الثلاثاء، 4 مايو 2010

التهمه """" بدون رجل """"




مش عارفه ليه اليومين اللى فاتوا حصل انى سمعت اكتر من موضوع كانوا بطلاته بدون رجال
الظريف بقى ان اللى بدون رجل هيه متهمه
سواء كانت لم يسبق لها الزواج او كانت متزوجه و تطلقت او خلعت او ارمله

كنت بسمع اسامه منير رغم انى مش من محبيه بس كنت بعمل شويه حاجات منزليه فى الروقان بدون دوشه العيال
و مش عايزه تلفزيون المهم
لقيت واحده بتقوله انها مطلقه و بتحب جيد و خايفه
راح قالها حاجه و بخبره السنين طبعا و حاجه مش جديده مطلقا بس انا وقفت عندها
قالها ايه بقى حكيم زمانه
قالها خلى بالك لان الطمع فى المطلقه بيكون كبير
ان ان ان تششششششششششش

ليه بقى ان شاء الله الطمع فيها كبير نفس الكلام بيكون للارمله
ده على اساس ايه ان شاء الله ان اللى كان مانعها من الانحراف انها تتجوز و لما حصل و انها اتجوزت بقى سهل انها تغلط
و كأنها خلاص متسنيه الورقه العرفى بفارغ الصبر

فيه ايه يا بشر نفس البنى آدمه اللى كانت صاينه شرفها ما اتغيرتش
و مش هاتتغير لان اللى متربى كوبيس مش هايتغير بتغير الظروف

التحفه بقى ليه لو مطلق محش بيبصله انه سهل جدا يقع فى الخطيئه و كأن اللى هاتقع فى الخطيئه هي المرأه و ليس الرجل

الحكايه التانيه لواحده ما تزوجتش لغايه دلوقت بتقولى ان جارتها الجديده لما عرفت انها ما اتجوزتش ما بقتش حتى تسلم عليها
خايفه على بعلها طبعا
و كأن الاخ مش بيخرج فى الشارع و بيشوف ستات ممكن يكونوا احلى منها او حتى اوحش اللى طبعه يخون مش مستنى واحده ما اتجوزتش
قلتها فى كل الاحوال الناس بتقرف بعض اللى متجوزه بيخنقوها بالخلفه و اللى مش متجوزه بيخنقوها بالزواج

طيب يا بشر الراجل ليه ماحدش بيبصله نفس البصه اتجوز و لا لاء و لا طلق و لا ارمل
الاظرف من كده انه لو ارمل يقولوا اكيد هايتجوز و عادى
و لو ارمله و اتجوزت يبهدلوها خاينه العيش و الملح دى
و عجبى على مجتمع حرم و حلل على مزاجه
كلمه اخيره ماحدش يهتم بالدماغ المتخلفه اللى زى دى المهم انه عايش صح و مراعى دينه و اخلاقه
و على غرار جروب على الفيس بوك
بس ياسيدى و راحت مزغرته و عجبى

هناك 43 تعليقًا:

صيدلانيه طالعه نازله يقول...

هو ده مجتمعنا للاسف بيشقلب كل حاجه و يحلل و يحرم بمزاجه

للاسف نظره المجتمع للمطلقه و الارمله نظره غبيه جدا

مع ان الفيصل فى السلوك هو التربيه و الاخلاق
مش تغير حالتها الاجتماعيه من متجوزه لمطلقه

لو حنتكلم فى الموضوع ده حناخد صفحات و صفحات

بس للاسف ده مجتمعنا و دى افكارنا

و بس يا ستى و راحت معيطه
ههههههههههههههههههههههه

أحــوال الهـوي يقول...

يا سيدتي
اوجزتي في نهاية ما حدش يهتم بالدماغ المتخلفه

فقط ضعاف النفوس من ينظرون للمطلقه او الارملة هذه النظرة الدونيه

و لعلها موروثات في مجتمعنا

ربنا يهدي متتبعين اعراض الناس

بالمناسبه اللي اسمة اسامة باحس من كلامه انه اسف للكلمة يصلح ان يكون قواد



تحياتي

كلمات من نور يقول...

مجتمعنا بقى ماشي بجاهلية زمان

مع الاسف الشديد والمتهمة في عين الرجال والنساء هي المطلقة و الارملة ...لو حكيت لك نظرة الناس بتختلف للأرملة والمطلقة مش حتصدقي ........وعليه العوض.

سمع هوص (Abo 3li) يقول...

طبيعي علي تفكر=يرنا الشرقي المصري اللولبي..

أنا - الريس يقول...

السبب نظرة المجتمع المتعصب المبني علي أساس قبلي وعادات بعضها خاطئة وهي النظرة للمرأة انها اساس والشريك الرئيسي في كل جريمة مع ان ده ملوش علاقة بالدين بس بعض المرضي بيلزقوه بالدين الإسلامي والشريعة .
انا عارف اني رأي ممكن تتقبليه بصعوبة اصلا في حالة تقبله /
انا كنت بنادي ولازلت ما دام هناك مقدره بالزواج من أكثر من واحدة ومحاولة ارجاع العادات والتقاليد مع الاحترام الكامل للمرأة لأنها مجتمع .
السبب ان عمي موجه قالي احصائية خوفتني جدا قال في السبيعينات كان الواحدة لما تطلق أو تأرمل بعد العدة تتجوز واحد علي طول .. عشان يراعيها في كل احتياجتها وكان الرجل بمثابة الأمان
أما دلوقت 7 حالات طلاق من كل 10 حالات في أول 3 سنين جواز مع اننا بنخدع بعض ان الجواز مبني علي حب ، الجواز مبني علي الدين ثم الشكل .

والسبب برضه حاجة تانية الراجل عايز واحدة جامدة جدا والست عايزة واحد غني جدا بالتأكيد هيبقي في مشاكل

الحل تغيير نظرة المجتمع للمرأة علي أنها الشيطان بعينة

سواحة يقول...

سنسنة
لسه كنت بسال عليك اخبارك ايه
طولتى فى السفرية
و سلامة الحلوين الف سلامة

التهمة :-)
مش ان الانثى بدون رجل
التهمة انها مختلفة فى اى شئ
لو مش متزوجة
لو مش ام
لو مش مستحملة جوزها زى الباقين و اطلقت
لو مش ميتة من الحزن عليه بعد ما مات
لو مش ..........

اعتقد الرجال برضه بيرموا كلام على بعض
بس اقل علانية مننا احنا النساء

momken يقول...

شوفى البنى ادم الشرقى سواء رجل او امرأه عمل ربط او ارتباك او تؤمه وتلازم بين غشاء البكاره والشرف

ودى من الموروثات

ومع الوقت الحكايه دى ترسخت جواه حتى تم اختصار الشرف واختزاله فى غشاء بكاره بتحمله طفله

بس ده بيقدنا لشى مهم
هل الرجل الى معندوش نبات ولا اخوات تحت سن الزواج ممكن نعتبره عدم الشرق

بقياس بسيط نقدر نقول اه من منطقهم

وبعدين هى لو محترمه تكلم برنامج زى ده فى موضوع زى ده ليه
دى لو مكنتش تبع البرنامج فى الاساس واسامه منير هو الى مالف السؤال علشان يتمطع فى الاجابه السخيفه دى

بالنسبه لوضع الطلقه مختلف شكلا وموضوعا عن الارمله طبعا

ولو ان اختلاف شكلها بيكون مش فعين المجتمع لكنه فى نظر امرأه مثلها هى ام او اخت الشخص الى بيرغب فى الزواج منها
يعنى الراجل بره الحسبه

اما بالنسبه لموضوع الطمع فييها فدول ميتحسبوش رجاله دول ذكور
ومش هما القاعده خالص


تحياتى

dr.lecter يقول...

علشان هيقولك هي اتطلقت لييه؟ اكيد كانت ماشيه بطال

اكيد كذا وكذا وكذا
اكيد ليها شوق تعمل كذا وكذا

انا بقولك الكلام ده فعلا لان ده انا سمعته للاسف

فاروق سحير ( فاروق بن النيل ) يقول...

الأخت الفاضلة ... سنسنة ...
حمد الله على السلامة الموضوع ده بقى سخيف جدا وطبعا ماقصدكيش أقصد المجتمع بتاعنا كفاية بقى جهل وتخلف ينادوا بمساواة الرجل بالمرأة وهيه وزيرة وبرضه جهله بالتعامل معها لو قريتى شعرى عن المرأة" عذرا سيدتى "
سيسلج هذا الشعر صدرك ويريحك عالآخر ودومتى..farouksam.blogspot.com

Mahmoud البطراوى يقول...

انا متفق مع واندا
التهمه فى الاختلاف
طالما انت مش زينا يبقى توقع اننا تحصلنا مصيبه بسببك كبير
اظنه احساس طبيعى ناشئ من رغبه كل واحد فينا من الدفاع عن بيته وانفسه واسرته
والاحساس دا مش عندنا احنا فى المجتمع الشرقى بس انا بشوفه فى الافلام الاجنبى برضه
والمختلف هيواجه صعوبات قدره كده حتى لو ملوش يد فيه

فاتيما يقول...

ازيك يا سنسن

يا رب تكونى آخر تمام
بعد وصلة رفع الضغط دى


طب حيث انى من إهلها
منكن اقول رأيى ؟؟


المطلقة طبعااا
مختلفة عن الارملة



الارملة جوزها راح
بامر ربنا



لكن
المطلقة جوزها راح
فى الوبا



نظرة المجتمع بتكون غالبا
انها السبب


و اختك اتعرضت لمواقف من دى كتييييييير .. خصوصا فى بداية ما انفصلت عن ابو ابنى
و طلبت الطلاق


ساعتها كنت مستلمة شغلى فى مدرسة ابتدائى و عاملة شغل حلو الحمدلله
رغم انشغالى بالمحاكم و القضايا
بس كنت بحرص افصل
و لما اقعد اشتغل
اعمل حاجات كتيييير
و كأنى عارفة انى ماشية قريب
فبعمل حاجات تقعدلهم و كدا



و يشاء السميع العليم
ان الدنيا تبقى صغيرة
و اتنين من جيران الأستاذ
يبقوا شغالين معايا


طبعا عرفونى
من تتبع اخباره ليا
و زقهم عليا يكلمونى نتصالح



و واحدة فيهم جت بمنتهى البراءة
فى يوم من ذات الأيام ع الصبح كدا و بدات الحديث



اول جملة قالتهالى ...


مش عيب تبقى امينة مكتبة شاطرة كدا و متعرفيش تحافظى على بيتك ؟؟!!


طبعا انا بصيتلها
و خدت الكلمة و بهتت
و انفجرت ف العياط


ايامها كان قلبى خفيف د
و بيصعب عليا نفسى قوى ..
و اصله ليلتها كنت مش نايمة كويس لأنى راجعة مع المحامى من القسم متأخر و المود زفت و نيلة

فكنت اصلا على آخرى

طبعا قعدت تعتذر
و تقولى معلش
و سابتنى و مشيت
و هيا محرجة جداااا
و مكملناش كلام


بس هيا كانت اول حد
يلفت نظرى للحكاية دى



ان الناس بتعتبر الست
اللى بتطلب الطلاق
او جوزها هوه اللى بيطلقها
انها معيوبة

و فيها حاجة غلط

او اضعف الإيمان هيا اللى معرفتش تحافظ على بيتها و جوزها و استقرارها عن خيابة


بينما الأرملة دى
ربنا اللى اراد ياخد جوزها
بلا تدخل منها فى ذلك
تبقى ست كويسة و عداها العيب


النظرة دى قيسيها
على ما بعد ذلك بقى


المطلقة ملهاش تدلع بقى
و تطلب طلبات زى بنت البنوت
يعنى كفاية هييجى واحد
و يصلح منظرها الفاشل قصاد المجتمع
و يساعدها تطلع لسانها لكل اللى قالوا عليها خايبة و نايبة

...فكويس قوى ان حد بيعبرها
تقوم تقول شقة
و عفش
و الأفلام دى ؟!!




شوفى بقى لو طلعت بالمرة
عندها عيال من الزيجة السابقة

يا لهوووووووووووووى

العيال يقعدوا مع ستهم
او يروحوا لابوهم
متشوفيهمش عشان متتعامليش معاه .. لما يكبروا هيجولك على مهلهم
القصص دى و هكذا


يعنى بينباع
و ينشرى فيها
و ان كان عاجبها



للأسف دى نظرة الغالبية

مع ان كل عيلة دلوقتى
فيها مطلقة و اتنين و تلاتة
و مش كلهم مفتريات


بس اى راجل لما بيحب يتجوز بيدور على بنوتة بلا مشاكل و لا عقد
و لو ليه اخت مطلقة حتى
النظرة مبتتغيرش قوى


اللى بيدور على الاسهل
و الأريح
و الأضمن
مع ان ممكن ياخدها بنت
تطلع عينه لحد ما يطلقها
فتنضم لطابور المطلقات
و هوه كمان


على فكرة المطلقين الرجال
ليهم برضو مشاكلهم المشابهة
لما بيروح يتجوز تانى


النظرة ليه بتبقى انه مش مضمون
و بيقعدوا يتشرطوا عليه
تدفع و تسوى عشان نضمن حق بنتنا
و كدا


خيابة بعيد عنك


و الحال عمره ما هينصلح
غير بتغيير الافكار و تنفيذها ف الواقع يبقى بجد

مش فى الادمغة و بس


تحياتى و خالص حبى ليكى

Atef Shahin يقول...

هذه للأسف سيدتي نظرة غبية وظالمة لكل إمرأة قادها حظها العثر للطلاق في مجتمعتا
معي زميلات مطلقات وهن قمة قي الإحترام لكنهن للأسف الشديد يشكين دائما من هذه النظرة المتخلفة
موضوع مهم
تحياتي

beautiful mind يقول...

والله عندك حق
وانا موافقك الراي تماما
الخطأ او الانحراف مش مستني رجل او ست
او تكون الست لسه انسه او اتجوزت
او سبق ليها الجواز
اللي جواه نزعه الانحراف هينحرف
والمهم البيت والتربيه
خالص تحياتي

فاروق سحير ( فاروق بن النيل ) يقول...

الفاضلة سنسنة ...
طبعا ده كلام عاف عليه الزمن المرأة بقت وزيرة وضابطة بالقوات المسلحة وتشغل مناصب فى جميع الأماكن ولو دخلت على مدونتى ستقرأين قصيدتى :
" عذرا سيدتى " وستعلمين من هى المرأة المصرية الآن . وشكرا لك .farouksam.blogspot.com(عصفورالجنة)

رنا عبد المنعم يقول...

بس يا شيخه دا أنا مبقوقه ومفقوع مرارتي.
هو ليه فعلا الراجل مش بيتحاسب زي الست يعني لو كان مطلق أو أرمل ... ليه برضو لما راجل يغلط المجتمع يغفرلو لكن الست لأ ؟؟؟مع إن الغلط فالحالتين غلط
دا يثبت نظريه إن مجتمعنا الم...ف ده بتاع رجاله

gogo!sf يقول...

كلام الناسسسسسسس لا بيقدم ... ولا يأخر

بصى هما دايما يقول فعلا ان المطلقه او الارمله فيها الطمع

والمقصود بده ان الناس او المتخلفين دايما بيحسو ان الارمله او المطلقه صيد سهل على اساس انها بقيت من غير راجل وهو ده التخلف بعينه

لانه اللى عايزة تغلط هتغلط حتى لو كانت متجوزة او حتى مش متجوزة

اهم حاجه التربيه والقرب من ربنا

بوست جميل ومفيد لبعض الناس يارب يفهموه بجد

ودى اول زياره ليا وفعلا عجبنى اسلوبك جدا جدا وان شاء الله مش هتكون الاخيرة

عاشقه الاحزان

جوجو

Ehab يقول...

الأجابه تونس سعادتك

عماله تسالي تسالي ارد على ايه وابتدي بايه مش عارف

اولا ليه المجتمع بيبص للمطلقه او الرمله انها هتنحرف
تبرير المجتمع انها قبل الجواز كانت متعوده تكون من غير زوج ولسه مجربتش حنان زوجها مثلا ده لو كان فيه حاجه اسمها حنان الزوج يعني

النقطه بتاعة اشمعنى المطلق والأرمل مش بنقول هينحرفوا لأن الراجل اصلا يا بنتي بينحرف من غير لا طلاق ولا ترمل هو اصلا كده كده طول الوقت معرض للإنحراف يعني مفيش جديد عمرك شفتي رقاصه بيقولوا عنها انها معرضه للإنحراف
ههههههههه

اشمعنى الست بعد الطلاق او الترمل مينفعش تتجوز وتبقى خاينه العيش والملح والراجل عادي يتجوز لأن الراجل لو متجوزش هيبقى عنده حجه هايله جدا علشان يخرب الدنيا علاقات وقرف ومحرمات انما الست اصلا دايما هي اقدر واقوى انها تصون نفسها حتى بدون زواج ولأن زي ما انتي فاهمه احنا مجتمع بيتعامل مع الشخص العصبي طويل اللسان على انه طبعه كده ولازم نتحمله والشخص الطيب هادء الطبع لازم ياخد فوق دماغه ولو اتعصب يوم على حد من غلبه يقولوا شوفي اللي كان عامل طيب اهو طلع ابن ستين تييييييت

اخيرا اقولك انا متفق معاكي في ان اللي عايز يعيش مستريح ينفض لكل الناس ويعيش العيشه اللي عارف ان ربنا راضي عنها مش الناس ومش نفسه كمان
لأن النفس هتدور على راحتها مش على الحق والناس هتدور على اللي يسليهم مش على الحق يبقى نرجع لكلام ربنا وهو اللي يحكم حياتنا وتصرفاتنا
تحياتي

سلاااااااااااااام

شاعر سبيل يقول...

الحكم بعد المداولة
محكمة...........

funky girl يقول...

للأسف بقت ثقافة شعب
و كل الناس بتحب تدخل في شؤون البنت اكن حياتها مش ملك ليها دي مسلسل و مستنيين حلقاته
و طبعا الارملة و المطلقة ازاي يعيشواطبيعي لا دول مجربين الجوازو خلاص كفاية عليهم
و الراجل عادي ايه يعني دا راجل

بنت الغربة يقول...

اولا وحشتينى قوى..
تانيا البوست ده حلو قوى..وكلامه فى الجون..ربنا حلل للمطلقه الجواز تانى والارمله كمان حتى لو عندها 100 سنه لكن المجتمع الذكورى حرم عليها الجواز وكأنها هترتكب ذنب لايغتفر وللأسف معظم المطلقات والارامل بيفضلوا عدم الجواز تانى حفاظا على مظهرهم قدام الناس..لكن انا معاكى ان المطلقه او الارمله من حقها تتجوز تانى وتالت ورابع لو عايزة ..ايه المشكله..ده شرع ربنا..وصدقينى لو كل واحده ضربت الحائط بكلام الناس ..الناس هتخرس ومش هتلاقى حاجه تقولها..تحياتى

Remas يقول...

ازيك ياقمر
عامله ايه

هى دى نظرة المجتمع للمرأة اللى بدون رجل
ومش الرجال بس على فكرة اللى بيبيصو لها كدا

حتى الست اللى زيها بتقلق منها
ويحرموا عليها انها تحس وتحب تانى بالذات لو ارمله وعندها اولاد

فاتيما ردها عاجنبى اوى لانها شرحت بالتفصيل الوضع

دايما الناس بتحمل المرأة فشل العلاقة مع ان كثير من السيدات بيتحملو ما لا يحتمل بس علشان يحافظو على استمرار البيت

حبيبتى ميرسي على رأيك في مدونتى والنيو لوك بتاعها
ويارب دايما منورانى كدا ياقمر

ahmed_k يقول...

المشكلة الأساسيه في التربيه والأخلاق كما ذكرتي
فمن تربت تربيه صحيحه فلن تؤثر بها أي عوارض او مغريات قد تقابلها في حياتها
وكذلك المر للرجل فهي ليست حكرا على النساء دون الرجال
وقد نجد فاسدين ليسوا بمتزوجين او لم يسبق لهم الزواج
فالأمر خلقي وتربوي بالأساس
ولا دخل للزواج من عدمه في هذا الأمر
تقبلي خالص تحياتي

Hadota ... حدوتة يقول...

كتبت تعليق طويل ومنه لله النت السيء مسح كل حاجة

كنت بقولك بسجل اعجابى بمدونتك وموضوعاتك :)

بالنسبة للبوست فالناس كده كده تحب تكلم .. وطلعا الحيطة المايلة اللى فى الجتمع دا هيا الست عشان تكلم عليها

لو متجوزتش يسألوا بمنتهى الفضول هتجوز امتى

لو اتخطبت يفضلوا يموتوا عشان يعرفوا هتجوز امتى ومطولة الخطوبة ليه


لو اتجووزت يسألوها هتخلفى امتى ربنا يرزقك ويعطيكى

لو خلفت بنت يبقى يدعولها تخاويها بولد

لو خلفت ولد يدعولها ربنا يخاويها ببنت


انتى جبتى الخلاصة لما قلتى ان التهمة بدون رجل لان دلوقتى الناس بتعتبر الرجل هو جواز المرور للمرأة فى كل حاجة .. وبدونه فهيا ناقصة ومعيوبة ومعرضة للانحراف

معرفش ليه كل واحد ميسبش التانى فى حاله ويقتنع انه حالة مختلفة تمام الاختلاف عن التانى وان حتى لو فيه نماذج سيئة فمينفعش نعمم دا على كل الناس


معرفش ليه الناس متبطلش تطلع العيوب فى اللى قدامها بحيث تثبت فشل تجربه فى كل حاجة والمبررات عندهم مبتخلصش

الجواز و سنينه يقول...

صيدلانيه طالعه نازله

منورانى فى اول تعليق كالعاده يا جميل
فعلا زى ما قلتى محتاجيين صفحات طويله علشان نتكلم عليها
و المجتمع اللى احنا فيه اللى بيخلى النظره للمرأه بالتفاهه دى يبقى اكيد فيه كميه كبيره من البشر بتعمل كده
طيب مين اللى بيعمل كده لما اغلب الناس اتعلمت و دخلت مدارس و مفروض انها بقى عندها من الوعى اللى يخليهم يتغيرروا
بس اظاهر اننا مش عايزين

الجواز و سنينه يقول...

احوال الهوى

حمدا لله اننا اتفقنا اخيرا
(:

عارف يا دكتور مشكله تتبع العوارت دى مزاج عند الناس رغم ان عقابها عند ربنا شديد
بس يا اما دى ناس مش عارفه يا اما ناس مش عايزه تعرف او عارفه و بتستهبل

ربنا يستر اعراض كل الناس

الجواز و سنينه يقول...

كلمات من نور

نوره يا جميله
وحشاااااانى للصبح و وحشنى الكلام معاكى
عارفه ان نظره الناس للارمله و المطلقه بتكون ازاى و زى ما قلتى عليه العوض فى التخلف

الجواز و سنينه يقول...

سمع هوص (Abo 3li)

و نعم الايجاز يا راجل بس موش فاهمه مع الاسف شكله كان كلام مهم بس فيه شيئ موش واضح

الجواز و سنينه يقول...

MR.PRESIDENT

رأى جميل جدا يا سياده الرئيس
بس هاقولك على حاجه وضع السبعينيات حاجه و وضع النهارده حاجه تانيه
يمكن فى السبعينيات الراجل كان لسه امان و لسه بيقضى مصالح
اعرف ستات تفوت فى الظلط و مش محتاجه رجاله يقضوا مصالحهم ده لو على موضوع الحمايه و الامان
اما فكره ان بدام فيه مقدره فالتعدد مطلوب هافكرك بالرسول صلى الله عليه و سلم لما سيدنا على كان هايتزوج على بنته الرسول قال انه يغضبه ما يغضبها

بمعنى انه حلال و هو الرسول بس برضوا عارف انه الزواج من اخرى يغضب المرأه

السؤال اللى نفسى كل الرجاله تسأله نفسها هل لو كان مشرع للمرأه الجمع بين زوجين كانوا هايحسوا بأيه و ما مقدار السعاده اللى ممكن كان يسعد بيها مراته على اساس انها ما تجمعش بينه و بين شخص تانى و خليها برضوا علشان تخدمه مش هايكون فيه علاقه زوجيه

افتكر انه ساعتها هايحس بأحساس المرأه

الجواز و سنينه يقول...

Wanda

وندتى يا وردتى
انتى عارفه رأيى فى تعليقاتك دايما بتعجبنى
فعلا انتى لمستى جزء مهم انها تكون مختله و انها مش ......... المهم انها تكون فاقده لشيئ ما علشان الناس تخاف و تكش من هذا الكائن اللى مش
فكره ان الرجال بيرموا كلام على بعض
هاتيلى واحد قطع علاقته بواحد علشان طلق و خايف على مراته منه علشان بقى مطلق
لكن الستات و بكل قدر ياختى بتعمل كده فى بعض
و عجبى

الجواز و سنينه يقول...

momken

انت ليك فى رقبتى اكتر من تعليق و كلهم اكتر من رائعين
و كلهم عايزه ارد عليهم
و ان شاء الله هايحصل
عليك الصبر و على الوفاء
(:
تخيل فكره جديده جدا ان فعلا لو الراجل ماعندوش بنات و لا اخوات يبقى مش عنده شرف يخاف عليه
الاهم بقى لو كان فيه حاجه ممكن نثبت بيها ان الرجل ده ماكانش بكر لما اتجوز
تفتكر بقى البنات هاترفض الزواج بيه زى ما هو يرفض الزواج بمن فققدت العذريه او حتته الجلده اللى تعباه دى
اما فكره لو هيه محترمه هاتكلم ليه اسامه منير
فاحب اقولك ان فيه ناس بتكون عايزه تسمع كلام هيه عايزه تسمعه و عارفه مين اللى هايقولهولها فاتروح تسأله علشان تسمع اللى هيه عايزه تسمعه من الاول اصلا
فعلا زى ما قلت مشكله المطلقه و الارمله فى أمرأه مثلها ترفض زواجها من رجل قريب منها
زيد عليه الذكور زى ما قلت عليهم
يبقى نعيشهم فى دوله وحدهم و لا ايه بدام المجتمع بيعاملهم زى المجرمين
بتسعدنى دائما تعليقاتك اللى فيها جديد دائما

الجواز و سنينه يقول...

dr.lecter

ياهوى وصلت لكده
كامن قولوها و عودوها و خلوها عايزه حاجات ممكن تكون هيه بريئه منها كلها
ليهم حق الستات يخافوا من الطلاق مش مهم تعيش تعيسه المهم تعيش متزوجه

الجواز و سنينه يقول...

فاروق بن النيل

منورنى دايما يا باشمهندس بكلامك اللى بيعجبنى
فعلا احنا بنطالب المساواه فى المناصب لاء مش هو ده المطلوب احنا عايزين مساواه فى المعامله بأنسانيه
ان شاء الله هاشوف الموضوع اللى عند حضرتك و اكيد هايعجبنى

mohamed ghalia يقول...

انا قولت اجى اسلم بعتذر عن الغياب

Noha Saleh يقول...

المجتمع الشرقى بيظلم المرأة بشكل كبير

(ست* جنى* الحسن) يقول...

سلامو عليكو..
فى عادات وتقاليد كتير اوى ثقافة مجتمعنا هى اللى فرضتها علينا واتعودنا عليها وسيطرت على طريقة حكمنا على الامور عشان كده متلوميش اسامة منير ولومى ثقافة مجتمع.
لك تحياتى

زهرة يقول...

كل حالة وليها إستثناءات
فيه مطلقات كان سبب إنفصالهم تافه لمجرد إن الحياة مش ماشية زى ما هما عايزين وتلاقى اللى عايزينة دة كان ممكن يتحل أو ممكن يتحط تحت مسمى كماليات مش اساسيات .. يعنى كان ممكن تكمل حياتها لكن رفضت لحاجة فى نفس يعقوب

وفين ونوع تانى وبيكون سبب الانفصال قهرى بحت بسبب مشاكل كبيرة متتحلش وبتكون مضطرة إنها تختار كدة

النوع الاول استحاله انصفة
النوع التانى صح ومش غلط

بالنسبة بقى لنظرة المجتمع .. لازم تكون كدة لانه مجتمع شرقى ومتعصب كمان ولانه زى ما كانوا بيقولوا لنا زمان فى الفصل "السيئة بتعم"
وماأكثر السيئات

لكن طبعاً لما تكون إنسانة بتحترم نفسها بكل المقاييس أكيد الناس هتحترمها

موضوع حيوى جداً

بنت وولد يقول...

للاسف هو ده مجتمعنا و هيا دى موروثاته للاسف

اول ما يشوفوا واحده مطلقه او ارمله تلاقيهم اتمصمصوا بطريقه ملفته
مع انها مكنتش غاويه تخرب بيتها و لا تموت جوزها

بوست جميل من انسانه اجمل

دمتى بود

ذو الوجه المبتسم يقول...

البوست لذيذ

واسلوبك بجد رائح وتلقائي

بجد ضحكت وانا باقرأ

موضوع المطلقة او الارملة او اى ست بدون رجل طبعا
موضوع الطمع فيها مش معناها انها ممكن تنحرف او غيره

بس اعتقاد البعض واللى فكره محدود وسطحى ان الست اللى سبق لها الزواج صعب تعيش لوحدها بدون راجل ؟؟؟

يمكن تكون حقيقة بدرجة كبيرة لكن بتتوقف حسب شخصية الست نفسها

المهم علشان مطولش بالتعليق الموضوع كبير ومحتاج لكلام وحوارات كتير

بجد انتى هايلة لاختيارك لموضوعاتك

تقبلى تحياتى

الفقيرة إلى الله أم البنات يقول...

هى جمله بتتقال بسمعها وانا عيله ومكنتش فاهمه ليه
بس لما كبرت فهمت
ان الناس هى اللى عندها مشكله فى اخلاقها ودماغغها
المطمع مش حسب حالة الست
هو بيكون حسب تصرفتها هى
ربنا يرحمنا من الجمل الثابته دى

همسات وبحــ الحياه ــر يقول...

للاشف هو دا مجتمعنا :)

نوكومنت

مبسوطة انى زرت مدونتك
تقبلى مرورى
تحياتى

يا مراكبي يقول...

ما هو ده اللي اسمه شيزوفرينيا المجنمعات الشرقية اللي بتكيل كل حاجة بمكيالين مختلفين تماما

والأمور اللي بيخاف منها المجتمع والناس بتحاول تحتاط منها بتكون احتياطاتهم ساذجة تماما

تصدقي ان الزوجة تقبل ان جوزها يخونها في الحرام لكن ما تقبلش انه يتجوز عليها في الحلال؟ ده نموذج آخر يوضح: كيف يفكر المجتمع

المجتمع يفكر بحذائه

maxbeta3zaman يقول...

والله يأخت جواز واتجوزنا.. انا لى صديق عزيز متزوج من أخت صديق عزيز جدا جدا ...توفيت زوجته بعد مرض عضال ..فتزوج من أخت صديق عزيز علينا جميعا ...فقامت الدنيا عليه على انه خاين العشره وازاى يتجوز على مراته" المتوفيه" شوفى الدنيا وأصبح عدو الجميع - طبعا أنا "لأ" لأنى أعرف الكل وكلهم أصدقائى ولكن هذه نظرة الناس -بعض الناس- لمن يجرؤ على الزواج وهو أرمل ..كما ترين الدنيا فيها العجب !!

Wise يقول...

السلام عليكم ورحمة الله وبركاته
احب اسجل اعجابى بفكرتك ومووضعك بجد
لان اانظرة الغريبه منتشرة فى اغلب دولنا العربية
ومهم جدا اننا ما نكونش احنا كمان لنا نفس وجهة النظر ده
وعجبنى جدا كلامك ده تحديدا
اخيره ماحدش يهتم بالدماغ المتخلفه اللى زى دى المهم انه عايش صح و مراعى دينه و اخلاقه
دمتى بكل خير