الأربعاء، 18 يونيو 2008

قله ادب مشروعه



بعد غيااااب طويل بسبب الاطفال اللى همه احباب الله
خطرت ليه حته دين فكره غريبه شويه
و الفكره جاتلى و انا قاعده ادام التليفزيون و ده مش بيحصل كتير مؤخرا بسبب المشاغل
كان شغال فيلم عربى
و بعدين البطل مسك البطله و هااااااااااتك يا بوس
مش عارفه ليه تخيلت الاخ المحترم زوج البطله و احساسه ايه و هو بيشوف مراته فى الوضع ده
و ازاى قادر يقنع نفسه ان ده تمثيل و آل ايه فن كمان و ليه هدف
طيب ايه الهدف ان مراته يا حرام تتباس ادام عينه و هو عامل مغمض
كمان ايه احساس الابن او البنت اللى بتشوف امها فى المنظر ده
خلاص بلاش البوس طيب الاحضان و لا دى ماحدش يقدر يقول فيها حاجه
طيب لو زوج الفنانه جمعته الظروف بالبطل القدير اللى عمال هايص مع مراته
يحطوا عنيهم فى عنين بعض ازاى ياناس
حسيت انى آخر تخلف و انا بسأل الاسئله دى
بس فى الاخر قلت لو ده تفكير الصعايده و الفلاحين فالحمد لله على دى نعمه
و دمتم سالمين

هناك 29 تعليقًا:

دكتور بهــدوء يقول...

اول كوممنت
==========
نفس الاسئله دي سألتها وربنا
المهم ان في فيلم ما ياعيني متشاله طول الفيلم رجلها مالمستش الارض غير يجي مره ومره يادوب كانت هتلمسها
وطبعا جوزو رافع الارايل ومظبط الدش ع قناه المطنشين
=========
الرجاله ماتو ف تلاته وسبعين

بطوط حبوب يقول...

هههههههههههه
كان فى نظريه قليله الادب كان العيال بيقولها زمااااااااان ايام الثانوى

هى الى بتشرح الحكايه دى

بس مش هقدر اقول عليها
المهم اعرف ان فى رد
هههههههههههههههه

Mafrousa يقول...

هههههههههه
طيب كنتي بتتفرجي على الفيلم لوحدك؟؟؟؟؟
بلاش خلينا ساكتين
قلة ادب صحيح من الافلااام
ههههههههههههه

الجواز و سنينه يقول...

دكتور بهدوء
منور بأول كومنت يا دكتره
ضحكنى جدا ردك و الله
خصوصا حكايه الاريال بس
هيه ترددها ايه قناه المطنشين دى علشان نعرف بيزعوا فيها ايه؟

الجواز و سنينه يقول...

بطوط حبوب
هو ايام ثانوى كان ليهم فى الكلام ده
و كمان نظريات
عامتا كان نفسنا نعرف النظريه بس واضح انها متشفره

الجواز و سنينه يقول...

واحده مفروسه
هههههههههههه
ايوه يا ستى كنت لوحدى
لانى ببساطه مش انا اللى بحدد ميعاد الاذاعه
و بعدين يابنتى كنتى خليتى الطابق مستور
الستات ستات مافيش فايده
هههههههههههههه

Ghada , Rofayda يقول...

قال (ص)......
لا يدخل الجنة ديوث. قالوا: ومن الديوث يا رسول الله؟ قال: الذي لا يغار على محارمه

وصدق الشاعر:
ما كانت العذراءُ تُبدي سترها
لو كان في هذه الجموع رجال

الغيرة صفة كمال يتصف بها (( الرجال الأكارم )) ذوي الأخلاق
الرفيعة ....

اول مره ادخلك بس مش الاخير ان شاااااء الله.......

تحياااااتي...

دمت فاضله....

Unknown يقول...

تحيتي
الصراحة لم أقرأ البوست لأني الآن على عجل ولكنني سأعود حتما لأقرأه وأضع تعليقي
هذه المرة الأولى لي هنا وأحب أن أدعوك بدعوة مصحوبة بالفل والياسمين لزيارة مدونتي آملا أن لا أرد دون إجابة الدعوة ..
أنتظر زيارتك وتعليقك قريبا..أظنها ستروق لك
تحيتي
مدونتي هناhttp://kanyatklam.blogspot.com/

شـمو نشـادر يقول...

ديما الحوار ده بييجي فى دماغى ..

بس واضح فعلا ان الناس دى شموع تحترق من اجل الفن ..

يا عيني بييجي على اعصابه وهو بيشوف مراته بتتـ .. احم .. بتتباس و يضطر يعديها من اجل الفن و الابداع ..

العالم دى عايشه الدور اوى .. ربنا يهديهم و يهدينا ..

تحياتى ..

أسامة أمين

Darsh يقول...

مش عارف و الله الوقاحة دي هتوصلنا لايه

عادي يعني ... الرجالة الأجواز دول ينطبق عليهم كلمة خرنج اللي اتقالت لعادل أمام في شاهد ما شفش حاجة ... أكياس بطاطا ... يعني حتى ما حصلوش جوافه

ربنا يرحمنا من خالد يوسف و من هم على شاكلته .... آمين

هيودونا في داهية

في أمريكا كن فيه فيلم زمان ظهر فيه واحد بيبوس واحدة ... كانت أول قبلة في تاريخ السينما الأمريكية

يا نهار أبيض على اللي حصل ...

قضايا في المحاكم ضد صناع الفيلم ... و مجلس الشعب الأمريكي بتاعهم أدان و شجب و طالب بسحب الجنسية

و خرج الحزب الوطني بتاعهم و قال أن ده إساءه لسمعة أمريكا

و أدينا شفنا عندهم الموضوع أبتدى بقبلة يتيمة و أنتهى دلوقتي بإيه

حسبنا الله و نعم الوكيل

صيدلانيه طالعه نازله يقول...

ازيك يا جميل
انا بعتقد انهم فى المواضيع دى عادى عادى مفيش مشاكل خااااااااااالص
روحهم رياضيه يعنى
احنا بس اللى متزمتشين زياده عن اللزوم
المهم انتى وحشانى جدا و من زماااااااااااااان مزورتنيش

Dr. Ibrahim يقول...

مشروعة وإيه اللى شرعها إن شاء الله


هى دى الحرية اللى بيقولوا عليها

عليا العوض ومنه االعوض

د/هيما

شفـقــة و إحســــان يقول...

والله عندك حق الاسئلة دى بتمر فى دماغنا كلنا ...لكن اجابتها عندهم ان ده فن وان اللى بيتعمل ده داخل السياق الدرامى
يا سلام يا ختى انتى وهى ....بجد هما عارفين الصح والغلط والحلال والحرام بس بيحبوا يستعبطوا ويبرروا لنفسهم وفى الاخر نطلع احنا اللى متخلفين
تسلمى على اثارتك للموضوع بشكل موجز
شفقة

شفـقــة و إحســــان يقول...

ازيك انتى مختفية ليه؟؟
وحشتينا

Esraa Hamed يقول...

ههههههههههههه
ساعات بردو بفكر التفكير ده
معرفش ازااااااااي يعني نقول اصل ده تمثيل مش اكتر

ماااا علينا
الحمد لله اننا طلعنا فلاحين و بنفكر بالصعيدي
هههههههه

سارة يقول...

يا ستي سيبك منهم و نفضي و قولي ربنا يهديهم أنا معرفش بوليس الأداب بيلم اللي في الشقق و سايب دول ليه ده حته كده ظلم

الجواز و سنينه يقول...

Ghada & Rofayda
فعلا الغيره صفه الرجوله و ربنا يحفظنا من اللى مت فيهومش الصفه دى
نورتينى و تنورينى دايما
عجبنى اوى بيت الشعر اللى كتبتيه

الجواز و سنينه يقول...

كاتب مصرى
نورت يا فندم و ان شاء الله ازورك
بس الموضوع كان صغير مش عارفه ازاى ما كانش عندك وقت تقراه و كان عندك وقت تعمل بيست للكلام اللى كاتبه

الجواز و سنينه يقول...

شموا نشادر
اسامه امين
ضحكنى تعليقك جداا
فهلا 4الناس دى شموع عايزه الحرق
قصدى تحترق
ربنا يهدينا جميعا

الجواز و سنينه يقول...

دارش
و الله يابنى انا صعب عليه اللى حصل لصناع الفيلم الامريكى صاحب اول بوسه ده
طيب حد سمع عن حاجه حصلت عندنا
مظنش
و لو حصل بيكون من قبيل الفرقعه
نورت يا درش

الجواز و سنينه يقول...

صيدلانيه طالعه نازله
انتى كمان وحشانى و الله بس الاولاد ما انتى عارفه

الجواز و سنينه يقول...

د هيما
اللى خلاها مشروعه انها بتحصل و ماحدش بيتدخل
لو واحد باس واحده فى الشارع بيسمى فى القانون فعل فاضح فى الطريق العام
و يتاخدوا على القسم و عينك ما تشوف إلا النور
لكن دول ماحدش بيكلمهم
عرفت ايه اللى خلاها مشروعه

الجواز و سنينه يقول...

شفقة هانم واحسان بك
خلاص بدام هيه دى الاجابه و همه مصدرين الطارشه
و اقنعوا نفسهم انهم همه الصح و احنا الغلط فخلاص يشربوا بس بيقوا يستحملوا عذاب ربنا
مرسى لسؤالك الغالى بس و الله انا صعب تواجدى بسبب الاولاد
بس بجد اسعدنى سؤالك

الجواز و سنينه يقول...

اسراء احمد
طلعنا فلاحين و بنفكر بتفكير الصعايده
هههههههههههههههههههه
ضحكتينى ضوحك
هههههههههههههههه
الحمد لله على دى نعمه يا شيخه

الجواز و سنينه يقول...

ساره
فعلا ليه التفرقه دى
ليه بيلموا الناس و دول لاء
هى دى القضيه
؟؟؟؟؟؟؟؟؟؟؟؟؟؟؟؟؟؟؟؟؟

Miss. Sosa يقول...

هى ملحوظة قوية ووجهة نظر ثاقبة

بس بصراحة ماعدتش عليه لاني ماليش في التلفزيون ولا العربي والاجنبي اللي بتفرج عليه بتكون ناس مش طايقة بعض ونازلين ضرب في بعض لاما افلام الخيال العلمي والهلاوس النفسية والرعب والناس ديه مش فاضية للكلام ده خالص بيبقى طول الفيلم صريخ لاما صمت الرعب ده

المهم بقى انا رأي ان الطيور علي اشكالها تقع
يعني الست ديه بتبقى متجوزة واحد من نفس الشاكلة ماعلينا مش هطول علشان مش نخوض في سيرة الناس

ربنا يعفو عنا ويغفر لنا

الجواز و سنينه يقول...

مس سوسا
احلى سوسا و الله
الحمد لله انك ما عدتش عليكى الحاجات دى
بس عايزه اقولك ان الفيلم اللى اتفرجت عليه كان قمه فى النكد
بتاع هانى سلامه و منه شلبى اللى كان فيه عامل مريض بالكانسر
و عمرى ما اتفرجت عليه من كتر النكد اللى فيه
بس نصيبى بقى سبت التليفزيون يوش و كنت بأكل العيال و كان اللى كان
و الفكره كانت من هنا
يعنى حتى النكد زرعوا فيه الهبل

غير معرف يقول...

مساء الفل عالجميع

سؤال بسيط ...
ليه فى افلام زمان الابيض واسود ايام فاتن وشادية وكمال الشناوى وشكرى سرحان الخ الخ مكناش بنشعر باحراج وكسوف لما البطل يبوس البطلة ؟؟

انا شخصيا حاليا واسمى متجوزة اهو لما بتفرج على فيلم وفيه بوس كدا بانكسف واقوم العيال يا اقلب المحطة بس لو فيلم ابيض واسود بيعدى الامر عادى حتى ولادى مش بيعلقوا نهائى عالامر ؟؟

ياترى العيب فى ايه تمثيل ولا اخراج ولا ايه بالظبط

غير معرف يقول...

ياااااااه أخيرا لقت حد زيي (متخلف ومتعصب)...داحنا الظاهر بننقرض من البلد دي وبقينا متعصبين فعلا

تخيلي ممثلة من دول اللي بتحكي عنهم يكونجوزها هو المخرج لنفس المشهد ده؟

وتخيلي ممثلة بدون ذكر أسماء تقول أنا جوزي وأولادي فخورين بدوري في الفيلم الأخير! طبعا الفلم كان عبارة عن شوية مناظر متركب عليهم قصة...!

زي ما حد قال في الكومنتات الرجالة ماتو في الحرب ...بس سؤال بجد
هما كمان البنات اللي عندهم دم ماتو هما كمان في الحرب؟

زيارتي الأولى لك بس اعتقد اني هارجع تاني ، وعد :)

شكرا
معتز

http://mezoderm.blogspot.com/