الأحد، 4 يناير 2009

احنا اتضحك علينـــــــــا



بعد غياب طويل اردته لنفسى

رجعت و اعتذر لعدم الرد على باقى الردود فى البوست اللى فات

و ده علشان اكتشفت منها انى لازم ارد رد عام على الكل و لانى كمان صعب تواجدى بكثره على النت

اكتشفت ايه بقى يا بنـــــــــــــــات

اكتشفت و لا نيوتن فى زمانه اننا اتضحك علينا

اكتشفت اننا بنقعد طول عمرنا مستنين فارس الاحلام و الحصان( رغم انى اعترض على الحصان متهيألى نستبدلها بعربيه بى ام او شبح او اى حاجه اسبور كده مع البعد كل البعد عن ال128 و العربيات الكحيانه مهو حلم بقى )

طلعت بره الموضوع ندخل تانى

اكتشفت اننا قعدنا نستنا و الرومانسيه هاتقتلنا و فى الاخر طلع نأبنا على كام شهر طالوا و لا قصروا فهمه كام شهر برضوا همه فتره الخطوبه و اول كام يوم جواز

و بعد كده بـــــــــــــــح على رأى بناتى

مش عايزه اقول ان الحياه بعد الجواز وحشه بالعكس هيه احسن كتير

بس احسبوها واحده قعدت تستنى كام سنه ؟؟؟ نقول من 17 إلى 27 علشان ده تقريبا السن اللى بيحصل فيه اغلب الزواج

يعنى تقريبا عشر سنين و فى الاخر تصفصف على كام شهر؟؟؟ده حتى يبقى ظلم

و علينا ان نتعايش مع ظروف الزمن بعد كده

و انك تستنى الاعياد يا حرام علشان يجيلك ب ورده او حتى تحسى بشويه رومانسيه

عارفه ان الرجاله وراهم مسؤليات كتير

بس الست زى الورده لازم تحسسها انها لسه ما دبلتش مهما كان سنها

و لازم ترويها كل شويه بشويه كلام مش هايكلف الرجاله كتير

بس مين يسمع

و دمتم سالمين

هناك 72 تعليقًا:

عاشقه وغلبانه يقول...

احنا اتضحك علينا ف يكل حاجه
لا حب نافع
ولا خطوبه نافعه
ولا جواز نافع
نطق نموت بقي ولا ايه النظام

غير معرف يقول...

ههههههههههههه والله نفسي واحدة متججوزة تقول غير كده ربنا يوعدنا وانضم للصفوف المضحوك عليه وعلى فكرة كلمة في سرك دي سنة الله في الكون التغيير ومافيش ثبات في شي على نحوثابت وكل سنة وانتي مضحوك عليكي " وش بيطلع لسانه"

حروف يقول...

ثالث تعليق احنا مضحوك عليا علينا في كل حاجة نعمل ايه بس الواحد بيتجوز وينسي الست اللي اتجوزها بيقول في سرةدية مراتي مش واحدة غريبة يعني
كل سنةن وانتي طيبة

أحمد (زوج مخنوق ). يقول...

يا ريت برضه الستات اللي بيتضايقوا يعرفوا ان الحاجات دي بتبقى رد فعل
يعني مش معقولة واحد هيدخل بيته يلاقي مراته قاعدة رابطة امطة على دماغها و ريحتها توم و بصل ( من الاكل اللى عاملهوله عارف بس اهو اسمه توم و بصل ) و المفروض انه يخش يقولها وحشتينيو بحبك
انما لو واحدة بتفهم و جوزها دخل لقاها قاعدة لابسة حاجة نضيفة و شكلها مستحمي و الدنيا رايقة و حاطة بختين كولونيا سبع خمسات بالتاكيد هو بنفسه هيبقى نفسه يقولها كل حاجة حلوة
معلش يا ريت اللي معترض على كلامي كمان يقرا بريد الجمعة بتاع الاهرام بتاع الاسبوع اللى فات
الراجل قايل كلام زي الفل الصراحة

صيدلانيه طالعه نازله يقول...

لهو انتى لسه مكتشفه دلوقتى بس انك اتضحك عليكى ده انتى متأخره قوىىىىىىىىىىىىى
مين ده اللى فى العيد بيدخل على مراته بورده ده بيدخل بكيلو ملوحه فى العيد الصغير و حزمه برسيم عشان الخروف فى العيد الكبير
قلبك ابيض

Empress appy يقول...

كله بيقول ومحدش بيسمع للتانى يا حبيبتى خلاص انسى بقى فى الزمن ده

fanty يقول...

مش شايف ان أي رد ممكن يكون مفيد غير "ليه بتقولي احنا انضحك علينا مع العلم ان العنوان كان ممكن يكون احنا كنا فاهمين الحياة بعد سن المراهقة غلط"

يا ريت بس الناس متبصش للأمور من ناحية واحدة، عشان ممكن يكون في حاجات تانيه كتير صح الناحية التانية أصح...

دمتم سالمين و أسعد الله الناس جميعا...

مطلق يقول...

هههههههههههههههههههههههه

طب يا ست الكل متسيبيه طالما اضحك عليكي

او لمونا كلنا و علقولنا الرمانه و ارمونه في البحر او ادونا حقن هوا

انتوا غلابه انكوا عايشين مع كائن خرافي متعطش للدماء

HAPPY يقول...

الرجاله عندهم رأى هيقولولك امال انا بشتغل لمين وبتعب لمين ؟؟ ده كله تعبير عن الحب من وجهة نطرهم..
المفروض اللى يحب حد يحبه بالطريقه اللى الطرف التانى عايزها عشان يحس بالحب ده..

غير معرف يقول...

how can you write a so cool blog,i am watting your new post in the future!

الجواز و سنينه يقول...

عاشقه وغلبانه
و الله احنا ممكن ما يتضحكش علينا اوى
لو كل واحد شاف احتياجات التانى اكيد الحياه هاتكون احسن
مع البعد كل البعد عن الانانيه و انى اشوف احتياجاتى بدون مراعاه احتياجات الاخر
ساعتها الحب و الخطوبه و الجواز هايكون احسن

الجواز و سنينه يقول...

قلب ينبض بالحب

ههههههههه و الله ابقى مفتريه لو قلتلك انى مضحوك عليه اوى
مضحوك عليه نص نص
اكيد فيه حاجات فى الجواز احسن من الغزل و الورد
بس برضو الغزل و الورد مطلوب
و عقبال ما ما يتضحكش عليكى و يكون بيقرأ المدونه عندى و يتعلم حاجه

الجواز و سنينه يقول...

حروف (دلو مرة ثانية وجرح ثاني سابقا)
ش عايزه نطلع احنا الملاك البريئ
المفروض كل واحد يبدأ بنفسه
بس مافيش مانع لو هو حس انها محتاجه كلمه حلوه يوقولها و العكس لو هو محتاج كلمه حلوه تقولها
يعنى كل واحد يراعى التانى
و على الرجل مراعاه الانثى
كما قال رسول الله " رفقا بالقوارير "
لاننا سهل اوى ننكسر
نورتينى يا قمر

الجواز و سنينه يقول...

أحمد (زوج مخنوق سابقا )
مش عايزه اعترض على كلامك لمجرد الاعتراض
بس عايزه اقولك
ليه لما الراجل مراته تطلب منه كلمه حلوه و تقوله انت ليه مش بتقول امال انا بتعب و بشقى علشان مين ؟؟؟ مش ده برضوا حب؟؟؟
هيه برضوا بتطبخ لمين؟؟؟ مش ده برضوا حب ؟؟؟ و حتى لو هو متضايق من كده ليه ما يقولهاش بسهوله البرفان اللى بتحطيه ده بيعجبنى خصوصا و انتى لابسه الطقم الفلانى ؟؟؟ تفتكر لو هو عمل كده هيه مش هاتعمل اللى هو عايزه
و يمكن تستمر عليه على طول لو هو بس بيبدى شويه اهتمام بيها
و بعدين ليه كل واحد مستنى من التانى انه يبدأ
يعنى هو مستنى انها تكون قمر مستنياه و هيه مستنياه يقول كلمه حلوه ؟
متهيألى كل واحد يبدأ بنفسه
يعنى اللى مش بيقول كلام حلو يقول
و اللى مش بخه تبخ و تشوف النتيحه و اللى مش عاجبه حاجه لو لمح بيها للتانى فيكون من الذكاء بحيث يغيرها لحياه سعيده مستمر و نكف عن التذمر بدون فعل و نكتفى بتعليق الغلط على الطرف لتانى بدون ان نحاول تصحيح الخطأ

الجواز و سنينه يقول...

صيدلانيه طالعه نازله
اولا وحشتينى اوى يا قمر فين الغيبه دى كلها؟؟
و بعدين انا بيتضحك عليه بمزاجى ما انتى عارفه
ههههههههههه
و بعدين جريتى نفسى على الملوحه امتى ييجى العيد بقى بلا ورد بلا بتاع مالها الملوحه على الاقل تشبعنا
ههههههههههه

الجواز و سنينه يقول...

~*§¦§ Appy §¦§*~ يقول...
كله بيقول ومحدش بيسمع للتانى يا حبيبتى خلاص انسى بقى فى الزمن ده

حطيتى ايدك على الجرح
كله ما بيسمعش التانى
مش هانسى و هافضل وراهم

الجواز و سنينه يقول...

Akram
عنوان الموضوع صح جدااااا
و احنا مش فاهمين الحياه غلط
و لا مش الاحتياج لكلمه حلوه مراهقه
و بعدين انت ما وضحتش ايه اللى الناحيه التانيه اللى ممكن يكون اصح ؟

و و بعدين الرجاله لو قلتلهم محتاجه كلمه حلوه يقولك امال انا بتعب لمين اكأنها هيه اللى قاعده و حاطه رجل على رجل مهى مطحونه فى البيت
و بعدين ايه اللى اتغير مهى هيه دى اللى قبل الجواز كان هاريها ...... ماحدش يفهم غلط
هاريها كلام حلو هههههههههه
ايه اللى اتغير بقى انها بقت معاه؟؟؟ مهى برضوا نفس الانسانه اللى نفسها تسمع كلام حلو امال هاتسمعه من مين بس؟
اوعى تهمل انوثه المرأه لانها تلجأ لأحد حلين 1- ان تتهمل فسها لانه مش مهتم
2- تسمع بره ؟؟؟؟؟؟؟
و بعدين مش كل حاجه مش شايفينا مش موجوده الهوا موجود و انت مش شايفه
و مش معنى انك مش محتاج للرومانسيه ان الطرف التانى مش محتاجها
المفروض ترضيه باللى هو محتاجه مش اللى انت شايفه صح
شكلك ولد وحيد يا اكرم
ههههههههههههه
نورتنى كالعاده و طولت الغيبه
اتجوزت و لا ايه؟

الجواز و سنينه يقول...

kareem
تفكتر يعنى احنا ما فكرناش فى اللى انت بتقول عليه ده؟؟؟
ههههههههههههههههههههه
الهدف من البوست ان الراجل يعرف احتياجات المرأه زى ما هيه كمان المفروض تعرف احتياجاته
و بعدين و لا كائن خرافى و لا حاجه بالعكس نبقى مفتريين لو قلنا كده فى الاخر محدش منا ينفع من غير التانى

الجواز و سنينه يقول...

هابى
هيه برضوا بتغسل و تطبغ و تذاكر للعيال و تنظف البيت كل ده حب
بس مش هاقضيها حب فى الصمت

"المفروض اللى يحب حد يحبه بالطريقه اللى الطرف التانى عايزها عشان يحس بالحب ده..
"
عجبتنى و كيفتنى اوى الجمله دى

الجواز و سنينه يقول...

nike shoes

thank u see u

حاسوباتيه يقول...

ربنا يبشرك بالخير والله انا كلها كام شهر واجوز شكلي هغير رايي يلا معلش الجواز شر لابد منه

بنت الغربة يقول...

صباح الخير
انت لسه عارفه انه اضحك عليك؟؟؟؟
انا يابنتى وصلى الموضوع ده مع اول عيل جبته
وحسيت انى رقم 3 فى البيت طبعا بعد الباشا وابنه
وبعدين جبت الاتنين التانيين
وحسيت انى مش موجوده اصلا فى البيت خالص
والكلام الحلو بقى معدوم نهائى
وكل الكلام عن العيال وراحة سيادته الكريمه
ودايما لما يجيب حاجه فى البيت للعيال يعمل حسابه وينسانى تماما
كان وظيفتى فى الحياة انتهت بالنسبه له - هو الواحد اتخنق من شويه
احنا اخدنا اكبر خازوق ياحبيبتى مش انضحك علينا
تحياتى وابقى زورينى

حروف يقول...

معاكي حق بس لية لما تكلمي راجل وتقولية كلمة حلوةيتكلم ويقول الريحة البصل والتوم لية ميديش قبل مياخد لية ميقولش الكلمة الحلوة اللي نفسها فيه وفي ساعةالصفا يقولها علي البرفان واللبس والاستقبال الذي يليق بلفاتحين وزيماهو عايزولا ايه رئيك؟؟؟؟؟؟؟؟؟

غير معرف يقول...

و الله الغلطه غلطتنا احنا يا استاذه
مالها ايام العذوبيه
المفرووض كان الواحد اتمسك بيها حتى اخر نفس ف حياته
بدل المروستان اللى احنا عاشين فيه ده
الصراحه انتوا مش بتدونا فرصه نقول كلمه حلوةلانمن ساعه ما بخش البيت لاصوت يعلو فوق صريخ العيال و امهم
لا مجال لاى حوار احنا عايشين ف حلقه سبق للعيال و امهم مين اللى هايسبق نفسي اعرف
او حلبه مصارعه
اوعدك انى اشدها منها و اديها ورده

ريهام العربي يقول...

ههههههههههههههههههههه

الله يبشرك بالخير

والله انا بحلم كتير بالرومانسيه وفارس الاحلام ومحدش من اللي اعرفهم طمني بكلمه تريح القلب

هو انا تقريبا كده هقلب علي انسانه معقده وخايفه من الجواز

قريباً ان شاااء الله :(


طيب بجد الموضوع ده ملوش حل ؟؟
ولا احنا النساء لازم نرضي بقضاء الله وقدره

MaNoOoSh يقول...

أنا لسة منضحكش عليا الحمد لله,
على فكرة الرومانسية دى لو الراجل عرف انها بتأسر قلب مراته وبتخليها تحس باجمل احاسيس فى الدنيا معاه كان هراها كلام جميل وتصرفات رومانسية رقيقة, وفيها اية يعنى حتى لو رجع لقاها ريحتها بص وتوم وساعدها باى شكل فى البيت وجالها بصنعة لطافة يقولها ياسلام لو اشوف عليكى الطقم الفلانى او تحطى من البرفان الفلانى والله ساعتها هتتمنى تسعده وتسر نظره.
اى علاقة فى الدنيا لازمها الرومانسية علشان متموتش بالبطىء والرومانسية محتاجة شوية مجهود من الطرفين مش اكتر.

zainab يقول...

يا عينى عليكى

ماتزعليش

يعنى معنى كده ماحلمش كتير

انا مش عارفه ليه كده يعنى هيخش عليهم حاجه دول كلمتين ولا حتى كلمه

ربنا يهديهم

تحياتى

Kiara يقول...

ميييييييييييييين يسمع

وحشاني والله

ومش تتاخري تاني

غير معرف يقول...

سلام عليكم الأول
طبعا مهم ان الراجل يقول لمراته كلام حلو
وهي بردوالمفروض تقوله كلام حلو
اه والله الراجل بيحب بردو يسمع كلام حلو من مراته
لأنه ممكن يسمعه بره على فكرة
كمان الست لازم تخلي بالها من نفسها مايجراش حاجة بعد ما تخلص شغل البيت تغير هدومها وتغسل وشها وتسرح شعرها
دي حتى شكلها هيبقي احلي
انا بس عايزاقولك حاجة ليه الست بتهتم بنفسها قوي قوي وهي خارجة بره رغم ان برة ناس اغراب مايهمهاش في حاجةومش بتهتم بنفسها وهي جوة اليبت رغم ان اللي جوة دة جوزها ومهم قوي تكون حلوة قدامه
لازم كل من الطرفين يهتمو بنفسهم جوة البيت لآن دةبياثر قووي في معنويات الطرف الأخر
ارجو انك تتقبلي رايي
وتحياتي ليكي
وحمدلله على السلامة يا ستي

rovy يقول...

الله عليكى بجد كلامك حلو قوى
فعلا لو كل رجل فهم كويس قوى الجمله دى الست زى الورده محتاجه تسقيها بالكلام الحلو علشان تعيش و ما تذبلش
اكيد كانوا زوجات كثير اصبحوا سعداء
معلش هى كمان الزوجه يعنى ساعات كثير بتأثر و بتنسى ان الرجل طفل صغير مهما كبر ومحتاج الكلام الحلو هو كمان
ربنا يسعد كل الازواج و الزوجات

خالص تحياتى

من غير عنـــوان يقول...

واحنا كمان

طبعا أنا عجوز على الكلام ده

ولكن يبقى

......الأمــــل

فينا
في ولادنا
في أحفادنا

وش بيضحك

على فكره الجواز زي البريدج أو التنس الزوجي.. لازم الأتنين بيعرفوا يلعبوا كويس..عشان يكسبوا...

ماحدش بيلعب لوحده

ولو تم توزيع الفرق بالقرعه
يبقى إنت وحظك...أو قدرك...

ممكن ما تكمليش اللعب ويا تلاقي زميل آخر في اللعب... يا إما تلعبي فردي
أو تقومي بدور الأتنين...

ده راجل أو ست على فكرة

أمنياتي


على فكره لازم الشباب يقروا كتير في مفهوم الرومانسية...

بنات و ولاد

لإن انتم فاهمينها غلط

Beram ElMasry يقول...

الفاضلة . الجواز و سنينه
اموت واعرف يعنى ايه رومانسية ، واعتقد انه مصطلح سياسى يقصد به اتهام الرجل بالتقصير ، وتمهيد الجو لاعطاء المراة حقوق اضافية فى غير مصلحة الزوج ، صح ولا مش صح
تحياتى

mahasen saber يقول...

يعنى احنا اتغشينا يعنى ولا ايه
هههههههههه
اصبرن اصبرن يا بنات الجيل
لعل وعسى ربنا يصلح الحال

نقول يا رب هههههههههه

romansy يقول...

بس بزمتك
الكلمه الحلوه اللى بتنقال فى الاعياد دى
مش بتبقى عيد تانى
غير العيد اصلا

الجواز و سنينه يقول...

حاسوباتيه
اولا الف مبروك يا سكر
و ربنا يتمم بخير
و الجواز مش شر و لا حاجه مادام الاتنين عارفين متطلبات بعض
و عندهم من الذكاء انهم يعيشوا حياه سعيده

الجواز و سنينه يقول...

بنت الغربه
و الله انا حاسه بيكى
انا على فكره عرفت العيب فين بسبب ردك ده
العيب فى ان الراجل بعد الجواز و مع الوقت مش بيشوف مراته
مش عارفه ليه
متهيألى لو واحد صاحبه عايش معاه كان اهتم اكتر
بس برضوا عندك انتى انك تخليه يشوفك
يعنى لو نسيكى فكريه
و كمان حسسيه بالذنب انه نسيكى و انه ازاى يعمل كده
مره مع التانيه مش هاينسى
جربى يمكن تنفع
تحياتى يا جميل و امنياتى بحياه سعيده

الجواز و سنينه يقول...

حروف
و الله انتى طبعا عندك حق
و ضحكتنى جداااااااا استقبال الفاتحين دى
متهيألى ان الرجاله بيحبوا يلاقوا سبب يعلقوا عليه تقصيرهم

الجواز و سنينه يقول...

biberss222
انا مستنياك لما توفى بوعدك و تشد المدام من الدوامه اللى انتوا فيها تقولى على النتيجه
وعد الحر دين خلى بالك
و جرب مش هاتخسر حاجه
عارف مره سمعت حوار لمحمود سعد كانت معاه دكتوره نفسيه و بيتكلموا عن موضوع الورد ده
قالتله لو انت روحت البيت و مالقتهاش هاتحس بأيه
قالها بس انا هاروح الاقيها
قالتله فرضا !!!!!
قالها هازعل طبعا
و والله سمعته فى حوار تانى بيقول للدكتوره انه فعلا حس اد ايه مراته مهمه و انه جابلها فى اليوم ده واد و ان الموضوع ده فرق فى حياتهم جداااا

الجواز و سنينه يقول...

ريهام العربى
يابنتى ما تتعقديش و لا حاجه و الله الجواز حلو
و فيه رجاله زى الفل
و ماحدش كامل فى الدنيا دى
بس حتى لو هو مش رومانسى ياستى علميه
و ربنا يبعتلك اللى تحلمى بيه و ابقى طمنينى على الورد ساعتها

الجواز و سنينه يقول...

مانوووووش
ردك يابنتى بيدل انك شخصيه جميله
عجبتنى اوى الجمله دى
اى علاقة فى الدنيا لازمها الرومانسية علشان متموتش بالبطىء والرومانسية محتاجة شوية مجهود من الطرفين مش اكتر
تسلم ادييكى و ربنا يديكى واحد سكر زيك كده

الجواز و سنينه يقول...

zainab elmosalamy
و الله يابنتى انا مش عارفه هايخس عليهم ايه
فيه منهم اللى ده طبعه و منهم اللى بيحس ان ده يبين ضعفه و منهم المعتدل و هو ده المطلوب

الجواز و سنينه يقول...

كيارا
يانتى انتى بتورينى كل مره بتيجى هنا
عامله ايه يا عثل
و اكيد ممكن حد يسمع او حتى يقرأ

الجواز و سنينه يقول...

مصطفى ريان
يانى انت اسلوب كتابتك اصلا بتدل انك انسان متربى و اكيد هاتقبل كلامك
اما عن حكايه ان الست بتهتم بره البيت و جوه لاء
فده علشان ان يمكن بره البيت بيهتموا اكتر من اللى جوه البيت
لو هو اهتم زيهم هاتهتمله و زياده 3 حبات و ده اللى انا بقول عليه
ما يسيبهاش تدبل
دايما يحسسها انها احلى نساء الارض
حتى لو هيه مش هيفاء بس هيه هاتحس انها كده
و ده هاينعكس على تصرفاتها ليه
مش عايزين اكتر من كده

الجواز و سنينه يقول...

روفى
و الله ياسكر ردك اسعدنى جداااااااا
و فعلا احنا ساعات بننسى
بس مهو هو هنا المشكله
حتى لو هيه نسيت انه طفل يفكرها ...يعلمها
و هيه كمان تلفت نظره
و عليهم انهم يكونوا من الذكاء بحيث كل واحد يراعى التانى زى ما هو محتاج

الجواز و سنينه يقول...

بدون عنوان
حضرتك ماحدش بيكبر على الاحتياج للرومانسيه
و اكيد فيه رجاله كمان اتضحك عليهم مش بنكر
و هو ده الهدف من الكلام ان كل واحد يفهم التانى
المرأ اتكلم عن احياجات المرأه و الراجل بتكلم عن احتياجاته
و بكده لو حد قرأ الكلام يمكن يطلع بنتيجه

الجواز و سنينه يقول...

Beram ElMasry يقول...
الفاضلة . الجواز و سنينه
اموت واعرف يعنى ايه رومانسية ، واعتقد انه مصطلح سياسى يقصد به اتهام الرجل بالتقصير ، وتمهيد الجو لاعطاء المراة حقوق اضافية فى غير مصلحة الزوج ، صح ولا مش صح
تحياتى

ههههههههههههههههه
هو فعلا مصطلح سياسى بس مش الهدق منه اضاقه حقوق للمرأه الهدف منه اعطاء حقوق للرجل على طريقه سلمنى و اسلمك
سلملنى كلام حلو اعطيك هدوء و راحه بال

الجواز و سنينه يقول...

mahasen saber يقول...
يعنى احنا اتغشينا يعنى ولا ايه
هههههههههه
اصبرن اصبرن يا بنات الجيل
لعل وعسى ربنا يصلح الحال

نقول يا رب هههههههههه

و الله يابنتى شكلها كده
هههههههههههههههه
يبقى الامل موجود برضوا مين عارف؟

الجواز و سنينه يقول...

رومانسى
طبعا الكلمه الحلوه بتكون احلى من العيد
دى حتى صدقه و تجوز على الغلبانه اللى فى البيت دى
ههههههههههههه

Unknown يقول...

السلام عليكم ورحمة الله وبركاتة
انا هقولك على وصفة سحرية تعمليها
اولا زى ما انتى عاوزاة يقولك قوليلوا
اول مرة هينفض مش مشكلة
تانى مرة هيكبر بردوا مش مشكلة بس عارفة بعد اسبوع وانتى كل يوم بتقوليلوا كلام حلو هتلقية اتكسف وقالك كلام حلو بردوا
ثانيا ودا الاهم
ادى ربنا كتيييييييييير يفتح بينك وبينة وعلى فكرة دا بجد مش هزار
وبعدين لما ييبقى كويس معاكى احمدى ربنا علشان ربنا يخلية كدا على طوووووووووووول
دمتى بالف ود يا جميل

Unknown يقول...
أزال المؤلف هذا التعليق.
الجواز و سنينه يقول...

حتى تشرق الشمس
يارب كل اللى يجرب النصيحه بتاعتك و تنفع يدخل يقولنا
انا مش بتكلم عن نفسى و بس
انا بتكلم عن حاله عامه

الجواز و سنينه يقول...

م/ الحسيني لزومي
يارب نعمل حاجه بقى

أميرة الجنة يقول...

صدقينى المتعة والحب فى كده ان الحياة مرة حلوة ومرة وحشة بس الشاطر اللى يخلى الاحلى من الوحش بس برده هاخد بالى قبل ما يضحك عليا.دمتى بخير

عاشقه الرومانسيه يقول...

نفسى مره واحده فى حياتى
لما واحده تكون متجوزه تتكلم عن الجواز كويس
كده حرااااااااام انا اتعقدت
بس برضه نفسى ينضحك عليا واتجوز
ههههههه
احنا بينضحك علينا بمزاجنا على فكره
ده طبع حوا
تحياتى على البوست الجميل ده

ادم المصرى يقول...

ههههههههههههههههههههههههههههههههههههههههههههههههه

ليه بس الشؤم ده لا الحمد لله انا سعيد جدا وبحب مراتى حبيبت قلبى جدا واتمنى مكنش زيكو هههههههههههههههههههههههههههههههههههههه
اهى اعدا جمبى بتتحك عليكو وشمتانا كمان
هههههههههههههههههههههههههههههههههههههههههههههههههههههههه

كدا بردو تدحكو الرجاله عليكو الجواز مفيش اجمل منو ولا احسن منو استقرار حنان كفايا انك بتلاقى الى يقولك يماما والى يقولك مالك زعلانه ليه ويطبطب عليكى والى يعيط عشان والى خايف عليكى ولى يدفيكى بليل ولو عيتى بتلاقيه جمبك كل دا والجواز والسنينو اتقو الله دا متاع الدنيا والاخره خير وابى اتمنى ليكم السعاده الدائمه ويصلح حلكو انا عارف انكو بتهظرو مستنى زيارتكم

هانى زينهم يقول...

اولا انا سعيد بالتعرف على المدونة التحفة دى وان كان الاسم "الجواز وسنينه " ناقصه كلمة " السودة" .
ثانيا بقى كام شهر ؟! ياه انتى متفائلة اوى ومحظوظة كمان . اجمل حاجة فى الجوز اللقب بس انا متجوز انا مدام كدة يعنى وان كان عيل ولا اتنين ودمتم . و مش عشان الناس هى اللى وحشة عشان احنا فاهمين الجواز غلط بس يلا ما اطولش عليكى اصل الموضوع شرحه يطول .

Unknown يقول...

لا مضحكش عليكم
بجد والله مش كل الرجالة زي بعضها أبدا
ربنا ييسر والي تكون من نصيبي تبقى مختلفة تماما عن آراء الكتير منكم وهخليها تقولكم بأه كام شهر ولا العمر كله
ربنا يكرمك ولو انك جيتي على الرجالة شوية مش كتير حاكم في ناس زي ما قلتي بالظبط
تحياتي

أحــوال الهـوي يقول...

بطلوا بقي
انتم اللي نكاديه
في عند الستات غباء اجتماعي ينكدوا علي الراجل من دول و تديله بوز و في الاخر هو برضه اللي غلطان
يا دوب يدخل من باب البيت و شريط النكد يبدأ
اخلع الجزمه بره الشقه انت بتقرا الجرنال
هو انت داخل فندق للنوم بس
بتبتكروا المشاكل و العكننه
نسيت عيد ميلادك و انت فكرتيني و جبت لك هديه بالشئ الفلاني
برضه كلام و نأرزه

سديتوا نفسنا و بتشتكوا

ستات صحيح جنس ال يا لطيف

ghorBty يقول...

السلام عليكم ورحمة الله وبركاته

انا مش عارفه اقول ايه هنا

يعني لسه لم اجرب اي شئ منهم بس بسمع الكلام اللي قلتيه من ناس كتير برضوه عندهم نفس الوضع

بس لو يفهموا بجد ان الزوجه بتكون محتاجه بس كلمه كويس كلمة شكر تشجعها وتقويها علي اللي هي فيه والا حتي الكلمة الكويسه بتكلفهم وزي ما بيقال

فليسعد النطق ان لم يسعد الحال

يعني مش قادر حتي تجيب ورده ضغيره كل فتره قلها ربنا يخليك لينا او اي كلمه كويسه

والا هما في النقد بس لسانهم بيطول

شكلي واضح اني متعقده من قبل ما اجرب بس اللي بسمعه والله كفايه يعقد امه مش انا بس

نسال الله ان تعود الموده والرحمه لبيوتنا من تاني

جزيت خيرا وربنا يصبرنا نحن نون النسوه


غربتي

موناليزا يقول...

الاعلام والموروثات البيئية هما السبب
بجد بقى ده تفكير الجميع دلؤتى (النص الاخر) وكأن الدنيا وقفت على كده خلاص

mohamed ghalia يقول...

أنا قولت أجى اسلم بعد عودتى من الإمتحانات
وبعدين فين المواضيع الجديدة؟
دمتى بكل الود
دمتى فى سعادة

فتــافيت (رحاب الخضري) يقول...

ربنا يكرمك.. ميرسي على الامل اللي رمتيه في وشي ده.. ومش عارفة اودية فين
بس والله عندك حق.. ستين حق كمان
بس تفتكري فيه حل تاني.. عارفة نفسي اخلف بيبي صغير جدا ونفسي يتقالي ماما
بس للاسف مافيش خلفة من غير جواز.. ياااااه لو كان فيه بنشطار.. كان زماني انشطرت من زمان وجبت حتة عيل
المشكلة كمان مش في الجواز نفسه عندي.. المشكلة اتجوز مين.. مافيش رجالة بجد دلوقتي الا نادرا جدا.. وللاسف ولا واحد من اللي اتقدموا يستحق اللقب ده
وكبير ذكر في خانة النوع في البطاقة.. حاجة تخلي الواحد يبقى عنده يأس مزمن
بوست جاااااااااامد بجد
واتمنى نبقى متواصلين
تحياااتي

الجواز و سنينه يقول...

اميره الجنه
اكيد ان لو الدنيا حلوه على طول مش هانحس بانها حلوه ...
بس فين الشاطر بقى اللى يساعدك على انها تفضل حلوه على طول
ربنا يوفقك و ما يتضحكش عليكى يا قمر

الجواز و سنينه يقول...

عاشقه الرومانسيه
يارب تتجوزى و ما يتضحكش عليكى
و فعلا احنا بيتضحك علينا بمزاجنا
و على فكره الجواز حلو بس التنفيذ هو اللى بيكون مش مظبوط
ادينى اتكلمت حلو اهه

الجواز و سنينه يقول...

ادم المصرى
و الله بستطنى ان فيه حد فاهم الجوز صح
علشان ده نادر
ربنا يسعدكم يارب

الجواز و سنينه يقول...

هانى زينهم
و الله حضرتك اول راجل يكون عادل فى حكمه
يعنى طلع عندى حق فى حكايه كام شهر دى
و على فكره الجواز و سنينه السوده حلوه برضوا
بس ممكن نفتحها شويه و نخليها سنينه الرمادى مثلا
علشان ما ابقاش مفتريه
نوردت المدونه و شكرا على رأيك لانه اسعدنى

الجواز و سنينه يقول...

كاتب مصرى
اكيد مش كل الرجاله زى بعض
ده حتى صوابعك مش زى بعض
و ربنا يسعدك انت و مراتك و اديك بتاخد خبره اهه

الجواز و سنينه يقول...

احوال الهوى
و عند الراجل اللى يوصل للست الاحاسيس دى غباء اجتماعى هو كمان
مش مطلوب من الطرفين غير مراعاه بعضهم البعض
و محدش يعكنن على التانى

الجواز و سنينه يقول...

غربتى
و الله يا بنتى انتى زى العثل
فعلا همه بيحكوا كتير اوى فى العكننه لكن فى الكلام الحلو بيسكتوا خالص
ربنا يهديهم و يهدينا و يجعل حظك حلو زيك كده

الجواز و سنينه يقول...

موناليزا
متهيألى فعلا ان الاعلام ليه دخل بالموضوع
بوظوا الدنيا منهم لله اللى بيعملوا كده
نورتينى يا جميل

الجواز و سنينه يقول...

محمد جلال
اسفرت و نورت يا باشا
اخبار الامتحانات ايه؟
المواضيع الجديده جايه ان شاء الله

الجواز و سنينه يقول...

فتافيت
ههههههههههههههه
عجبتنى اوى انشطار دى
و على فكره ساعه القضا بيعمى البصر زى ما بيقولوا
ربنا يجعل نصيبك حلو الولاد اللى زى الفل موجودين كتير و الله
بس انا بعمل اللى عليه و بفكرهم باللى عليهم
و اللى عليهم كتير الصراحه الشقه و الموبليا و الشبكه
و الله كتر خيرهم برضوا كمان هايقولوا كلام حلو؟؟