض و مش رجال بس مع الاسف احنا بنرجع ورا و حقوقنا اللى امهاتنا ضيعوا عمرهم يجيبوها لنا احنا اللى بنفرط فيها بكل سهوله طبعا بعض النساء علشان ما اعممش خصوصا ان لسه فيه ستات جدعه زيك يا قمر ..

وحشااااااااانى كثيييييييييير
بوسيلى بناتك الامامير ما شاء الله عليهم ربنا يحفظهم يااارب

تحياتى و حبى لكى

مي يقول...

ايوة كده ياختى جيبيلنا حقنا
هههههههههههههههه
هو طبعا الراجل لو عايز يتجوز تانى ابو عين زايغة هيتجوز حتى لو مراته مكفياه وعايشة تحت رجله برضه هيتلكك على اى حاجة
بس دول مش بقدورا النعمة اللى معاهم ولما ياخد على دماغة بقى يبتدى يصحصح كده
بس يفيد هيفيده الندم بايه يا ضنايا هههههههههههه
تسلمى ياقمراية مبدعة كالعادة

بسنت صلاح الدين يقول...

عندك حق والله مش عارفه ايه الظلم ده دى الست المصريه شايله البيت و متحمله مسئوليه كل حاجه و الاولاد و كمان بتشتغل و كل ده ولا تكفى ، انا معاكى فى كلمه

donya يقول...

اول مره ادخل المدونه
جامده وبوست جامد

بس امراه واحده لاتكفي

العيب علي التانيه اللي خلت واحده ماتكفيش لو المراه لمت نفسها ومابصيتش لزوج امراه تانيه
الرجاله دولهمه مش هيلاقوا امراه تانيه

*تحياتي

dodo يقول...
أزال المؤلف هذا التعليق.
الجواز و سنينه يقول...

micheal
اشى خيال يا ناس
و انا قلت هاتدخل تقاوح
و الله ما مصدقه نفسى
حقانى حقانى
و لا وزاره الحقانيه كلها
حلو كده
نورتنى يا باشا

الجواز و سنينه يقول...

صيدلانيه طالعه نازله

علا يا قمر
وحشاااااااانى جدا و الله
بس ايه ده ازاى تبقى حاطه روج و هو يعمل كده
دى حاطه روج يا راجل
و فى الاخر يبص على ايه حتته واحده عامله فى روحها البدع و زى القمر
ييجى ايه ده جنب الروج
بس ايه انتى ردتيها صح
و كل الرجاله دلوقت هايشتروا جل مان لوك

فعلا يا دماغك المتكلفه

الجواز و سنينه يقول...

rovy
روفى حبيبتى
ربنا يكرمك على التشجيع الجميل ده
فعلا انا متوقعه هجوم كبير بسبب كلامى ده
بس الحمد لله هيه مستوره لغايده دلوقت
بصى عايزه اقولك ان لو الرجل عجبته واحده يخرب بيته علشانها و يرجع يندم فى الغالب الاعم
و نقول نزوه
لكن الست مالهاش نصيب انها تخرب البيت علشان نزوه
زغم ان الاتنين برضوا مش هايعملوا حاجه حرام الاتنين هايتجوزا
لكننا نقول للراجل ان ده حقه
و الست هاتك يا شتيمه و خربت بيتها و مش عارفه ايه
طيب و الراجل اللى بيعمل كده كان متخيل ان مراته هاتسكت
عجبى

الجواز و سنينه يقول...

مي

ايوه و الله يا اختى على رأيك
الراجل بتجوز حتى لو مراته مكفياه
مس مهم بيته اللى هايتخرب
المهم يفضل يدور على اللى تكفيه
المهم هو
مش مهم هيه
حاجه غريبه و الله
و سمعنى اغنيه تفيد بأيه يا ندم
نورتينى يا قمر

الجواز و سنينه يقول...

بسنت صلاح الدين


الله يخليكى يا جميل
نورتينى و طمنتينى انى الحمد لله ما افترتش عليهم
ربنا يهدى الجميع

الجواز و سنينه يقول...

donya


نورتينى يا جميل فى اول زياره
بس عايزه اقولك
ان مش عيب الستات لوحدهم
محدش بيكون منوم مغناطيسيا و هو بيتجوز على مراته
هو المفروض يحسب كل حاجه كويس
و التليفزيون مليان بلاوى الهبل ده
و برضوا ماحدش بيتعلم من غلط غيره
آل يعنى الواد حسين فهمى و هايموتوا عليه
و هو فى الغالب عايزاه علشان فلوسه

Unknown يقول...

انا موافق اشتغل في شغل البيت بس بشرط تشغلةني زي ما بيشتغل الاجل بره في أوربا وأمريكا
أنا بشتغل 3 شغلانا وبطلع من 8 ص إلى 10 م

طب واحد زي يقدر يشيل معلقة بعد الهده دي كلها

أنا شايف أن الحل بسيط

وصية الرسول صلى الله عليه وسلم لعلى وفاطمة رضى الله عنهما
على كل شيء يتعلق بخارج البيت حتى لو شراء مستلزمات البيت
وفاطمة لكل شيء داخل البيت

بالإسلام تعود حياتنا هانئة وسعيدة بعيدا عم حقي وحقك

وفي علمك أن شايف أن أمرأة واحدة تكفى ونص لو كانت فاطنة وذكية وعندها اتزان في كافة أمور حياتها فلا يطغى جانب على جانب

أرجو ان تتقبلي كلامي

ويبقى التواصل

Tamer Nabil Moussa يقول...

كلامك صحيح

واتفق معاكى.

ياريت كل ست تبقى كل الستات لرجل واحد

والرجل يبقى كل الرجال ست واحدة

مع خالص تحياتى

سلوى يقول...

جميله مدونتك قريت كتير منها
عجبني موضوع موقف غريب
وازاي حاولتي تحمي الولد اللي امه سايبه تربيته على الشغاله

احييكي

أحــوال الهـوي يقول...

توضيح
اللي موافق عليه نصف الاول من كلامك لانه سمة تعود عليها الرجل منذ صغرة مدلل من امه و تري انه من العيب ان يعمل اشغال البيت و ده تقليل من رجولته و كان رسولنا( صلعم ) يساعد زوجاته بالمنزل و انا لا اجد غضاضه في هذا
يعني انا معارض للمعني الظاهر اللي تفضلتي بايضاحه بالرد

نحن لا ننكر دور المراة و هي تعمل اكثر مما ذكرتي نسيتي الحمل و الولاده و رعاية الاطفال
و لكنها في وسط هذا الانشغال تنسي و جود الرجل و حقوقه لا تري فيه الا انه لا فائدة منه في البيت فحينما يتفرج علي التي في مشكله و لو جلس يقرا كتاب اهملها و اذا خرج مع اصحابه سايبها لوحدها و لكنها لو تكلمت في التليفون لساعات هذا حقها لانها مخنوقه
لا تتكلم المراة مع زوجها الا في المشاكل لو كلمها في الحب تقوله انت رايق و انا عايزة اطبخ اذا لم يتكلم يبقي فيه و احده تانيه

طولت اسف
تجياتي

with you يقول...

السلام عليكم ورحمة الله وبركاته

أولا هذه أول زيارة لي للمدونة وإنطباعي أنها تناقش قضايا مهمة بالنسبة للأسرة الإسلامية والعربية الشرقية....

ثانيا أتفق معك في 99% من كلامك غي أني لا أتفق مع الشعارين

إمرأة واحدة لا تكفي.

رجل وحيد لا يكفي.

أختي في الله

أتفق معك علي أن الزوج يساعد الزوج في بعض الأعمال لأن النبي صلي الله عليه وسلم " علي الرغم من كونه من رئيس وقائد الدولة وكل مشغولياته العظام" كان في عمل أهل بيته

1: كان يكم البيت " أي يكنسه "

2: ويحيك ثوبه " أي يخيطه "

3: ويقضي حوائج زوجاته " يساعدهم في قضاء الحوائج "

وهذا حتي يضرب بكل من قال أنه مشغول عن زوجته.

ولكني في ذات الوقت أقول أن من كان هو السبب في هذه الكارثة " وهي كون الرجولة هي عدم مساعدة الزوجة في البيت " هي زوجة سابقة " أم الزوج "

ألا تتفقين معي في ذلك فلو عملتي أنت من الأن علي تعليم إبنك أن يرتب حاجته وينظف مكانه ويساعدك في غسيل الأطباق فسوف يعمل هو بدوره علي مساعدة زوجته في المستقبل وسيكون هذا هو طبعه.

ولكن علي الزوجة أن تلتمس لهذا الرجل الأعذار وتعلم أنها بلمستها الحانية قد تقربه من شفائه من جميع متاعبه

وعلي الزوج أن يعلم أن كلمة شكر مع لمسة حنان قد أزال جبال التعب عن زوجته وقد وضعها في نصابها الصحيح.

ودعونا من حقي وحقك.

وضعونا في مودة ورحمة.

ولكن أختي علينا أن نعرف إمرأة واحدة لا تكفي " من جهة الشرع غير صحيحة".

وعلينا أيضا أن نعلم أن رجل واحد لا يكفي " من جهة الشرع حرام ".

ولكن علينا معشر الرجال أن لا نقول ذلك لأنها إهانة للمرأة.

وعليكم معشر النساء أن لا تقولوا هذا لانها إهانة لكم قبل أن تكون حرام شرعا.


والختام يقول المولي عز وجل

ولهن مثل الذي عليهن بالمعروف


تحياتي لفكر رسالتك

محمد حياتنا

Unknown يقول...

كنت لسه هقولك طب ماندور علي واحد يكون بكل الرجاله

كلمات من نور يقول...

خليه يبدل يا فتاتي يقعد في البيت يوم واحد وتنزلي الشغل مكانه يوم واحد واتفرجي

ههههههههههه كان عندي إيميل زمان عن زوج وزوجة بدلوا وظائفهم يوم وبعد تسعة أشهر أنجب الرجل بيبي


ربي يكرمك الدنيا ماشيه بالعكس ومش بيقدروا برضه والله...ربي يهديهم

Beram ElMasry يقول...

الاخت العزيزة الغالية الجواز وسنينة
آمين آمين يا رب العالمين
كان الله في عونك وكل ما نتمناه أن تكوني بخير وأن لا تحرمينا من الزيارة قدر المستطاع فإنا بتعليقك نسعد والسلام ولا سلام مع بني إسرائيل قتلة الأطفال والأنبياء .

mahasen saber يقول...

والله يكفى لو كل واحد شاف التانى كل الناس وحس انه معاه نعمه وبشر شيه الماس

انا اعتقد ذلك

اه مش الماس الكهربائى

كلام عيب يقول...

فعلا معظم الرجاله بقوا نفس النظام يبقى مشنكل واحده فى ايده و دماغه ملووحه على واحده وراو يا سلام بقى لو قدامه قشره موزه مش شايفها يبقى دى عداله السماااااااء اللى هبطت على جدور رقبته

اقصوصه يقول...

عجبني الشعار

انا اؤيد

لووووووووول

مـجـنـووون يقول...

والله كل وأحد واستطعته

ولما ربنا حلل للرجل اربع زوجات مكنش بيقول كده هباءاً ولكن ليه عله وسبب

وبعدين الزوجة مينفعش تتزوج كذا راجل ازاي اصلا هتعرف تجمع بينهم

بس نقول العدل هو اصل الشرع والتشريع
والي يقدر يعدل ويكفي بيته واهله يبقي ربنا يوفقه

تقبلي مروري
مجنووون

زقطـوطـة يقول...

صحيح....رجـل واحد...لا يكفي
عندما تغادر المرأة بيت أهلها
فهي تترك أبا .. أما..و أخا
فكن لها عزيزي الرجل
الأب..الأخ..الأم..والزوج :)

تحياتي

micheal يقول...

بوست جديد بقى
:)