الخميس، 24 سبتمبر، 2009

اتجوز اللى ما تقدرش تعيش من غيرها او من غيره




مقوله سمعتها و عجبتنى جداااااا

ما تتجوزش اللى تقدر تعييش معاها اتجوز اللى ما تقدرش تعيش من غيرها


و مش عارفه ليه الناس بعد الجواز تكتشف انها ما اختارتش الحاجات اللى هيه تقدر حتى تعيش معاها

طيب مهو كان فى ايديكم انكم تختاروا اللى انتوا عايزينه بس ساعتها فكرت فى حاجات بعيده تماما عن احتياجاتك

على سبيل المثال

لما واحد بيتقدم لواحده بيكون كل المعلومات المتاحه عنه هيه ايه ؟؟؟؟

وظيفته هو و اهله و حالتهم الماديه و هايقدر يجيب شبكه بكام و عنده شقه و لا لاء


اما المعلومات المتاحه عن العروسه ايه بقى ؟؟

ياترى حلوه و لا لاء

طلباتهم كتيره و لا ايه

بتشتغل ؟؟؟؟؟

اهلها وضعهم ايه ؟


و بمجرد ان يتم الموافقه على الطلبات الموضوعيه ننتقل إلى الشبكه و تمنها كام و هانعمل الخطوبه فين ؟

و بعد الخطوبه و الذى منه يكون التجهيز للفرح من جهاز و الذى منه

و ده حتى قبل ما يكونوا فكروا همه عارفين يتفاهموا و لا لاء

و بتكون فتره الخطوبه بدل ما هيه فتره تعارف تتقلب إلى فتره تجهيز


و فجأه يتجوزا و يبدأوا يعرفوا بعض

و يا إما نفع ....يا إما لاء ......او تبقى اهى عيشه و السلام


و فى الاخر نقول ليه نسب الطلاق بقت كتيره

علشان احنا ما اتجوزناش غير وظيفه و شقه و جمال و شبكه

ماوقفناش كتير ادام الشخص و اخلاقه و طباعه و قلنا حتى لو بتاع بنات مسيره يبقى كويس

و تغاضينا عن حاجات كتير علشان نتجوز و السلام

ما حدش فكر انها هاتبقى عمر بيضيع
و احتياجات نفسيه
و عيال هاتروح فى الرجلين

المهم الافلات من لقب عانس و المهم تكمل نص دينك و السلام


محدش ضد الجواز و لا هو وحش و لا حاجه
بس محتاج شويه ذكاء من الطرفين علشان ما يلاقوش نفسهم
مخيرين بين حلول كلها وحشه
و دمتم هانئين

هناك 44 تعليقًا:

لاسع افندى يقول...

احجز اول تعليق

لاسع افندى يقول...

نفسى اعملها من زمان بس دايما باجى متأخر زى البوليس

لاسع افندى يقول...

اكبر نعمه ممكن يكون فيها الانسان
هى بيت هادى وزوجه صالحه(او زوج متفاهم) ساعتها الواحد هيستقر فى حياته ويعرف يتفرغ لشغله بدون ما يبقى شايل هم البيت
ساعتها يبقى البيت هو المكان الجميل اللى بيرتاح فيه وينسى همومه
اما العكس ...تخيلوه انتوا لانى ماجربتهوش
تخيلوا واحد يرجع من عناء الشغل ومشاكله يلاقى بيته اكبر مشكله

الحمدلله على الزوجه الصالحه


تحيه وامنيه
باسعد حياه زوجيه

mimi يقول...

ايه ده

ده انا كنت اول تعليق؟؟؟؟


عااااااااااااااااااااااااا

لاسع افندي ... بقي كده؟؟؟؟؟؟

mimi يقول...

جميلة الفكرة ... رائع المبدأ

مش هتجوز اللي هقدر أعيش من غيره

للأسف احنا مش اتربينا إزاي نرضي نفسنا

لأ ... إزاي نرضي المجتمع

والناس هتقول علينا إيه؟؟

بس فكرة زي دي ... ثورة في طريقة التفكير

راحة البال ... بيتدفع فيها فلوس واللي بتقول جوازة والسلام هتعيش عيشة والسلام

بوست هايل أهنيكي عليه

كل عيد وانتي بخير

تقبلي مروري

dr.lecter يقول...

وفي الاخر يقولك هم ليه اتطلقوا

فيها ايه لما الخطوبه تطول شويه علشان يعرفوا بعض كويس وزي مادخلوا بالمعروف يطلعوا بالمعروف قبل مالعمليه توسع

مافيش حاجه اسمها دي فيها عيوب كذا بس استحملها لا كده احنا بنضحك علي بعض لانك مش هتقدر تستحملها بعد الزواج وهتبقي حياتكم ايه ولعه

انا مع المقوله وبؤيدها طبعا

Soul.o0o.Whisper يقول...

السلام عليكم و رحمة الله و بركاته

كل سنة و انتى طيبة يا جميل
و يارب كان عيد سعيد عليكى يارب

بجد بجد حقيقة وحشانى جدااااااااااا
و أخبار العثولتين الضغنتتين ايه؟؟؟

يارب انتى و العيلة كلها بخير

..................

بالنسبة بئا للموضوع دا ، فحقيقى هو مفيش حد أصلا ينفع تعيشى معاه ... مش تعيشى من غيره
ههههههههههههههههههههه
(( عقد عقد عقد يعنى ، مش عاوزة أقولك

لا بجد ...
عاد صعب جدا انك تلاقى حد تحسيه اوى لدرجة انك ماتقدريش تعيشى من غيره

بس الامل فى ربنا كبيييييييييييير :)

لكن طبعا إذا لقينا الشخص فأكيد هيكون من الصعب التنازل عنه

و أنا بصراحة منتظرة فرج ربنا :)

...................

أما بئا بالنسبة لأن شخص تقدرى تعيشى معاه ...فاللى عاوز حاجة مابيغلبش

يعنى هيا شايفاه هيلبى احتياجاته او هو شايفها مش بطالة

خلاص .. مفيش مانع
بس للاسف المعاشرة هى اللى بتكشف معدن الناس
و المسئولية بردوا و عشان كدا كتير مش بيستمروا

ربنا يوفق الجميع ، و الناس اللى خدت بعض كدا .... يقدروا يوفقوا مابينهم لأن الحياة أكبر من مجرد حلو و كويس
و سيرى على بركة الله :)



دمتى بكل الخير يا جميلة و طمنينى عليكى

مي يقول...

بجد معجبة جدا بالمدونة دى لانها واقعية وبستفاد منها وبتفق فى الراى لازم التفكير العميق بس برضه التتقاليد بتمنع الفتاه من التحدث الزيادة عن اللزوم او المقابلات او او انا قصدى المتفق عليه قيود عائلية يعنى طب تعرفه ازاى ؟
ياريت نستفاد اكتر ونشوف البوست الجاى ازاى يكون اعرف اللى قدامى لانى محتارة بجد ايه هو مقياس الحكم عليه وعليها
تحيااتى موضوع هايل

دعاء يقول...

على فكره
كنت قبل ما أتجوز بقول لازم تاخدي اللي متقدريش تعيشي من غيره.
بس بعد ما اتجوزت
لقيت ان الأهم انك تاخدي اللي يكون أحسن أب لأولادك
لأن بجد ده الأهم و الكلام للرجال كمان ,اختار أحسن أم لأولادك

Sweet Violet يقول...

تفتكرى فى عصر الامراض النفسية اللى احنا فيه ده
كام واحد/ة من ميه تقدرى تقولى ان فعلا الانسان مش هيقدر يعيش من غيره ؟؟؟
v_v

الفراغ يقول...

كلام حلو قوى
وكمان برضه ممكن يتقال عند حدوث الطلاق
مكن كلا الطرفين يسئل نفسه ..ياترى هاعرف اعيش من غيره/ها
بس اهم مافى الموضوع هو الصدق
ياريت يكونوا صادقين لان التمثيل قبل الزواج بيكون ايــــــــــــــه 100/100
ربنا يوفق الجميع

أحــوال الهـوي يقول...

كلام جميل كلام معقول ما اقدرش ااقول حاجه عنه

بس غير قادر للتنفيذ بحرفية الكلمات
و لكن الاختيار له مقومات غير ماذكرت

الزواج شراكه و ليست تفصيل فلا يوجد ما يتوائم مع الاخر بنسبة 100% و لكنه تعايش ورغبة في السعادة فاذا تكونت هذه الرغبة مع فدان قناعة بين الشريكين لرفرفت طيور السعادة و الهناء
فليس في الزواج من يحاول ان يكون الفائز او المنتصر

تحياتي

صيدلانيه طالعه نازله يقول...

للاسف انتى فعلا صح و كلامك ده بيوصف حاله ناس كتييييييييييييييير قوى بنوا حياتهم على حسابات خاطئه من البدايه و ما بنى على خطأ فهو خطأ
فعلا نسبه الطلاق زات قوى ووصلت لنسب منفجره و مصر و لاول مره تتفوق فى حاجه و هى اعلى نسبه طلاق
الموضوع اللى انتى اتكلمتيه فيه ده محتاج مناقشه مفتوحه فعلا لانه محتاج ان الاواحد يعرف كل وجهات النظر فيه

عاشقه الرومانسيه يقول...

صح جدااااا

ادم المصرى يقول...

الطيبين لطيبات والخبيثين لخبيثات

والقانتين لقانتات

ما هى الحياه الزوجيه الا تفاهم بين روحين

مع اختلاف الشخصيات

mahasen saber يقول...

كلامك منطقى يا جدا وفى محله بس بيفضل النصيب بيفرض رأيه على الجميع

ناهيكى ان عند الاختيار كتير مبيفكرش كدا

walaa tulip rose يقول...

اولا كل سنة وانت بكل خير
ثانيا البوست ده جمييل اوي وكله افكار وفعلا يدعوا لتفكير عميق في خطوة الزواج
ومش اخبي عليكي انا مقبلة علي الزواج وللاسف وباقول للاسف لاني مش لاقيه حد يشجعني علي تفكيري
كل كلمة قلتيها في البوست صحيحة وانا اهو واحدة من البنات اما بتفكر بشكل موضوعي يا تري حتى العيوب اللي في الطرف الاخر هاقدر اتعايش معاها ولالأ ؟؟
وايه قابل للتغير من وجهة نظره هو شخصيا وايه غير قابل للتغير و عمره ما هيتغير ولو انا عملته قردة حتى
بتلاقي كل اللي حواليا بيفكروا في الزواج علي انه شقة وراجل ووظيفة فقط والكل مستعجل وبيطلب طلبات لا حصر لها ال يعني هو المستقبل بيكون في فلوس ونفوذ ....!!؟

حقيقي ياريت كل اسرة تقرأ البوست ده وتفكر بالطريقة دي وتدي فرصه للخطيبين يدرسوا بعض بجد ويتخانقوا بجد وتكبر الخناقة بينهم ويشوفوا هتوصل لفين عشان اما يكونوا في بيت واحد يبقي كل طرف خايف علي التاني وعارف حدود غضبه لفين وحدوح عطاءة لفين
والا هنلاقي نسب الطلاق بالفعل حتزداد اكتر من الان بمراحل

تحياتي لتناولك موضوع زي ده واسلوبك في عرضه حققي ممتاز
كل سنة وانتي بكل خير يارب

Mohamed Hamdy يقول...

كنت بعت سؤال فى مدونتى عن ميعاد برنامج دريم هيكون امتى

هيكون الساعه الرابعه عصرا ان شاء الله

شكرا

reem يقول...

البوست دا حلو اوى بجد

وفعلا كلامك صح ولو كملنا عليه الكلام اللى في كومنت احوال الهوى هايكون الكلام واقعى وصالح للتنفيذ تماما

ياب فعلا الناس تفكر صح قبل الجواز

اخبار بنوتاتك ايه ياقمر

بوسات كتير لكل واحد فيهم

انا ودماغي يقول...

و الله انتى معاكى حق تماما ..لو كل واحد ركز فى الاخلاق و الطباع نفس تركيزه على الحاجات التانية كان زمانه بقى فى راحة بين الناس اللى متجوزين

بس برضه الخطوبة مش بتبين كل حاجة و احيانا مش بتبين حاجة اصلا..يعنى ممكن الناس تركز فى الخطوبة و بعد الخطوبة يلاقوا نفسهم قدام حد تانى

أحمـــــــــــــد أبو العلا يقول...

مش هنكر انك معاكي حق بس في نفس الوقت مش مستوعب ان ده ممكن
معلش بأه اول مره اجي هنا بس لازم اختلف

اصل النهارده الثقافه العامه عند الأقل بترفض تماما ان الخطوبه تكون تعارف, وبتصر ان الخطوبه تجهيز بس

وبيرفضوا تعارف بدون خطوبه

وفي نفس الوقت الخطوبه الفاشله بتكون بمثابة طلاق في مصيبتها وبتصعب المستقبل اكتر واكتر

ده اللي انا بشوفه وبجربه للأسف

كراكيب يقول...

الجواز الجواز الجواااااااز
ليه الكلمة دي واخدة اكتر من حقها في بيتوتنا في قعدة صحابنا في مجتمعنا بشكل عام
خلاص خلصت كل امنياتك وحققت كل طموحاتك واهدافك... مفيش اي حاجة هتعرف تشغل بيها فراغك واحتياجاتك غير الجواز والبنت الحلوة وبعدين اطفال هتعيش وتموت علشان تجيبلهم عيشة ولقمة كويسة
ااااااااااااع انا الموضوع ده بيخنقني وبيغيظني
وافضل اقول لماما انا مش بفكر في الجواااااااااز لما احقق كل اللي انا عايزاه او اغلبه انا عندي افكاري وطموحاتي وبعدين مش اي راجل هو اللي عشانه اشيل مسئولية بيت واطفال
يا جماعة الموضوع كبير كبير
وما ينفعش يبقى هو ده شغلنا الشاغل
امال امتى هنفكر نعمر البلد دي بقى..............الله

كفاية رغي بقى وسيبيني اقولك
بلوجك حلوة ومبسوطة اني اتكعبلت وجيتلك هناهوه

miro el niro kwaniroooo

طوبه فضه وطوبه دهب يقول...

w3arfa yom mataoly ank m7taga t3rfeh wttklmy m3ah wtarby aktr wtfhameh tsm3y million leh wkano msh mn 7aak wla shaa tabe3 lakn el tabe3y an el 7awaleky lma yshfoh kways ybaa kways wlslam mn gher ay nkash bgd baat 7aga tt3b el a3sab

الجواز و سنينه يقول...

لاسع افندى
نورت و اسفرت و نورت التعليقات كلها
و اديك جيت قبل البوليس اهه
ــــــــــــــــــ
تخيلوا واحد يرجع من عناء الشغل ومشاكله يلاقى بيته اكبر مشكله
ـــــــــــــــــــــ
فى الجووووووووون
فعلا ساعتها البيت هايبقى اكبر مشكله
و دى اصعب حاجه

الجواز و سنينه يقول...

mimi
اعتبرى نفسك يا روحى اول تعليق و لا تزعلى
على فكره مدونتك زى العسل زيك
ـــــــــــــــ
واللي بتقول جوازة والسلام هتعيش عيشة والسلام
ــــــــــــــــ
صح مليون الميييه
مخمختينى

الجواز و سنينه يقول...

dr.lecter
نورت و اسفرت و احللت اهلا
بس عايزاه اقولك انهم مش بيطلعوا من الخطوبه بالمعروف
احنا اصلا ما نعرفش المعروف شكله ايه
دول بيطلعوا من الخطوبه هاريين بعض بالحق و اللى ماحقش
بس اكيد اكيد
ــــــــــــــــــــــ
مافيش حاجه اسمها دي فيها عيوب كذا بس استحملها لا كده احنا بنضحك علي بعض لانك مش هتقدر تستحملها بعد الزواج وهتبقي حياتكم ايه ولعه
ــــــــــــــــــــــــ
اكيد احسن من انهم يخدعوا رحهم و يقولوا هانقدر عنيش او نعير العيوب اللى مش عاجبانا

الجواز و سنينه يقول...

Soul.o0o.Whisper



سول حبيبتى وحشانى خالص مالص بالص
و الله بجد جدا
و كل سنه و انتى طيبه يا عمرى
اما النونات ف زى العثل الاسود
قصدى الابيض
***********
ايه يابنتى كل العقد دى
مين اللى معقدك كده
اكيد اكيد اكيد مش انا
ههههههههههههههه
فيه ناس كتير تقدرى تعيشى معاها
و ممكن همه همه نفس الناس ماتقدريش تعيشى من غيرهم
بس المشكله انه يكون هو كمان عنده نفس الرغبه
بمعنى
لازم يكونوا الطرفين عندهم الرغبه فى عيشه سعيده

هاسير على بركه الله معاكى ان شاء الله
امووووووووووووه

الجواز و سنينه يقول...

مي

مرسى يا جميل على كلامك الحلو ده
و بجد ادتينى فكره جميله هو ازاى تعرف اللى قدامك
هاحاول اتكلم فيها على اد خبرتى و اكيد كلكم تساعدونى انتم كمان
فعلا احنا عندنا مشكله كبيره
مانسيبش البنت مع الولد لحسن يغررغر بيها
طيب ما تراقبوا من بعيد مش لازم تكتموا على نفسهم
و بعدين ترجعلكم متبهدله و معذبه نفسيا
كان هاتفرق فى ايه شويه وقت مع مراقبه حازمه بس مش خنيقه
ناس غريبه و الله

الجواز و سنينه يقول...

دعاء

لازم تاخدى اللى ما تقدريش تعيشى من غيره انتى
لانه بدام كويس معاكى هايكون كويس معاهم
دى غريزه
اكيد هايحاول يكونلهم قدوه حسنه و الاب كما يتمونه

الجواز و سنينه يقول...

Sweet Violet
فى عصر الامراض النفسيه
المطلوب واحد بس مش تعرفى تعييشى من غيره
هو بس انك تلاقيه هيه دى المشكله
بس ادعى تلاقيه بسرعه
بجد بيفرق كتير فى الحياه

الجواز و سنينه يقول...

فاصل و نواصل

صوت من مصر يقول...

اظن ان الجواز لا يمثل لى سوى اختيار صحيح فى التعايش والتاقلم

حازم سويلم يقول...

فعلا الزواج بحاجة الى كثير من الذكاء, ربما بقدر أكبر من الحب . وعلى رآى أم واحد صاحبى ..محدش بياخد مرات غيره

تحياتى

شمس النهار يقول...

لا لا لا
في حاجه هنا مش مظبوطه
انا جيت هنا قبل كده وسبت تعليق
هو فين بقا

ماعلينا
كل سنه وانت طيبه

كلامك كله صح

ودي الموضه كمان اليومين دول

اللي بيتجوز بيتجوز علشان كده وخلاص
وليس بالامكان احسن مما كان

البنات نظرية ضل راجل
والصبيان علشان ماما تبطل تزن وكمان يكون اختيارها علشان ماتوجعش دماغي وترجع تقول لي مراتك عملت ومراتك سوت
هقول لها هو ده اختيارك

ماهو الامور في كل حاجه اتشقلبت ياناس حتي في الجواز

momken يقول...

ماشاء الله كلام رائع

تعرفى السبب الرائيسى فى فشل بعض الجوزات
او ندم كل طرف على اختياره؟

السبب مقوله متدوله ومتوارثه بتقول
(الجواز قسمه ونصيب)
وانا اكاد اجزم ان الى قال الجمله دى حد حماااااااار مش بس حمار دى حمار كبير كمان

لان الجواز هو محض اختيار لا اكثر ولا اقل
علشان كده الرسول -صلى الله عليه وسلم- نصح بانواع النساء الى نتجوزها
ونصح اهل المرأه بانواع الرجال الى يختاروهم

قال للراجل تنكح المرأ لاربع.... -لاخر الحديث
وقال لاهل المرأه- من ترضون دينه وخلقه.....- لاخر الحديث

لكننا ورثنا مقوله الجواز قسمه ونصيب وكأنها ايه قرأنيه او حديث شريف

وهى كله عبيطه ومن حد عبيط

وكتير لما بيفشلوا بيقولوا ده نصيب
لاء حضرتك دى اسمه تسرع وسؤ اختيار ولهوجه ومحاوله اقتناص فرصه بيعقبها الندم


الجواز جميل - على ما اسمع يعنى-
لكن يجب ان تتوفر فى المتزوجين مصوغات الزواج...ليس فقد القدره الماديه والفحوله فقط ولكن ينغى توافر القدره النفسيه والشخيصه واحترام الاخر والمقدره على العطاء وحب الحياه والتسامح

و اشياء اخرى اكثر واعمق بكثير


بوستك افادنى كثيراً دمتى بصحه وسعاده


تحياتى

Beram ElMasry يقول...

الأخت العزيزة الغالية الجواز وسنينه
وأنتي طيبه ونفعني الله بدعائك وجزاك عني خيرا مرورك يشرفني ويسعدني فلا تبخلي بهذا الفضل والتفضل مع خالص تحياتي والسلام ولا سلام مع قتلة الأنبياء والأطفال بني إسرائيل .

micheal يقول...

وده يدل علي مدى سطحية النظرة لموضوع الجواز في مجتمعنا وبالتالي إزدياد نسب الطلاق والمشاكل الأسرية
لأ..نسيتي كمان تقولي الرد المستفز بتاع كل واحد وواحدة فشلوا في الجواز
ساعة القضا يعمى البصر
:)
بوست هايل
تحياتي

فشكووول يقول...

السلام عليكم

كل سنه وانت طيبه

شوفى يا صاحبة المدونه ... الجواز دا زى البطيخه ... ممكن يكون شكلها من الخارج حلو قوى والبطيخه سليمه والخطوط مرسومه عليها من بره حلوه قوى والواحد اما يخبط عليها تقوم ترن كويس قوى مما ينبأ بانها حتكون حمره .. وبعدين تدبح البطيخه ... وعينك ما تشوف الا الابيض وبس... هوا دا الجواز وانت ونصيبك ... قولى لى ليه

الاخلاق ... الطباع ... التربيه... وخصوصا مع اللى بيتجوز واحده او واحد ما يعرفوش ...ممكن الطباع تكون ضد بعضها ... ممكن التربيه تكون كل واحد اتربى بطريقه ... دا ما بيبانش الا بالمعاشره ... والمعاشره اصل نجاح او فشل عمليات الزواج ... يا اما اثنين يقدروا يصبروا على بعض فى عشرتهم ويعودوا بعض ... يا اما انت عارفه ... المأذون موجود وفى النهايه هى قسمة ونصيب والمكتوب على الجبين لازم تلاقيه العين.

يعنى طنطك ام اسامه الحاجه بتاعتى كل يوم ترقعنى علقه وانا من اول يوم اتعودت على كدا عشان كدا الموضوع ماشى اما لو مش كنت متعود على العلقات دى كان الموضوع وقف ... وهكذ دواليك ... يعنى الموضوع انهم الاثنين يعودوا بعض على طباع بعض ولازم الاثنين يقبلوا طباع بعض والا انكسرت العصا .. وانقطعت شعرة معاويه ... عارفه ان الدبلوماسيه فى الزواج من اهم وسائل نجاح الزواج ... المشكله الكبيره فى الطبببببببااااااع وكيفية قبول طباع الاخر

تحكياتى

عمرو يقول...

بوست ذكى جدا و بيناقش موضوع خطير يعانى منه الكثيرون ..
الجواز فى هذا الزمان الكوميدى أصبح مرتبط فعلا بأمور و مسائل ماديه و أصبح بشكل أو بآخر بعيد عن التوافقات و الكيمياء التقاربيه بين الأشخاص ..
هو الجواز مش بطيخه الحقيقه زى ما الناس بتقول و لكنه أصلا معادله عقلانيه عاطفيه يتدخل فيها طبعا بشكل مباشر اٍختيار الاٍنسان الحر لشريك حياته ..
طيب فى رأيك أيه الحل ؟؟
يعنى قليلو الخبره يعملوا أيه خاصة لو كان ده اٍختيارهم الأول ؟؟
بوست رائع ..
تقبلى تحياتى و تقديرى ..

عاشق الجنة من الإخوان صلى على النبى يقول...

ده جواز وياريتنا ما اتجوزنا
لا حول ولا قوة إلا بالله
صلي علي النبي

أبو كريم يقول...

معك مئة بالمئة

مشكلتنا اننا ما بنسمعش نصائح الدين ورسولنا الكريم والدين دايم متأخر فى أولوياتنا


ربنا يرزقنا الفهم عنه وعن رسوله وحسن الأختيار

دمت بكل الخير

rovy يقول...

ازيك يا قمر ؟؟ وحشااانى ..
انتى صح و عندك حق .. لكن كل حاجه فى مجتمعنا بتتغير للاسوأ مع الاسف انا حاسه اننا رغم تقدم التكنولوجيا و الدنيا فى عصرنا الا اننا بنرجع بأفكارنا للوراء .. ومش فاهمه ليه و لا عارفه بجد ايه السبب ؟؟

بوسيلى القمرتين بناتك ربنا يبارك لك فيهم ياارب ..

تحياتى دوما

بنت قلبى يقول...

بجد انتى عندق حق كبير جدااااااا

والحته دى بقت ظاهره جدا جدا وكتير اوى عايشين فيها حتته اللخبطه وكله فى السريع
رغم انى شيفا ان بعد الموافقه من الطريفين بتم الخطوبه علشان التعارف بس
وبعد ما نحس اننا متافهمين خلاص
لان اساس الحياه التفاهم
وطبعا لو اى حاجه حصلت فى الزواج هيبقا اللوم كله على البت ايوه
هيقولوا انها عليها الاستحمال ومش قادره تعيش ولا تتفاهم طب زليه مكان من الاول
ودا طبعا بيرجع من عقل لعقل

Saso يقول...

والله ياست الجواز وسنينه.
وبسب تيت اللى جايبينه.
هههههههههههه
حلوه وزن وقافيه اهو ماحدش يقول انى موش مبدعه اهو احس والله اجرى وراكم بال(..)
ولا بلاش قباحه
بوست رائع بجد ومايحسوش اد ناس عايشه الجوازه والسلام
تقبلى مرورى