السبت، 2 مايو 2009

التاج ده جانى و رب العرش نجانى






التاج ده جانى من حبيبت قلبى Soul.o0o.Whisper و الله البنت دى انا بحبها جداااااااااا

و هيه عارفه ده و ربنا يحببنا فى بعض يارب دايما

المهم انها دبستنى فى تاج حاسه انه استجواب فى امن دوله بس ماعلينا

يجعل كلامنا خفيف عليهم

اشتاتا اشتوت

نيجى بقى للمحضر قصدى الاستجواب قصدى للاسئله


اسمك؟


طيب ما انتى عارفه بتسألى ليه؟


المشهوره بيه وسط اصحابك؟

ام البنات


سنك؟

ده علشان المحضر يكمل 30

طيب مهو مكتوب فى العريف بتاعى

و بعدين هو ده سؤال يتقال لبنات حواء برضوا


مجال دراستك؟

ما انتى عارفه برضوا و بعدين الحدق يفهم اللى يركز هايعرف

ههههههههههههههه


اسم مدونتك؟

جواز و اتجوزنا برضوا فوق فى المدونه مالهم بنات مصر


صورتك الرمزيه فى المدونه بتعبر عن ايه؟

صوره عروسه بس تحسيها كده حيرانه مش عارفه ليه

بس دلوقت عرفت ليه

اتجوزت

هههههههههههههههه


هل فكرت فى اغلاق مدونتك؟ والسبب؟
اه فكرت لما لقيت لاشر كتير فى الدنيا فكرت اقفلها و لقتنى بسأل ايه فايده كلامى لما الناس بالمنظر ده

و اكتأبت جامد جدا فى الفتره دى


ايه رد فعلك لو حد قل ادبه عليك فى تعليق؟
يعنى هيه الحمد لله ماحدش عملها بس لو حصلت و كانت قله ادب مش نقد اكيد هاشيل التعليق



اسوء مدونه ؟

من غير دبلوماسيه مش بتابع حد وحش و الله


هايحصل ايه للايميلات بعد ما تموت؟
مش عارفه ؟ اكيد مش تتفتح


اديت الباسوورد لحد قبل كده؟
اه زوجى العزيز طبعا و اكيد لما العيال هاتكبر هاديهالهم


السفر بالنسبه لك؟
اكيد متعه بس دلوقت و مع العيال بقى صعب شويه


المود بتاعك ايه؟
انا جوزاء و الجوزاء شخصيتين و انا الاتنين


بتعمل ايه فى وقت فراغك؟
هو فين وقت الفراغ ده

ده انا بقعد على النت بالعافيه بس لو فيه بيكون للنت


الاكله المفضله؟
المكرونه و الحلويات


الصفات اللى اخدتها عن والدك؟
انا بحس انى نسخه من بابا من غير تفاصيل


الصفات اللى اخدتها من والدتك؟
الرقه


اكتر 6 حاجات بتكرههم؟
الكدب


الحقد


الخيانه


الغباء


اللف و الدوران


الاسئله الكتير


اكتر 6 حاجات بتحبهم؟

عكس اللى فوق هههههههههههه

بحب الوضوح و النقاء و ان الناس تكون احسن من كده لان الدنيا مش مستاهله


شخصيتك نوعها ايه؟
حاسه ان السؤال ده جه قبل كده

بس لو صفات عامله فأنا بحالات

مره شعنونه و مهيبره و مره عاقله و رزينه و الكلام اللى بحساب

فيه قصه اسمها دكتور جيكل و مستر هايلد اهه اده انا بالظبط


لماذا دخلت التدوين من الاساس؟
اكيد مش فضا

بس شفت حلقه عن المدونين و دخلت اعرف الحكايه حصوصا انى فى النت من زمان

و لما دخلت عجبتنى الحكايه و كملت


اجمل كلمه قيلت فى وصف مدونتك؟
و الله كلام كتير حلو من ناس حلوه كتير مش عايزه انسى حد


اهميه التعليقات بالنسبه لك ايه؟
زى عيالى بالظبط

ههههههههههههههه اكيد مهمه بتحسسنى ان فيه حد سامعنى و متفاعل و فاهمنى او بيناقشنى


احلى بوست كتبته؟وضع اللينك ثم اذكر السبب؟

انا مش كتبت بوستات كتير رغم انى ليه اكتر من سنه

بس بحب البوست ده

امسك مناخيرك من فضلك

علشان الناس بقت حشريه بزياده




افضل مدونه قرأتها؟

كتير و الله مش عايزه انسى حد بس والله انا عرفت هنا ناس دماغها ماشاء الله عليها


افضل بوست قرأته؟

كتير برضوا افتكرهم ازاى بس

و هادور عليهم ازاى برضوا

اسئلتك معقربه اوى يا استاذ طارق علام


الشغل بالنسبه لك؟

زمان و لا دلوقت

زمان مش كان نفسى اشتغل كنت حاسه ان الشغل بهدله و انا يصعب عليه اتبهدل

دلوقت برضوا النظريه اللى فاتت برضوا مازالت قائمه بس نفسى احس انى بستغل امكانياتى من غير ما اتبهدل

حد فاهم حاجه ؟؟؟؟؟؟؟؟؟؟


الانترنت بالنسبه لك؟

نافذه على العالم بجد بحبه توى مش عارفه ليه ؟


تمرر التاج لمين؟

ياااااااااااااه فرصتى بقى و استغلها


الباشمهندس المحترم صاحب مدونه من غير عنوان


طبعا مخنوقه حبيبتى صاحبه يوميات زوجه مخنوقه ربنا يفك خنقها


هابى الجميله صاحبه مدونه على بالى


روفى طبعا صاحبه مدونه لقاء الاحبه


محمد جلال و هل تبحث عن السعاده مين مش بيبحث يا محمد


منوش الجميله و هيه كمان مخنوقه بس خانقه غير الاولانيه


المصريه المسلمه لله و ربنا يجعلنا معاها فى الاسلام و نفر معها لله
لجين ابو الدهب علشان نفسى اعرف اجابتها على التاج و على الله تقولى ما انتى عارفه
77Math علشان حاسه انها دماغ و هاتكيفنى اجابتها


بس خلاص على رأى شعبوله


و دمتم سالمين





هناك 38 تعليقًا:

MaNoOoSh يقول...

الميزة اللى بتعجبنى قوى فى برج الجوزاء انهم مهيبرين
هههههههههههههههه
بس طلعتى شقية وانا بموووووت فى الشقاوة.. شكلك طبعا تعبتى من الشقاوة بسبب الاختين الحلوين ربنا يحميهم
تسلمى يا قمر على تدبيسة التاج بس انا جاوبتة قبل كدة.. وكنت فاكرة انى دبستك فيه بس طلعت نساية
عااااااااااااااا

Soul.o0o.Whisper يقول...

هييييييييييييييييه

تانى تعليييييييييييييييق

أحبك الذى أحببتنى فيه يا حبيبة قلبى
والله و أنا كمان بحبك أوى ربنا أعلم

ربنا ما يحرمنا من محبتنا فيه يارب


و اجاباتك عسل زيك والله

يعنى حسيت الحمد لله ان فى حد زيى
هههههههههههههههه




ربنا يكرمك يارب يا جميلة
و يخليلك الكتكوتين الجميلتين
و يهنيكى بحياتك يارب




دمتى بكل ود و حب

Empress appy يقول...

مش عيب بزمتك مش عيب
نبقى بنحب المكرونه قد بعض وتيجى تقولى ليه زعلانه
طبق يا رب اعدم كل المكرونات اللى فىالدنيا ماعارفه انتى زعلانه ليه
لو علشان مش بسال فغصب عنى والله انا كمان مدهوله فى الشغل

HAPPY يقول...

اسمك؟

طيب ما انتى عارفه بتسألى ليه؟

طب واللى مش عارف يعمل ايه بقى؟؟

انا مش عارفه ليه عمرى ما لقيتك اون لاين؟؟ انا بصراحه مبكونش موجوده كتير بس لما بكون موجوده انتى مش بتكونى موجوده... انا نفسى اتكلم معاكى ..

حماده زيدان يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

ELMASRYA - MRS WRITER يقول...

والله انتي عسوله خالص

وإجابتك تدل فعلا إنك من برج الجوزاء

يا جميل انت يا للي جوزاء زيي

فعلا إحنا فينا كل المتناقضات وعاملين زي البحر

بس لعلمك نبقى مسليين جدا لأننا متغيرين دائما مابين الهيبرة والتعقل

سعيدة إنك افتكرتيني ومررتيلي البوست وهحاول أرد على الأسئلة دي بإذن الله

أحبك في الله

لجين أبو الدهب يقول...

مبروك على مرور التاج ..

بس ايزة اقول لحضرتك حاجة صغنونة ..

ان الرد على الكام السؤال الاولانين اكترهم ما انتى عارفة ..

بس التاج هدفها مش هى تعرف .. اننا احنا اللى نعرف .. هههههه D:

سعيدة بإجاباتك اللى عرفتنا عليكى اكتر ..

دمتِ بخير ..

Unknown يقول...

وأنا كمان جوزاء

شكله كل الجوزاء شبه بعضه
خصوصا في نقطة ال5000 شخصيه :)

77Math. يقول...

طيب معلش بما إننا دولة ديمقراطية، أنا حرد على بعض الأسئلة بس مش كلها، عشان خاطرك بس.

mohamed ghalia يقول...

جميلة إجاباتك
ربنا يكرمك ويسعدك

mahasen saber يقول...

طب انتى اكتفيتى ان سولو الوحيده اليى عارفه اسمك وسنك ومهنتك هههههههههه

ماشى على العموم تليفون صغير وتقر سولو بكل حاجه وتعترف عليكى فورا


ربنا يباركلك فى بناتك يا ام البنات

وعلى فكره شكلنا هنشكر سولو لانها خلتك تنزلى بوست جديد بالتاج ده بعد ما خراشوف كان هيعلمنى روسى وينسينى العربى

منوره البلوجر والدنيا كلها يا ام الملايكه القمرات

توفى يقول...

طب انا معرفش اسمك لغايه دلوقتى برضه
اعمل ايه دلوقتى اتصرفى و ابعتيه
موضوع الجوزاء يظهر فعلا حقيقى عشان انا ساعات باحس ان عندى انفصام فى الشخصيه من التناقضات اللى مالياها
بس اجاباتك سكره زيك و شقيه
سلامى للقطتين اللى عندكو و ليكى انتى كمان فوق البيعه

من غير عنـــوان يقول...

أجابات جميله شقيه
ربنا يسعدك إنت وأسرتك

وشكرا على الإهداء

بس أنا جاوبت عليه المره اللي فاتت

فأعذريني يا أم البنات

ولك تحياتي

momken يقول...

تاج جميل اوى
ماشاء الله

اجاباتك كلها دمها خفيف وجميله

تسلم ايدك


تحياتى

momken يقول...

تاج جميل اوى
ماشاء الله

اجاباتك كلها دمها خفيف وجميله

تسلم ايدك


تحياتى

عاشقه وغلبانه يقول...

جوزاء زي
شخصيتين
كتير ضدد بعض

زقطـوطـة يقول...

:)))))))
عجبني عنوان البوست قوووووووووي
بجد جامد : )
عجبتني إجاباتك
بصي أنا حبيتك لله والله
إذ ربما عشان سيرة الجواز و سنينه : D
تحياتي
و ربنا يا رب يبارك في البنات يااارب : )

Darsh Basha يقول...

اه ....عرفت كل حاجة
مع انك بتخلعى فى بعض الاسئلة
ب اجابات حلوة وزى العسل

تحياتى

dr.lecter يقول...

نفسي اعرف ايه سر حبكم للمكرونه

مش شايف انها مبهر اووي ياعالم

ياما بقي انا كل اللي اعرفهم مابييعرفوش سر خلطتها علشان كده باتطلع ملهاش طعم

Empress appy يقول...

يا خراشى يا لهوى يا حوستى يا نيله عليه
والله كنت كاتبه تعليق فى البوست اللى انتى بتتكلمى عنه ده
يا لهوى يكونش نشرته عند حد تانى بالغلط ياااااااختى
اعمل ايه بقى اعمل اعلان اقول تعليق ضايع يا ولاد الحلال
والله العظيم
اصل بصى انا بفتح تلات ابرع مدونات مع بعض واقعد اتسلى تلاقينى رزعته عند حد تانى
سماح والنبى يا ام البنوتات ربنا يخليهم لكى
ومتخافيش على اختك خالص

rovy يقول...

السلام عليكم اختى الحبيبه ام البنات ..

مبروك على التاج و طبعا مبروك لينا
اننا نعرفك اكثر و نعرف انتى اد ايه حد حلو و جميل كده ..
ربنا يبارك لك فى بنوتاتك و زوجك و كل حياتك يارب ..

طبعا شكرا حبيبتى انك افتكرتينى
شرحت لك فى الرد على تعليقك عندى ليه ما وصلنيش حاجه ..
ان شاء الله نتكلم قريب

دمتى غاليتى بكل الود

ارق تحياتى

صيدلانيه طالعه نازله يقول...

على فكره يا ديدى انا علا اللى كنت كاتبهتعليق عندك من كام يوم لاحسن تمكونى معرفتنيش و لا حاجه

Beram ElMasry يقول...

الجواز و سنينه
العزيزة الغالية كفاية وجع قلب ازاي والهم مستمر والظلم مستمر والعته مستمر في اصرار وبلاده يربنا يصرف عنا الهم جميعا وتروق وتحلا
ولك تحباتي والسلام ولا سلام مع اليهود

بسمه عبدالباسط يقول...

دمك خفيف جدااااااااااااااااااااااا على فكرة

الجواز و سنينه يقول...

MaNoOoSh
انتى هاتقوليلى على الهيبره
الجوزاء دول دماغ يا بنتى
احنا اللى بدعنا الهيبره
فكرتينى بالشقاوه و الاختين الحلوين
تفتكرتى واخدين الشقاوه من مين؟
هههههههههههه
و من ناحيه النسيان فحدث و لا حرج
هو انا فاكره اكلت ايه امبارح؟ و لا حتى من شويه
و الله انتى طيبه يا منوش

الجواز و سنينه يقول...

Soul.o0o.Whisper

دمتى بكل ود و مبروك عليكى تانى تعليق يا حبى
و بعدين اجاباتك انتى اللى كانت زى السكر زيك
اسعدنى اوى انك قلتى انى فيه منك
بجد سعيده جدا ان حد عسل زيه فيه منى
ربنا يكرمك يارب يا سول و يديكى كل حاجه حلوه

الجواز و سنينه يقول...

Appy

ابى حبيبتى الغاليه
عيب طبعا يا حميل نكون بنحب المكرونه زى بعض و مش نكلم بعض لغايه دلوقت
هاديكى الميل بتاعى و لازم و حتما و لابد انك تضيفينى
ساعتها هاعزمك على طبق مكرونه حلو زيك

قيس بن الملووووح يقول...

انا خارج الابراج

موفقه
تحياتي

brokencup يقول...

والله كلام كبير يصعب على امثالي فهمه
والتاج ولا في أحلى منه
بس اسئلة امن الدولة اشتاتا اشتوت اسئلتها اخف شويه ( طبعا علشان الرقابة )

brokencup يقول...

وانا كمان عايزة من التاج ده
المفروض انى اجدد واحدة فيكم فتعاملوني معاملة خاصة جدا
انا عايزة من التاج ده يا حزمبل

Ehab يقول...

هههههههههههههههههههههههههههههه

العنوان تحفه اولا

ثانيا حلوه اجاباتك قوي كلها نصب بصراحه
لا مؤاخذه يعني كل سؤال ما انتي عارفه
كل سؤال ما هو مكتوب
هم قالولك احنا هنعمل فريق بحث عنك يا بنتي
لا لا لا احسن تزعلي من الهزار
عموما المدونه كلها جميله
بس لسه هتفرج بقى كده واتمختر فيها براحتي

سلااااااااااااااااااااام

barbie girl يقول...

نفس نظرية الشغل عندى.ز دى فهمتك فيها اوى

لاسع افندى يقول...

انا كمان جوزاء وده اللى هيجننى بجد مش عارف انا مين فى الاتنين اللى جوايا

بس برضه ده احيانا بيكون شيىء رائع




تقبلوا تحياتى ومرورى

ســـهــــر يقول...

يا سلام يا سلام جوزاء ؟
انا كمان جوزاء ولعلمك البرج دة صعب جدا الواحد يعرف هوبيفكر فى اية ولا بعد دقيقة مودة هيبقا اية صح الكلام ؟

تأثير الفراشة يقول...
أزال المؤلف هذا التعليق.
تأثير الفراشة يقول...

السلام عليكم و رحمة الله و بركاته

أول لزيارة هنا،عجبتنى جدا إجابات التاج و فرصة حلوة إنى أول مرة أدخل فيها فاتعرف على شخصيتك اللى واضح من الإجابات إنها مرحة و عاقلة فى نفس الوقت :)

ربنا يبارك لك فى بيتك و أطفالك

تحياتى ليكى و دمت بكل خير

rovy يقول...

ايه الحكايه انتى فين ؟
يارب تكونى بكل خير
وحشاانى و لسه مستنيه رقم الموبايل اللى ما وصلنيش و الله

طمنينى عليكى يا قمر

ارق تحياتى

mahasen saber يقول...

واحشتينى والله وليكى حق انا بقيت كسليه بس غصب عنى وبالاكراه

بس ان شاء الله من بداية 6 اكيد هرجع لقواعدى سالمه

بس بجد مش قادره اشككرك ازاى ولاا عارفه بجد اوفيكى حقك من الشكر على اهتمامك وسؤالك عليا

ربنا يباركلك فى ملايكتك
وميحرمنيش من سؤالك الغالى ابدا عنى