الأحد، 22 نوفمبر، 2009

انا حذرتكم يا رجاله





من زمان و من فتره طويله
ده على اساس انى عندى 99 سنه
حذت و قلت للرجاله خلو بالكم
قولوا للستات كلام حلو و ان لو مش سمعت من جوه هاتسمع من بره
و لا حد سمع كلامى
و طلعت انا صح
الدليل بقى مش قالولوا
الدليل القصه اللى كانت مكتوبه فى بريد الجمعه من اسبوعين كده و الردود اللى كانت عليها
القصه كانت عن واحده خانت جوزها علشان مش بيقولها كلام حلو و مش مهتم بنضافته الشخصيه
و رغم المميزات اللى انا متخيله انها ممكن تكون فيه
هيه ما قدرتش تتغاضى عن احتياجاتها النفسيه فسمعت بره
و كانت الوقعه
طبعا زى ما قلت مافيش مبرر للخيانه
بس ليه الراجل لما يخون يقول اصل مراتى مش مهتمه بنفسها و احتياجاته النفسيه مش عارف ايه
و نسامحه و لو الست عملت كده يبقى نعلقلها المشانق
لو عدينا غلطه الراجل نعدى غلطه الست
مش بصادر طبعا على حق الراجل فى الزواج من اخرى
بس متهيألى ان كله بيستسهل و يعك
اللى خلانى اكتب ان الردود على الموضوع من سيدات اوشكوا على الخطيئه او وقعوا فيها
زى ما يارجاله عايزين الواحده دايما متهيألكم انتوا كمان اتهيأولهم
مش بس انك تهتم بالنظافه
لاء كمان انك تسمعها كلمتين حلوين
هيه محتاجاهم علشان تقاوم لو هيه مش عندها المقاومه الذاتيه
المقاومه هاتكون لذئب قاعد مستنى الفريسه
و ما اكترهم
زى ما انت المفروض هيه تكون عفتك انت كمان كون عفتها
و خلص الكلام سلام


هناك 59 تعليقًا:

صيدلانيه طالعه نازله يقول...

و الله يا بنتى ما قصرتى و عداكى العيب و قزح
يا رجاله حسوا شويه بالست اللى طالع عنيها من صباحيه ربنا عشان تريح البيت كله و مع ذلك محدش بيدور على راحتها
و دايما تطيب خاطر الكل و محدش بيبل ريقها بكلمه حلوه
خدوا بالكم و انتبهوا عشان مترجعوش تندموا
و قد اعذر من انذر

عاشقه وغلبانه يقول...

انا كنت قريت القصه دي افتكر انها كانت من اسبوعين بالظبط يوم لقاء المنصوره

المشكله اللي ادت للمشكله دي هي ثقافه الشعب بالكامل
الكيل بمكيالين
للراجل حاجه والست حاجه
الاتنين يغلطوا مع بعض نفس الغلطه وسبحان الله ممكن يكون الراجل اللي خططلها والست وقعت فيها من ضعفها تلاقي المجتمع سامح الراجل واداله الفرصه يطلع يتمنظر بفعلته ويبقي واااااااااو وماحصلش والست تداري وتبقي قليله الادب مذنبه

ده العادي بتاع المجتمع
انا مش بقول الاتنين صح
لا بالعكس الاتنين غلط

rony يقول...

انا معاكى فى اللى انتى بتقوليه
محدش بيقول انا غلطت فى كذا
لكن بيقول هى غلطت فى كذا
بيعلق اخطاؤه على شماعتها هى
ومجتمعنا للأسف الست لما تغلط
وتقصر فى حق جوزها غصب عنها
يبقى عايزه الرجم بالحجاره
اما لو هو عمل كده
يبقى لازم نعديله ونستحمله
اصله ده سى السيد لازم نطيعه
فى اى حال من الاحوال
وربنا يهدى ادم على حوا يارب
وبس خلاص
تحياتى

لاسع افندى يقول...

الراجل طفل كبير
بيعتمد على الست فى كل حاجه لازم هى تفهم ده كويس
وهو لازم يفهم ان الست مفتاحها ودانها
ممكن يكسبها بكلمه صغيره
اى نجاح لازمه اجتهاد
مافيش حياه ناجحه ببلاش بدون مجهود
حتى الحب وحده بدون رعايه مش كفايه



تحيه لاسعه

كلمات من نور يقول...

كلام صحيح وفعلا أنا سمعت بنفسي قصة لامرأة وقعت في المعصية بسبب الزوج وكتبت مقال بعنوان : اتقوا الله في النساء

http://mamanooor.blogspot.com/2009/03/blog-post_28.html

حقا على الرجال أن يتقين الله في النساء فهم سيحاسبوا عليهن يوم القيامة فهو الراع المسؤول.

mahasen saber يقول...

القصور من الزوج فى حاجات بسيطه للاسف الشديد بيعمل فجوه ما بين الاتنيين
فبنلاقى كل واحد راح فى اتجاه بس للاسف مع اصحاب النفوس الضعيفه من الطرفيين بتقلب بخيانه زى ما فى الحكايه دى

فمن الاول كل واحد يحترم متطلبات التانى ويعملها
وبعدين على رأيك محدش بينصب مشانق للراجل ليه

عارفه لو ست اشتكت من كده هيقولولها ايه
تعبان وشقيان على لقمة العيش عشان يأكلك انتى وعيالك

مع انها بتطلب ابسط الامور لا هتكلفه ولاا هتجهده

amirelhob يقول...

تقريبا انا موافق على كل الكلام بتاع البوست دا وبوست لذيذ والله وعاجبنى جدا وعارف طبعا ان راى متواضع بس بجد بوست يجنن وكل نسه وانت ى طيب ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر

أحــوال الهـوي يقول...

كلاكيت 99 مرة
لا فرق بين الرجل و الست في الخيانة و كل ما استطيع قوله ان مداخل الشيطان و وساوس النفس كثيرة و منها محاولة ايجاد مبرر ولو تافه او اسقاطات واهية لايجاد سبب للخيانه

فالرجل الذي يري بدلال عشيقته مقارنة بزوجته التي ترعاه و ترعي بيتهو اولاده سبب يتجمل و يوظف من ترعي البيت و الاطفال والاشغال الشقه في البيت و يجعل امراته متفرغه للدلال و الغنج
و السيده التي ترغب بسماع الكلمات من زوجها حين عودته من عملة و قد تعرض لضغوطات كثيرة تصبر عليه حتي يرتاح و سوف تسمع ما تريد

للاسف حينما يحل الزوج الي البيت تبدا الزوجه بالشكوي من الشغل و الاولاد و الدنيا كلها و تتعجب لماذا لا يقول كلام ظريف لها و هي قد سدت كل منافذ الهواء و هو لا يقوي علي التنفس
و يأتي القناص الذي لا يسمع الا تنهيدات الشوق و النشوي فمن الطبيعي ان يسترسل بالكلمات الخاوية من اي احساس الا بقضاء و طرة

لا فرق لا فرق بين الرجل و المراة فالخيانه خيانة للدين و النفس و الاعراف

و نبطل تكرار التفرقه حتي لا نسمع غدا ان من حق المراة ان تخون كما يخون الرجل

تحياتي

مخنوق كيك يقول...

انا شايف ان القصة دي ماخوذة من فيلم عشان ربنا يحبك

صح يا غشاشة ؟

علي كل احنا الرجاله مش بنخاف واللي عايزه تعمليه اعمليه
ومفيش كلام حلو غير لما طبق الملوخيه ينزل علي السفرا

بس الكلام الجد بيقول ان موضوعك حلو ولمس وتر حساس في قلب العلاقة الزوجية الجميلة
ولازم كل واحد حريص علي حياته الاسرية انه يكون فيه رومانسية وحب متبادل

يا اما مفيش ملوخية

bos bos يقول...

والله عندك حق

بس انتى عارفة اللى بيدن فى مالطة

نفسى فعلا الكلام ده يتحقق

يارييييييييييييت

أحمد عاطف يقول...

السلام عليكم ورحمة الله وبركاته

بادئ ذي بدء إن مبررات القذارة ... عفوا الخيانة واحده لدى الطرفين نفس الاحتياجات النفسية و ... و ... و ... ولكن لا مبرر للخيانة مهما كان ومهما حدث

الطرف المظلوم يمكنه ان يتحدث وان يقول .. من حقي ومن حقي ولكن عدم مطالبته بحقه يعد تنازل عن حقوقه مما يعطي الحق للطرف الاخر التفريط فيها

تاني حاجه واسمحيلي اتكلم بالعامي بس ... خيانة الرجل في مجتمعنا المصري مش مجرد معرفته بواحده ست اخرى غير مراته ... الزوجة بتعتبر الخيانة هو زواجه من اخرى غيرها

يعني اهون عندها انه يمشي في الحرام لكن مايتجوزش غيرها

فخيانة الزوج مش مبرره ولا حاجه هي الست اللي مبصتش للخيانة الصح على انها خيانة

وبصت على شرع الله على انه خيانة فالخلل في الانثى هنا مش في الرجل

لو الست بصت بعين ان كون زوجها يعرف غيرها دي خيانة والله الرجالة هتخاف وتقلق

HAPPY يقول...

هو أساسا الست محتاجه الحنيه والاهتمام والكلام الحلو اكتر من الراجل..
والرجاله لازم تراعى اختلاف شخصيه الست عن الراجل...
انا مش بشجع ست ذى دى على الخيانه بس فى الاخر احنا بشر وكل واحد ليه احتياجاته النفسيه ..

بسنت صلاح الدين يقول...

انا معاكى فى ان الخيانه ليست غلطه فرد و لكنه خطأمشترك من الاتنين ، و العجيب ان الرجاله لا يعترفوا ابدا بخطأهم فى الموضوع ده ، رغم انهم بيطالبوا المرأه انها تبقى على اهبه الاستعداد و فى تمام الجمال و الاناقه فى انتظارهم،كل سنه وانتى طيبه وبوست رائع

mohamed ghalia يقول...

كل سنة وانتى طيبة
ربنا يسعدك دايما

قيس بن الملووووح يقول...

كل عام وانتم الي الله اقرب
وعلي طاعته ادومِِ

عاشقه الرومانسيه يقول...

كل سنه وانتى طيبه ياقمر
وياريت الناس تفهم
(:
اكيد هيرتاحوا ويريحوا

micheal يقول...

صدقيني كل ده موروثات لمجتمع ذكوري بحت ودي حقيقة لازم نعترف بها
يعني دايما بنحاول نبرر الغلط للراجل ونقول مثلا نزوة ولو الشست تبقى الخطيئة العظمى مع أن كله عند ربنا واحد
الست والراجل بيكملوا بعض..صعب أوي اللي احنا بنعمله ده ونفتكر أن كل حق للمرأة ينتقص من الراجل
كل سنة وانتي طيبة
تحياتي

خالد الاسكندرانى يقول...

why she doesnt divorce him if she interested in someone els ?!

sookra يقول...

دا بيحصل لاننا عايشين فى عالم ذكورى بحت

عابرة السبيل يقول...

عندك حق

بس الست لازم تصبر وتستحمل وتيجى على نفسها وتعصر على روحها لمونة وما تتكلمش وما تشتكيش وتحمد ربنا على العيشة والاربع حيطان وتبوس ايدها وش وضهر وتصلى ركعتين شكر ان فى واحد عبرها وانقذها من العنوسة ولمها بعد ما كانت متبحترة واسمها على لسان كل خاطبة

يا شيخة مافيش فايدة المجتمع ده مجتمع زكورى بحت ....وفى ستات لسه بتدعم الافكار دى

بلا خيبة

زقطـوطـة يقول...

واحشاااااااااااني مووووووت
وصح لسااااانك طبعا
مش بنزايد ولا بندافع
بس فيه احتياجات نفسية مش ممكن تتعوض باي حاجة
لازم يكون الرجل مهتم
لكن هم كده .. صنف رمرام :S

الجواز و سنينه يقول...

صيدلانيه طالعه نازله
ايه رفع المعنويات الجميله دى
الله يخليكى ليه يا جميل
نفسى الرجاله تسمع علشان تعرف
الكلام الحلو مش بفلوس
يبقى ليه بخل المشاعر ده

الجواز و سنينه يقول...

عاشقه و غلبانه

وحشاااااااانى جدا يا جميل

طبعا الاتنين غلطانين
و ماحدش المفروض يغلط
كمان مش من المفروض ان حد يدى فرصه للتانى انه يغلط
كل واحد يفهم نفسيه التانى و يتعامل من خلال كده

الجواز و سنينه يقول...

رونى

بصى خلينا حقانيين
محدش بيعترف بغلطه و لا راجل و لا امرأه
كله بيعلق غلطه على اللى ادامه
بس مافيش مبرر للغلط
حتى لو اللى ادامك مش مديك اللى انت عايزه يبقى انت ادامك حل من اتنين
يا اما تطلق يا اما تستغنى عن احتياجك
و كلاهما مر

الجواز و سنينه يقول...

لاسع افندى

احلى تحيه لاسعه ليك يا فندم

فعلا الراجل طفل كبير و المرأه مفتاحها فى ودانها
صعبه دى ؟؟؟؟
ليه محدش عايز يفهم التانى ؟؟؟؟
ناس غريبه

لجين أبو الدهب يقول...

كله عليه حقوقه وواجباته
مافيش فرق بين راجل وست فى المواضيع دى
مش غلطة الراجل بواحد وغلطة الست بألف
ربنا يهدى الجميع

جزاكِ الله خير الجواز وسنينه ..

م/ الحسيني لزومي يقول...

نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن 45 يوم

بنت الغربة يقول...

ازيك ياحبيبتى وحشتينى قوى
البوست ده واللى قبليه حلوين قوى..
ومعاكى حق فى كل اللى بتقوليه..
الست مهما كانت قويه ..متاجه للكلمه الحلوه تطرى على قلبها من الخنقه..
بس برضه ارجع وااقول مافيش مبرر للخيانه..لكن فيه مبرر للانفصال او الطلاق حتى لو كانت مبررات زى دى ..
لان الخيانه عقابها عند ربنا عظيم قبل مانفكر عقابها ايه عند جوزها..
ومادام ربنا حلل لها الانفصال ..يبقى لازمتها ايه الخيانه..؟؟؟
تسيبه وتتجوز غيره شرعا وحلاالا..
ده رأى..وتحياتى ياقمر

Beram ElMasry يقول...

سيدتي الجواز وسنينه
ياااااااااااه اشرقت الانوار وشك وله القمر شرفتينا واسعدتينا
اما الاكل بالدين يعني لو نستدين من اجل الطعام فالموت اكرم
وياريت تتابعينا لنعرف رأيك السديد فيما اكتب من شعر عاطفي او اجتماعي واليوم قصيدة جديدة
ولك تحياتي والسلام ولا سلام مع اليهود

rovy يقول...

وحشتينى .. اخبارك ايه يارب تكونى فى احسن الاحوال انتى و بناتيتك الصغننين ربنا يبارك لك فيهم يارب يا دودو ..
بوست رائع و عندك حق فعلا فيه مع الاسف رجال كثير جداا خصوصا فى مجتمعتنا الشرقيه بيعرفوا يقولوا كلااام جميل جداا بس بره البيت و لكن فى بيوتهم ياسااااتر .. بجد ربنا يهديهم ..

ارق تحياتى لكى

شمس النهار يقول...

ازيك

هاتي مهما تهاتي

هي دي النفس البشريه

والمتضرر يلجأ الي الله


المراه في مجتمعنا الشرقي لها الله

وطول عمري اقول:
الكلمه الطيبه صدقه تبسمك في وجه اخيك صدقه
مابالك بقي لزوجتك

كل سنه وانتي طيبه
سلام

micheal يقول...

في إنتظار بوست جديد

الجواز و سنينه يقول...

كلمات من نور

تعليق هايل و بجد اسعدنى
و رغم ان مافيش مبرر للمعصيه زى ما قلت لان كل واحد معلق من عرقوبه زى ما بيقولوا
بس لازم الاتنين يتقوا الله فى بعض
هو عليه انى يراعى مشاعرها زى ما بيراعى طلبتها بالظبط
و ربنا يستر على الجميع

الجواز و سنينه يقول...

mahasen saber

محاااااااااااااسن الجميله
نورتينى يا جميل
و بعدين الراجل تعبان و شقيان
عايزاه يدخل من البشغل يسلم و كلمتين حلوين و ماسج كده من الشغل فيها وحشتينى ان شالله مره فى الشهر او كل ما الظروف تسمح
ايه الطلبات الكتيره دى
بس عارفه هيه لو مش عملتله الاكله اللى هو عايزها
ممكن يبص بره و يبقى عنده حق اصل الهانم مقصره
ماحدش بيعلق المشانق للراجل علشان عشماوى راجل مش انثى
ههههههههههههههههههههه

الجواز و سنينه يقول...

amirelhob

رأيك جميل جدا و هايل و ليه ثقله طبعا
و كل سنه و انت طيب و ربنا يسعدك يارب
و مرسى على الدعوات الجميله دى

الجواز و سنينه يقول...

أحــوال الهـوي يقول...

كلاكت 999999999999
انا اصلا بقول مافيش مبرر للخيانه و لا من ارجل و لا من مرأه
يعنى انا بصادر على ده من الاول و مش بسامح فى الخيانه حتى لو الطرف التانى كان خايف فده مش بيدى الحق برد القلم و الخيانه بالمثل لان فى الاخر كل واحد هايتحاسب لوحده
و هايشيل عمله لوحده كان خاين فالنفسه و إلان كان صالح فلنفسه
ده بس علشان حضرتك فاكر انى بدعوا للمساواه فى الخيانه و ده مش صحيح
انا اللى بستغربله ليه بس النظره بختلف
يعنى الست الخائنه و هيه مخطئه من وجهه نظر المجتمع ماتستاهلش الحياه
و الراجل الخائن يتبصله على انه نزوه و عدت و خلاص مش هايكررها
هو ده اللى بتكلم عليه
عايزه اقول لحضرتك انى اعرف ناس و الله شايليل اجوازهم من على الارض شيل و برضوا مش بيقولوا كلام حلو لانهم يا مش حاسينه يا اما خايفين يقولوه فايتقال ان مراته ممشياه مش عارفه الصراحه وجه نظرهم ايه بس هيه اكيد غلط
علشان كده انا بكتب عن احتياجات الانثى علشان اللى مش عارف يعرف
ماتخافش ماحدش هايطالب بالمعامله بالمثل فى موضوع الخيانه
لان اللى هايعمل كده مش محتاج مبرر اقوى من اللى هو قاله لنفسه علشان يوصل للخيانه
ـــــــــــــــــــــ
للاسف حينما يحل الزوج الي البيت تبدا الزوجه بالشكوي من الشغل و الاولاد و الدنيا كلها و تتعجب لماذا لا يقول كلام ظريف لها و هي قد سدت كل منافذ الهواء و هو لا يقوي علي التنفس
و يأتي القناص الذي لا يسمع الا تنهيدات الشوق و النشوي فمن الطبيعي ان يسترسل بالكلمات الخاوية من اي احساس الا بقضاء و طرة
ــــــــــــــــــــــــ
جزء عجبنى اوى هو الصراحه التعليق كله هايل

الجواز و سنينه يقول...

مخنوق كيك

و الله لو المؤلف يكون هو اللى بعت المشكله لبريد الاهرام يبقى هو اللى غشاش مش انا
بس طبق الملوخيه ماكنش فى بريد الاهرم يمكن مؤلف تانى بقى
طيب نا جوزى مش بيحب الملوخيه تفتكر اعمل رز
ههههههههههه
التهديد اللى فى آخر التعليق ده محسوب عليك و انا هابلغ الامم المتحده بيه
كله إلا الملوخيه
نورت المدونه تسلم اديك

الجواز و سنينه يقول...

bos bos

هافضل أأذن فى مالطه لحد ما حد يفهم
لو واحد بس فهم يبقى الحمد لله عملت حاجه
ادعى بقى ان الناس تفهم
نورتنى

الجواز و سنينه يقول...

أحمد عاطف

اكيد مافيش مبرر للخيانه للطرفين ده حقيقى
اما بقى موضوع ان الوحده بتعتبر ان جوزها خان حتى لو اتجوز تانى و دى مش خيانه علشان دى حاجه فى الحلال
فحتى لو هيه ما تعتبرش خيانه فهمى على الاقل خيانه ثقه
و بعدين مين قال ان الستات مش بتاخد موقف لو جوزها عرف واحده غيرها و ما اتجوزش عليها
هو انا اللى برد متأخر بس برضوا بريد الجمعه الاسبوع ده كان بيتكم عن واحده جوزها كان بيخونها و لما عرفت كانت عايزه تتطلق و اهلها مارضوش و هو اتأسف لها بس هيه ماقدرتش تغفر
و حاسه بعد ما الاولاد كبروا ان فين عمرها و اشتياقها للكلام الحلو اللى صادر من انسان ماخنهاش
تفتكر بقى الرجاله هاتبطل كده بقى ؟؟
ما اظنش !!!!!!!!!!!!

الجواز و سنينه يقول...

HAPPY

و الله انا هابى علشان انتى رجعتلنا تانى
ماحدش هنا شجع حد على الخيانه
احنا بس بنبه لخطوره الموقف مش اكتر
و الله بجد وحشتينى

الجواز و سنينه يقول...

بسنت صلاح الدين

الخيانه غلطه مشتركه بس بيحاسب عليها ربنا اللى خان
و المشكله ان يتحمل تبعياتها الاطفال
انتى جميله اوى يا بسنت

الجواز و سنينه يقول...

mohamed ghalia
كل سنه و انت طيب يا محمد و ربنا يديك على اد ما انت انسان كويس
مش عارفه ليه انا رغم انى عمرى ما شوفتك
بس كتابتك و حتى صورتك بتبين انك انسان هايل
ربنا يتم عليك نعمته يا محمد

الجواز و سنينه يقول...

قيس بن الملووووح

و حضرتك طيب
مرسى جد ا ان حضرتك افتكرتنى من الناس اللى عيدت عليهم

الجواز و سنينه يقول...

عاشقه الرومانسيه

كل سنه و انىتى طيه يا جميل
و ياريت الناس تفهم خلينا نخلص
يريحونا و يرتاحوا
نوررررتينى جداااااااااااااا

الجواز و سنينه يقول...

micheal

كل سنه و انت طيب يا مايكل
بص بقى عايزه اقولك ان لو المجتمع ذكورى ياسيدى حاجه تبسطنا لان الست الطبيعيه مش بتحب تكون مسيطره
بتحب دايما تحس بأن الراجل هو سندها و امانها فى الحياه
بس مايكونش على حسابها اكيد
موضوعك الاخير رااااااااائع تسلم ايدك

الجواز و سنينه يقول...

خالد الاسكندرانى

كل حد بيوصل للخيانه مش بيفكر كده
بيفكر ان ده اسهل من خراب البيت و كونها مطلقه و العيال
تبرير الغلط ما اسهله
ربنا يصلح حالنا جميعا

الجواز و سنينه يقول...

sookra


ده بيحصل علشان احنا ما اتربيناش على اننا نطالب بآداميتنا
اتربينا على اننا تحت رجلين الراجل و فى الاخر بنشتكى من جهل اللى قبنا
انا انسانه و ليه مشاعرى اللى تحترم زى ما مشاعره تحترم

الجواز و سنينه يقول...

عابرة السبيل

سيبك انتى
تعليقك زى العسل زيك
تحسيه كده شايل و معبى
فضفضى يا شيخه و لا يهمك
طبعا لازم نشكر ربنا على ازواجنا
و همه كمان يشكروا ربنا علينا
مش ميزه فيه انه ذكر و انا انثى
انا مش متبنيه افكار الدفاع عن المرأه
متبنيه افكار الدفاع عن الآدميه البشريه و حقها فى كامل احتياجاتها

الجواز و سنينه يقول...

زقطـوطـة

انتى كمان وحشااااانى خالص
انا مش عارفه انتى بتختفى فين ؟
حلوه اوى صنف رمرام
هو الصراحه مش كلهم بس فيه نسبه كبيره مع الاسف

الجواز و سنينه يقول...

لجين أبو الدهب

حمدلله على السلامه
فين الغيبه دى كلها
فعلا الغلطه واحده للاتنين
بس المحاسبه مش واحده للاتنين فى المجتمع مع الاسف
ربنا يهدينا جميعا

الجواز و سنينه يقول...

بنت الغربة

وحشااااااااااااانى اوى جدااااااا خالص
و الله بجد
و حمدلله على السلامه يا قمر
رأيك تحفه كالعاده
بس مع الاسف الخيانه اسهل من الانفصال
انفصال عنى هاتروح فين و تييجى منين و مين هايربى العيال و كلام عك من ده
لكن الخيانه مافيهاش كل ده
إلا بقى الخوف من عقاب ربنا دنيا و اخرى طبعا و الفضيحه لو اتكشف الامر
و عجبى

الجواز و سنينه يقول...

rovy

وحشاااااااااانى خالص يا قمر و كل سنه وانتى طيبه
انا الحمد لله تمام انا و البناتيت
اما حكايه ان الرجاله بيقولوا كلام حلو بس بره
علشان عينه اخدت على اللى جوه
هههههههههههههههه
نعمل ايه بقى

الجواز و سنينه يقول...

شمس النهار

و الله يا شموسه هافضل اهاااااااااتى
يمكن حد يسمع و يقتنع و يعمل
و خلينا نلجأ إلى الله
يارب اصلح حالنا و حال ازواجنا و حال الناس جميعا
كل سنه و انتى طيبه يا شموسه و وحشتينا اوى

الجواز و سنينه يقول...

micheal


البوست الجديد فى الطريق ان شاء الله
شكرا على السؤال
مرسى ليك

م/ الحسيني لزومي يقول...

عام سعيد وكل عام انتم بخير
نحن مقبلون علي لحظات حرجه في تاريخ مصرنا
انتخابات مجلس الشعب 2010
انتخابات الرئاسه 2011
هل اعددت نفسك لتقول كلمتك
هل سجلت نفسك في الجداول الانتخابيه
اذا كنت قد سجلت نفسك ادعو غيرك
الحمله الشعبيه للقيد بالجداول الانتخابيه
باقي من الزمن30 يوم

Beram ElMasry يقول...

العزيزة الغالية الجواز وسنينه
وكل عام وانت وجميع اهلك في سعادة وسرور وامن وامان

وشك ولا القمر ولاتبخيلي عنا بالزيارة فهي تدخل البهجة في نفوسنا

وكلي امل ان تكوني في سعادة وهناء ولاتحرمينا الدعاء

تحياتي والسلام ولا سلام مع اليهود

بحبك يامصر يقول...

بصراحه مش عاجبنى انك تتناولى الموضوع بكيفية ان المجتمع بيفرق بين خطـأ المرأه وخطأ الرجل لازم نتناول الخطأ على ما هو خطأ وذنب ولا مبرر زى ما تفضلتى وذكرتى للخيانه سواء للرجل او للست وطبعا اهتمام الراجل بننفسه مطلوب زى ما اهتمام الست بنفسها مطلوب

اقصوصه يقول...

اممم

للاسف الاحظ ان اغلب الشرقيين

يشتركون بهالشيء :(

غير معرف يقول...

When some one searches for his essential thing, thus he/she desires to be
available that in detail, so that thing is maintained over here.


Here is my blog post ... acoustic guitar chords for beginners