الأحد، 13 أبريل 2008

نقارهم و لا خلو دارهم



المثل ده سمعته من وقت قريب فى التليفزيون
و عجبنى اوى اوى اوى
علشان فعلا الناس بقت ما عندهاش تمسك بالجواز مش عارفه ليه ؟
حوليا كتير اوى بيشتكوا من الجواز و سنينهع و ناس بيتهيألها ان الطلاق ده سهل جدا
و الغريب ان الناس اللى حوليهم تلاقيهم بيملوا دماغهم بحاجات غريبه زى
سبيه و انا اجوزك سيد سيده او سيبها و انا اجوزك ست ستها
طيب تعرفوا انا اعرف اتنين اتطلقوا و كل واحد منهم اتجوز و بعد كده كل منها طلق و اتطلق و رجعوا لبعض
طيب بالذمه مش حاجه تفقع ؟؟؟ طيب ما كان من الاول
و لا كل واحد مهم كان مع التانى بس ما حسوش بقيمه بعض إلا لما بعدوا عن بعض
طيب فين ست ستها و سيد سيده ؟؟؟
فيه مقوله بتقول ان محدش بيعرف قيمه الحاجه إلا لما بتبعد عنه
و دايما اصعب سنه هيها اول سنه فى الجواز و بتختلف على حسب تغير الاشخاص
بس دايما افتكروا
نقارهم و لا خلو دارهم
و دمتم سالمين

هناك 41 تعليقًا:

بطوط حبوب يقول...

هههههههههههههههههه
حلو المثل اوى

عروسة ننوسة يقول...

والله معاكى حق دايما الواحد ما بيحسش بالحاجة الا لما تضيع منه...تحياتى البلوج بتاعك تحفة

Esraa Hamed يقول...

جميلة اويييييييي مدونتك بجد

و فعلا ناس كتير مش بتقدر قيمة الحاجة الا لما تضيع منها
و ناس كتيييييييير مش بتقدر قيمة الحاجة الا لو تعبت عشان توصلها

مبسوطة بجد اني لقيت مدونتك و ان شاء الله هتلاقيني هنا كتير

عــلاء ســالـــم يقول...

السلام عليكم

فعلاً والله المثل واقعي جداً وكلامك صح
بس لو كان الإختلاف جوهري يبقى الوضع مختلف .
ولو الإختلاف جوهري يبقى غلط منهم إنهم يكملوا الخطوبه أصلاً ويوصلوا للزواج .
..........
و دايما اصعب سنه هيه اصعب سنه فى الجواز

أظنك تقصدي أول سنه في الجواز .

خالص تحياتي

admelmasry يقول...

ياريت الكل يسمع ويتعظ بجد
.
.
تحياتي والسلام

صيدلانيه طالعه نازله يقول...

فعلا اول سنه هي الاصعب لانها سنه اسقاط الاقنعه و ظهور الحقائق و اعتقد ان المثل صحيح

FaceMoon يقول...

معاكى حق فى كل حاجة والمثل صحيح جدا اوى خالص
ليكى عندى تاج تعالى خدية اوعى تتأخرى

Mafrousa يقول...

بصى همه بيقولو ان الجواز بيمر بسنين صعبه ..اول سنه و خامس سنه و سابع سنه و عاشر سنه .. و بعدين خلاص
الصراحه بقى هى اول سنه هى بتبقى صعبه شويه لان كل واحد بيشوف التانى من غير قناع على طبيعته على راى صيدلينيه طالعه نازله...و اول سنه ديه هيه الفيصل ..ياتكبرى دماغك على حاجات بقى و تخلى الحياه تمشى ..ياتفضلى تقاوحى على تغيير اللى انتى شوفتيه اول سنه.. و تفضل حياتك فى نقار مستمر

lonely يقول...

السلام عليكم
أول زيارة ليا للمدونة
أنا فعلا اعرف ناس جيراننا الحياة بينهم شبه مستحيله بس مش عايزين يتطلقوا علشان المسمى
مايبقاش اسمه مطلق ولا هى اسمها مطلقه
وعايشين مع بعض علشان الاولاد وعلشان ضل راجل ولا ضل حيطه
ونقارهم ولا خلو دارهم
بحييكى على البوست

المـــفـــــــقــــــــوعـــــة مــرارتـهــا يقول...

عندك حق
عشان كدة انا أنصح كل اتنين متجوزين ياخدو أجازة من بعض كل شوية
جايز الزهق هو المسبب للحالة دي

تحياتي

د/اجدع بنوته يقول...

نقارهم ولا خلو دارهم

ههههههههههههههههههههههه

حلو اوى المثل ده

موناليزا يقول...

عاجبنى جدا المثل ده لان مهما كانت اسباب النقار ده مش مبرر للطلاق ده حتى النقار دليل المحبة

الجواز و سنينه يقول...

بطوط حبوب
نورت البلوجر يا باشا
و الحمد لله ان المثل عجبك اوى كده و يارب تعمل بيه

الجواز و سنينه يقول...

جنه
اسعدنى جدا رأيك فى البلوجر بتاعتى
و اكيد ده من زوقك العالى

الجواز و سنينه يقول...

اسراء احمد
كده بقى انا هاتغر بجد
جنه و انتى وراها كده كتير يا ناس و الله
عجبنى اوكى االجمله اللى انتى كتبتيها دى " و ناس كتيييييييير مش بتقدر قيمة الحاجة الا لو تعبت عشان توصلها
"
تكمله جميله منك يا عسل
نورتينى و اكيد هاتنورينى دايما بوجودك

الجواز و سنينه يقول...

علاء سالم يقول...

نورتنى طبعا و ده اكيد
و فهعلا انا كنت اقصد اللى انت كتبته و صلحته فى المدونه و شكرا على لفت نظرى
اما بخصوص الاختلاف الجوهرى فأنا ليه وجهه نظر هابقى اكتبها ان شاء الله فى بوست لوحده و اتمنى انك تبقى تشوفه
نورت يا فندم

الجواز و سنينه يقول...

ادم المصري

و الله يا ادم انا نفسى كل الناس تسمع
نورتنى يا فندم

الجواز و سنينه يقول...

صيدلانيه طالعه نازله

و الله يا د/ علا انا ما مش بحب حكايه الاقنعه دى اللى الناس بتتخض منها
دا انا ليه حتته دين وجهه نظر فزززيعه
هابقى برضوا اكتبها فى بوست لوحدها
و انتى دايما منورانى يا جميل

الجواز و سنينه يقول...

FaceMoon يقول...

و الله مش عايزه اقولك التاج ده اسعدنى اد ايه و الله فعلا انبستط بجد جدا
هارد عليه ان شاء الله بس التأخير غصب عنى و الله

الجواز و سنينه يقول...

واحدة مفروسة
عارفه كلامك ده فكرنى بحاجه غريبه
ممكن الولد و البنت يفضلوا يحبوا بعض 10 سنين من غير اى انتكاسات بس الجواز مش بس حب و بس
ده مسؤليه اكتر منه
مش موافقه على حكايه السنوات غير السنه الاولى
بس هافكر فى حاكيه ان الواحد يقعد يناقر فى اللى شافه فى السنه الاولى

الجواز و سنينه يقول...

fatma
بما انها اول زياره فعايزه اقولك انك اكيد نورتينى و انا اقول البرفان الجميل ده من مين ؟؟ههههههههه
و عايزه اقولك حكايه عن الناس اللى مش بيحبوا يتطلقوا دول
عارفه لو دخلتى جواهم هاتلاقيهم ما يقدروش يعيشوا من غير بعض
بس فيه مشكله ناس كتير بتقع فيها انها بتوصل الامور لمرحله اللا رجعه
و اللا تفاهم و لما الامور توصل لكده حتى لو بيحبوا بعض مش هايقدروا يتفاهموا

الجواز و سنينه يقول...

مفقوعة مرارتي من حماتــــــــــــي
انا انصحهم بقى انهم يتجوزوا و كل واحد يعيش مع اهله اول سنه و بعد كده يروحوا بيتهم هههههه
لاء المشكله ان كل واحد داخل يتجوز و فى دماغه شويه تراب لازم يتشال منه ادبحلها القطه و جوزك على ما تعوديه
تفتكرى لما يكون ده الموروث الثقافى بتاعنا الزوجين يعملوا ايه ؟
دول داخلين و همه مجهزين الاسلحه اصلا

الجواز و سنينه يقول...

د/اجدع بنوته
نورتينى يا دكتوره و يلا ادينى بديكى العلم اللى تنتفعى بيع لما تتجوزى ان شاء الله

الجواز و سنينه يقول...

monaliza

بالظبط ده حتى الفلفل و الشطه
كفايه انه بعد النقار تلاقى الدنيا صفيت و كل واحد عايز يعوض التانى عن الزعل اللى بنهم
نورتينى يا جميل

دكتور بهــدوء يقول...

هيه دي فايده الخطوبه

وطالما عدت واتهببوا اتجوزوا
يعرفوا انهم بقوا اسره
وبينهم باط مش سهل ابدا يتفك
وماينفعش ابدا اللي بينهم يطلع بره بسهوله
الا اذا كان الحل الوحيد
عشان يصلحوا بنهم
مش يخربوها

mostafa rayan يقول...

عارفة ايه المشكلة انم بيدو ودانهم للناس اللي بتحب تهدي النفوس
وما اكترهم ف يمجتمعنا
ياريت الناس دي تهدي شوية وياريت المتجوزين اسرارهم ماتخرجش برة حجرة نومهم دة هو الحل الوحيد

- لوسمحتي ممكن تشيلي تأكيد الكلمة

لـــى لــــىِ يقول...

احنا عاوزين نعمل حاجه اسمها اجازة زواج

يعنى الزوج والزوجة يبعدوا عن بعض شوية

هو بقى يروح يقعد فى مكان كده زى الشاطر
عند اهله او يقعد فى فندق ولا بنسيون اهو يتصرف

طبعا الست متقدرش تسيب البيت علشان الاولاد

ولما يبعدوا عن بعض ويبقى بس فيه تليفونات
يتطمن عليها وعلي الاولاد
هى تحس بالتغيير وتحس اكتر بوجوده واهميته
وهو كمان يحس باهميتها ووجودها والاشتياق ليها

وبكده الملل والروتين والخرس الزوجى والحركات دى كلها
يبقى ملاهاش مكان

بس ده مش بيحصل فى مصر
الزوج المصرى مش بيعترف بالكلام ده
كل اللى يقوله
وانا ايه اللى يخلينى اروح اقعد فى مكان لوحدى
ولا عند اهلى ويقعدوا يقولوا لى تعالى نصالحكم
اصلهم مش هايفهموا يعنى ايه اجازة زوجية

صباح الملل الزوجى

ههههههههه

سلاماتى

Gannah يقول...

الله يطمنك اول مرة حد يقول حاجة حلوة فى الجواز و سنينه بس بصراحة اكيد فى رجالة يتفات لهم بلاد و لا ايه بس ربنا يبعدنا عنهم
موضوعاتك ظريفة و تقبلى تحياتى و دعوتى لك للزيارة

الجواز و سنينه يقول...

دكتور بهــدوء

ايه الهدوء ده يا دكتور
اتهببوا حته واحده هههههههههههه
و الله انت حكايه
و فعلا اللى بنهم ما يطلعش براه و لا بسهوله و لا بصعوبه عمر ما الناس بتحل حاجه حتى لو حلت كفايه انك كل ما تشوفهم تفتكر حكايتك او همه يفكروك او تلاقة الكلام من وراك ايه زى الرز ابوا خمسه جنيه

الجواز و سنينه يقول...

mostafarayan

فعلا المشكله فى الودان و ايه الواحد هايلاقى مليون فم تزن جواها بس دول مش بيعملوا كده إلا لما الناس بتجيهم الفرصه انهم يزنوا
شلت التأكيد يا فندم و نورتنى

الجواز و سنينه يقول...

لـى لـى
مساء الدماغ الرايقه
اجازه و بنسيون
طبعا الراجل ايه اللى يخليه يعمل كده
ده يبقى عبيط حتى لو عمل كده
و ازاى هيه تقدر تخليه يبات بعيد عنها
طبعا لاء و الف لاء
مش مطلوب من الزوجين انهم يقعدوا ماسكين ادين بعض و يحبوا فى بعض طول الانهار و إلا يبقوا اتجننوا
بس برضوا ما يسكتوش و كل واحد فى حاله
اكيد فيه حل تانى غير الاجازه

الجواز و سنينه يقول...

Gannah
كمان فيه ستات يتفاتلهم مليون بلد
و بعدين الجواز فيه حاجات كتير حلوه بس احنا اللى مش عارفين نطبقه صح
نورتينى و المدونه بتاعتك جميله زيك

صبرني يارب يقول...

بصي يا جميل النقار مطلوب مش عمال على بطال والا يبقى عاملين زي الى بنقو بكره النكد بكره

وحكايةان فى سنين صعبه وسنين سهله دي لا اعتقد فيها اوي
لكن تقدري تقولي ان السنه الاولى من الزواج بتكون زي حط النقط على الحروف لا لا مش بتاعة بوسي سمير .

واختلف مع مفروسه فىحكاية الاقنعه دي
لان اصلا المفروض ما يكونش فى اقنعه خالص انما ان وجدت هاتسقط تدريجيا مع الجواز .

انما وضع النقط الحروف بمعنى انشاء دستور للحياه والتعامل بين الشخصين قد يكون دستور صريح ومباشر (زي مثلا ما تعمليش كده تانى او ما تعملش كذا تاني ) وقد يكون دستور مستتر وضمني بحيث ان كل واحد بيعرف ازاي يتعامل مع الطرف التاني ويحط ملامح واضحه للمعامله والمعيشه بينهم .

اما الناس الى مش عاجبها الجواز وسنينه فده صنع اديهم يقدروا يغيروه او حتى يصلحوه .
وقريت كتير فى المدونه بتاعتك مدونه حلوه تسلم اديكى

غني يابهيه يقول...

اول زياره

هو فعلا دايما الواحد ما بيحسش بالحاجه الا لما تبعد عنه

امل يقول...

هوه لو كل واحد يجرب يفوت للتاني وما يقفلوش ع الواحده اكيد الحياة هتبقى ابسط وكمان اغلب المشاكل بيبقى سببها تدخل الاخرين يحرضوا كل واحد على التاني وبعدين يعملوا نفسهم عايزين يصلحوا
ربنا يهدينا جميعا
مدونتك جميلة

بنت مصريه يقول...

بالنسبه لسيبيه وسيبها دى
هو دلوقتى عامه محدش لاقى يتجوز اصلا عشان يسيب ويتجوز تانى
والحاجه التانيه فعلا اول سنه بتبقى ارخم سنه ف حياه الازواج يعنى كل ولحد فيهم بيتعود عالحياه الجديده البيت الجديد
بيشوف البدع من التانى والحاجات اللى عمره ما شفها ف الخطوبه تبتدى تظهر ف اول سنه كده يعنى
احييكى على مدونتك اتمنى تنورينى

ليكوريكا يقول...

بس دايما افتكروا
نقارهم و لا خلو دارهم

-----------------------------

ايه الامثال الجميله دي

لا بجد

(خدوا الحكمه من افواه المتزوججين :) )

Tamer Nabil Moussa يقول...

قيمه الحاجه إلا لما بتبعد عنه

بجد كلام صحيح


وبعدين مفيش حياة بدون مشاكل

وبدل ما يهرب الاثنين من بعض

يقف كلاهما مع بعض عشان يحلوا المشكلة..


ربنا يوفقك

تحياتى

Miss. Sosa يقول...

ست ستها راحت السيما وسيد سيده مقضيها كليبات مش محتاج يتجوز
اسلوبك سهل ومختصر وبسيط وده سر جماله
اسمحيلي بالعودة مرات لمدونتك

Darsh يقول...

ههههههههههههه

ضل راجل و لا ضل حيطة

لأ طبعاً

انا مختلف معاكي من البداية اسمحيلي

الغلطة كانت لما اتجوزوا

و المفروض لو هما مش مستريحين مع بعض ... يعني شخصياتهم مش متماشية مع بعض ... مش بيتخانقوا على مين يغسل المواعين لو ما عندهمش دش ووشر ... أو بيتخانقوا على مين اللي يرد على التليفون ...

لو بيتخانقوا على حاجات نتيجة في اختلاف العادات و التقاليد و فروق في الشخصية يبقى ينفصلوا قبل ما العيال يشرفوا و ساعتها هيبقى فيه ضحايا و حريمة و محاكم و عرض على النيابة و بهدلة

انا مش مع الاستمرار في الحلالات اللي زي دي

عروسة ننوسة يقول...

اولا اخبارك ايه وحشتينى
ثانيا عايزانى اتعصر ذيك فى ايه وانا موافقة؟؟