الأربعاء، 20 مايو 2009

اغتصاب مع سبق الاصرار



ضغطت كتير على روحها علشان تعرف تتكلم

حاسه انها فى كابوس مش عارفه تفوق منه

كانت بتتكلم مع نفسها و بتقول لو رجع الزمان ما كانتش خرجت فى اليوم ده

رغم انها لابسه محترم و ماشيه فى وقت مناسب

ما منعش المجرم انه يهددها و ياخد اغلى ما عندها

تمنت لو ماتت و لم تعش طول عمرها بين الحياه و الموت

نظرات الناس بتموتها كل يوم اكتر من مره

ما بقتش زى ما كانت

ضحكتها و برائتها و احساسها بالامان كله راح مع الحادث

و دلوقت مضطره تحكى تفاصيل مخزيه و مؤلمه و تعيد و تزيد فى اللى حصل

و كمان الصحافه كله بيخليها تحكى بدل المره مليون

اسأله سخيفه مضطره ترد عليها

فين الحياء اللى يخليها تحكى كل التفاصيل دى لاكتر من واحد

زى ما يكون مستخصرين فيها النسيان ده لو قدرت عليه

حاسه انها فى غيبوبه بتتحرك بس مش حاسه

مش عارفه هاتفوق امتى و لا اصلا هاتفوق و لا لاء

مافيش حد حواليها إلا و جواه مليون سؤال

ياترى الناس لما تعرف هاتقول ايه

و اخواتها هايتجوزا ازاى

و اخوها هايرفع راسه ازاى

و بدل ما يكون الجانى هو اللى حاسس بالعار هيه و اهلها اللى حاسه بيه

لو اتسرقت مش هاتحس بالعار طيب مهى اتسرقت برضوا بس بطريقه تانيه

ليه الناس بتفكر كأنها مدانه و بقت عار هيه و اهلها و حكمت عليها من غير محاكمه

لو ماكانتش بلغت محدش كان هايعرف بس تسيبه يفلت باللى عمله

و لو بلغت تعيش بالاحاسيس دى


كل دى افكار بتجيينى كل ما بشوف جريمه اغتصاب جديد
و كتبته بالاحمر على غير عادتى

و مع الاسف ده بيحصل كل يوم تقريبا

لو الجانى ماخافش على بنات الناس يخاف من ربنا يخاف على عرضه هو شخصيا

بقت حاجه تقرف

هناك 38 تعليقًا:

ELMASRYA - MRS WRITER يقول...

كلامك فكرني بموضوع قريته زمان قوي عن إحساس البنت اللي بتغتصب ونظرة المجتمع ليها

وكانت البنت دي بتسأل سؤال هي مين الأشرف؟

اللي اغتصبت بدون حول منها ولا قوة ولا البنت اللي ماشية على حل شعرها وبتحافظ على بكارتها بمنتهى المكر والدهاء؟

الغريب إن المجتمع بيساوي بين المغتصبة وبين من تمارس هذا الفعل كمهنة

أنا رأيي اللي تتعرض لحادث من مثل هذا النوع لازم تبلع الشرطة مين عارف يمكن يقدروا يوصلوا للجاني أو الجناة وفيه حالات كتير بيتوصلوا فيها للمجرمين دول

ولازم تتلقى علاج نفسي علشان تقدر تواجه المجتمع تاني بلا خوف وبلا حياء سلبي يجردها من حقوقها ويلجم لسانها في الدفاع عن نفسها أمام من لا يملكوا إلا ألسنة كالسياط يلهبوا بها أجساد الأبرياء

موضوعك جميل ومهم جدا

ياريت تتوسعي فيه أكتر وتعرضي نماذج مختلفة لبنات وسيدات قدروا يتغلبوا على هذه المأساة

ربنا يعافينا نحن وبناتنا ويصلح حال الرجال والشباب

خالص مودتي وتحياتي

لاسع افندى يقول...

بما اننا فى بلاد شرقيه تعتبر العرض والشرف هو اعز ما يملك الانسان وجب علينا جميعا ان نطالب بتشديد عقوبة الاغتصاب لتتساوى مع القتل انما انا ارى ان القتل اهون من الاغتصاب
لنتبنى جميعا هذ الموضوع ونطالب بالوقوف معا ضد المعتدى على الشرف



تقبلوا تحياتى ومرورى

Mostafa Safwat يقول...

انا لما بسمع عن حادثه زي دي بيجيلي احساس بالخنقة بالقرف بحس اني عاوز ارجًع
بتمنى ان يكون في ايدي طؤيقة اعاقب بيها الحي...ن الي بيعمل كده
انا حموته بس بطريقة حتخليه عبره لمن قد تسول له نفسه انه يفكر فكره زي دي

rovy يقول...

اد ايه مؤلم اكيد احساس اى واحده تم اغتصابها ربنا يحفظنا ياارب و يحفظ بناتنا من كل مكروه ..
الناس دى افترت و نسيت ربنا فانساهم انفسهم و صدقينى المشكلة بقت ازمة اخلاق زمان كنا لما بنسمع بحادث اغتصاب الدنيا تقوم رغم ان كانت الملابس غير دلوقت خالص يعنى انا فاكرة ان كان عادى جدا البنت تمشى بملابس عاديه المهم انها تكون مغطيه الركبه و الصدر مقفول غير كده ده العادى و المحترم كمان
مش فاهمه ليه ده حصل دلوقت رغم ان معظم النساء و البنات اتحجبوا لكن يمكن اللى بيحصل على قنوات التى فى
يمكن التربيه من الاول فى البيت اصبحت خطأ او مش موجوده .. دور رجال الدين اللى دايما بيكلموا البنت اليومين دول انها تكون حشمه لحسن و احسن و قليل ما بيوجهوا الكلام للشاب و يقولوا اعتبر كل بنت اخت لك و بنات بلدك عموما يعنى عرضك و لازم تصونهم و انت اللى تحميهم مش انت اللى تغتصبهم
الموضوع كبير غاليتى .. كفايه كده علشان ما طولش عليكى و ربنا يرحمنا برحمته يارب و يهدينا لما فيه الخير و يحمى كل بناتنا من اى سؤ ..

تحياتى

MaNoOoSh يقول...

شرف البنت فى عقلها قبل ما يكون فى جسمها.. والمجتمع اللى بيحكم على المغتصبة بالشكل دة مجتمع عايز الحرق.


ومعاكى انه شىء مستفز اللى بيعمله الاعلام فى انه بيفضل يعصر فى مشاعر البنات المغتصبات.. ولو ان دة ممكن يكون بيدى شوية مساحة للبنت انها تعبر عن اللى جواها للمجتمع وتبين الوش القبيح للمجتمع.


وانا بجد بحيي اى بنت كان عندها شجاعة تواجه الناس وتسعى انها تاخد حقها لان هو دة الصح.

تحياتى يا قمر

ستيتة يقول...

لا المجتمع بيتغير
ولا العقول بتنور
ولا المفاهيم بتطور

سهل جدا ان المغتصبة تسكت
والأسهل تعمل عملية وتتجوز ولا من شاف ولا من دري

لكن هي بتختار انها تاخد حقها
وتحمي المجتمع من أشر أنواع البشر "المفسدون في الأرض"

لو على التعليم بنتعلم
ولو على الثقافة والتطور صفررررررررررر كبير مدور

اللهم استرنا فوق الارض وتحت الارض ويوم العرض عليك

تحياتي

mahasen saber يقول...

هو لو كان المغتصب عنده من الاساس اى نوع من انواع الاحساس الادمى والبشرى
كان اقدم على خطوه سوده وفعل مشين وقاتل زى ده

ابدا كان فكر مليون مره فى كل انثى عزيزه عليه
بس ده وامثاله مجردين من كل شئ ادمى

حسبى الله ونعم الوكيل فيهم وفى كل من تسول له نفسه بذلك

تأثير الفراشة يقول...

لا حول و لا قوة إلا بالله

ربنا يرحمنا فى مجتمع انقلبت فيه المعايير ، فاصبح المظلوم هو الظالم ، و لكن الظالم معذور

حسبنا الله و نعم الوكيل

أحييكى على طريقة عرضك للموضوع
تقبلى مرورى

دعاء يقول...

من كام يوم شفت على اليوتيوب أصغر ام فى مصر مش فاكرة كانت فى برنامج ايه وجايبينها وهى شايلة طفل صغير جداأنجبته نتيجة لإغتصاب
البنت بتتكلم كلام كبير جدا على سنها تحسى انها خلاص مبقيتش طفلة..طفلة إيه دى بقت ام وبترضع الطفل وبتتحمل مسئوليته ده بالاضافة لنظرة الناس والمجتمع ليها.
بجد كانت حاجة تقطع القلب.
شكرا ليكى
وتقبلى مرورى

من غير عنـــوان يقول...

حسبنا الله ونعم الوكيل

المشكله إن الناس تركت الدين الحق..
المشكله إن الناس تمسكت بدنيا زائلة
المشكله إن كل واحد فاهم إنه أكتر واحد شاطر ويقدر يهرب من عقاب ربنا

وكمان.. راحت المرؤة والنخوة والحياء

زقطـوطـة يقول...

أولا أنا بجد بشكرك على سؤالك عليا الفترة اللي فاتت :)
ثانيا
البوست ده قوي جدا
ربنا يعافينا و يعافي بناتنا يارب
بس السؤال فعلا ملح عليا
تبلغ؟ ولا تسكت ؟
وتسكت ليه؟ ماهو سكوتها يخلي الجاني يعيد ويزيد في عملته
تبلغ؟ تبقى عار..طب عار ليه؟
وهي ذنبها إيه ؟
مرة من حوالي 5 سنين شفت أب بيتكلم عن حادثة اغتصاب بنته..أب أردني و الجريمة في الأردن..لقيته بيحمد ربنا إنها ماتت و إلا كان موتها بنفسه بعد الجريمة..مع إن الجاني اعترف إنه قتلها الأول عشان يقدر عليها لأن مقاومتها كانت شديدة جدا...ومع ذلك تمنى الأب إنها لو عاشت لكان هو قتلها
يعني المغتصبة بتموت مرتين..مرة لحظة الاغتصاب..ومرة من أهلها و المجتمع اللي ليه أكبر دور في الجنايات دي..لأن لو حمينا بناتنا و وقفنا جنبهم ما اعتبرناهمش جانيات..كان كل المرضى النفسيين دول خافوا يهوبوا للبنات ربنا يستر علينا

شمس النهار يقول...

المشكله كمان في الموضه الجديده
كل ما تغتصب بنت تلاقيهم جايبنها في جميع القنوات ويتكلموا معاها كلام اهبل

وبتغظ جدا لما تكون بنت صغيره

كده هي بتغتصب مرتين مره من جاني واحد
والمره التانيه من 700مليون علي جميع القنوات

Soul.o0o.Whisper يقول...

السلام عليكم و رحمة الله و بركاته

أولا معلش على التأخير
غصب عنى والله كنت تعبانة شوية

المهم يا جميل
عارفة فكرتينى بمقال قرأته لشخص
قال فيه انه لما كان فى الجامعة
ماكنش يعرف يعاكس بنت

المهم كان مع اصحابه مروحين
فهما بيتريقوا عليه و ازاى هو مابيعرفش يعاكس بنات و لا يكلمهم
قام دمه فار و قالهم لا باعرف
و عارفين البنت اللى جاية هناك دى اما وريتكم
و راح يعاكسها

أتاريها أخت واحد من الشلة
قام نازل عليه ضرب لولا الباقيين شالوه من ايده كان خلص عليه

للاسف لو كل واحد من الكائنات دى حس ان ممكن يحصل كدا فى اخته عمره ماهيفكر يعمل كدا فى بنات الناس

الحاجة التانية
ان للاسف بئت الصحافة و الاعلام مادة للكسب و الاخبار الحصرية
غير مهتمة بمشاعر الناس
و لا الأذى اللى بييجى من وراهم

و حتى احنا كمجتمع
لسه بنبص للمجنى عليه فى القضية دى كأنه الجانى
و الجانى ليس عليه حرج
لأنه ببساطة
ذكر



بجد ربنا يخفف عن كل واحدة اتحطت الموقف دا
و يعافينا أجمعين اننا نتحط فى الموقف دا




تحياتى ليكى يا جميلة
و بجد بجد وحشتينىىىىىىىىىىى

صيدلانيه طالعه نازله يقول...

للاسف ان فى مجتمع بيحاسب المجنى عليه و يقف مع الجانى
البنت الغتصبه بتبقى مدمره معنويا و جسمانيا و بتبقى محتاجه مسانده نفسيه للاسف فى مجتمع زى بتاعنا ده مش موجوده

dr.lecter يقول...

شوفتم بقي ان فرق شاسع بين الاغتصاب والتحرش اللي انتم ماليين به الجرايد وعمالين تجعروا به ليل ونهار؟

الاغتصاب هو سلب روح باختصار والتحرش لا يمثل له اي شيء

الاغتصاب مش هنعرف نتكلم عنه اخرنا نحط راسنا في الرمل ونتجاهل بكاء المغتصبه

سبهللة يقول...

اللهم استرنا واستر بناتنا
واستر بنات المسلمين
الموضوع وجعنى اوى
يمكن لان عندى بنت
اللهم استرنا فوق الارض وتحت الارض ويم العرض عليك

HAPPY يقول...

الناس خلاص معدتش بتميز ايه الصح من الغلط .. كل اللى يهمهم يلاقوا حاجه يتكلموا فيها لدرجه ان الكلام فى اعراض الناس بقى عادى جدا.. كل واحد مبيحطش نفسه مكان الناس ولو دى بنته او اخته هيحب حد يتكلم عليها كده؟؟؟

الحكايه دى مش فى الاغتصاب بس الناس مبتسبش حد فى حاله..

الست فرويد يقول...

تجربة عذاب
وابتلاء عظيم
ربنا يحفظ كل بنات المسلمين يارب

تحياتى لكى

Beram ElMasry يقول...

الجواز و سنينه
الاخت العزيزة (فذكر ان الذكري تنفع المؤمنين) يجب ان لا تنصرف همتنا الي اي شئ اخر ونحفظ دائما ذاكرتنا واعية يقظة لتكون عوننا عند اللزوم وهذا ما اسعي اليه وتذكيرنا بما نحن فيه حتي تستمر ضمائرنا يقظة

الموضوع صعب التعليق عليه......
لك تحياتي ولا سلام مع اليهود

الجواز و سنينه يقول...

ELMASRYA - MRS WRITER
حبيبتى المصريه
فعلا المفروض نفرق بين الاتنين
بس ده ده صعب تحقيقه مع للاسف
ازاى نقدر نفرق بين المغتصبه و اللى ماشيه على حل شعرها ؟
الاتين لو بلغوا هايتعاملو نفس المعامله

طبعا المجرم لازم يتحاسب بس برضوا مش لازم نشهر بالمجنى عليها علشان احنا مش بنرحم
فكره ان المغتصبه تاخد علاج فده مطلوب جدا
بس دى مش ثقافه شعبنا
اما انى اجيب نمازج فده صعب مع الاسف بس هاحاول
تحياتى و شكرى و تقديرى على الزياره الغاليه

الجواز و سنينه يقول...

لاسع افندى
متهيألى ان اى بلد هايكون عندها العرض حاجه مهمه
انا معاك فى تشديد العقوبه على المغتصب لان زى ما القاتل سلب الروح فده كمان خلى المغتصبه و لا طايله حياه و لا موت
ربنا يعفينا من الابتلاء ده
نورتنى

الجواز و سنينه يقول...

Bondok

ياريت يكون فعلا فيه طريقه رادعه للحي....ات اللى بتعمل كده
بس مع الاسف يا بيفلت بعملته يا أما العقاب مش بيكون على اد الجرم اللى عمله
نورتنى و حسستنى فعلا انك متضايق من الناس دى

الجواز و سنينه يقول...

rovy
هيه بقت مشكله اسبابها كتير التى فى و التربيه و الغلاء و النت و و حاجات كتير
منها فعلا ان محدش بيقول الشباب بقى سافل
لاء البنات و اللى بتلبسه
مش الولاد و اللى بتتفرج عليه على النت و غيره
دايما البنت فى حاجه اتهام مخفى
ربنا يحفظنا و يشيل عننا

الجواز و سنينه يقول...

MaNoOoSh
شرف البنت فى الاتنين
الغريب ان محدش بيتكلم عن شرف الولد ياترى فى ايه؟
كنت بقول من حق البنت الشريفه انها تاخد ولد شريف
مش اسمه شريف
اما حكايه الاعلام
فممكن على الاقل مش يطلعوا صورتها
بلاش عذاب بقى ليها اكتر من كده

Ehab يقول...

مش عارف ارد بايه بصراحه
المجتمع بقى فيه قذاره تقيله قوي
لدرجة ان ساعات تبصي لناس تحسي انهم بقوا يستاهلوا كل مصايبهم
كل اللي اقدر اقولقهولك اننا مفيش قدامنا غير نربي ولادنا يمكن مستقبلهم يبقى احسن

سلاااااااااااااااااااااااااام
اخوكي ايهاب

Kiara يقول...

موضوعك بيملس كتير خاصة بعد كثره الاغتصابات للاسف مبقاش في امان

ربنا يسترها علينا كلنا

blue-wave يقول...

والله المفروض الناس دى تتعدم
علشان تكون عبرة لغيرها
ربنا يلطف بينا

micheal يقول...

أصعب وأقسي وأحط جريمة ممكن إنسان يتعرضلها
وانا شايف فعلا أن لسه تناول الاعلام للنوع ده من الحوادث لا يزال منقوصا
تحياتي

ذو الوجه المبتسم يقول...

السلام عليكم
بصراحة الموضوع صعب التعليق عليه
ولكن
فيه نقطة مهمة جدا
وهى اقامة حدود الله
ماهو لو الجانى اقامه عليه الحد فعلا
اعتقد ان كتير من العالم دى هترجع عن اللى بتعمله
واللى باتمناه ان تكون اقامة الحد علانية مثل هنا بالسعودية مثلا وذلك للاتعاظ
ولكن ارجع واقول
حتى هنا فى السعودية وبالرغم من اقامة الحد
لكن برده فيه نسبة كبيرة من الجرائم وبخاصة الاغتصابات حتى لو بالرضي

ربنا يعفينا ويرحمنا برحمته
بخصوص اى بنت مغتصبة لازم تاخد حقها سواء عن طريق اهلها او عن طريق الشرطة
لكن بايدها لا تظهر عبر الفضائيات ولا حتى تتكلم بالاعلام نهائيا وياريتها ترفض كده من البداية

فيه قصة صغيرة
حصلت بالفعل
شاب اغتصب بنت فى بلدة ريفية
وحظه ان ابوها جزار
عارفين ابوها عمل ايه فى الشاب
ذبحه مثل ما بيذح الخروف
وعلق جثته على باب المحل

ربنا يرحمنا
تقبلى تحياتى

mahasen saber يقول...

ازاى الجميله ام الملايكه

اخبارك ايه يا حبيبتى

واخبار بناتك يا رب تكونوا تمام وبافضل حال

قلت اشوف جديدك لقيت نفس الموضوع

شكلك اتعديتى منى وكسلتى ولاا ايه

زقطـوطـة يقول...

wherek ???

زقطـوطـة يقول...

فينك ؟؟؟؟؟؟؟؟؟؟؟

ذكرى رحيل قلم يقول...
أزال المؤلف هذا التعليق.
غير معرف يقول...

السلام عليكم

طيب بما انك خبرة في حل العقد والمشاكل الزوجية
هاقلم مشكلة انا انسانة صريحة جدا وطبعي غريب شوية بالنسبة للحياة المحيطة ودائما موضع نقد من اهل زوجي
يعني اخر موقف ان اخو زوجي برن الجرس راح فتحلي الباب سوري ب الطقم الداخلي غضت نظري وتركت الحاجة علي الباب وانا نزلة السلم قولتله لو سمحت ما تبقاش تخرج لي كدة تاني ليه وليه
راح قال لزوجي واهلو كلهم
واتسبب في خناقة بيني وبينه عشان كنت عايزة اخرج واخد ابني معايا وهو عايز يخده معاه
طيب هو ابني ولا ابنك انت يدوبك عمه
افتكر اننا وخداها عند ومش عايزة اعطيه ابني
وراح مزعق وزوجي زعقلي
وكنت هاسيب البيت
انا مش عارفة اخلي زوجي يعملني كويس بعيد عن اخواته يارب يموته كلهم بس
مش عارفة هو بيعمل معايا كده ليه ادمهم
اكيد بيقللو اكلام عليا صح وبيقوموا عليا وهو بيخزن لحد مينفجر فيا
قوليلي بقي يا خبرة اعمل ايه
علي فكرة بعيد عنهم هو بيعملي كويس جدا بس حسة اني فقدت احتامه ليا ونفس اسيبه مش مش هاقدر
انا بكرهم
انا بكلم وخلاص بس بردة ردي عليا وهاتبعك
تحياتي
علي فكرة محتاجة اغظهم ومش بعرف اعامل الناس زي معملتهم
طبعا بسسب الكلمة ديه الكل هايقطعني
ابقي انصي الناس اللي بيكلموكي ميبقوش يتزوجوا في بيت عايلة

ذكرى رحيل قلم يقول...

السلام عليكم

ربنا معاها ويسترها علينا كلنا الناس مش بترحم حد لا هوز سليم ولا مغتصب بس انا نفسي اقول لا اي حد اتعرض لمشكلة ما هو مالوش سبب فيها
انه يقرب من ربنا ويشكيله والله هو افض من يسمع شكاوي الانسان وبيرزقه بالفرج
تحياتي

mony يقول...

اكيد المغتصب ده انسان مش طبيعى .عشان كده مفروض تكون التربيه للولد زى البنت.الناس فاكره ان تربيه البنت اهم من الولدوبيضيقوا على البنت اكتر وبيسيبوا الولد يعمل زى ماهو عايز .والتعليم مفروض يكون فيه ماده تقويميه نسميها مثلا الاخلاق .وربنا يسترها علينا..

اسلوب يقول...

اسلوب
منتديات اسلوب
مدونة اسلوب
دليل اسلوب
منتديات عامة
فضاء واسع
منتديات اسلامية
اخبار
Language Forum
سياحة وسفر
صحة وتغذية
وسع صدرك
نكت
عالم حواء
منتديات حواء
ازياء واناقة
عطور و اكسسوار
مكياج و تسريحات
عناية بالبشرة
المنطقة الحساسة
تفتيح المؤخرة
عناية بالجسم
عناية بالشعر
مطبخ حواء
مطبخ
ركن العروس
عروس
فوتوشوب
منتديات فوتوشوب
ادوات فوتوشوب
دروس فوتوشوب
منتديات صور
دروس تصوير
صور
منتديات ادبية
شعر وقصايد
خواطر
قصص
رياضة
رياضة سعودية
رياضة عالمية
سيارات
رياضات اخرى
تطوير مواقع تطوير منتديات
تطوير مواقع
تطوير منتديات
منتديات برامج
برامج
برامج جوال - برامج نوكيا
توبيكات - MSN
العاب - Pc Games
بناتي
زفات
منتديات دريم
منتديات دريم - زفات - اغاني - جلسات طرب
زفات - اغاني - جلسات طرب
زفة
تسجيلات دريم
تسجيلات حلم الغد
منتدى زفات
منتديات زفات
موقع زفات
تساهيل
منتديات تساهيل
ترافيان
منتديات ترافيان
بنات الدمام
خريطة منتدى اسلوب
عبدالرحمن بن مساعد
كلية العلوم بالدمام
كلية الاداب بالدمام
اضف موقعك
دليل
منتديات
منتدي
منتدى
شبكة
موقع

شهووووده يقول...

الموضوع ده مقزز ومرعب .. المشكلة ان في ناس بتقلك تلاقي لبسها مش عارف ايه ولا تلاقيها خرجت في وقت مش مناسب.. لا بالعكس محتشمة وخارجة في وقت كويس وساعات بيبقى في وضح النهار .. طب ليه وفي ايه ؟؟ يعني تفضل قاعده في بيتهم ولا تاخد معاها حراسة في كل خروجة.. حاجة تقرف فعلا