الجمعة، 12 يونيو 2009

مشكله و ارجوا المشاركه

السلام عليكم طيب بما انك خبرة في حل العقد والمشاكل الزوجية
هاقلك مشكلة انا انسانة صريحة جدا وطبعي غريب شوية بالنسبة للحياة المحيطة
ودائما موضع نقد من اهل زوجي
يعني اخر موقف ان اخو زوجي برن الجرس راح فتحلي الباب سوري ب الطقم الداخلي غضت نظري وتركت الحاجة علي الباب وانا نزلة السلم قولتله لو سمحت ما تبقاش تخرج لي كدة تاني ليه وليه راح قال لزوجي واهلو كلهم

واتسبب في خناقة بيني وبينه عشان كنت عايزة اخرج واخد ابني معايا وهو عايز يخده معاه طيب هو ابني ولا ابنك انت يدوبك عمه افتكر اننا وخداها عند ومش عايزة اعطيه ابني وراح مزعق وزوجي زعقلي وكنت هاسيب البيت

انا مش عارفة اخلي زوجي يعملني كويس بعيد عن اخواته يارب يموته كلهم بس مش عارفة هو بيعمل معايا كده ليه ادمهم اكيد بيقللو اكلام عليا مش صح وبيقوموا عليا وهو بيخزن لحد مينفجر فيا

قوليلي بقي يا خبرة اعمل ايه علي فكرة بعيد عنهم هو بيعاملي كويس جدا بس حسة اني فقدت احترامه ليا ونفسى اسيبه مش هاقدر انا بكرهم

انا بكلم وخلاص بس بردة ردي عليا وهاتبعك
تحياتي علي فكرة محتاجة اغظهم ومش بعرف اعامل الناس زي معملتهم
طبعا بسسب الكلمة ديه الكل هايقطعني
ابقي انصحي الناس اللي بيكلموكي ميبقوش يتزوجوا في بيت عايلة

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
اولا احب اقولك انك كنتى سبب انى ارجع اكتب تانى و ده علشان انا كان عندى ظرف وفاه حماتى رحمها الله
و بعدها فقدت الرغبه على الكتابه و انتى طلعتينى منها
بصى يا ستى انا رأيى ليكى يتلخص فى ان اى راجل مش بيحب مراته تبان ادام اهله انها المتحكمه فيه
و ده مهم جدااااااااااااااااااااا و يمكن ده اللى بيفسر ليه هو ادامهم مش زى من وراهم
كمان عايزه اقولك انك واضح انك ساكنه فى بيت عيله و ده ليها مميزاتها و عيوبها
بس محتاجه شويه ليونه زى ما بيقولوا
يعنى يا ستى حتى لو اخوه فتحلك و هو مش جاهز انه يفتح الباب
تسيبى الحاجه على الباب و تنزلى تقولى لجوزك و هو اللى يلفت نظر اخوه مش انتى
او حتى يقول لمامته او احته تنبه اخوه
و لو مش حصل ده ماتوصليش انتى اى حاجه و قوليله روح انت و ساعتها مش هايقدر يفتح بقه
هو عارف ان اخوه غلطان بس مش هاقولك ده علشان مايصغرش بيه
الليووووونه
لما بقى لو عايز ياخد الولد ياستى سبيه و تعالى على نفسك
حتى لو هو عايز يغيظك غظيه انتى و سيبوهوله و مش هايقولك تانى هاتيه لان اكيد الولد هايتعبه برضوا
خلى بالك انك لو لسه مستجده عليهم فأنتى بالنسبالهم مبهمه و انتى اللى داخله عليهم و عايزين يفرضوا عليكى رأيهم
فأنتى اللى يهمك جوزك انه يحس انك جايه على نفسك علشانهم و ساعتها هايشيلك على راسه
الليووووووووونه برضوا
انا مش فاهمه اى كلمه اللى بسببها هايقطعوكى كلمه هو ابنى و لا ابنك و لا انه مش يفتحلك الباب كده
بس على العموم الاتنين غلط منك
لو هو فتح الباب و هو كده مش انتى اللى تلفتى نظره
و حكايه ابنك برضوا هو عمه و خليه يا ستى يشيل
لو جرب مره مش هايجرب التانيه
حاولى مايكونش فيه مقاطعه و اقعدى مع جوزك و قوليله انا هاجى على نفسى ع لشان خاطرك
و صدقينى هايشيلهالك فى قلبه و هايرجع الاحترام اللى بتقولى عليه
لو نفع رأيى ياريت تبلغينى
تحياتى

هناك 20 تعليقًا:

لاسع افندى يقول...

اولا يجب ان تتخلصى من كراهيتك لهم لانها ستنعكس على تصرفاتك ويلاحظها زوجك
ثانيا ان وجدتى من اخوته من تصلح صديقه ستدعمك كثيرا



تقبلوا تحياتى ومرورى

MaNoOoSh يقول...

فعلا انا من رأي ان الزوج ممكن يكون بيعمل كدة علشان يثبت انه شخصيته اقوي.

ممكن موقف زي اللي اخوه فتح الباب.. تلفتي نظر زوجك بلهجة بسيطة وتقوليله يبقى يروح هو يودي الحاجة بعد كدة


وموقف زي موقف ابنك تسيبيهوله واهو يريحك من المسئولية شوية


بالنسبة للي جاي بقى.. ممكن بطريقة ناعمة تكلمي زوجك وتقوليله انا بحب اهلك (لانك حته منهم) ونفسي اكسبهم وعايزا تساعدني علشان اكسبهم.


مرة فى مرة زوجك هيحس ان اهلة بيفتروا عليكي وهيقف فى صفك ان شاء الله

غير معرف يقول...

أولا
البقاء لله و ربنا يرحم حماتك و يسكنها فسيح جناته

ثانيا

فعلا رأيك حلو أوى و الموضوع محتاج شوية ذكاء فى التعامل او الليونة يعنى...و هى المفروض تشيل من دماغها انها بتكرهم و تحاول تشوف جوانب تانية مشتركة بينهم و تدخلهم منهاو هما اكيد حيتقبلوها زى ما تقبلوا من الاول انها تكون واحدة منهم

HAPPY يقول...

الجواز وسنينه
البقاء لله وربنا يصبركم يارب..

واضح جدا ان اللى بتسأل بتكره اهل جوزها فعلا ويمكن تكون مش مديه نفسها فرصه اساسا انها تحبهم.. يمكن يكونوا هما فعلا ناس مش كويسين بس المواقف اللى حكتها مواقف لا تستدعى كره ..

وعموما لازم تعرف انها مش حرب وانها لو حرب هى لوحدها هتكون الخسرانه لو معرفتش تتعامل مع اهل جوزها ...

عاشقه الرومانسيه يقول...

البقاء لله فى حماتك ياحبيبتى


انا معاكى جدا فى كل كلمه قلتيها
و اى انسان بيحب ان زوجته تيجى على نفسها علشان خاطره وهيقدر لها ده قوووى
ده غير أن الزوج بيحب يحس بسلام وموده بتربط اهله بزوجته
وبالذات امه
هى كده مثلث
الام والزوج والزوجه
ولازم الزوجه ترضى الام علشان ترضى زوجها
اعرفى انك هتدخلى الجنه برضا زوجك وزوجك هيدخل الجنه برضا امه يبقى لازم ترضى امه
اما اخوه فهو فعلا عايز يغيظها يبقى ماتديهوش فرصه لده
وتسيب الولد له
يعنى هيحصل له ايه
بالعكس عمه هو اللى هيزهق
وبلاش العند لانه بيخرب بيوت كتير
واخرته وحشه
تعالى على نفسك علشان ابنك
وربنا يوفقك

blue-wave يقول...

بجد صعب اوى دا
بس ياترى ايه سبب كرههم دا؟
دورى وشوفى وشاركيه معاكى

Kiara يقول...

بصي بقي انا صغنونه اه لكن من اللي شفته هقولك

بصي اي زواج في الدنيا في البدايه بيبقي ضعيف وهش وموش فيه ثوابت اوي

هقولك مثلا خالتو في السنين الاولي في جوزاها

كان في مشاكل بالهبل

لدرجه ان يوم اما زوجها تعب اخوه مش وافق يدخلها عليه والدكتور معاه بيقولها لا برغم انها مراته بس خالتو اتحملت في الفتره الاولي وبقت تساعدهم في امور البيت وجت علي نفسها دلوقت بقي بعد 9 سنين جوزا جابلها شقه وكتبها باسمها وقدرت تخلي كل بيت منفصل عن التاني في الاكل والشرب وكدا وبيتجمعوا بس اخر الليل يقعدوا ساعه ولا اتنين وبعدها كل واحد علي شقته

الموضوع محتاج صبر وتحمل شويه ودوري علي اي ثغره وسديها وبالعكس اضحكي معاهم وصاحبيهم اعتقد حفاظ علي بيت يستحق كل دا

وربنا معاكي ويوفقك

غير معرف يقول...

السلام عليكم

انا بيني ونهم كل خير بس في الموقف اللي زي ده ولما تحصل مشكلة بيني وبين حد فيهم بلاقي الكل قطعني بدون سبب ومن غير ما اغلط فيه ابوه وامه علي عيني وعلي راسي وما فيسش حاجه بنهم بالعكس باباه اتكلم معايا وقالي متزعليش وحق عليا والكلام ده
المهم اني بستغرب ليه من اي موقف بيعندوني وكمان الكل يروح مخصمك
بمعني لو زعلتي من اخونا احنا مش هانكلمك
واهومن يومين وحتي لو قعدت شهر
انا فعلا غريبة عنهم مش قريبتهم وطبعا كلهم اقارب في بعض
وعلي فكرة
انا مش بعرف انافق حد
وعشان مخنوقة ومش عارفة اخد حق ليا هافوض امري لله هو كفيل ينصفني في يوم من الايام
انا مكنتش فكرة انك هتعملي بوست انا كنت فضفض معاكي وقلت هاتردي عليا في تعليق
برفو عليكي
متشكرة قوي
تحياتي

الجواز و سنينه يقول...

لاسع افندى يقول...
اولا يجب ان تتخلصى من كراهيتك لهم لانها ستنعكس على تصرفاتك ويلاحظها زوجك
ثانيا ان وجدتى من اخوته من تصلح صديقه ستدعمك كثيرا



تقبلوا تحياتى ومرورى

ــــــــــــــــــــ
ردك عجبنى اوى و خصوصا فى نقطه ان كرهها سينعكس على تصرفتها

الجواز و سنينه يقول...

منوووووووش

الله عليكى بجد قلتى جمله فى الجون

ـــــــــــ
بالنسبة للي جاي بقى.. ممكن بطريقة ناعمة تكلمي زوجك وتقوليله انا بحب اهلك (لانك حته منهم) ونفسي اكسبهم وعايزا تساعدني علشان اكسبهم.
ـــــــــــــــــــ
اسكيفت جدا منها و الله

الجواز و سنينه يقول...

انا و دماغى
حياتك الباقيه و شكرا ليك على ذوقك

ــــــــــــــــــ
تحاول تشوف جوانب تانية مشتركة بينهم و تدخلهم منهاو هما اكيد حيتقبلوها زى ما تقبلوا من الاول انها تكون واحدة منهم
ــــــــــــــــــــ
وجون و جون و جون و جوووووووون

بجد عجبنونى اوى الكلمتين دول
حل برضوا و اكيد فكره

الجواز و سنينه يقول...

هـــــــــــابى

حياتك الباقيه يا حبيتى شكرا ليكى

ـــــــــــــــــــــ
واضح جدا ان اللى بتسأل بتكره اهل جوزها فعلا ويمكن تكون مش مديه نفسها فرصه اساسا انها تحبهم.. يمكن يكونوا هما فعلا ناس مش كويسين بس المواقف اللى حكتها مواقف لا تستدعى كره ..

وعموما لازم تعرف انها مش حرب وانها لو حرب هى لوحدها هتكون الخسرانه لو معرفتش تتعامل مع اهل جوزها
ـــــــــــــــــــــــــ
تعليقك كله عجبنى و بجد اكيد يوضع فى عين الاعتبار و جدا كمان
ربنا يكملك بعقلك

الجواز و سنينه يقول...

عاشقه الرومانسيه

حياتك الباقيه يا حبيبتى تسلميلى يارب دايما

ــــــــــــــــــــــ
ده غير أن الزوج بيحب يحس بسلام وموده بتربط اهله بزوجته
وبالذات امه
هى كده مثلث
الام والزوج والزوجه
ولازم الزوجه ترضى الام علشان ترضى زوجها
اعرفى انك هتدخلى الجنه برضا زوجك وزوجك هيدخل الجنه برضا امه يبقى لازم ترضى امه
ــــــــــــــــــــــــــــ
كلام عجبنى اوىىىىىىىىى
و الله ربنا يكملك بعقلك كلمتين فى الجون

الجواز و سنينه يقول...

بلو ويف

اكيد فيه اسباب مش للكره و لكن متهيألى انها لسه جديده عليهم و همه مستغربينها و هيه مستغربها و مع الوقت هايزول كل ده بإذن الله

الجواز و سنينه يقول...

كيارا
ردك جميل زيك
و فعلا نطلع منه انه مع طول الوقت الناس بتتعود على طباعنا و احنا كمان بنتعود على طبعاهم
مسأله وقت مش اكتر

الجواز و سنينه يقول...

السلام عليكم

انا بيني ونهم كل خير بس في الموقف اللي زي ده ولما تحصل مشكلة بيني وبين حد فيهم بلاقي الكل قطعني بدون سبب ومن غير ما اغلط فيه
ــــــــــــــــــــــــــ
عايزه اقولك ان لو جوزك زعل اخوكى باباكى و مامتك و انتى و اخواتك هاتزعلوا منه

ـــــــــــــــــــــ

ابوه وامه علي عيني وعلي راسي وما فيسش حاجه بنهم بالعكس باباه اتكلم معايا وقالي متزعليش وحق عليا والكلام ده
ـــــــــــــــ
قلتلك انهم فاهمين انه غلطان همه بس يمكن اعترضوا على طريقتك فى التعبير

ـــــــــــــــــــــــــ

المهم اني بستغرب ليه من اي موقف بيعندوني وكمان الكل يروح مخصمك
بمعني لو زعلتي من اخونا احنا مش هانكلمك
واهومن يومين وحتي لو قعدت شهر

ــــــــــــــــــــــــــ
هنا بقى دور جوزك
اقعدى معاه و قوليله الكلمتين اللى قالتهم منوش
و الله كيفونى انا و اكيد هايكيفوه هو كمان ان شاء الله
و خليه يصالحكم على بعض و حاولى تهدى اللعب لان فى الاخر انتى من مصلحتك انك لما يتقفل عليكى بابك تكونى سعيده مع جوزك

ـــــــــــــــــــــ
انا فعلا غريبة عنهم مش قريبتهم وطبعا كلهم اقارب في بعض
ـــــــــــــــــــــ
على فكره انتى غريبه إلى حين يعنى مع طول الوقت هاتبقى واحده منهم و اكتر

ـــــــــــــــــ
وعلي فكرة
انا مش بعرف انافق حد
وعشان مخنوقة ومش عارفة اخد حق ليا هافوض امري لله هو كفيل ينصفني في يوم من الايام
ــــــــــــــــــــــــ
مش فكره نفاق محدش قالك نافقى بس كمان لازم تتعلمى ازى تكسبيهم و اللى مضايقك همه يبطلوه او يبطلوا اغلبه و ده برضوا سبيه على جوزك و لو ما عرفش يوصله حاولى تتلافى المواقف اللى بتضايقك او حتى فكرى بينك و بين نفسك ايه احسن رد او فعل كان المفروض تعمليه ساعتها لو جه حاجه مشابهه هاتعرفى تتعاملى
ـــــــــــــــــــــــ

انا مكنتش فكرة انك هتعملي بوست انا كنت فضفض معاكي وقلت هاتردي عليا في تعليق
برفو عليكي
متشكرة قوي
تحياتي

ــــــــــــــــــــــــ
كنت هارد عليكى فى التعليق بس قلت لو عملت بوست و حد قال رأى تانى يمكن يكون شايف حاجه مش شايفاها تفيدك و قد كان كلهم قالوا كلام احلى من بعض
و بعدين ده يديكى ثقه ان التصرف اللى هاتتصرفيه موافق اغلب الاراء مش رأيى انا بس
تحياتى و اى حاجه انى عايزاها قولى و فضفضى و لا يهمك
احنا فى الخدمه

rovy يقول...

السلام عليكم
حبيبتى البقاء لله .. انا داخله اشوفك لأنك وحشانى و دخلت اكثر من مرة و ما لقيت جديد .. سامحينى لأن كان عندى شوية مشاغل خلتنى اقصر و ما اتصلش بيكى المهم البقاء لله و ربنا يصبركم
ان شاء الله اكلمك قريب اطمن عليكى
بالنسبه للبوست ان شاء الله ارجع تانى اعلق عليه ..
تحياتى

صيدلانيه طالعه نازله يقول...

واضح قوى ان الطرفين شايليين من بعض و متلككين لبعض من الاول جايز عيب فيهم و ممكن فيها بس الموضوع مش حرب لانها للاسف فى وسطهم و مهما كانوا غلطانين عمر جوزها ما حيقف معاها ضدهم حتى لو عارف انها مش غلطانه و دى قاعده مسلم بها

من غير عنـــوان يقول...

ردك عاقل وكويس

ربنا يسعد الجميع

شمس النهار يقول...

البقاء لله وربنا يرحم حماتك ويدخلها فسيح جناته

انا شايفه ان ردك ورد الاخوه جميل وكفايه بس عايزه اضيف حاجه صغيره

الانسان لما يفضل يعامل الناس وخصوصا اللي مافيش مفر من التعامل معهم بلين وبطريق كويسه يغلب عليها انها تكون حسبه لله
ربنا بيعين علي ده
وبيجي يوم همه يغلطوا نفسهم ويتعدلوا
وطالما انت مش هضماهم كده حاولي ان يكون التعامل في اضيق الحدود
بس ماتمنعيش جوزك والا اولادك