الخميس، 18 يونيو، 2009

موقف غريب شوفته بعينى




النهارده كنت فى النادى و مش عارفه ليه انا بشوف حاجات غريبه هناك
الناس فعلا اتغيرت


لقيت واحده ماسكه ولد صغير و لويه دراعه و عماله تشد فى ودانه و تضربه على وشه بالقلم

انا فى الاول قلت يمكن مامته بس شكلها مش مامته

بس رجعت و قلت لاء مش ممكن تكون مامته و بتضربه كل ده قلبها مش هايطاوعها

استنى تسكت مش بتسكت

الدم غلى فى عروقى و اتغاظت جدا خصوصا انى كنت متأكده انها مش مامته

رحت رايحاها و قلتلها انتى مامته ؟

بصتلى و قالت لاء و انتى بتسألى ليه

حسيت طبعا انها ماتوقعتش ان حد يسأل على الولد اللى هارياه ضرب ده

قلتلها انتى مشرفه عليه يعنى ؟

قالتلى اه

قلتلها لو مامته شافتك و انتى بتعملى كده ماكانتش سابتك على فكره

قالتلى و بمنتهى البجاحه هيه قايلالى اعمل كده ؟؟؟؟؟؟؟

و هاخليكى تكلميها و هيه تقولك ؟

و راحت واخده الولد و بتجرى بعيد علشان ما اردش عليها

قلتلها اه هاكلمها و اقولها و رحت بصيت للولد و قلتله ماتخليش حد يضربك كده

فضلت متابعاها بعد كده لانها كانت قاعده فى المكان نفسه

لقتها بتتعامل مع الولد بعد كده منتهى الرقه ؟؟؟؟ تخيلوااااااااااااااااااااااااااااااااااااااااااااا

مشيت من المكان و رحت مكان تانى انا و صاحبتى اللى كانت معايا و نسيت الموضوع

بعدها لقيت الولد جيلى بيقولى يا طنط هو انتى اسمك ايه ؟

قلتله ليه ؟

قالى ناديه عايزه تعرف اسمك ؟ قلتله ناديه مين قالى اختى

قلتله مش شكلها اختك قالى دى الشغاله بس ماما قالتلى مش نقول عليها كده

قلتله خلاص انت لما تروح لماما تقولها انها كانت بتضربك فى النادى خلاص قالى حاضر

بس ماما قالتلها تعمل كده

مصيييييييييييييييييبه اكبر

استغربت جدا انها كانت عايزه تعرف اسمى و ما فهمتش ليه اصلا هيه عايزه تعرفه ليه

و استغربت اكتر كل الناس اللى كانت واقفه و شايفه الولد بيتضرب و محدش قالها بتعملى ايه ؟

استغربت جدا الام اللى قاعده فى البيت او حتى بتشتغل و سايبه تربيه العيال على الخدامه

مستنيه منها تعلمه ايه ؟
تعوده انه يتضرب ادام الناس و اصحابه لانهم كانوا واقفين
و لا ايه هاتكون نفسيته

عرفت دلوقت ليه فيه مدرس ممكن يعمل عاهه مستديمه لطفل عنده او حتى يموته علشان ما كتبش الواجب

اكيد اكيد اكييييييييييييييييييييد مالقاش حد يقوله انت غلط و هاشتكيك

هيه خافت لا اقول لمامه الولد فعلا و انا عارفه انها اكيد اكدت عليه انه مش يقول لمامته على اللى بتعمله
يمكن الام ماتستاهلش ان حد يحمى عيالها و هيه مش حمايتهم
بس اكيد الولد يستاهل لانى كلمته و لقيته قمه فى الادب مش من العيال السافله
و دول كتير على فكره

انا مش حشريه خالص و الله بس مش بحب نشوف الغلط و نعمل نفسنا مش شايفينه

و تخيلت ان لو ده ابنى كنت اكلتها و الله ماكانش هايكفينى عمرها كله لمجرد انها ضربته بس

لكل ام مسؤليتك الاولى و الاخيره فى الدنيا هيه اولادك اوعى يغيبوا عن عنيكى فى كل مراحل حياتهم

لانهم محتاجينك اكتر من الفلوس و اكتر من الخدامه اكيد
اوعى تكونى متطمنه لمجرد انهم مع الخدامه

او حتى احد اقاربك

دائما كونى موجوده دى شغلتك و همك و اللى هاتتحاسبى عليه

هناك 36 تعليقًا:

MaNoOoSh يقول...

انتى موقفك مش حشرية خالص على فكرة
دة هو ده الح
وانا مش عارفة لو فى مكانك كان هيجيلي الجرأة ادافع عن الولد وللا لأ

بس اللي انتى عملتيه هو الصح

ووالله الواحد ياما شاف مواقف من امهات اقل ما يقال عليهم معدومى الآدمية
وسايبين تربية عيالهم للشغالة اللي ميعرفوش اذا كانت منحرفة جنسيا وللا بتعمل ايه فى عيالهم


ربنا يعدنا ومن نحب عن اى سوء

دعاء يقول...

ربنا يبارك فيكى و الله انا عملت زيك كده مرة واتدخلت بس كان أب هو اللى بيضرب ابنه فى الشارع وانا اساسا معرفهمش ..المهم الراجل زعق لى والضرب برده جه عليا بس برده مسبتوش لانه كان بيضربه بغباء.
ربنا يهدى الاهل دول بس عشان خاطر الاولاد ميطلعوش معقدين نفسيا اصل البلد مش ناقصة.

تحياتي

لاسع افندى يقول...

احنا بنتأثر ونزعل لما نشوف طفل يتيم الام ونقول ياحرام العيل اتحرم من حضن امه...لكن نقول ايه فى الام اللى تكون عايشه وتحرم ابنها من حنانها وترمى مسؤليته على غيرها
وبعدين حتى لو عايزه تأدبه ماتقولهاش اضربيه..ممكن تديها فلوس وتقولها فى حضوره كل ما يبقى كويس اشتريله حاجه حلوه ساعتها هيسمع كلامها بدون ضرب


تحياتى

أم مالك يقول...

اول مرور لى على مدونتك
وباذن الله لن يكون الاخير
مافعلتيه ياحبيبتى شىء طبيعى
اننا لو نرى اى شىء غريب نتدخل
ونعرف مايدور
لكن المصيبة الاكبر تهاون الاهل فى ترك
اولادهم مع الشغالين والحضانات
وينتج جيل مذبذب
ربنا يرحمنا برحمته
تقبلى مرورى وتحياتى

واحدة مفروسة يقول...

فرستيني بالحكاية ديه
و تصدقى بالله الام اللى الى قالت للخدامه تعمل كده تستاهل هيه الضرب
ديه امهات آخر زمن حاجة تفرس
بس الولد هوه اللى حيتعقد
و ان ما شالش فى نفسيته من دلوقتي حيشيل بعدين و حتبقى شخصيته مهزوزة
لما خدامه تضربه عاوزة ايه اكتر من كده؟
تصدقى بالله من فرستي نفسي اروح للام و اديها كلمتين فى جنابها
موقففك صح مليون فى الميه بس لازمن تلاقى الام و تنبهيها
ده لو شوفتيها فى النادى
بس ما اوعدكيش انها تسمعلك
ممكن تفرسك و تقولك انتى مالك

صيدلانيه طالعه نازله يقول...

و الله يا بنتى كتر خيرك فعلا و موقفك يستحق الاحترام
المشكله ان الولد ياروحى بيقول ان مامته قايلالها كده و ممكن تكون مش قايله و الولد اما بيهددها انه حيقول لمامته هيا قالت له كده
بصراحه فيه امهات فى الزمن ده عجب العجاب فعلا و تشوفيهم امهات بالاسم و ميستاهلوش النعمه اللى ربنا مديهالهم
و زى ما اتفقنا انا و انتى الزمن ده بقى زمن العجايب

بلاش فضايح يقول...

السلام عليكم

اكيد اكيد الام مشغولة عن تربية ابنها
وسايباه على الشغالة اللى ممكن متكونش شافت التربية السليمة بتكون ازاى

وطبعا الام مستنية ابنها يطلع ولد بار وصالح ومستقيم

متعرفش ان بسبب اهمالها ليه التربية السيئة دى هتطلع عليها هى

تحياتى

بسنت صلاح الدين يقول...

اسوأ حاجه موضوع الشغاله ده،متهايألى انها ترتب البيت بس زياده عن كده لأ،الا تربيه الاولاد،ازاى الام تسيب ابنها يتربى على ايد واحده متعرفش هى تنشئتها كانت عامله ازاى و اكيد ظروفها و بيئتها غيره يعنى مينفعش تعلمه السلوكيات ابدا،و زياده على كده الضرب لو كان من الام ممكن يتقبله الطفل و لو انه برضه اسلوب تربيه غلط، لكن مش كويس ان الولد يتعود ان حد غريب يضربه عادى
انتى موقفك سليم جدا و مش حشريه خالص بالعكس انتى كنتى ارحم على الولد من امه للأسف

جوسيان يقول...

هو حضرتك من الفيوم ؟

انا برضة فيومية علي فكرة

mohamed ghalia يقول...

ياريت فعلا نهتم بتربية الأولاد ومش نسيب تربيتهم لحد تانى

حاسوباتيه يقول...

والله انا مش عارفه الام الي ترضى تسيب ولادها مع الخدامين دي ام ازاى اه ممكن الخدامه تساعدني لكن مش تربيلي اولادي بجد صعب عليا الولد جدا ونفسي ادي مامته قلم يفوقها ويقولها حرام عليكي ابنك

كلام فارغ اوى يقول...

انتى كنتى بتدافعى على طفل مالوش دعوة باى حاجه العيب بقى على الام اللى سايبه التربيه للخدامه والله اعلم بتعلمهم ايه غير الضرب
مفيش حد يستاهل انه يربي ولاده غير الام هيه اللى هتبث فيهم التعاليم والاحترام والتربيه
غير كده متعرفيش الخدامه دي اتربت ازاى ولا حتى ممكن تكون بتعلمهم ايه
ربنا يستر على الشباب اللى جاى من الامهات اللى زي دي

عمرو يقول...

ده الضرب و الاٍهانه من الشغالين للأطفال أبسط ما يمكن أن يحدث لهم كثمن لاٍهمال الأهل لهم ..
ما يحدث من اٍعتداءات و اٍغتصاب و تحرش للأطفال سواء كانوا ذكور أو اٍناث أبشع بكثير جدا مما تتخيلى ..
الأهالى نايمين فى العسل و مطمنين و مش عارفين اٍنهم بيضيعوا عيالهم مدى الحياه بما يحدث لهم من ممارسات لا أخلاقيه بالمره من الشغالين ..
تقبلى تحياتى و تقديرى ..

عاشقه الرومانسيه يقول...
أزال المؤلف هذا التعليق.
عاشقه الرومانسيه يقول...

كلامك صح جداااااااا
الاطفال دول نعمه من ربنا محدش يقدرها الا اللى اتحرم منها
باشوف صديقاتى متزوجين وربنا مش كرمهم لسه باطفال واشوف اللهفه فى عيونهم على طفل
واشوف ناس معاه اطفال ومش بتهتم بتربيتهم
سبحان الله
مش بيحس بالنعمه فعلا الا المحروم منها
ثم ان الطفل لو اتعامل من صغره على انه حيوان ويغلط وينضرب ده مع الوقت هيخلى دماغه ناشفه ومش هايسمع الكلام
انا بافضل العقاب المعنوى اكتر
بانك تحرمى الطفل من حاجه بيحبها علشان عمل حاجه غلط
وده ان شاء الله اللى هاستعمله مع اولادى فى المستقبل
علشان يكونوا اسوياء ويكون لهم كيان وشخصيه

معلش رغيت كتير بس الموضوع فعلا استفزنى

عمرو فكرى يقول...

لا هو انتى صح
بس مادام الام قالت ل(اخته)تعمل كدة
فخلاص خليها تشرب بقى

زقطـوطـة يقول...

بجد أنا بشكرك من قلبي على سؤالك عليا
ربنا ما يحرمني منك أبدا و يبارك فيكي
ويسعد قلبك يا رب : )
ويتقبل حماتك بقبول حسن إن شاء الله يا رب العالمين

طبعاموقفك صح مية في المية
بس أنا في حاجة عجبتني في رد الطفل لما قالك إنها أخته و إن مامته قايلاله كده
بالرغم من سلبية الأم..إلا إن كونها حافظت على كرامة الخدامة قدام الأطفال
يدل إنها ست ممكن تكون كويسة و ممكن تكون مش سايبة الخدامة تربي العيال لكن تخلي بالها منهم وقت اللعب مثلا..والخدامة هي اللي افترت على الواد من ورا مامته..يعني حتى أمه ماتعرفش البنت بتعمل إيه..!

وكون الولد مش بيشتكي..فده معناه إنه متعلق بالبنت دي ! بس أنا معاكي إنه غلط الأم تطلب من الخدامة إنها تضرب الولد.وتسيب العيال للغرب

طولت أنا ؟؟؟
طب سلامو عليكو
:D

كيــــــــــــارا يقول...

ابني اللي ولدته مش في حد هيحس بيه غيري

ومحدش يربيه غيري

بصراحه مش تستاهل انها تكون ام طالما مش قادره تحميه

شمس النهار يقول...

وبنسأل ليه في شذوذ في كل حاجه
ايه عرفنا الشغاله دي بتعمل ايه كمان
في الولد

الام هي عماد البيت وهي المدرسه الاولي والاخيره للأولاد

E73 يقول...

السلام عليكم

دايما كدة كسلانة وباجي متأخر

لا حول ولا قوة الا بالله العلي العظيم

الله يخليكي انتي فيكي الخير المواقف اللي زي دي فعلا بتخلي دمي يغلي لمجرد بس ان ام تسيب ابنها مع شغالة فما بالك بقى لما تكون بتضربه ومابالك كمان لو كانت اجنبية وبتعلمه حاجات منيلة بستين نيلة

المفروض اني مدرسة اطفال بس بجد آااااااااه يا غلبي على اللي بيحصل للأطفال

يوميات شاب منوفى يقول...

انا لو منك كنت ضربتها دول ناس غبية بجد والام اغبى منها
امبارح وانا فى القطر طلع راجل ومعاة بنتين وولد ودور على كراسى وبيقول لبنته اقعدى البنت مشفتش الكرس راح زقها بعنف وقالها اتلقحى هنا البنت صعبت عليا وكان هاين عليا احرقة وطول الطريق البنت حطة ايدها على وشها وبتعيط

mahasen saber يقول...

بتستغربى ليه بس يا جميله

ااقلك على موقف مشابه كانت جارتى بتسيب ابنها كتير مع الشغاله وتخرج مش للشغل كمان لا خرج تتفسح المهم
كنت بشوف الشغاله بتهرى الولد ضرب وتاخده وتقعد تحت فى الشارع وهيا قاعدهخ مع مرات البواب
ولما قلت لمامته مينفعش تسمحى للشغاله تعمل كده فى ابنك
ومينفعش تسيبى ابنك ليها كده
تقولى اسكتى يا محاسن لو زعلتها هتمشى ومش هلاقى غيرها

قوليلى انتى بئه
ينفع عشان نحافظ على وجود الشغاله ندمر ولادنا بالشكل ده

mahasen saber يقول...

احنا نقول ربنا يلطف بينا

واليى ربنا رزقه بنعمه يا ريت يحافظ عليها
دى امانه يا ناس

بنت اسكندرانية يقول...

فعلا الزمن بئا فية حاجت غريبة والناس بقت تقول واحنا مالنا لو بنت بتتخطف وشايفنها ودام عنيهم مش بيعملوا حاجة يوقللك لاحسن يكونوا معاهم سلاح او نضر الكل بئا يفكر في نفسة والماديات اخدتتنا وجرت لبعيد
بوست رائع كلعادة
دمتي بالف خير

انا ودماغي يقول...

لا حول و لا قوة إلا بالله

بجد الامهات دى مغيبة

ده كل يوم بيحصل مصايب من ورا الحكايات دى يأما الطفل موت و لا تحصله عاهة...يأما ممكن تستخدمه فى السرقة أو اى حاجة غير اخلاقية

الطفل فى السن ده يبقى محتاج بيئة صالحة ينمو فيها..يبقى محتاج يقضى وقته مع مامته و باباه...دى اهم مرحلة من مراحل تكوين الشخصية...أنا مش فاهمة إيه الأمهات اللى مش قادرة تحس دى

hasona يقول...

السلام عليكم

فعلا الام مدرسة اذا أحسنت أعدادها خلقت شعبا طيب الاعراف والخصال

لذلك نري السلبية في كل شئ ولا أحد يتكلم ولا أحد يتحرك

،،،
موقفك جميل طبعا
حتي لو ماماته اللي بتضربه
لازم حد ينصحها - ان العقاب له مكان ووقت معين

وموقفك كان صح

،،،،،

فعلا التركيز علي الام مهم جدا

سلمت يداك

تحياتي

حلم بيعافر يقول...

اللى عملتيه صح
مفيش شك فى كده

بس الغلط من البيت ومن التربية اصلا
وازاى زى مابتقولى حد يسيب ابنه مع الشغالة كده
وكله طبعا بيكون بداعى الشغل والبحث عن لقمة العيش

funky girl يقول...

بجد انا مستغربة جدا ازاي ممكن ام تخلي الشغالة تضرب ابنها
والله امهات اخر زمان
دلوائتتي باءا و لا حد ليه دعوة بحد داه لو حد بيقتل حد الناس هتمشي و تقول و انا مالي
ربنا يستر و القادم اعظم

micheal يقول...

لا أنتي مش حشرية واللي عملتيه هو الصح
فعلا ولد زي ده نفسيته حتبقي عاملة ازاي لما يكبر
شيء صعب جدا
تحياتي

حبيبه سى السيد يقول...

دة اسمة كلام فارع لما هما مش اد التربية كانوا بيخلفوا لية

واللى يغيظك انهم لو اتاخروا شوية فى الخلفة يبقوا هيتجننوا

ويكشفوا ويحللوا لحد ما يجى الطفل ولما يجى ينسوا النعمة اللى فإديهم

ويهملوها عشان خاطر حاجات هايفة


ربنا يسامح كل ام واب جابوا عليا واهملوا فيهم
دول هيسألوا عن حق ابنائهم


تحياتى

ابو بدر الدين يقول...

سلام الله عليكم ورحمته وبركاته
انا راي اننا فيه حاجات كتير لسنا عايزين نتعلمها
ازاي نتعامل مع الناس
ازاي نربي اولادنا
ازاي نصنع رجالا ونساءا يستطيعون التعايش مع الواقع
رجال ونساء يصنعون المستقبل ويؤثرون فيه
كتير من الناس مش بتتقي ربنا في شغلها
يعني مثلا الشغالة دي ليه بتعامل الولد كده
والام دي ازاي سايبه ابنها كده
بس انا احييك على ايجابيتك في التعامل مع الموقف
خلاص مش هطول عليكم
وسلا ا ا ا ا م م م م م

rovy يقول...

السلام عليكم
ازيك يا قمر .. وحشانى ..
برافوا عليكى فعلا فى تصرفك و ياريت كلنا نرجع تانى نتصرف باجابيه و نبطل السلبيه اللى تفشت فينا و كتفتنا و غيرت اخلاقنا و احوالنا ..
طبعا مشكلة الام اللى بتطمن على اولادها مع الشغاله دى مصيبه تانيه و الله العظيم ان لو اضطرتنى الظروف انى اسيب بنتى الصغيره مع امى كنت بأتجنن و كل شويه اكلمها اطمن .. بجد مش فاهمه دى ام ازااااى ..
احييكى على البوست و على تصرفك

تحياتى

Teawater يقول...

وسمعني احلا سلام للفيوم
هيه اول مرة الاقي حد من الفيوم مدونة ومعرفهاش
بس بجد انبسط كتير وربنا يسامحها الام ديه
انتي اكيد موقفك ده بيدل ع انك حد عسول وحنبين
وانا باحييكي ارفعلك الشابوووو

اقدم عاصمه فى الحب يقول...

السلام عليكم ورحمه الله وبركاته

اول زياره ليا فى المدونه الجميله دى
موضوع عصبنى كتير فى الاول
بس برافو عليكى اتصرفتى صح
انا لو مكانك ماكنتش هعرف اعمل كده اصل انا عصبى كنت ممكن اضرب البنت دى من غير ما اعرف فيه ايه... :)

عموما انا اتشرفت انى وصلت لحد هنا
تقبلينى زائر لصرحك العظيم

Nora 7wades يقول...

موقفك نبيل..
عن قول الله((ولا تلبسوا الحق بالباطل وتكتموا الحق وانتم تعلمون))

بس فعلا الامهات دلوقتى مفيش اى اهتمام ونوادى واجتماعات وحقوق المرأة ويجيبوا خدامين يربولهم عيالهم
طب فين الانتماء..؟؟

سبهللة يقول...

اولا انتى مش حشرية اللى عملتيه دة
بيدل على ان لسه فيه ناس عندها دم
ومش كل الناس بقت قلوبها حجر وكل واحد بيقول يالا نفسى
========
بالنسبة لموضوع الشغالة
لايمكن اسيب ولادى معايا ابدا
هى كل اللى عليها التنظيف والمواعين والغسيل فقط لا غير
لكن انا اللى بحمى العيال واكلهم وانا اللى بطبخ ولو خرجت لازم الم العيال والمها معاهم ونخرج كلنا سوا
========
بالنسبة للشغالة دى
اكيد ام الولد قرفاها عشان كدة بتطلعه على الولد الغلبان دة
ربنا يرحمه منها