الخميس، 9 أكتوبر 2008

حبه رومانسيه



خطر فى بالى سؤال

ليه الناس بتتجوز؟

انا بتكلم بجد مش بهزر

علشان فيه ناس بتتجوز علشان تخلف

و فيه ناس بتتجوز جواز مصلحه

ده حتى فيه ناس بتتجوز علشان بيتهيألها ان الجواز هايصلح حالهم اللى مايل

كمان فيه ناس بتتجوز علشان خايفه تكبر على الجواز

او حتى علشان تبعد بعيد عن بيت الاب و الام


السؤال بقى

هو المفروض الناس بتتجوز ليه؟


و السؤال الأخطر

ايه ذنب الطرف التانى اللى داخل سواء بحسن نيه

او حتى علشان ليه اسبابه الخفيه هو كمان


المفروض الناس تتجوز علشان تسعد بعض

و بــــــــــــــــــــــــــــــــــــــــــــــــــــــــــــــــــــــــــــــس

و اللى شايف نفسه مليان عقد ياريت ما يتعبش معاه طرف تانى ممكن يكون اصلا مش ناقص تعب

و دمتم سالمين

هناك 61 تعليقًا:

مصري بالغربة يقول...

والله معاكي فعلا حق

اللي شايف في نفسه عقد ما يتعبش الطرف التاني معاه

والبنات ما يبقاش همهم بس انهم يتجوزوا وخلاص

لازم يكون الزواج عن اقتناع وليس هروب من شبح العنوسة

FreeKiller يقول...

مبلا الناس تتجوز
كده احسن

Beram ElMasry يقول...

الاخوة الاعزاء
السلام عليكم ورحمة الله
بناء على رغبة الكثير من الاصدقاء المدونين ، وفى مقدمتهم الاخ الدكتور توكل مسعود ، فى تغير اصم مدونتى من ( المدهول ) الى اسم اخر يليق بمحتوى المدونة ، وانطلاقا من طبيعتة الغيورة على اصدقائه ، ومن الاسماء المعروضة ( كرباج سودانى ) وقد وقع عليه اختياؤى ، وصار هذا اسم المدونة الجديد
لااختلاف فىالمحتوى ولا تغير فى موعد كل جديد وهو يوم الثلاثاء
لكم كل الحب والاحترام
لىعودة لمناقشة موضوع الزواج

nona يقول...

بصى هى فعلا مشكلة كبيرة
دية حتى فى ناس بتتجوز عشان بس ما حدش يقول عليها دية عانس مش بيجلها عرسان و تتغاضى عن حجات كتير ان كانت هتنجح فى الحياة الجديدة و الا لا
و فى ناس بتتجوز هروب من سيطرة الاب او الام او مجرد فكرة كل الناس بتتجوز اشمعنا انا الاى هفضل قاعدة
و بعد كدة بتحصل الكوارث و المهازل و ناس بتدفع تمن حاجة مالهاش ذنب فيهم
تعرفى ان مش طرف واحد هو الاى بيدفع دة كمان لو فية اطفال بيدفعوا الفاتورة كاملة و هما الوحيدين الخسارنين فى الموضوع دة كلة
لية ما يبقاش فى حب و تفكير بالعقل فين السكن و المودة بس نقول اية
ربنا يصلح حالنا جميعا

rovy يقول...

السلام عليكم
كلامك مضبوط بس هى دى طبيعة البشر يعنى صعب تلاقى كل الناس رومانسيه او حتى متفهمه المعنى السامى من الزواج ..
علشان كده لازم كل فرد يحاسب قبل ما يخطو الخطوه دى و يحاول يعرف الاخر كويس
و يا ريت نفضل فاكرين دايما ان الزواج موده و رحمه ..

اشكر مرورك الكريم لمدونتى و ان شاء الله يدوم التواصل ..
مدونتك جميله و فكرتها ايضا جميله
سعدت بالتعرف عليها و عليكى اختى الكريمه ..
دمتى فى حفظ الله
تحياتى

الرومـيصاء يقول...

انتى اثرتى موضوع خطير جدا
والسؤال هو لماذا نتزوج
واكثر اسباب الفشل فى الزواج ان الواحد لا يسأل نفسه هذا السؤال قبل الزواج
يجب ان نضع النوايا من الزواج قبل القدوم على خطوه كهذه
ومن النوايا مثلا
اولا اتزوج طاعه لله واتباع للسنه
ثانيا اتزوج لااعف نفسى عن الحرام فالزواج نصف الدين
ثالثا اتزوج لانجب اطفال اربيهم ليحملوا هذا الدين وينصروه
اتزوج لانجب ولد صالح يدعوا لى بعد الموت
وهكذا.......
العديد والعديد من النوايا التى يجب
ان يقوم على اساسها الزواج لنعلم
ما الهدف من ان نتزوج واين سينتهى هذا الزواج
وجزاكى الله خيرا على زيارتى
تحياتى.

KHALED يقول...

إيــــــــــــــــــة
أفندم .........
بتقولى إية .... !!!؟؟؟
الجواز فى الاساس هو الشرعية إللى إتحددت للإنسان علشان يعمر الأرض
أما إحنا البشر بإختلاف مذاهبنا و عوايدنا و أمزجتنا و دماغتنا عملنالة ميت علشان
السؤال هنا كان لازم يكون
لما انت موش قد الجواز بتتجوز لية
موش الناس بتتجوز لية ..؟؟؟
تقبلى مرورى
تحية طيبة

عــلاء ســالـــم يقول...

السلام عليكم

معاكي حق بجد والله
الزواج إرتباط أبدي يعني لازم يكون النيه فيه حسنه
لأن أي خلل في النيه هايوصلنا لخلل طول العمر نعاني منه

Unknown يقول...

أنا شايفه كدهب بردو

لو مكنش كل واحد فيهم هيحاول يسعد التاني ويكون نصه التاني بجد
يبقي بلاش أحسن

Empress appy يقول...

اممممممم لما اتجوز هقولك بس انا اعرف انه سنه الحياه
انتى تعرفى حاجه تانيه
هههههههه
بصى يا قمر اولا اللخبطه اللى بتحصل علشان النفسيات بقت وحشه ومحدش بيراعى ربنا فى تصرفاته ولا اخلاقيات بس خلاص

blue-wave يقول...

ياسلام لو الناس كلها تسمع كلامك
والله كان كله ارتاح
تقبلى تحياتى باول زيارة

همس يقول...

دا ممكن ناس تتجوز علشان امكانيتها تتيح ليها فتتجوز غلاسه ورخامه

بص من غير جواز ومتعقدين فعادى

اى حد تلاقيه متعقد فى الموضوع دا ما تبقى تستغربى

تحياتى اليكى

ومدونة لذيذه فعلا

وان شا ءالله من زوارها الدائمين

Sweet Violet يقول...

سؤالك اجابته لان الجواز نص الدين و عمار الارض

اما بقى الكلام بتاعك اللى هو كل واحد بيتجوز عشان يقرف اللى معه

فادا لان كل الموازين اتقلبت فى الزمن دا اللى سببه البعد عن ربنا

لان لو كل واحد قرب من ربنا و خافه هايبقى الجواز موده ورحمه زى ما ربنا قال

mahasen saber يقول...

معاكى حق يا جميله بس هقولك ايه
تعددت الاسباب والنصيب واحد ...
يعنى برضه تعددت الاسباب والجواز واحده
هو فيه مفرمن التجربه دى
بس انتى ناقشتى الموضوع صح وفعلا فيه ناس كتير كتير بيبقا ليه سبب من الاسباب اليى ذكرتيها دى

بس تقولى لكين يعرف انه داخل مرحله لازم يتقى فيها الانسان التانى اليى هيشاركه فيها
انتى نورتى مدونتى وشرفتينى بكلامك الجميل
انا شاكره ذوقك وكلامك الجميل
واسغدتنى زيارتى لمدونتك قوى قوى
مدونة جميله جدا وبوستاتها خفيفة الروح...

mohamed ghalia يقول...

متفق معاكى
بس الجواز ده هو المصير إلى لابد منه
هنتجوز يعنى هنتجوز
وكل واحد يستحمل التانى على عيوبه
تحياتى
دمتى بود وفى سعادة

romansy يقول...

الناس بتتجوز علشان تقرف بعض
ههههههههههه

Rehab يقول...

اعتقد ان الناس بتتجوز ...
علشان المفروض انها تتجوز..
مش علشان هي حاسة انها عايزة تتجوز...
يعني تأدية واجب..
نوع من التابع العادات والقاليد البليه ...
وعلشان هو مرحلة والسلام فناس كتير بتظلم بعض..
لانها بتبقي مش حاسة ببعض..
فالحياة بتقي تقرف...
والناس مبتبقاش عايزة تكمل..
او عايشين لمجرد انهم عايشين وخلاص..
لو كل واحد حاول يحس ويفهم اللي بيعمله في اي مجال في حياته او حتي وهو بياخد اي قرار في حياته ويحط نفسه مكن الطرف التاني..
عمر ما هيكون في حد تبعان وقرفان او حاسس انه مظلوم ...



بشكرك من كل قلبي علي تعليقك في المدونة بتاعتي يا ريت تقرا الباقي وتقوليلي..رايك

د/ رامي شهاب الدين يقول...

ليه الناس بتتجوز ؟ .. سؤال مش بطال

لكنك جاوبتى عليه إجابات إستثنائية ، يعنى الاسباب إللى قلتيها دى هى الأسباب النادرة

لكن أشهر سبب للجواز هو إن أتنين اتقابلوا ، وبينهم كيميا خاصة ، وبمحض إرادتهم عايزين يكملوا حياتهم مع بعض

الإنسان كائن إجتماعى بطبعه ، يعنى ماينفعشى يعيش لوحده ، واللى بيفضل العزلة ده يبقى إنطوائى وعايز يتعالج .. إلا فيما ندر

وخلاصة القول إن الجواز شئ ذو حدين ، قد يكون نعمة وقد يكون نقمة ، لكن أهم شئ حسن الإختيار

معلشى سؤال يعنى : إنتى تعرفى مدام سوسة؟ .. لو تعرفيها إبقى سلمى لى عليها .. وطبعا إسمى مكتوب أهو

دمتى بكل الود .. تحياتى

الجواز و سنينه يقول...

مصرى بالغربه
اولا نورت البلوجر بتاعتى و ترجع بالسلامه من الغربه
و اكيد لازم يكون الجواز عن اقتناع بس ده نادر ما بيحصل

الجواز و سنينه يقول...

FreeKiller
الناس لازم تتجوز بس المهم تتجوز صح
تتعوز علشان تبنى بيت مش علشان خايفين من العنوسه و العنوسه دى للبنات و الولاد على فكره
او علشان عايزين يكملوا نصف دينهم و خلاص
لازم الناس تتجوز و هيه قرحانه بالانسان اللى اختاروه
يعنى بمعنى اصح يرموا عقدهم خارج الجواز علشان ما يتعبوش حد تانى

الجواز و سنينه يقول...

nona
كلامك اكتر من رائع و مافيش كلام بعده
نورتينى يا جميل
و بجد اسعدنى كلامك جدا

الجواز و سنينه يقول...

rovy
و الله اسعدنى جدااا زيارتك مدونتى
و طبعا كلامك مظبوط فى ان الواحد لازم يفكر كويس قبل ما يتجوز
و على الاقل لو كان فيه سبب خفى للجواز فلازم يرمى ده ورى ظهره بمجرد ما دخل حد تانى فى حياته و ما يظلمهوش مالهوش ذنب معاهم
دمتى بود و فى حفظ الله و رعايته

الجواز و سنينه يقول...

الرومـيصاء
اسبابك اللى ذكرتيها و نواياكى اكثر من رائعه
بجد ياريت الناس كلها تقرأها علشان تستفيد منها
نورتينى بكلامك و طلتك الجميله

الجواز و سنينه يقول...

Khaled

اولا نورت طبعا
ثانيا ما فهمتش الاستنكار الغريب ده كله معناه ايه؟؟؟؟؟؟؟
فكرت ارد عليك ب لا تعليق
بس رجعت قلت لاء
و بعدين انت قلت السؤال المفروض يكون
لما انت مش اد الجواز بتتجوز ليه ؟ مش الناس بتتجوز ليه؟
و رغم ما فيش فرق شاسع بين الاتنين لان المغزى واحد تقريبا
اما ان الناس حطت للجوزا اكتر من علشان
انا لقيت ان الناس زمان كانت تقريا عارفه علشان قله الناس و المساحه اللى عايشيين فيها
و لما كترت الناس ظهرت المشاكل
و هو ده اللى خلانى اقول ان الناس المفروض تتجوز بنيه صافيه مش لوجود اسباب خفيه يدفع تمنها طرف مالوش ذنب
اخيرا نورت طبعا

الجواز و سنينه يقول...

علاء سالم
اولا حمدلله على السلامه
ثانيا نورت المدونه
ثالثا انبستط اوى ان اللى انا عايزه اقوله وصل
كنت بدأت اقلق
بس طمنتنى
ربنا يوفقك فى جوزاك

الجواز و سنينه يقول...

esraa
مش عايزه اقول بلاش جواز
بس حتى لو الاسباب دى موجوده و لو بجزء بسيط
بلاش يطلع على عين الطرف التانى
او الاطراف التانيه لو فيه اولاد
نورتينى و شكرا على ردك الجميل

الجواز و سنينه يقول...

~*§¦§ Appy §¦§*~

هههههههههههههه
اعرف طبعا سبب تانى
علشان هو قسمه و الشبراويشى
هههههههههههههههههه
و بعدين انتى حطيتى ايدك على الجرح
و دوستى كمان
النفسيات
الناس كلها عايزه دكاتره من كتر اللى بيشوفوه

طيب انا هاحكيلك حكايه كده
مره واحده معقده م بابها اتجوزت و الله ورت جوزها الويل يا حرام و طلبت منه الطلاق و إلا هاتموت بنتهم و طلقها و بس بعد ما اتبهدل معاها
هو ده اللى بقصده
الناس اللى زى دى ما يبهدلوش ناس تانيه معاهم
كان الاولى انها تنسى ياياها و تحاول تعيش صح
بس هيه كانت داخله بنيه مش تومام
رغيت انا صح ؟؟؟
نورتنينى يا عسل

الجواز و سنينه يقول...

blue-wave
و الله اسعدنى كلامك و زيارتك للمدونه بس برضوا نزل الباقى بسرعه علشان عايزه اعرف الباقى

الجواز و سنينه يقول...

همس
هههههههههههههه
عجبتنى اوى فكره ان الناس بتتجوز غلاس علشان معاها الفلوس اللى تخليها تتجوز
نورتنينى يا قمر و دايما كده تنورينى

Gannah يقول...

اختى الكريمة
زيارتك لمدونتى اسعدتنى
أما ليه الناس بتتجوز
المفروض علشان السكن والمودة والرحمة
وعلشان يكون ليهم ذرية فالابناء من زينة الحياة
أما الواقع فمحدش بيسأل نفسه ليه؟؟
زى حاجات كتير بنعملها من غير ما نعرف ليه
سؤال يبدو بسيط بس هو مش بسيط ولا حاجة
وعلى رأى آبى لما اتجوز هقولك
تحياتى

dreem يقول...

ازيك
اول مرة اجى عندك وانورك ههههههههههه
مبروك على الموضوع ده واللى واضح منه انك حطيتى رجلك على اول طريق الحكمة هههههههههه
اعذرينى عالضحك بس السؤال ده عجبنى ولو انى اتكلمت فيه كتير وكنت بسأله زماااان كتير برضه
تقبلى تحياتى

KHALED يقول...

فكرت ماعقبش بس رجعت و قلت لأ

**************************
اللى شايف نفسه مليان عقد ياريت ما يتعبش معاه طرف تانى ممكن يكون اصلا مش ناقص تعب
**************************
دة كلامك و دة معناة إللى موش قد الجواز و تبعاتة من تحمل للمسؤلية و إسعاد الطرف الأخر و تربية أطفال و خلافة .. مايتجوزش ... صح ولا لأ أعتقد إنى فهمت المعنى علشان كدة كان فية إستنكار لسؤالك عن إن الناس بتتجوز لية ..؟؟؟ والفرق كبير موش متقارب زى ماقولتى ...
إنى أأقول الناس بتتجوز لية
أو أقول إللى موش قد الجواز بيتجوز لية ....
على فكرة أنا بشد فى شعرى منك ...
و على فكرة جنة قالت فى تعليقها الخلاصة
وانا هنا باشارك فى مدونتك موش جاى أستنكر ...... ههههههههه
تقبلى تحياتى مع خالص الود
........

الجواز و سنينه يقول...

ضد التيار
اكيد الجواز سبب لعمار الارض
ــــــــــــــــــ
لان لو كل واحد قرب من ربنا و خافه هايبقى الجواز موده ورحمه زى ما ربنا قال
ـــــــــــــ
كلام جميل كلام معقول
مافيش حاجه تتقال بعده

الجواز و سنينه يقول...

mahasen saber
و الله انتى اللى نورتينى و سدتينى بكلامك
و فعلا الناس لازم تتقى ربنا فى الانسان اللى دخلته حياتها و م قلبش حياته إلى جحيم

الجواز و سنينه يقول...

mohamed ghalia

فعلا المفرضوض كل واحد يستحمل التانى على عوبه لانه هو كمان مش خالى منها

الجواز و سنينه يقول...

romansy
ههههههههههههههههه
الناس بتتجوز علشان تقرف بعض برضوا
هههههههههههههههههههه
تيب

الجواز و سنينه يقول...

Rehab
كلامك جميل و بيعجبنى
و فعلا ناس كتير بتتجوز عادات
و بعد الجواز بتفكر هيه كانت عايزه ايه؟ و ياترى اللى معها ده هو اللى عايزاه و لا لاء
و لو لاء فالسؤال بعد ما اخدت القرار و لو طلع غلط ليه احمل الطرف التنى مسؤليه غلطتى
لازم نحسبها صح

الجواز و سنينه يقول...

Rehab نسيت اقولك انى هاقرأ البوست الجديد و عارفه انه هايعجبنى طبعا

الجواز و سنينه يقول...

رامي شهاب الدين
يعنى الاسباب إللى قلتيها دى هى الأسباب النادرة
ــــــــــــــــــــــ
مش نادره بالعكس
اللى قلته هو اللى نادر ماحدش بيفكر كده كتير
ــــــــــــــــــ
وخلاصة القول إن الجواز شئ ذو حدين ، قد يكون نعمة وقد يكون نقمة ، لكن أهم شئ حسن الإختيار

ــــــــــــــ
هيه دى الخلاصه
ـــــــــــــــــــ

معلشى سؤال يعنى : إنتى تعرفى مدام سوسة؟ .. لو تعرفيها إبقى سلمى لى عليها .. وطبعا إسمى مكتوب أهو
ــــــــــــــــــ
اللى اعرفه انها آنسه
بس انا ما اعرفهاش
و بدام اسمك مكتوب خلاص اكتبه عندها
هههههههه

الجواز و سنينه يقول...

Gannah
انا كمان انبستط كتير بزيارتك ليه
و مستنياكى تتجوزى علشان تقوليلى النتيجه اللى يارب تكون جميله زيك

الجواز و سنينه يقول...

dreem

طبعا نورتينى بس الكهربا بقت غاليه
مين هايدفع الفاتوره بقى
هههههههههههههههه
و كمان حتطينى على اول طريق الحكمه
مرسى يا ستى على الكلام الحلو ده
لما انتى سألتيه كتير يترى عرفى الاجابه و لا ايييييييييييه
هانقضها اسئله؟

الجواز و سنينه يقول...

خالد الوقت متأخر و انا لازم انام
هامخمخلك فى الرد و اقولك عليه
بس سلامه شعرك
و كله إلا الشعر بعد كده تقول لمراتك اما السبب
لاء انا مش مسؤله

dreem يقول...

يوووووووه عرفتها بقالى كتيييييير
واتكلمت فيها وكتبتها
تحياتى

غير معرف يقول...

علي فكرة أنا أول مرة أدخل عندك المدونة، عجبني قوي البوست بتاع شفيقة و تيمور، أول مرة أشوف واحدة فاهمة العلاقة بين الراجل و الست صح، يمكن عشان انتي اتجوزتي خلاص و فهمتي الدنيا اكتر، فعلا الحياة مش كلها رومانسية و لو كان كلها رومانسية حتبقي زهق، طبعا انتي عندك مليون حق ان الرومانسة مش ورود و هدايا، الرومانسية هي احساسك ان ليكي نص تاني بيخاف عليكي و يهمه مشاعرك و نفسه يسعدك.... الموضوع الاهم بقي اني علقت هنا لأول مرة لسبب واحد فقط، انك كتبتي كلمة أنا عن نفسي بعتبرها أحد مباديىء الشخصية الي جانب اني قلتها لخطيبتي في اول مرة قعدت معاها لما اتقدمتلها، قلتها الناس بتتجوز عشان تسعد بعض مش عشان تتعس بعض، و الحمد لله هي خدت مني الكلمة دي و حطتها حلقة في ودانها و في اي وقت انا او هي بيحصل بينا اي *كلاش* كل واحد بيحاول يصلح الامور بأسرع وقت ممكن عشان دايما بنحط قدام عينينا مقولة ان احنا مخطوبين و حنتجوز انشاء الله عشان نسعد بعض، مش عشان نعمل مشاكل و ننكد علي بعض، انا سعيد ان لسه في بنات زيك معتدلات و دماغهم عاقلة و فاهمين الدنيا بشكل افضل من غيرهم كتييييييير قوي....

إمضاء واحد من أشد المعارضين لاسلوب غادة عبد العال و هي عن نفسها بتكرهني موت عشان كدة مش حكتب اسمي، هي الوحيدة اللي ممكن تعرف انا مين لو شافت الكومينت بيتاعي عندك...

تحياتي

الجواز و سنينه يقول...

دريم
انا فعلا جيت عندك
بس انا عندى مشكله فى الجهاز صعب انى احكيهالك
بس بأختصار مش عارفه ارد عندك علشان التعليق بيطلع فى نافذه منبثقه
لو عملتيه زى للى عندى هاعرف ارد
اصل الجهاز عندى بيهبل
ربنا يهديه

الجواز و سنينه يقول...

غير معروف
اولا نورت البلوجر
و مرسى جدا على الكلام الحلو اللى قلته عنى
و ربنا يسعدك انت و خطيبتك يارب
واضح انك شخصيه عاقله و تفكيرها مرتب

و هابقى احب اعرف انت مين حتى علشان اشوف مواضيعك انت كمان
نورتينى يا غير معروف

مخنوق كيك يقول...

الجواز وسنينه

احييكي علي تشريفك لمدونتي المتواضعة للمجانين فقط . شفت اسمك قلت مادام فيها جواز يبقي اكيد مجنونة .تيييييت

اللي زاد المهلبية فانيلا .. اني دخلت اتصدمت بموضوع ليه بنتجوز ؟؟

طبعا اجابه السؤال سهلة خالص . ان الانسان مش عاقل في جميع الاوقات .. لازم يتجنن شوية .. ودي نتيجة جنانه

عايزه حبه جد ؟؟؟ اوك
الانسان عايش حياته مرة واحده وبطبيعة البشرية لازم يكون ليه النص التاني اللي يريحه ويرتاح معاه ويفضفضله ويشاركه حياته ويكون الجزء المكمل ليه في وقت احتياجه .

الحياه مليانة مشاكل وضغوط . علي الرجال والنساء . وبالكيميا اللي جوانا بيتجاذب كل منهما للاخر عشان يلتحموا مع بعض وينشئوا كيان خاص بيهم وعالمهم الخاص .

المفروض ان الكيان ده يبقي كله سعاده وهدوء ولكن ضغوط الحياه ساعات بتعكره ويتعرض لبعض الاتربه . لكن بالحب اللي بينهم بيقدروا يتخطوا كل العقبات دي

وطبعا ربنا بيوفقهم لان الجواز نص الدين ان لم يكن الدين كله في عالمنا الان

دا غير الاطفال اللي هتيجي وهتبقي هيصه .. ورحمه خالتي اللي معرفهاش منا متجوز

وعلي راي المثل " اللي يخاف من شبرا ينفخ في المعادي "

إيمان قنديل يقول...

قالوا لنا أن الجواز سنة الحياه،والمفروض طبعا الجواز ده يبقى حاجه كويسه في حياتنا واللي بيحصل إن كل الكلام كدب، وأحلى حاجه ممكن تيجي من الجواز العيال

احساس لسه حى يقول...

عزيزتى

ايه السؤال اللى اجابته بتحتاج كتب

شوفى يا ستى كل انسان ليه اسباب بيتجوز علشانها وبعض الاسباب دى واحده مع كل الناس وفى ناس ليهم اسباب زيادة على اللى بيتفق فيها كل الناس

نقول بعضها

بنتجوز علشان ما نعيش فى الدنيا لوحدنا

بنتجوز علشان يكون عندنا اطفال

بنتجوز علشان نخرج زغبتنا الجنسية

بنتجوز علشان بنحب

بنتجوز علشان اهلنا عاوزنا نتجوز

حلوين دول

السؤال التانى

ان معندش بيشوف نفسه متعقد ودايمن فاكرين اننا صح وكويسين وميه ميه

والطرف التانى هو اللى مخ متركب شمال

واحنا بقه دورنا اننا نختار ونعرف نختار صح

تحياتى
سلام

غير معرف يقول...

صباح الخير، ازيك عاملة ايه؟؟؟ أنا غير معروف بتاع المره اللي فاتت :) ميرسي علي ردك الجميل، أخجلتم تواضعنا... أما بخصوص انك حابه تعرفي انا مين عشان برضه تتعرفي علي المواضيع بتاعتي، ف أنا بصراحة مش عامل بلوج، أولا و بصراحة عشان انا بني ادم واقعي جدا و عارف اني لو عملت بلوج مش حوصل بيه لأي مكان و مش حغير بيه حاجه في الكون، ماهو في غيرنا عملوا بلوجز و اشتهروا و طلعوا في التليفزيون و حتي الاعلام الخارجي!!! و في النهاية كلامهم غير ايه في الكون؟؟؟ ولا حاجه!!! تاني حاجه بالنسبة ان موضوع عمل بلوج ممكن يكون فضفضة!!! ما هو انا ممكن افضفض مع أعز الناس ليا و حاخد منهم الزبد كلها، مش محتاج آراء ناس كتير من علي النت كل واحد يجي عندي يكب كلمتين عليا و يمشي، موضوع اني ممكن اكون زي ناس كتير كتبوا عن نفسهم انهم عملوا بلوجز عشان يتكلموا مع الناس علي النت في الحاجات اللي محرجين يصارحوا الناس بيها، دي برضه انا معنديش مشكلة فيها لأني اولا مش بتكسف من حاجة لأني انسان عاقل بالغ متحمل نتيجة افعالي و أقوالي، و تاني حاجه أنا مش شايف ان في أي حاجة مهما كانت تدعوا الي الخجل، أنا من الاخر ليا فلسفتي الشخصية المبنية علي تجاربي الكتير و الحمد لله لسه بتعلم كمان و كمان، اسف اذا كنت طولت عليكي أو انك ممكن تفتكري ان شايف نفسي شوية بس بكل بساطة I'm proude of myself being a self made man :)Cheers

mostafa rayan يقول...

المشكلة اننا كلنا عندنا عقد بس مش شيافنها اوربما شايفنها بس متعاملين معاها
بس خلي بالك كل واحد شايف نفسه انه كويس وانه زي الفل دي طبيعة بشرية فينا كلنا
المفروض في الجواز نتقبل بعض بعيوبنا ومشاكلنا وعقدنا طالما وافقنا نرتبط ببعض من الأول
اهم حاجة في الجواز الوضوح
تحياتي لموضوعك الجميل

- اخ غير معرف
معلش حضرتك بتقول انك مش بتحب اسلوب غادةعبد العال حضرتك حر طبعا في رأيك بس ليه بتتدخل عندها مدام مش بتحب اسلوبها
- معلش حضرتك بردو بتقول انك مش مقتنع بجدوى التدوين وانه مش هيغير شيئ طيب حضرتك ليه بتابع مدونات من الأصل مدام هي مش مهمة بالنسبة لك
انا عارف انها حرية شخصية بس كلامك يستدعي السؤال

fanty يقول...

أستاذ مصطفي ريان، أنت تقدر تقول اني مش بالظبط مش بحب اسلوب غادة، أنا خاني التعبير لأن أكيد أسلوبها جميل لحد لما تتعود عليه و بعد كدة يبقي عادي و تبقي بتقرا و انت عارف ان كل سطرين تلاقيلاك كلمتين استظراف، علي الاقل ده بالنسبة ليا أنا، لكن خليني أقول اني مش مقتنع ولا حابب اسلوب تفكيرها و دماغها و خليني كفاية كده كلام عنها عشان مش حابب انها تشوف تعليقي عليها بعد كده و تفتكر اني ماشي عمال اتكلم عليها بالوحش عند الناس، أنا معرفهاش شخصيا ولا حتي عاوز، بس بلاش أحسن نجيب في سيرة الناس و أنا لما كتبت إمضاء واحد من أشد المعارضين لاسلوب غادة عبد العال، كان عشان اني اكتشفت الفرق في الدماغ مثلا بين المدام صاحبة مدونة جواز و اتجوزنا و آنسة غادة... أما بقي بخصوص انك بتقولي انك مش مقتنع بجدوى التدوين وانه مش هيغير شيئ طيب حضرتك ليه بتابع مدونات من الأصل مدام هي مش مهمة بالنسبة لك، يا استاذ مصطفي أنا كنت بتكلم عن نفسي، ممكن يكون حد تاني شايف انها مفيده ليه، و مش معني اني راجل و مش بطبخ يبقي لما أشوف حله تيفال حلوة ماجيبهاش لمراتي، معني كلامي ان مش معني اني شايف انها مش مفيدة بالنسبة ليا، ميمنعش اني ممكن أحب اني اشوف الناس بتكتب ايه و بتفكر ازاي و كمان ممكن اتعلم حاجه جديده، من الاخر يا أستاذ مصطفي أنا مش بتابع غير المدونات اللي بتتكلم عن العلاقة بين الراجل و الست عشان ده بالنسبة ليا موضوع مهم، أنا لا ليا في الشباب اللي شايلين الهرم علي كتفهم و عمالين يكتبوا في السياسة، ولا ليا في مدونات الشباب اللي قاعدين يكتبوا في اي حاجه تيجي علي مزاجهم بعد الاصطباحه او حتي قبلها، ولا ليا في مدونات البنات اللي قاعدين يكتبوا في هواجس الجواز و لما بيقعدوا بالليل بيقولوا ايه للمخدة بتاعتهم، انا يا استاذ مصطفي عندي 28 سنة، بقالي 6 سنين شغال يا أما بره القاهرة أو بره مصر، و بالذات اني بحكم وظيفتي القديمة(ريسبشنيست في هيلتون و شيراتون)، بالتالي انا شفت و قابلت و اتعاملت و صاحبت طوب الارض، كل الجنسيات و اللغات علي الديانات علي الالوان، المحترم و الواطي، المحترمة و اللي تعلم الف واحد الصياعة و كل اللي انت تتخيله و اتعلمت كتير و بالتالي في كتير من المدونات مع احترامي لأصحابها، لسه نونو شوية و مش عارفين حاجه، مش دي بقي المدونات اللي حدخل أنا أقرا الناس عندهم بتقول ايه، اتمني ان يكون ردي كان كافي و عفوا للاطاله. و كمان كتبت اسمي عشان متزعلوش

كـــيــــــــارا يقول...

ممممممممممم

وجعلنا بينكم موده ورحمه

ده الجواز اللي المفروض يكون لكن اللي بيبقي غير كده يبقي كلو احد مكنش هدفه انه يتقي الله في الطرف الاخر

ياريت موضوعك يجد صداه

Esraa Hamed يقول...

عندك حق جداااااااا
كمان في كورسات كتير بتؤهل الناس اصلا قبل ما يتجوزوا انهم يفهموا شخصيات بعض كويس لان الطبيعي ان طبيعة الولد بتختلف عن البنت في التفكير و طريقة التعامل و كل حاجة
مش معني اني بتعامل كويس مع صحابي البنات لو انا بنت او بتعامل كويس مع صحابي الولاد لو انا ولد اني هكون ناجح في معاملاتي مع الطرف الاخر
لازم نتعلم الاول و بعدين نفكر في الجواز
و لما نتجوز كمان نتعلم الاول ازاي نربي ولادنا صح و نتعامل معاهم صح في اعمارهم المختلفة و بعدين نقرر نخلف
المواضيع عمرها ما بتيجي بالبركة و لا الخبرة و لا الحاجات اليل بنضحك بيها علي نفسنا دي
و ادينا شايفين نتيجة الي بنسميها خبرة ايه

تحياتي علي البوست الرائع
تسلم ايديكي يا قمر

mahasen saber يقول...

ايه يا جميله مفيش بوست جديد
.....
اه البوست ده حلو بس نشوف بوست كمان يطلع ان شاء الله تحلى منه
.....تحياتى ليكى ويا رب تكونى بافضل حال..

عايش علي الهامش يقول...

اسمحيلي ان اختلف معكي في تلك النقطه
من حق كل انسان ان يكون له هدف خفي من خلف الزواج
يعني فعلا كل البنات غالبا بتتجوز قبل ما يكون حب وحلم بالسعاده واسعاد الطرف الاخر فبيكون علشان حلم الاستقلال والمملكه المستقله والحريه
تخيلي حتي حلم تكوين اسره هو هدف خفي وبمبداك هو هدف وحش لانه مش لازم يكون قائم علي اسعاد الاخر

من حق الرجل ان يتزوج طلبا للعفه وانصلاح الحال وده شئ ديني اسلامي او مسيحي

اعتقد ان عباراتك لازم تختلف بعض الشئ من حق كل انسان ان يكون له هدفه الخفي ولكن لما لا يكون معه قدر من الحب والموده ومراعاة الله في الطرف الاخر
الحب والموده هما الاساس الناقص مع هدف خفي موجود في نفوسنا جميعا

شكرا لك

من غير عنـــوان يقول...

سنة الحياة

FreeKiller يقول...

FreeKiller
الناس لازم تتجوز بس المهم تتجوز صح
تتعوز علشان تبنى بيت مش علشان خايفين من العنوسه و العنوسه دى للبنات و الولاد على فكره
او علشان عايزين يكملوا نصف دينهم و خلاص
لازم الناس تتجوز و هيه قرحانه بالانسان اللى اختاروه
يعنى بمعنى اصح يرموا عقدهم خارج الجواز علشان ما يتعبوش حد تانى


................

ده المفروض
مش الواقع

may يقول...

نزلت بوست شبيه بى هل الموضوع

بس ما فيش اجابه مقنعه

غير معرف يقول...

i agree your idea ! very nice blog

dreem يقول...

صح كلامك وحلو بس مين اصلا بيقعد مع نفسه ويحاسبها او مين بيتمتع بالصراحة ؟؟
تحياتى