الأحد، 9 نوفمبر 2008

انت ليه مش بتمسك ايدى



اولا احب اشكر محاسن كتر خيرها علشان هيه اللى دايما بتنبهنى انى اتأخرت فى الكتابه بس غصب يارب و بقولك اهه يا ستى علشان خاطرك البوست ده

و ثانيه اللى ما ردتش عليهم ان شاء الله هارد عليهم بس افضى و الله من العيال و البيت و سنيه

ـــــــــــــــــــــــــــــــــــــــ

نخش فى الموضوع

مره قريت موضوع كوميدى عن واحده كانت بتحب واحد و بتقوله انت ليه مش بتمسك ايدى

قالها لما نتجوز كده عيب... و بعد كده قالها ما احنا لينا بيت الناس تقول علينا ايه... و بعد كده انا هامسك ايدك و لا ايد العيال... و بعد كده حنا كبيرنا على الحاجات دى انتى عايزه جوز بنتك يقول علينا اتجننا


و كان ليه واحده صحبتى خالها كان خاطب و خطيبته( ايام زمان بقى علشان الحاجات دى اندثرت) ماكانتش عايزاه يمسك ايدها فكان بيشتكى و يقول طيب هو انا لو ما مسكتهاش دلوقت هامسكها بعد الجواز ليه؟؟؟

منطق برضوا طبعا ههههههههههه



بس لقيت بعد تفكير و تمحيص الفرق بين الزوجه و الحبيبه

و طلع اهم حاجه ايه تخيلواااااااااااا

طلع ان احساس الوحد انه ممكن يسيب الحبيبه بيديه الحريه فا يتمسك بيها لان مافيش حاجه تجبره غير رغبته انه يكون جنبها

لكن الزوج قبل ما يفكر يسيب لازم يفكر فى النفقه و الشقه الحضانه إلـــــخ يعنى متمسك بس غصب عنه

و بجد يفرق كتير اوى انك تحس انك لوحدك قيمه او ان الاثاث هو القيمه

طبعا مش كله كده بس اهى نظريه برضوا

يلا بقى علشا اروح اصلى و انام

دمتم ساااااااااااااااالمين

هناك 60 تعليقًا:

mostafa rayan يقول...

القصة دي في مدونة رحاب بسام
( حواديت ) وفي كتابها ( ارزبالبن لشخصين )
بصي الراجل اللي يتحمل ست مش طايقها لمجرد الفلوس يبقي غلطان والست اللي تقبل تعيش مع راجل مش طايقاه ومتأكدة انه مش طايق يبص في وشها وساكت علشان الفلوس تبقي غلطانة بردو
العمر اغلى حاجة وساعدتنا نشتريها ولو بأخر قرش نملكه
تحياتي ليكي

Yasser Hussein يقول...

اول زيارة
مع احترامي الشديد لرأيك
الا اني اختلف معاكي في نقطة
انا كرجل مفيش شيء يجبرني اني اعيش مع واحدة مش باحبها عشان نفقة ولا عفش ولا غيره، الرجل مننا ممكن يترك كل ده في ثانية لو شعر إن حياته مع الست اللي متجوزها اصبحت لا تحتمل
لكن اتفق معاكي في نقطة ان قبل الزواج بيكون لها طعم مختلف لأن ما ملكته اليد زهدته النفس
خالص تحياتي

رئيس جمهوريه نفسى يقول...

هي النظرية مش كدة مسك الايد وسيلة لنقل الاحساس بالحب الحبيب بيمسك ايد حبيبتة علشان يحسسها بحبة وانها قريبة جنبة خاصة وانى فترة قبل الجواز بتكون لسة مشاكل الحياة مطحنتش الحب انما بعد الجواز خلاص بقيت معاة وضغوط الحياة بتقتل الحب او فرص التعبير عن الحب فمش بيحاول يمسك الايد اصلا

romansy يقول...

الموضوع مش موضوع انه يمسك ايديها بس كده وخلاص
اوقات البنت لما تحب بتحب ح الامتلاك وتحب ان خطيبها يكون ليها بس
مش لاى حد فى الدنيا
ونفسها يمسك ايديها علشان بس يحتويها ويخاف عليها ويحسوا بنبض بعض واحساس بعض
دا لو بيحبها بجد
اما بعد الزواج دا شئ مختلف تماما المفروض تكون الاعلاقه حميمه بينهم
امال هما اتزوجوا علشان يطلقوا ولا ايه

Empress appy يقول...

اصبتى بجد الصح
ودى فعلا مظبوط الراجل بيتمسك بالحاجه اللى مش بتأيده

Unknown يقول...

لأ اكيد السبب الاول انها مراته حبيبته طبعا

اصل انا لسه بحلم بالأزواج الرومانسين
(:

HAPPY يقول...

الراجل بعد الجواز بيسيب دور الرومانسى بقى لان المسؤليات بتبقى كتيرة عليه جدا من جهه ومن ناحية تانية فى ستات كتير بعد الجواز مش بتهتم بجوزها ذى الاول يعنى كانت عايزة تتجوز مثلا وخلاص اتجوزت فهو بيلاقى ان الاهتمام بيه قل فكل ده بيخلى الراجل واقعى اكتر..

Meme يقول...

بسم الله

انا كمان بيتهيألي ان السبب هو فقدان الرومانسيه و الملل... قبل الجواز بيكون الوضع كله رومانسيه برومانسيه وبعد الجواز خلاص ماهو الحاجه اللي كان شايفها بعيده بقت قريبه وطول اليوم قدامه و لان المسؤليات بتزيد فأكيد حتضيع معاها الرومانسيات
اذا كان جت على مسك الايد بس فاحنا بخير!
على فكره مشاء الله اسلوب حلو و مدونه تجنن بس انتي كتري البوستات شويه وماتبقيش كسلانه زيي
اول زياره بس انشاء الله مش حتكون الاخيره
في امان الله

عايش علي الهامش يقول...

لا بالعكس الزوج بيمسك ايد زوجته كثير بعد الجواز مره يمسكها ويقول نفسي اقطع الايد دي هي الي خاربه بيتي
ومره يمسكها ويقول انت بعت الشبكه يا وليه
ومره يمسكها ويقول يا بنت المحظوظه شكلي هموت انا الاول وانت هتعمري صحه

الراجل بيحب الست قبل الجواز وبعد الجواز بس باختلاف الاسلوب قبل الجواز الزوجه بتكون منطلقه وهو منطلق مفيش مسؤليات الحلم كله بيدور في فلك شقه وامتي نتجوز وحعزمك والكلام العبيط ده
بعد الجواز الوضع بيختلف لحظه من التامل بدا يفكر انه داخل منعطف خطير وانه محتاج وعاوز وهي عاوز ومحتاجه والاولاد والدنيا وهي بصراحه مش كلهم بس كثير منهم خلاص مصدق مسك العريس وضمنه تبدا بقي تهتم اكثر بالبيت والدنيا مراعاة منها لوظيفتها الي هي معتبراها الاساسيه وده بالطبع مش عيب فيها هو عيب في المجتمع الي علمها من الاول ان البيت هو الواجب المقدس ولو البيت حلو الراجل هيكون مبسوط وربوا الراجل انه يقيس البنت بمدي خدمتها لبيتها
بس خدوها مني حكمه الزوجه التي تصنع من المنزل جنه كالمحل الذي يربي قط حتي يكبر ثم يبيعه لشخص اخر الراجل هياكل ويكبر ويربب ويرتاح وينجح وهوب يخلع
الا بقي لو هي امراه مختلفه
احيانا بيقولو عني ليهاراء غريبه ماعلينا

شكرا لك

blue-wave يقول...

ههههههههههههههههههههههههههه
والله فكرة برضه:))
تحياتى

حاسوباتيه يقول...

iههههههههههههههههههه الجواز وسنينه لاكده عاجب ولا كده عاجب

من غير عنـــوان يقول...

الموضوع مهم وحساس
لو قريتي الرجال من المريخ والنساء من الزهرة... حتعرفي إن دي وجهات نظر...
يمكن ان الراجل شايف ان ال
support
بيكون في فتره الخظوبة مسك ايد وكلام حلو...
وبيشوف بعد الجواز إنه نفقه ومسئولية...

جايز الرجاله غلطانين في ده بس هي دي طريقة تفكيرهم... زي ما الستات شايفين انه مسك الإيد أهم من الإنفاق مثلا...

الإعتدال حلو
بس تقول لمين

ثقافة قبول الآخر ماتعلمنهاش

يارب كل الرجاله تمسك ايدين كل الستات ونرتاح

أمنياتي

كـــيــــــــارا يقول...

ههههههههههههههههههههههه

موتيني من الضحك

بس حياه مستحيله لما يكون في حد عايش معاكي عشان عفش ونفقه وخلافه

مش عايش معاكي لانه بيحبك وعاوزاك معاه

دكتور بهــدوء يقول...

alsalamo 3alaykom
ezzayek
bgd wa7ashtoony
sorrrrryyyyyy 3ala elenketa3 el taweeel rage3 orayb be2zn allah
belnesba llbost
howa mntek el sara7a
bgd dmk zy el 3asal
we tesba7y 3ala 5eeeeer

سهر الليالي يقول...

اجمل حاجه بين اتنين بيحبوا بعض هي المشاعر والاحاسيس الرقيقه دي واللي بتبين قد ايه كل واحد فيهم بيحب وجوده جمب التاني ويكون متمسك بيه وبحبه
بس انتي كدا من كلامك بتقولي ان الجواز بيلغي دا
لان التمسك هنا بيبقي قائم علي الماده بس
متمسك بيها او متمسه بيه عشان الشقه والعفش والنفقه يعني الحب ضاع في الرجلين
وبقي العلاقه بعد الجواز امر واقع عشان شكليات ماديه فقط

ايه دا هو الجواز بيبقي كدا بجد
ربنا يطمنك

Gannah يقول...

هههههههههه
بجد صح
دا حال معظم الرجالة
لكن اكيد برضه الزوجة ليها دور لانها نفس الانسانة اللى كان بيحبها فى الخطوبة وكانت رومانسية
فجأة ام العيال اللى مش وراها غير البيت والطبيخ
ولا ايه؟؟
تحياتى

Nasimlibya `√ يقول...

ههههههه في من فترة قريت بوست علي نفس القصة ليه مش بتمسك ايديا
واستمرت معاها القصة حتي اصبح عندهم احفاد والمسكينة تردد نفس السؤال
بس زوجها في كل متسئله يتختلف الجواب
وهي مسكينة تزيد وتعيد ليه وليه وليه
الارتباط صعب والاصعب استمرار العواطف بنفس الوتيني لو كانت حبيبته لكان هو المبادر بسؤاله
غريب هذا المنطق
اسعدني مروي بمدونتم من خلال مدونة الرقيقة ميمي
دمتي بخير

شفـقــة و إحســــان يقول...

يا بنتى هو بقى فيه حد دلوقتى بيمسك ايد حد الا اذا كان بيعديه الشارع
الزمن ده يا ماما ولى واندثر وفااااااااااااااات
وعلى راى سناء يؤنس "قال ايه بيعادينى"
لو لقيتى حد ماسك ايد مراته دلوقتى ابقى بلغنى بالبريد المستعجل علشان اطبق فى زمارة رقبة احسان

حواء يقول...

السلام عليكم
تقريبا انا جوزي من ساعت متجوزنا ممسكش ايدي إلا بالطلب
ونادرا لما يعملها لوحده
وعايزه الحق حتي لو عملها مش بحس بيها اوي علشان الجونتي هههههههههههههههههههههههه

عبدالله يقول...

فكره جميله و تحليل ممكن يكون فيه اجزاء من الصح نفس نظام ليه مش بتخرج مراتك و كنت بتخرجها كتير ايام الخطوبه يكون الرد حد شاف صياد بياكل السمكه بعد ما يصطادها :)

الحياة مش كلها رومانسيه و مش كل الرجاله زي بعض بس كله الا مسك الايدين لو مش مسكتها هتوه منك و ضاع عليك المهر و الشبكه :)))

تحياتي

Beram ElMasry يقول...

العزيزة ، الجواز و سنينه
يا الله يا الف اهلا والف سهلا وعود حميد
وانا اشكر السيدة محاسن وان كنت تحتاجين الى تنبيه فساسخط نفسى منبها لك كى نسعد بفنك الرشيق (منبه مش قرد ) ،
واللى عايزه تتمسك ايدها تمسك لسانها وهوه يمسك ايديها الاثنين ولا يهمه شارع ولا امة لا اله الا الله
زيارة الاهل صدقة وزيارة الاصدقاء صدقات
على فكرة الرد علية سريع لانى عجوز ومحبش الطوابير

momken يقول...

حلو البوست ده ودمه خفيف
وطريقه سردك وتحليلك حلوة اوى

دمتى بخير

تحياتى

mohamed ghalia يقول...

لذيذ قوى البوست وبصراحة مش عارف برده السبب
على العموم ليكى تاج عندى
تحياتى

حاجــ عيال ــات يقول...

مهما كانت الاختلافات في وجهات النظر
فأنا استمتعت جدا بالبوست وبالمدونة ككل

مـجـنـووون يقول...

والله بعتقد المشكله ان في أيام الخطوبة بيبقي في رهبة وخوف وبالذات من البنت

وطبعا علي رائي المثل ( المحظور مرغوب )

أما بعد الزواج فبتبقي الأيد معاه في البيت علي طول وطبعا البني أدم مش بيحس بالحاجه مدام معاه علي طول

ونصيحة لكل شاب وكل شابه متخليش حد يمسك أيدك علشان يبقي متشوق أنه يمسكها بعد الزواج هههههههههههه


تقبلي تخاريفي
مجنووون

Tamer Alhosiny يقول...

هو كلامك للاسف فيه شيء كبير من الصحة
فعلا
في اختلاف بين الحبيبة والزوجة
بس مش بس العفش الاي كل الناس لسة عايشة علشانه
في حجات كتير
بس انا شايف ان في حل برضه
ليه الرجل والست مش ينسوا بعد الجواز انهم اصلا حبيبين
ليه مش يتاعملو سوا علي الساس ده
انا عارف ان كلامي غريب
بس ممكن علي فكرة
ممكن الست تفضل تعامل الرجل علي انه حبيبها وهو يعاملها علي انها حبيبته
وبكدة
اكيد حياتهم هتختلف
مفيش حد بيتجوز عايز يطلق
وده الطبيعي

تحياتي
انسان عاشق حر

mahasen saber يقول...

اتاخرت انا ...انا اليى بقولكنولى بوست جديد اتاخرت عليكى فى الزياره
بس عارفه انك حبيبتى وكريمهومقدرهظروفى

نتكلم فى مسكان الايد بئه يا قمر
هو من الحاجات البسيطه اليى بتحسس الواحده انها فعلا متججوزه زوج حنين ورومانسى والكلام الحلو ده كله بس ااقولك بأمانه وعن تجربه يغيور فى داهيه مسكان الايد فى الشارع وفى النادى وعلى البحر قصاد انك مش حاسه بالامان وانه لما يتقفل عليكوا بابا واحد الامور بتبقى غير اليى فى الشارع خالص
وعارفه ليه لان فيه ازواج بيعملوا كده منظر قدام الناس بس
عشان يتقال قد ايه هو هايل ورائع وتحفه وما كان فى البيت انيل

بس موضوعالشقه والعفش وانهم دول الرادع لاى زوج اعتقد اه شويه ولاا فى الغالب لان كل واحد بيعتمد دلوقتى اعتماد كلى على بطء الاجراءات القانونيه وروتين المحاكم فبيقولك لما يبنلهاصاحب

وبس كده كفايه

mahasen saber يقول...

اه حاجه كده على الهامش بس ملهاش علاقه بالموضوع

خلى بالك على اولادك لان الرمد الصديدى منتشر ومعدى كمان لان ابنى اخده من الحضانه والدكتور قالى المعلومه دى انه معدى

ربنا يباركلك فيهم ويحفظهملك

سلام يا قمر

اقصوصه يقول...

ع فكره موضوع التدوينه جدا جميل

وصلني من فتره ايميل بهالعنوان

ويحمل نفس المحتوى تقريبا

وهي بنيه تطلب من خطيبها يمسك ايدها

يقولها عيب لو الناس شافونا شو يقولون

انتظري لين ما نعقد قراننا

وبعد عقد القران تقوله ليش ما تسمك ايدي

ييقولها عيب لو اخوج او ابوج شافونا شو بيقولون..انتظري بعد العرس

بعد العرس نفس السؤال..يقولها عيب امسك ايدج بره ليش ما عنا بيت

ع هالحال لين يشيبون

وتقوله نفس الشي

يقولها خلاص احنا شيبنا عيب هالكلام

ههههههههههههههههههه

الجواز و سنينه يقول...

mostafa rayan
انا ما اعرفش مين مألف القصه دى انا قريتها فى منتدى
و بعدين انا ما جبتش سيره طلاق
انا بس بقول ان الواحد سهل يسيب حبيبته
و هو مش خسران حاجه و لو رجع بيكون علشان بيحبها و مش قادر على بعدها
لكن مراته مايقدرش يسيبها بنفس السهوله اللى ممكن يسيب بيها الحبيبه
لان هناك ما يربطه منها ما هو مادى و منها ما هو غير مادى مثل الاولاد

الجواز و سنينه يقول...

ياسر حسين
اولا نورت المدونه باول زياره
و على فكره انا هدفى مش ان الناس تضغط على نفسها و تستحمل علشان الفلوس
انا هدفى ان الحريه الموجوده فى غير الجواز بتدى الناس احساس انها متمسكه علشان الحب ليس إلا
و لكن هناك اعتبارات فى الجواز اخرى تجعل الطرفين متمسكين حتى و لو بالاولاد و مستقبله و ليس ببعضهم البعض
انا بكتب ليه بلغه عربيه
مش عارفه بس الكلام طلع كده
تحياتى

الجواز و سنينه يقول...

رئيس جمهوريه نفسى
سياده الرئيس
كالعاده منورنى يا باشا
و لا الرئيس بيقولوا ايه؟؟؟؟
يا ريـــــــس
انت قلت الجمله الصح
"انما بعد الجواز خلاص بقيت معاة "
هيه دى مربط الفرس او الحمار علشان بيغنوله دلوقت

الجواز و سنينه يقول...

romansy
و ربنا انت عثل يابنى
بس انا عايزه اقولك ان احتياج المرأه للاحتواء بيكون سواء قبل الجواز او بعده
يعنى يرضيك البنت تقعد طول عمرها نفسها يتمسلك اديها اوووووم لما ربنا يرزقها بالحلال هههههههه يمسك ايدها يادوب شهرين و مش كلهم كمان و بعد كده خلاص
ده ظلم يا ناس

الجواز و سنينه يقول...

~*§¦§ Appy §¦§*~
مش عايزه اقولك انك جيتيلى طوق نجاه
مين نجاه دى؟؟؟
كل الشوباب نازلين هجووووم ما صدقوا بس نون النسوه تحس ببعض برضوا

الجواز و سنينه يقول...

esraa
اسراء حبيبتى خايفه اقولك انه هايفضل حلم
ههههههههههه
ربنا يديكى اللى بتحلمى بيه
بس ماترجعيش توقولى ماحدش نبهنى

الجواز و سنينه يقول...

HAPPY
مش بنكر المسؤليات اللى على الطرفين
هو و شكغله و المصاريف
و هيه و العيال و البيت
بس امتى هايستمتعوا ببعض لما يعجزوا و شبابهم يضيع
و ساعتها هايمسك ايها علشان يعديها الشارع و همه بيتعكزوا على بعض؟

الجواز و سنينه يقول...

Meme
اسعدتينى جداااااااا بزيارتك الجميله
ـــــــــــــــــــ
"وبعد الجواز خلاص ماهو الحاجه اللي كان شايفها بعيده بقت قريبه وطول اليوم قدامه "
ــــــــــــــــــ
يعنى نعمل ايه نتجوزو كل واحد يقعد عند باباه

الجواز و سنينه يقول...

عايش علي الهامش
و ربنــــــــــا هلكتنى من الضحك
و بعد كده كلامك الجد كان اكتر من رائع
بجد شخصيه متزنه جدااااا
ـــــــــــــــــ
"بس خدوها مني حكمه الزوجه التي تصنع من المنزل جنه كالمحل الذي يربي قط حتي يكبر ثم يبيعه لشخص اخر الراجل هياكل ويكبر ويربب ويرتاح وينجح وهوب يخلع
الا بقي لو هي امراه مختلفه "
ــــــــــــــــــــــــ
حكمه جميله جدا جدا جدا
و انا مش شايفه اى اراء غريبه بالعكس انت ماشاء الله عليك

الجواز و سنينه يقول...

blue-wave
نورتنى كالعاده
و شكرا على تعليق و كويس ان الفكره عجبتك

الجواز و سنينه يقول...

حاسوباتيه
انتى فعلا بتحسبيها
ههههههههههههه
نورتينى يا عسل

الجواز و سنينه يقول...

هـــــــــــــا روح انام و اكمل باقى التعليقات يوم اخر ان شاء الله

عــلاء ســالـــم يقول...

السلام عليكم



للأسف فيه نماذج سيئه فعلاً زي اللي إتكلمتي عنها لكن لا أظن إن اللي بالشكل دا ممكن يتقال عليه راجل
أكيد جينات الرجوله مش كامله عنده
بس للأسف في الزمان دا الشخصيات اللي من النوع دا أصبحت في إزدياد

خالص تحياتي

صاحب المضيفة يقول...

تصدقي برضو نظرية

:):)):):


كل الود

rovy يقول...

ااسلام عليكم

اولا باعتذر عن تأخيرى عليكى و الله غصب عنى مريم ابنت اصغيره كانت مريضه وكنت لا ادخل الى النت الفتره اللى فاتت .ز

البوست كعادتك جميل و سؤالك واقعى جدا .. لان الرومانسيه وزمانها عدت و لوفيه ناس بتحاول باحس انها بتمثل
لكن ده ما يمنعش ان فيه لسه ولونسبه بسيطه تعشق الرومانسيه .

دمتى بخير

تحياتى

د.توكل مسعود يقول...

"قد تكون المساوة ... عار"

مهداة إليك في بلاوطن

may يقول...

ههههههههههههههه
حلو البوست على الاخر
وعجبنى حتى لو كانت الزيارة متاخره....

وعلى حكاية النظريات زادت فى جمالية الموضوع

تقبلى مرورى

Beram ElMasry يقول...

اختى . الجواز و سنينه
السلام عليكم ورحمة الله وبركاته
اجمل التهانى بمناسبة عيد الاضحى المبارك اعاده الله عليكم وجميع الاهل بالخير والبركة ، وجعلنا واياكم من الملبين فى العام القادم
والسلام عليكم ورحمة الله

Esraa Hamed يقول...

القصة لرحاب بسام
و عجبتني اوي فعلا
و زي ما قال مصطفي ريان مينفعش الفلوس هي اللي تفرض علي الانسان يعيش مع مين و ميعيش مع مين

اتأخرتي علينا كتييييييير
مستنية بوست جديد
كل سنة و انتي طيبة يا قمر

حلوة الدنيا يقول...

كل عام وأنت والأسرة والأمة الأسلامية بخير

mahasen saber يقول...

كل عيد وانتى بالف خير
واسرتك وكل من تحبين
بكل صحه وستر

غير معرف يقول...

كل عيد وأنت وكل من تعزين بخير وفي أحسن صحة وأسعد بال.

م/ الحسيني لزومي يقول...

تقبل الله منا ومنكم
وكل عام وانتم بخير

عاشقه وغلبانه يقول...

هو بيمسك ايدي علشان الاسم مسكها ولا ايه
هههههههههههههههههههههه
الموضوع اكبر من كده بكتير
احساس وقرب وحمايه واحساسي اني جزء منه
قبل الجواز بقي ولا بعد الجواز ماتفرقش طالما في حدود الشرع والدين
ولو هايمسك ايدي لمجرد انه يعديني الشارع يبقي مش عايزه
لو مش هاحس بيه وبحبه ليا من لمسه ايديه يبقي بلاها خالص
تحياتي ياجميل

انسانةعادية فى عالم مش عادى يقول...

ههههههههه ياساتر ليه كده بئا اعمل ايه انا انا عايزة اتجوز علشان يمسك ايدى الظاهر الموضوع ده مش هيتحقق ولا ايه :(
لا هى اكيد الفكرة على مبدأالتعود هوا اعتاد مراته هتروح فين مهى دايما جنبه بس خطيبته يمكن نسفه يكون جنبها على طول ومش يسيبها لحظة
بس دى بردو فكرة غريبة المفروض كل راجل يعتبر مراته حبيبته
وال يمسك ايدى ال قبل الجواز دانا افضحه ههههههههه
مرسيى للمرورك جدا على المدونة
ومدونتك لذيذة جدا

rovy يقول...

عييييييد سعييييييييد
كل سنه وانتى طيبه

كل عام وانتى الى الله اقرب و على طاعته اقدر

Beram ElMasry يقول...

ابنتى العزيزة . الجواز و سنينه
ابنتى لانك اصغر من ابنتى سنا
مادام القادة اتباع ويسيرون فى الركب بادب فسيبقى منتظر الزيدى مجرد ظاهرة صحية
شكرا وخالص تحياتى

أكون أو لا أكون يقول...

مدونه جميله... وبوست جميل جدا... بس مش عارفه اقول ايه... الموضوع ده من المحظورات عندنه... ههههههههههههههههههههههههههههههه... اه والله بجد... على العموم لما اتجوز "يمكن" اقول رآيي فيه "يمكن" لأ... إذا طلع واحد معقد اكيد حيعقدني معاه... هههههه 

حزينه يقول...

تعرفى ان الموضوع دة دايما شاغلنى
كنت بشوف اختى وخاطيبها يام ما كان خطيبها دلوقتى بقى جوزها بيمسك ايديها كتير لكن بعد الجواز ابدا ولا بيمسك ايديها ولا حاجه
مش عارفه
ومش هما وبس لا كل المطوبين وبعدين يتجوزا مش عارفه باين بيحصل حاجه بعد الجواز احنا مش عارفينها



حزينه

من غير عنـــوان يقول...

القصة مشهورة..
والفرق بين الراجل والست في الخته دي موجود..
كمان الست المصرية عايزاه دايما هو اللي يبتدي..
صدقيني.. لو مسكت إيده
( بإحساس).. حيفرح.. وماتطلبس إنه يمسك إيدها..
جتلاقيه لوحده بيمسكها..

مشكله كبيره إن الحاجات دي تتطلب...
الفعل هو اللي بيخلي اللي قدامك يرد الفعل..

طب ما يبتدي هو؟؟
مش حايبتدي..
لأنه من المريخ وهي من الزهره

لو عايزاه يتكلم لغتها... تعلمه الأبجديات

أمنياتي

غير معرف يقول...

lol,so nice