الثلاثاء، 23 مارس، 2010

اتعظوا يا رجاله من الراجل ده





كان يا مكان
كان فيه راجل تعبان علشان بيشتغل كل يوم و زوجته جالسه فى المنزل
و كمان بتجيلها هدايا كتير فى عيد الام
قعد يصلى و يقول يارب تحس بالتعب اللى انا بتعبه
و قعد يقول ياربى انا بشتغل كل يوم 8ساعات
انا عايزها بكره تصحى و تبقى راجل علشان تحس باللى بحس بيه


تحقق دعائه
و صحى الصبح لقى نفسه امرأه
جهزت الفطار للزوج و الاطفال
جهزت الاطفال للمدرسه و اكلتهم فطارهم
جهزتهم الغدا وصلت الاطفال المدرسه رجعت البيت و جهزت الهدوم للتنظيف
جهزت الملابس للتنظيف الجاف و عدت على البنك تسحب فلوس
ذهبت للتسوق ثم رجعت للبيت علشان تضع المشتروات
دفعت الفواتير
نظفت القط و الكلب
هنا كانت الساعه واحده ظهرا جرت توضب السرير
غسلت الملابس
نظفت الشقه
جرت على المدرسه تجيب الاطفال و طبعا جادلت معاهم فى طريق العوده للبيت
حتطلهم اللبن و الكويكز
ذاكرت معهم دروسهم
بدأت تكوى الملابس و هيه بتتفرج على التلفزيون
الساعه 4ونص بدأت تحضر للعشا
و تنظف المطبخ و تحط الاطباق فى غساله الاطباق ده للى عندهم غساله اطباق يعنى
اخدت الاطفال للاستحمام و حتيطهم فى السرير
رجع هو عشته و جرت على السرير و إن كانت كل حاجات البيت لم تنتهى
صحت تانى يوم الصبح
ركعت و قال يارب انا ماكنتش عارف انا كنت بفكر ازاى ازاى كنت بحسد مراتى على هدايا عيد الام


يارب ارجع راجل تانى ؟؟؟؟؟؟؟؟؟؟
بس ياترى عرف يرجع تانى رجل ؟؟؟

هناك 49 تعليقًا:

صيدلانيه طالعه نازله يقول...

هههههههههههههههههه

و النبى لو دعا عمره كله رااااااحت خلااااااااص

اصل البطران يا امى يلاقى القطران

هو الراجل بيتعب و الست بتتعب و كل ميسر لما خلق له

يعنى ربنا خلقها ست و خلاها تتحمل حاجات معينه لو ربعها عدى على الرجاله كان زمانهم ماتوا من التعب

و الراجل كذلك

يبقى كل واحد يرضى بحاله و يسكت

الجواز و سنينه يقول...

ياعينى عليكى و على حكمك يا ست اماثل

و الله يا بنتى مخمختينى بالتعليق الجامد ده

و خصوصا الحكمه بتاعه السنين لما بتقولى كل ميسر لما خلق له
ايه العقل ده
نمسك الخشب الارو
ههههههههههههههههههه

بس احسن حاجه انها راحت خلاص
هههههههههههههههههه

dr.lecter يقول...

ماحنا عارفين قيمتكم حد يقدر يقلل
وعارفين انكم بتموتوا نفسكم علشاننا بدون مقابل
بس فيه بقي ستات تبقي عاوزين العين الحمرا لانهم مابيعملوش ده خالص بتالاضافه انهمعاوين الراجل يبقي زي العبد عندهم مايبط
لش شغل علشان يصرف عليها

عارفه انا دخلت اول امبارح علي والدتي بببوكيه ورد كانت هتعيط من الفرحه وقالت انا مش عايزه هديه كفايه انك بتهديني حاجه جميله زي دي

والله بنقدركم وبنحبكم بس ساعات الظروف بتخلينا نتصرف تصرفات غير طبييعيه

الجواز و سنينه يقول...

dr.lecter

اولا احب احييك على البوكيه الجميل ده
تخيل نفسى ابنى ان شاء الله يدخل عليه ببوكيه ورد
اصلى بحب الورد كيك
(:
اكدي فييه ستات غبيه و فيه رجاله غبيه
و ربنا يعين اللى بيتعاملو مع الاغبياء و فى تعاملهم معهم

micheal يقول...

يستاهل..يعني هو أصلا عايش في مجتمع ذكوري بحت ومش عاجبه كمان !
اه الرجالة بتتعب في الشغل بس في النهاية الست عليها أعباء إضافية..كفاية أن الكلاب والقطط دلوقتي بتمشي أكثر امانا منها في الشارع
تحياتي

sony2000 يقول...

لاا معرفشي
عرفين ليه
لانه بعد 9 شهور هيبقي ام
مبرووووووووووك:)

لاسع افندى يقول...

ده حتى الست اللى فى القصه ربة منزل
شوفى انتى كمان اعباء المرأه العامله
وضغط الشغل

اعتقد ان يوم واحد للاحتفال بالمراه مش كفايه


تحياتى

كلمات من نور يقول...

أساسا يا أمي بعد شهرين طلع حامل ...اقصد طلعت حامل ...
ههههههههههههههههه

انا وصلني الخبر كده...

Lady E يقول...

هههههههههه هما فعلا بالطريقة دي لازم يتعظوا ومش هما بس اي بنت تفكر تتجوز وتدخل عش الزوجيه السعيد

هو الزوج ملوش دور كده خالص؟ ولا ده في مجتمعنا المصري بس واجب وحق مسلم بيه على المرأه اما الراجل بيجيب الفلوس بس

بجد دي متبقاش حياه وميبقاش اسمه شريك حياه

reem يقول...

هههههههههههههههه

احسن هو اللى جابه لنفسه

حد قاله يستهون بدور مراته ؟

طبعا بعد كومنت د/علا حبيبتى مش في كلام

ولازم كل واحد يحترم دور التانى ويقدر اهميته

اهم حاجة في الموضوع انها عندها غسالة اطباق

هههههههههههههههه

أبو حميد يقول...

نيااااااهاااااهااااهااااااا
حلوة موووووووووووووت
بس أنا أعرف واحدة دعت ربنا تبقى راجل
صحيت الصبح لقت نفسها راجل.. خد الواد الصغنن وداه الحضانة بعد ما طلع عينه طول الطريق.. وبعدين ساق العربية لمدة ساعة ونص فى وسط الزحمة والخنقة لغاية شغله ووصل متأخر وبعدين فضل يشتغل زى -لاموأخذة- الحمار من تسعة الصبح لغاية تمانية بالليل.. وهو راجع على البيت إشترى مستلزمات البيت وشوية فاكهة وفينو لسندوتشات الصبح.. رجع البيت لقى الواد الكبير مش عايز يعمل الواجب قعد معاه لغاية ما عمل الواجب وبعدين إتغدى اللى هو يعنى إتعشى وشرب كباية الشاى ونام زى القتييييييل صحى الصبح قال يارب أنا ماكنتش عارف أنا بفكر إزاى يارب أرجع ست تانى... تفتكروا رجعت؟؟؟

Wanda يقول...

سنسة
مينفعش الراجل ده
طلعيه
رجعيه
حدخليه الجنة اونطة من يوم واحد :-(((

انا بعترض

خليه راجل احسن
ده بيشتكى و عنده عربية و غسالة اطباق و تنظيف جاف :-(((
رجالة اخر زمان :-)))))))

و بعدين هى اخبارها ايه ؟؟

سومه...مجنونه فى بلد عاقل يقول...

ههههههههههههه عارفه القصه دى بس اما قال للعفريت يرجعه راجل العفريت قاله لازم تستنى 9 شهور عشان المدام حامل
هههههههههههه دى كانت نكته بيقولوها لينا من زمان
وعلى فكره عملوا اكتر من فيلم اجنبى عليها :))

ستيتة حسب الله الحمش يقول...

جامدة جامدة جامدة

وبالنسبة لعم ابو حميد
لأ معرفتش ترجع ست تاني
لأنها من الأساس متحولتش ولا حاجة
جه ملك الأمنيات يحولها

قال لها يا مسكينة طب ما انتي بتعملي النهاردة شغل الأتنين واخر حلاوة
يبقى تتحولي ليه؟
نيهااااااااااااااااااااااي

ندى الياسمين يقول...

هههههههههههههههههههههههههه

ده حال كل الرجاله يا بنتى

حاسين انهم بيعملوا الىما حدش عمله والستات دول منعمين

انا فاكره مررررره حضرتك زمان رضا خرج راح الشغل وكنت صاحيه طبعا بعد ما فطرته بس كنت قاعده فى السرير

كنت حامل جديد فاتقلبت نمت شويه كنت بانام نوم غير طبيعى فى مريم
المهم نمت ساعتين وقمت بقى وضبت البيت وطبخت وخلصت كل الى ورايا والى من ضمنه يجى 3 مرات كده ترجيع من ريحة الطبيخ الى باطبخه

وبعدين تعبت بقى دخلت اترميت فى السرير

فهو رجع بصي لي كده وقالي ايه ده انتى نايمه كده من الصبح ؟؟؟

مش عايزه اقولك هو جراله ايه طبعاااااااااااااااااااااا

والحقيقه يعنى هو دلوقتي بيعترف من غير اي ضغوط انه ما يقدرش يتحمل يقعد مكاني ولا ساعه واحده
الاعتراف بالحق فضيله

هما الرجاله كده يا اختي والنبى

حَـبآيـۃْ.بـטּـدۉڷ يقول...

هههههههههه ..

يسـتاهل الرآجل ده .. ويـآريت مايرجع تاني .. ^_^

هو ربنا خـآلق الراجل ليه شغله وحاجات خاصه بيه .. ويحاسبه عليها

والست نفس الشئ .. مع إن الأم بتتعب اكتر والله .. هو بيرجع يلاقي اكل جاهز وبيت متوضب ..

واللي يستفز بقى ان قليل جداا من الرجاله اللي بيقدرو الكلام ده

للأسف ..
>_<

الجواز و سنينه يقول...

micheal


الله عليك يا ميكو لما تدينى التعليق الجامد
ايه يابنى الحلاوه دى
و الله خايفه عليك لا تحسد
بخر يابنى و رش ميه
شفت بقى ان فيه رجاله تستاهل اللى يجرالها
طلبها و نالها ياخويا
يستاهل احسن انا فرحانه فيه
بس عارفه حكايه الامن و الامان دى بتوجعنى علشان بق صحيحه مليون الميه

الجواز و سنينه يقول...

sony2000


لوووووووووووى
و الله براوا عليكى يا بنت يا سونى
انتى جبتى النتيجه من الكنترول اهه
فعلا قد كان و احسن خليه يتربى

الجواز و سنينه يقول...

لاسع افندى

و الله كده كتير يا ناس
يعنى مايكل و كمان لاسع نصيراء المرأه
اشى خيال يا ناس
اللى بيفكر بالطريقه دى اكيد هايكون و ان شاء الله سعيد فى بيته
تحياتى ليكم انتوا الاتنين يا رافعين راسى

الجواز و سنينه يقول...

كلمات من نور

يادى البلد اللى ما يستخباش فيها سر دى
فعلا المدونات ليها ودان
و انتى واح انك كنتى فى نفس الكنترول مع سونى

الجواز و سنينه يقول...

Lady E
قال الفيلسوف جحا
ربنا يسامح اللى اتجوزا قابلى و اللى اتجوزوا بعدى سألوه ليه
قالهم اللى قابلى ماقالوليش و اللى بعدى ما شارونيش
الموضوع ده فيه مشاكل من ايام حجا
ههههههههه
بس صراحه الظلم حرام
الحكايه دى جاتلى على الميل بالانجليزى و انا ترجتها
حتى الاجانب ياختى بيعانوا ممكن يكونوا اقل و عندهم غساله اطباق و حاجات من دى مش متوفره فى كل بيت مصرى
و ده بيزود الحمل بس اكيد العجينه كلها وااحده
بصى نصيحه
جوزك على ما تعوديه
الناس القدام ما قالوش كلمه غلط
(:

الجواز و سنينه يقول...

reem

طبعا احسن حاجه فى الموضوع غساله الاطباق
و كمان تعبانه متير خيرالام المصريه على كده
يلا اهه نال جزائه اللى يستاهله

الجواز و سنينه يقول...

أبو حميد
مش قلتلك جينات المهندسين كلها واحد
هو انا لسه ماورتش جوزى البوست ده
بس لو شافه يا سبحان الله
هايقول نفس الكلام
انظروا إلى اخوانكم مايكل و لاسع
ماشاء الله عليهم
حاجه تفرح
و الله يا باشمهندس مش بننكر تعبكم
بس ما تقولوش اننا ما بنتعبش
طيب انت عارف تحضير اكله محشى باخد وقت اد ايه و انت بتاكلها فى ربع ساعه
فكرت ان اللى واقفه تعبانه دى علشان انت تاكل الاكله اللى بتحبها
و لسه نظافه البيت و تعب العيال
يلا اهو اللى يطلب التغيبر و يتعب يبقى يستاهل
بس ايه التأليف الجامد ده
تسلم اديك

الجواز و سنينه يقول...

Wanda

طبعا دى رجاله مرفهه و كمان بتشتكى
تنظيف جاف و غساله اطباق و ماطاقش
فعلا كده هايدخل الجنه اونطه
نرعجه تانى من عنيا
هيه بقى لما بقت راجل عايشه عيشه زى الفل حضرتك
بتشتغل 8 ساعات بس فى اليوم غيرها مطحون 18 ساعه
انا منهم
ههههههههههههههه

الجواز و سنينه يقول...

سومه...مجنونه فى بلد عاقل


و النبى يا سومه ياختى انا اول مره اسمع الحكايه دى جاتلى على الميل
بس بالعنجليزى
و ترجمه الانجليزى فى الجزء ده حسيته وقح شويه فعملت عليه رقابه و حذفته
و لا حتى شفت الافلام
اصلى ليه 5 سنين بطلت اتفرج على اجنبى
مش قادره اتابع اى حاجه
يادوب بالكتير بتفرج على اسبيس تون

الجواز و سنينه يقول...

ستيتة حسب الله الحمش
ستوته الجميله يا قمر
تسلم اديكى يا جامده
هاااااااااااااااا هااااااااااااا هاااااااااا

الجواز و سنينه يقول...

ندى الياسمين


واضح انك كنتى تعابه اوى و علشان كده اثر فيكى اوى انه ماشافش كل تعبك و كمان قدر يقولك انتى نايمه كل ده
طيب ازاى قدر يقولها
ماشمش ريحه الاكل الجميل ده
و لا حس انك تعبانه من الترجيع
ما تفكرنيش لحسن انا اخدته كله ترجيع
حاجه يعععععععع
كفايه انهم مش بيحسوا بآلام الحمل و الولاده
الحمد لله انتى عملتى الواجب شكلك كده
هههههههههههههه
علشان كده هو بيعترف لوحده من ساعه الواقعه دى
طيب ما تفطمينا عملتى ايه هاااا ؟

الجواز و سنينه يقول...

حَـبآيـۃْ.بـטּـدۉڷ



طبعا يستاهل
كل ده علشان الهديه
اهه وقع فى شر اعماله
و اكيد هاتجيله هديه
ههههههههههههههههه
فعلا رجاله قليله اللى بتقدر تعب الستات و كمان ستات قليله اللى بتقدر تعب الرجاله
كل واحد لازم يقدر تعب التانى
و بلاش اسلوب انا و بس اللى بتعب

الجواز و سنينه يقول...

غير معرف

مرسى جدا على كلامك الجميل عنى
و اللى ساب حد علشان حد ده قراره قد يكون صح فيه و قد يكون خاطئ
و كل واحد مسؤل عن قراراته
محدش بيشرب حد حاجه اصفره قبل ما ياخد قرار و خصوصا لو مهم زى ده

هي وظروفها يقول...

لالالالالالالالالالالالالالالالالالالالالالالا
اعيش راجل ولو اتربط في ساقيه ولا ادعيش علي نفسي بكده

ابددددددددددددددددددا

انا مستحمل رجولتي وجنوني وهبلي وتناقضي وعصبيتي واللي يحصل فيا من مراتي

انما اغسل واطبخ وامسح ويرجع جوزي من بره يطلع خنقته فيا


ده انا مجوزش واعيش راجل وراجل وفقط
ومظنش انه يعرف يرجع تاني

خلاص الاوبشن لا يعاد ولا يتغير الا مره واحده

وبعد كده السيستم يضرب

سلامو عليكو

momken يقول...

طبعا عندك كل الالمرأه نعمه عظيمه من نعم الله وربما تكون اكبر نعمه انعم الله بها على الرجل

بس انتى مقولتليش الست الى اتحولت راجل كانت بتعمل ايه

ياترى مفكرتش ازاى توافر الامان للبيت ده
ازاى كل واحد فيه ينام مطمن وهو عارف ان فى شخص اخر مسئول عنه من كافه النواحى

ياترى فكرت فى ان ازاى وهى فى البيت ممكن متقفلش بالترباس وكذا تكه لان معاهم راجل مسئول عن امنهم

ياترى عرفت يعنى ايه مسئوليه


لو افترضنا ان الست الى كانت راجل اصلا معملتش كل الحجات دى ياترى الدنيا هتقف؟؟؟؟

اعتقد ان الدنيا مش هتكون حلوة بس مش هتقف

لكن لو الست الى اتحولت راجل معملتش الى مفروض يتعمل كل يوم الدنيا هتخرب مش عتقف بس


سيدتى احترم جداً وجهه نظرك لكن حتماً هناك وجهه نظر اخرى من اتجاه اخر


لست ذكوريا ولا تسيطر عليا هيرموناتى الذكوريه
لكنى موضوعى واعشق العدل


دمتى بخير



تحياتى

أم .. بوبه يقول...

يا سلام .. أما المدونة بتاعتك دى دخلت مزاجى على الآخر

هو ده الكلام ... لو محدش حاسس بينا .. نقول ونتكلم .. أحسن يفكروا إننا مرتاحين على الآخر .. والجواز ده طلع امله ...

لأ نحن النسوة .. أنا عايزة نوعية المدونات دى تزيد كدة وتترعرع

إن شاء الله مش هتكون آخر زيارة

ذكري رحيل قلم يقول...

السلام عليكم
تقريبا انا اول مرة ازود المدونة

فرصة سعيدة

ذكري رحيل قلم يقول...

هههههههههههههه


ده بقي حقد علي هايا عيد الام الله يسمحه اللي عمل التفرقة بين الام والاب
الحياة شركة لا يقل دور الام عن دور الاب فهو يكدح ويعمل ويشقي وبالفعل لازم من يوم تقدير له والام تربي وتسهر وتعمل لنا الكثير

سبحان الله يارب يرجع راجل ويكون ماكان فيه حلم وانتهي
دمتي بخير

esraa يقول...

ههههههههه
عشان كده انا نفسي لما اتجوز يكون جوزي اتغرب فتره من حياته
عشان يكون جرب شغل البيت وعرف انه مش لعب عيال

FOrty يقول...

ده كاه سهل و يخلص فى خمس دقابف بس المشكله فى تنظيف القطه و الكلب
هههههههههه
تحياتى

عفوا أنا أميرة يقول...

هههههههههه، حلوه قوى
سبحان الله كلا ميسر لما خلق له، مش ممكن نقوم بدور الرجل ومش ممكن الرجل يقوم بدور المرأة، دى الفطرة اللى ربنا فطرنا عليها. تسلم ايدك

Just waiting يقول...

اول زيارة للمدونة
ان شاء الله هتتكرر دايما
بس ايه دا على فكرة البنات والستات بتتعب قوي اكتر من الرجاله
لدرجة ساعات بقيت افكر كدا ان الانوثه عقاب :)
لأ بس انا بحب كوني بنت الحمدلله على اختيار ربنا فعلا كل خلق لما هو ميسر له

أحــوال الهـوي يقول...

تعرفي انا قريت القصه دي قبل كده و لها تكمله
ان بعد كل التعب طول النهار عليها انها تلبي حاجه زوجها و تفعل رغم تعبها

و حينما ارادت ان تدعو الله ان يعيدها الي حالتها الذكوريه اوحي اليها انها عليها الانتظار 9 اشهر لان الليلة اثمرت بحمل

تحياتي

rovy يقول...

هههههههههههه
برافوا عليكى و الله بجد ..
طبعا مش حيعرف يرجع راجل تانى أبداا :))
يا ريت يفهموا و يحسوا ..
و لو أنى متأكده أنهم فاهمين بس أحيانا بيتظاهروا بالغباء غلاسه يعنى :))
تسلم أيديك يا أجدع دودو

وحشتينى كثيييير
تحياتى

كلام على بلاطة يقول...

متعظين منه ومن غيره
تحياتى

صدى الصمت - عاشقة الورد - يقول...

ههههههه
والله ضحكت من قلبى
فعلاً ماحدش عاجبة حالة
ولو علمتم الغيب لأخترتم الواقع
كل واحد ميسر لما خلق له
تحياتى لكتاباتك الجميلة ومدونتك الرائعة

سمو الامير يقول...

هههههههههههههه

جميلة أووووي

كل ميسر لما خلق له

لا الراجل هايقدر يستحمل الشغل اللى هيئ للمرأة

ولا المرأة هاتقدر تعمل الشغل المهيئ للرجل

لأن دي سنة الحياة

تدوينة جميلة

تحياتي

:)

موناليزا يقول...

حلوة بجد:)
تعرفى ان ده احساس زوجات كتير
يتمنوا ان الزوج يبدل معاهم الادوار لمدة يوم واحد بس

مياسي يقول...

ذكرتيني بمرة خالي

لما تضل تحكي الزلمة بيخلص دوامو الساعه 5
والست دوامها زياده عالـ 24 ساعه في اليوم :)

كيف حالك؟

ابو بدر الدين يقول...

حلوه
اولا سلام الله عليكم ورحمته وبركاته
والله جميله جدا
وانا موافقك الراي جدا
انهم فعلا بيتعبوا جدا
وانهم يستحقوا كتير
وربنا يخلي النساء
من غيرهم هنليص
بس يا رب يهديهم كمان وكمان
سلام دلوقت

˚͜˚ mEma ˚͜˚ يقول...

أول مره ادخل المدونات كانت من فتره قريبه
و فعلا مدونتك مليانه كلام جميل و مميزه فعلا
شرف ليا جدا انى اتواجد فيها
و فعلا الموضوع ده جامد جدا

Mona يقول...

أولا أشكرك على مرورك وكلماتك الرقيقة طبعا لازم يرجع رجل ثانى لانه لم يتحمل :) ياسلام من يوم أنهار بس والله فيه رجالة جدعة من غير ما تتحول :)) تسلمى

المفروس المتحزلق يقول...

فاروق بن النيل ...
ياجواز ياسنينه القلب هوه السبب فى الحب وبعدين العقل العقل هو السبب فى الجواز وبعدين ممكن القلب وممكن العقل ساعتها يكون تايه.......
المرأة قطعا بتتعب أكتر من الرجل وإلا لما كان النبى محمد صلى الله عليه وسلم قال لرجل يسأله : من أحق الناس بحسن صحابتى يارسول الله قال : أمك قال : ثم من قال : أمك قال ثم من قال : أمك قال : ثم من قال أبوك " صدق رسول الله صلى الله عليه وسلم الذى قال أيضا" الجنة تحت أقدام الأمهات " وكان أحد الصحابة قد حضرته الوفاة فقالو له إنطق الشهادتين:
(أشهد أن لا إله إلا الله ,وأشهد أن محمدا رسول الله) فلم يستطع الرجل أن ينطقها ويقول لهم لاأعرف لماذا لايستطيع لسانى أن ينطقها فذهبوا إلى رسول الله صلى الله عليه وسلم وحكوا له ذلك فقال لهم : أله أم قالوا: نعم يارسول الله فقال لهم :آتونى بها فلما جاءت قال لها : مابال إبنك معكى قالت: كان يفضل زوجته على يارسول الله فقال النبى : آتونى بحطب ونار فقالت له: ماأنت فاعل يارسول الله قال: سأحرقه نار الدنيا أهون عليه من نار الآخرة فقالت : لا يارسول الله قال : إذن سامحيه وأرضى عنه قالت : سامحته ورضيت عنه يارسول الله وعندها فقط ذهبوا إلى الرجل فوجدوه ينطق الشهادتين وحده
أرأيتى ياأختى " أماثل " تقديرا للمرأة فى أى دين أكثر من تقدير الإسلام لها هى أخواتنا الصابرات وبناتنا الرقيقات " وزوجاتناالمريحات العفيفات الطباخات والغسالات والحاملات لفلذات أكبادنا والمرضعات لأولادنا والمربيات والصابرات على سخافاتنا" وأمهاتنا الحنونات والداعيات لنا والراضيات عنا وسبب رئيسى بدخولنا الجنات طبعا بعد رضا رب السموات .
farouksam.blogspot.com